Momma Yɛnhyɛ Teɛ A Onyankopɔn Teɛ Mu Ahotoso A Yɛwɔ No Mu Den

“Nea ɛbɛyɛ na wode wo ho ato [Yehowa, “NW”] so no, merema woahu.”—MMEBUSƐM 22:19.

 1, 2. (a) Dɛn nti na Yehowa Adansefo da Yehowa mu ahotoso adi? (Mmebusɛm 22:19) (b) Dɛn na ɛkyerɛ sɛ ehia sɛ ankorankoro bi hyɛ Yehowa mu ahotoso a wɔwɔ mu den?

NOKWARE Kristofo wɔ Yehowa ne n’atirimpɔw ahorow ho nokware nimdeɛ. “Akoa nokwafo ne ɔbadwemma” bi fi ɔdɔ mu ma wɔn honhom fam “aduan ɛbere a ɛsɛ mu.” (Mateo 24:45) Nimdeɛ a wonya no ma wonya nea wɔde ahotoso a wɔwɔ wɔ Onyankopɔn mu no begyina so pintinn. Ne saa nti, sɛ́ kuw no, Yehowa Adansefo da ahotoso soronko adi wɔ Yehowa ne teɛ a ɔteɛ no mu.

² Nanso sɛ́ ankorankoro no, ebia ehia sɛ Adansefo binom hyɛ wɔn ahotoso a ɛte saa mu den. Ɛtɔ mmere bi a Asafo ti no nsa ka nkrataa ahorow a ɛkyerɛ adwenem naayɛ a ebinom nya wɔ nkyerɛkyerɛmu a wɔde ma wɔ ne nhoma ahorow mu no ho. Adwenem naayɛ ahorow yi betumi ayɛ nea wɔda no adi wɔ nsakrae a wɔyɛe wɔ ntease bi ho, anaa ebia nsɛm a ɛka ɔsɛmmisafo no ankasa titiriw wɔ nkate fam no ho.—Fa toto Yohane 6:60, 61 ho.

 3. Dɛn na ebetumi ato Yehowa asomfo anokwafo mpo, na dɛn ntia?

³ Asɛm a ɛwɔ Ɔsɛnkafo 9:11, NW, yi ato Yehowa asomfo anokwafo mpo: “Mesan mihui owia ase sɛ ɛnyɛ ahoɔharefo de ne ammirikatu, na ɛnyɛ nnɔmmarima de ne ɔko, na ɛnyɛ anyansafo de ne aduan, na ɛnyɛ nhumufo de ne ahonya, nanso ɛnyɛ animdefo de ne anuonyam, na ɛbere ne asiane to wɔn nyinaa.” Wɔ ntease a ɛkɔ akyiri anaa honhom fam no, ɔkwan bɛn so na eyi betumi ayɛ nokware? Ebia na yenim Kristofo bi a na wɔde Bible mu afotu di dwuma ntɛm so, de nsiyɛ gyina nokware no akyi, fi nyansam de Bible mu nnyinasosɛm ahorow di dwuma, na wɔde nnamyɛ di nokware nimdeɛ akyi. Nanso esiane “ɛbere ne asiane” nti, ebia na akwanhyia anaa onyin ama wɔn mu binom ntumi nyɛ pii. Wontumi nhu sɛ ebia wɔbɛhyɛn Onyankopɔn wiase foforo no mu a wɔrenka owu nhwɛ da koraa a.

 4, 5. Dɛn nti na Kristofo nni biribiara a wobegyina so ahwere ahotoso a wɔwɔ wɔ teɛ a Yehowa teɛ no mu?

⁴ Sɛ Kristoni bi aware mu hokafo wu a, ɛyawdi ne adehwere no yɛ kɛse. Ebia na wɔasom Yehowa abom sɛ awarefo mfe pii. Ɔwarefo a ne hokafo awu agyaw no no nim sɛ owu tetew aware abusuabɔ mu.a (1 Korintofo 7:39) Afei nea ɛbɛyɛ na ɔnhwere n’ahotoso no, ɛsɛ sɛ ɔhyɛ ne ho so.—Fa toto Marko 16:8 ho.

