Yona​—So Ɛyɛ Apataa Ho Anansesɛm?

BIBLE kyerɛ sɛ apataa kɛse bi menee Yona na odii ne yam bɛyɛ nnansa. Wɔn a wɔkasa tia Bible bere nyinaa no akyerɛ sɛ asɛm yi di adanse sɛ anansesɛm wɔ Bible no mu.

So ɛsɛ sɛ obi yɛ atetekwaa anaa nea onnim nyansa na wagye Bible mu asɛm a ɛfa Yona ho no adi anaa? Sukuufo baasa bi a wonnuu mpanyin afe so rebɔ asɛm no ho nkɔmmɔ. Dɛn nti na mommma yɛnka wɔn hoa

Nancy: Yesuaa abonsu bo ade nnɛ wɔ adesua a ɛfa abɔde ho no mu, na Owura Dean bɔɔ Bible no akyi ankasa. Ɔkae sɛ ayɛsɛm a ɛfa Yona ne bonsu ho no ne apataa ho anansesɛm a ɛyɛ kɛse sen biara a wɔaka pɛn.

Ron: Ɔkaa nea enti a ɔte nka saa?

Nancy: Ɔkae sɛ abonsu nni nnipa nam; wodi biribi a wɔfrɛ no plankton, na ɛyɛ ketewaa. Enti abonsu fã kɛse ara nni menewa a ɛsõ a wɔde bɛmmene onipa. Afei de, minhu nea megye adi.

Brad: Enti dɛn? Migye Bible no di, nanso minnye Yona ho asɛm no nni. Me sɔfo kyerɛ mpo sɛ ɛyɛ ayɛsɛm bi ara kwa.

Nancy: Yiw, ɛhaw me. Me sɔfo se ɛsɛ sɛ yegye asɛm biara a ɛwɔ Bible mu di na yɛfa ne nyinaa sɛnea ɛte ankasa, na sɛ yɛanyɛ saa a na yɛnyɛ wɔn a wogye Bible no di sɛnea ɛfata. Nanso Owura Dean ma ɛyɛ den ankasa sɛ wubegye adi sɛ bonsu menee Yona.

So Bonsu Na Ɔmenee Yona?

Ron: Wunim, makenkan sɛ bonsu foforo bi wɔ hɔ a ebetumi aba sɛ ɔno na ɔmenee Yona​—bonsu kɛse no. Wɔkyerɛ sɛ ɔno ne bonsu biako pɛ a ne menem sõ a obetumi amene onipa.¹

Nancy: Ná minnim saa.

Ron: Abonsu akɛse no di nea ɛyɛ akɛse sen nea wɔfrɛ no plankton no. Nokwarem no, ɛte sɛ nea wɔpɛ nsum nam akɛse.² Wohui sɛ po mu nam kɛse a ɔte sɛ oboodede a ne tenten yɛ anammɔn 35 hyɛ bonsu kɛse bi yam!³

Nancy: Nanso Owura Dean kae sɛ sɛ anka bonsu betumi amene Yona mpo a, abonsu nni Mediterranea Po no mu, na ɛhɔ na wɔmenee Yona.

Ron: Ɛyɛ nokware sɛ abonsu ho yɛ nã wɔ Mediterranea po no mu, nanso wɔahu bonsu nnompe wɔ hɔ.⁴ Ɛwom, ɛnyɛ bonsu kɛse no nkutoo na ɔwɔ mu. Hwɛ, ma menkyerɛ wo wɔ Bible no mu.

Brad: Ei, Ron, bere nyinaa woasiesie wo ho?

Ron: Mebɔ mmɔden sɛ mɛyɛ saa. Afei ɛka wɔ Yona 1:17 (Twi Bible Foforo) sɛ: “Ná Yehowa asiesie apataa kɛse bi sɛ ɔmene Yona.”

Brad: Enti dɛn ne nsonsonee no?

Ron: Apataa betumi ayɛ po mu aboa kɛse biara, te sɛ oboodede.

So Na Ebetumi Ayɛ Oboodede?

Nancy: So aboodede akɛse bi wɔ hɔ a wobetumi amene onipa mũ nyinaa?

Ron: Oboodede fitaa kɛse no sõ paa. Ɛtɔ mmere bi a otumi nyin ma ne tenten du anammɔn 40.⁵ Bere a ɔnte sɛ bonsu kɛse a n’ani ntaa mmere no, wɔkyerɛ sɛ oboodede fitaa kɛse no ani so yɛ hyew na ɔhwehwɛ sɛ obedi biribiara a ohu.⁶

Brad: Sɛ nhwɛso no?

Ron: The Australian Zoological Handbook se oboodede fitaa kɛse no “betumi amene onipa mũ a ɔmmrɛ ho”⁷ The Natural History of Sharks bɔ amanneɛ sɛ na oboodede fitaa a ne tenten yɛ anammɔn 15 a woyii no 1939 mu no wɔ aboodede abien a wɔn mu biara tenten yɛ anammɔn asia wɔ ne yam​—na wɔn mu biara kɛse reyɛ ayɛ sɛ onipa!⁸

Brad: Nanso so wohu oboodede fitaa no bi wɔ Mediterranea mu?

Ron: Wɔn a wonim wɔn ho ade gye tom sɛ ebi wɔ po a ɛwɔ wiase nyinaa no mu, a Mediterranea ka ho.⁹ Animdefo bebree bɔ amanneɛ sɛ ɔtaa di ahyɛn a ɛretu kwan akyi nna pii, na odi biribiara a wɔtow fi hyɛn no mu kyene nsu mu no.¹⁰ Wokae nea ɛbaa Yona hyɛn no so ansa na wɔrehyɛ mmarima a wɔyɛ hyɛn mu adwuma no ma wɔatow no afi hyɛn no mu akyene nsu no mu no?

Nancy: Wɔpɛe sɛ wɔma hyɛn no mu yɛ hare, anaa ɛnyɛ saa?

Ron: Yiw, Hwɛ ha: “Na ahum kɛse tui ɛpo no so . . . na wɔtotow hyɛn no mu ade guguu po mu na ayɛ hare ama wɔn.”​—Yona 1:4, 5.

Nancy: Wususw sɛ na ɛno betumi atwetwe aboodede no bi ma wɔaba hɔ, na afei ama wɔn mu biako atumi amene Yona?

Ron: Wiɛ, ebetumi aba saa. Ná ebetumi ayɛ nsɛm a ɛresisi ntoatoaso.

Nancy: Enti oboodede fitaa kɛse bi na ɔmenee Yona!

Ron: Ebetumi aba sɛ oboodede fitaa kɛse bi na ɔmenee Yona! Ebetumi ayɛ bonsu kɛse bi nso, nanso ɛda adi sɛ ɛyɛ oboodede no mmom. Ebetumi aba mpo sɛ Onyankopɔn de po mu aboa kɛse bi a adebɔ nhwehwɛmu nnya nhui da dii dwuma. Nanso, ɛdefa oboodede no ho de, anka w’ani begye, sɛ wokɔhwɛ Amerika Abakɔsɛm Atetede Akorae a ɛwɔ New York kurom, faako a wo ankasa wubetumi ahu oboodede abogye a wɔfrɛ no Carcharodon megalodon no a. Nyansahufo akyerɛ sɛ abogye no sõ dodo. Nanso sɛ wɔayɛ no ketewa mpo a, ɛbɛda adi pefee sɛ na saa bɔpɔn yi betumi amene Yona. Anyɛ yiye koraa no, na ne tenten yɛ anammɔn 43!¹¹

Brad: Sɛ na oboodede no yɛ kɛse saa a, dɛn nti na nnompe anka mmom sen ɛsẽ ara kwa?

Nancy: Efisɛ aboodede nni nnompe. Yesuaa ɛno wɔ abɔde ho adesua no mu. Ade dennen bi na ɛwɔ wɔn mu te sɛ nnompe.

Ron: Ɛyɛ nokware, Nancy. Nea ɛsɛ sɛ nyansahufo ka ho asɛm nyinaa ankasa ne ɛsẽ no. Ɛwom sɛ aboodede akɛse yi fã kɛse ara sẽ yɛ nea wɔahyɛ da ama akyen de, nanso Theo Brown ka wɔ ne nhoma Sharks​—The Silent Savages mu sɛ wɔahu ɛsẽ akɛse pii a ɛnkyenee wɔ Pacific Po no mu.¹²

Brad: Wokyerɛ sɛ ebetumi aba sɛ na saa aboodede akɛse no bi wɔ hɔ nnansa yi ara?

Ron: Ebetumi aba sɛ wɔwɔ hɔ nnɛ. Mmeae bebree na wɔkyerɛ sɛ wɔahu saa abɔde yi wɔ yɛn afeha yi mu a wontumi nsii so dua.¹³

Brad: Wohuu wɔn wɔ Mediterranea po no mu anaa?

Ron: Dabi, na mmom wɔahu aboodede sẽ a akyen bebree wɔ baabi a ɛbɛn Malta, wɔ Mediterranea po no mu, na sɛ yɛfa Tarsis sɛ Spania a, ɛnde na ɛwɔ ɔkwan a na Yona retu afi Yopa akɔ Tarsis no so pɛɛ. Enti ɛda adi sɛ na oboodede kɛse bi da Mediterranea mu tete hɔ, na ebetumi aba sɛ ná ebi wɔ Mediterranea po no mu nnansa yi ara.

Ɔkwan Bɛn So Na ná Yona Betumi Anya Nkwa?

Brad: Nanso sɛ oboodede menee Yona mpo a, so ɛnyɛ nea nyansa nnim sɛ yebesusuw sɛ obenya nkwa wɔ oboodede no yam nna bi anaa?

Nancy: Yiw. Owura Dean kaa saa asɛm no nso.

Ron: Nokwarem no, na Yona hia anwonwade bi na ama watra ase wɔ apataa a ɔmenee no no yam. Bere a ɛyɛ nokware sɛ hyɛn mufo binom a abonsu menee wɔn anikan na wonyaa nkwa ho asɛm wɔ hɔ no, nnipa bebree gye asɛm yi ho akyinnye, na mprempren yi, wontumi nkyerɛ sɛ ɛyɛ nokware. Na sɛnea ɛyɛe a apataa no duu hɔ, ne nokwasɛm a ɛyɛ sɛ ɔde Yona kɔtoo asase kesee so no yɛ nwonwa nanso dɛn nti na ɛyɛ den dodo sɛ yebegye atom sɛ na Yehowa Nyankopɔn betumi afa anwonwa kwan so akora Yona nkwa so wɔ apataa no yam?

Brad: Ɛno yɛ soronko.

Ron: Saa? Ɛda adi pefee sɛ Yesu ansusuw saa. Hwɛ nea ɔkae wɔ ha wɔ Mateo 12:40.

Brad: “Na sɛnea Yona dii apataa kɛse no yam nnansa awia ne anadwo no, saara na onipa Ba no bedi asase komam nnansa awia ne anadwo.” NW.

Ron: Ná nea ɛbaa Yesu so no yɛ nokware ankasa, ɛnte saa? So ebetumi aba sɛ sɛ Yona asɛm no nyɛ nokware a, anka Yesu de bedi dwuma de ayɛ n’ankasa ne wu ne ne wusɔre no ho mfatoho?

Brad: Aa . . . minnim.

Ron: Hwɛ sɛnea Yesu toaa asɛm koro no ara so. “Niniwe mmarima ne nnɛ mma yi bɛsɔre atemmu no mu, na wɔabu wɔn fɔ; efisɛ Yona asɛnka mu no wɔsakraa wɔn adwene; na hwɛ, nea ɔsen Yona wɔ ha.” (Mat. 12:41) Famtutufo ada no adi sɛ na Niniwe wɔ hɔ ampa. Dɛn nti na ɛsɛ sɛ Yona yɛ anansesɛm mu nipa bi? Dɛn nti na anka Yesu bɛkyerɛ sɛ “ɔsen” obi a ɔntraa ase pɛn?

Brad: Misusuw sɛ woaka asɛm. Sɛ na Yesu de ne ho retoto obi a ɔntraa ase pɛn ho a, anka nkurɔfo besusuw sɛ Yesu reto anansesɛm.

Ron: Saa pɛpɛɛpɛ. Afei hwɛ nkyekyem 42.

Brad: “Nifa hɔ hemmaa no ne nnɛ mma yi bɛsɔre atemmu no mu, na wabu wɔn fɔ; efisɛ ofi asase ano nohoa betiee Salomo nyansa; na hwɛ, nea ɔsen Salomo wɔ ha.”

Ron: Wugye di sɛ na Salomo yɛ onipa ankasa?

Brad: Mete ase. Sɛ na obi foforo biara a ɔtraa ase yɛ onipa ankasa a, dɛn nti na Yona nyɛ onipa a ɔtraa ase ankasa?

Ron: Enti, ɛwom sɛ na Yona osuahu no yɛ anwonwade de, nanso na ɛyɛ abakɔsɛm, ɛnyɛ ayɛsɛm.

Nancy: Nanso dɛn nti na Onyankopɔn maa apataa menee no? Dɛn nti na wamfa duasin bi ammrɛ Yona na watra so wɔ nsu no so?

Dɛn Nti Na Ɔde Apataa Dii Dwuma?

Ron: Efisɛ na Yehowa de Yona osuahu no redi dwuma de akyerɛ sɛnea ɔnam anwonwa kwan so begye Ne Ba no afi ɔdamoa mu.

Brad: So ɛno nyɛ abɔsrɛmkã?

Ron: Dɛn nti na ɛsɛ sɛ ɛyɛ saa? Yesu ankasa kae sɛ apataa kɛse no yam a Yona hyɛe no yɛɛ “asase komam” a na n’ankasa bɛhyɛ no ho mfonini. Hwɛ nea Yona kae bere a na ɔwɔ apataa no yam no. Ɛha, wɔ Yona 2:2, (Twi Bible Foforo) .

Brad: “Mifi asaman (sheol) yafunu mu meteɛɛm, na woate me nne.”

Ron: Sheol yɛ Hebri asɛmfua ma ɔdamoa, ɛnyɛ apataa. Na Yona wɔ apataa yam, nanso na Yesu wɔ Sheol anaasɛ ɔdamoa ankasa mu. Enti na Yesu betumi afa Yona asɛm a esii no sɛ nea na ɛbɛba ne so ho “sɛnkyerɛnne.” Wɔ Mateo 12:39 (Twi Bible Foforo) no Yesu kae sɛ: “Nnɛ mma abɔnefo ne awaresɛefo hwehwɛ sɛnkyerɛnne, nanso wɔremma wɔn sɛnkyerɛnne biara, gye odiyifo Yona sɛnkyerɛnne no.”

Nancy: Enti biribi nti na apataa no menee Yona!

Ron: Biribi pa bi nti.

Brad: Minnim koraa sɛ na wubetumi ahu ɛnonom nyinaa wɔ Bible mu.

Ron: Mpɛn bebree no, Bible no si hia a Yesu afɔrebɔ ne ne wusɔre no ho hia so dua. Ɛnsɛ sɛ ɛyɛ nwonwa sɛ na Onyankopɔn de nsɛm bi a esisii bɛyɛ nneɛma a ɛho hia wɔ Yesu wu no ho no ho mfonini. Biribi a ɛte saa ara sii bere a Abraham pɛe sɛ ɔde ne babarima Isak bɔ afɔre wɔ Bepɔw Moria so no.

Nancy: Wokyerɛ sɛ, na nea Abraham yɛe no te sɛ nea Onyankopɔn yɛe bere a ɔde Ne Ba, Yesu mae no anaa?

Ron: Ɛyɛ nokware.

Brad: Ɛyɛɛ dɛn na wunim eyi ho asɛm pii saa, Ron?

Yehowa Adansefo Gye Bible no Di

Ron: Meyɛ Yehowa Adansefo mu biako, na yegye di sɛ kyerɛwtohɔ anaasɛ asɛm a ɛfa Yona ne apataa kɛse no ho no yɛ nokware. Enti bere a asɛm sɔree wɔ baabi a misua adebɔ ho ade afe a etwaam no, mitumi yɛɛ ho nhwehwɛmu bi na mede ho asɛm too asuafo no anim.

Nancy: So ɛno kyerɛ sɛ Yehowa Adansefo yɛ wɔn a wogye di sɛ ɛsɛ sɛ wɔfa Bible mu asɛm biara sɛnea ɛte no ara, sɛnea ɛte wɔ yɛn asɔre mu no?

Brad: Yiw wɔyɛ saa.

Ron: Dabi. Yehowa Adansefo nyɛ saa. Yegye di sɛ Bible mũ no nyinaa fi Onyankopon home mu na ɛyɛ nokware, nanso yennye nni sɛ ɛsɛ sɛ wɔfa ne nyinaa sɛnea ɛte ankasa. Sɛ nhwɛso no, ɛda adi sɛ wɔkyerɛw Adiyisɛm nhoma no sɛnkyerɛnne kwan so. Nokwarem no, nkyekyem a edi kan wɔ nhoma no mu no ka saa.

Brad: Ɛnde dɛn nti na wonka sɛ Yona nso yɛ sɛnkyerɛnne?

Ron: Efisɛ Bible no nkyerɛ nea enti a ɛsɛ sɛ yɛyɛ saa. Woaka asɛm no sɛ abakɔsɛm, ɛnyɛ sɛnkyerɛnne kwan so. Ɛda adi sɛ Yesu tee nka sɛ na Yona asɛm no yɛ nokwasɛm. Afei nso na Yehowa Nyankopɔn wɔ atirimpɔw pa bi nti a ɛsɛ sɛ ɔyɛ anwonwade a Yona kyerɛw ho asɛm no.

Nancy: Na minnim saa koraa. Ɛboa obi ma ohu sɛnea na Yesu wu ne ne wusɔre no ho hia ma Onyankopɔn.

Brad: Ron, mepɛ sɛnea wokyerɛkyerɛ nsɛm mu no.

Nancy: Mepɛ sɛ mitumi gye Bible no di efisɛ nyansa wom, ɛnyɛ sɛ esiane sɛ obi ka sɛ ɛsɛ sɛ woyɛ saa nti.

Ron: Wunim, wɔ yɛn Ahenni Asa so no, yebetie ɔkasa bi a wɔato din sɛ, “Noa Bere So Nsuyiri No Kyerɛ Biribi ma Yɛn.”

Brad: Wiɛ, ɛno yɛ ade foforo a mewɔ ho nsemmisa.

Nancy: Mɛpɛ sɛ metie saa ɔkasa no.

Ron: Wubetumi aba.

Yehowa Adansefo gye Bible no di na wogye tom sɛ ɛso wɔ mfaso ankasa ma yɛn bere yi. Sɛ wowɔ nsemmisa a ɛfa Bible no ho a, dɛn nti na wonhwehwɛ wɔn akyi kwan? Wɔn ani begye sɛ wobɛboa wo.

Faako a Nsɛm No Fi

 ¹ Mammals of the World (nea ɛto so mmiɛnsa a wɔyɛe) , Vol. II, 1975, krat. 1098.

 ² Nhoma koro no ara.

 ³ Whales, E. J. Slipjer, University of Amsterdam, nkrat.  276, 277.

 ⁴ Aid to Bible Understanding, Watchtower Bible and Tract Society, New York, 1971, krat.  1057.

 ⁵ The Fishes of South Australia, Edgar R. White, South Australian Museum, krat. 40.

 ⁶ Sharks and Survival, Perry Gilbert, Cornell University, krat. 13.

 ⁷ Australian Zoological Handbook, The Fishes of Australia, Gilbert Percy Whitley, Australian Museum, Part I​—The Sharks, krat. 125.

 ⁸ The Natural History of Sharks, Richard M. Backus and Thomas H. Lineaweaver III, Andre Deutsch Ltd., London, 1970, krat. 111.

 ⁹ Nhoma koro no ara, krat. 113.

 ¹⁰ Sharks​—The Silent Savages, Theo Brown, Little, Brown & Co., Boston & Toronto, 1973, krat. 40; Sea Fishes of Southern Africa, J. L. B. Smith, Rhodes University, krat. 49; Australian Zoological Handbook, krat. 106.

 ¹¹ Natural History, November 1980, nkrat. 112, 113.

 ¹² Sharks​—The Silent Savages, krat. 79, Australian Zoological Handbook, krat. 125.

 ¹³ Sharks​—The Silent Savages, nkrat. 79-81.

 ¹⁴ Australian Zoological Handbook, krat. 126 (ase hɔ asɛm) .

 ¹⁵ The Year of the Whale, Victor B. Scheffer, nkrat. 84-86.

[Ase hɔ nsɛm]

[Kratafa 17 mfoni]

Bonsu kɛse a ɔwɔ menewa a emu sõ a obetumi de amene onipa

Oboodede fitaa kɛse​—betumi amene onipa

[Kratafa 19 mfoni]

Wɔde Yona toto abakɔsɛm mu nnipa ahorow ne mmeae ahorow ho

Niniwe

Salomo

Yesu