⁵ Hwɛ nyansa ara a ɛyɛ sɛ obi bebu n’aware mu ɔhokafo, ɔwofo, ɔba, anaa n’adamfo Kristoni bi wu sɛ hokwan a ɔde bɛda ahotoso a ɔwɔ wɔ teɛ a Yehowa teɛ mu no adi! Sɛ yɛhwere biribi mpo a, yebetumi anya ahotoso sɛ Yehowa nyɛ obi a ɔnteɛ. Yebetumi anya ahotoso sɛ obiara a obenya daa nkwa—sɛ́ ebia obenya ne ti adidi mu wɔ ɔsɛe a ɛreba no mu anaa ɛdenam owusɔre so—no ani begye. Odwontofo no ka faa Onyankopɔn ho sɛ: “Wubue wo nsam na woma ateasefo nyinaa nya nea wɔpɛ di mee. [Yehowa, NW] teɛ, n’akwan nyinaa mu, na ɔyɛ adɔe ne nnwuma nyinaa mu. [Yehowa, NW] bɛn wɔn a wɔfrɛ no nyinaa, wɔn a wɔfrɛ no nokware mu nyinaa. Ɔyɛ nea n’afɛrefo pɛ ma wɔn, na otie wɔn sufrɛ, na ogye wɔn.”—Dwom 145:16-19.

Bere a Yɛte Nka sɛ Yɛahu Amane a Ɛnsɛ sɛ Anka Yehu

 6, 7. (a) Dɛn nti na ebia Adansefo binom a kan no wohuu amane no anya ntease foforo nnɛ? (b) Dɛn nti na ɛnsɛ sɛ yebu Yehowa sɛ ɔnteɛ sɛ ɔmaa amanehunu a ɛtete saa ho kwan wɔ bere a atwam no mu?

⁶ Bere bi a atwam no, Adansefo binom huu amane wɔ wɔn ho a wɔamfa anhyɛ dwumadi bi a mprempren ebia wɔn ahonim bɛma ho kwan no mu no ho. Sɛ nhwɛso no, eyi betumi ayɛ adwuma a ɛmfa sraadi ho a mfe bi a atwam no anka wɔbɛpaw. Ebia afei de onua bi bɛte nka sɛ n’ahonim betumi ama no kwan ma wayɛ adwuma a ɛte saa a ɛremma ommu ɔfá biara a onni sɛ Kristoni no so wɔ mprempren nneɛma nhyehyɛe yi mu.

⁷ So na ɛnteɛ wɔ Yehowa fam sɛ Ɔmaa kwan ma ohuu amane sɛ wanyɛ biribi a anka ɛnnɛ ɔbɛyɛ a ɛrensɛe hwee no? Wɔn a wɔanya saa osuahu ahorow no mu dodow no ara rensusuw saa. Mmom no wɔn ani gye sɛ wonyaa hokwan de daa no adi pefee wɔ baguam sɛ na wɔasi wɔn bo sɛ wobegyina amansan tumidi ho ɔsɛmpɔw no akyi denneennen. (Fa toto Hiob 27:5 ho.) Dɛn na obi betumi agyina so adi yaw sɛ otiee n’ahonim gyinaa Yehowa akyi pintinn? Ɛdenam nokwaredi a wɔde kuraa Kristofo nnyinasosɛm ahorow mu sɛnea na wɔte ase, anaa denam tie a wotiee wɔn ahonim so no, wɔdaa wɔn ho adi sɛ wɔfata sɛ wɔyɛ Yehowa nnamfo. Akyinnye biara nni ho sɛ nyansa wom sɛ yɛbɛkwati nneyɛe bi a ɛbɛhaw yɛn ankasa adwene anaa ɛbɛto afoforo hintidua. Ɛdefa eyi ho no, yebetumi asusuw nhwɛso a ɔsomafo Paulo yɛe no ho.—1 Korintofo 8:12, 13; 10:31-33.

 8. Dɛn nti na Yudafo Kristofo a na kan no wodi Mmara no so no nni biribiara a wobegyina so aka teɛ a Yehowa teɛ no ho asɛmmɔne?

⁸ Nea ɛbɛyɛ na wɔasɔ Yehowa ani no, na ɛsɛ sɛ Yudafo no di Mmara Nsɛm Du no ne afei mmara ahorow bɛyɛ 600 a ɛka ho no so. Akyiri yi, na wɔnhwehwɛ sɛ wodi mmara horow yi so wɔ Kristofo nhyehyɛe no ase, a na honam fam Yudafo mpo ka ho, na wɔde asom Yehowa. Mmara a na ɛnyɛ adwuma bio no bi ne nea ɛfa twetiatwa, Homedadi, mmoa afɔrebɔ, ne aduandi ho mmara horow bi a wobedi so, ho. (1 Korintofo 7:19; 10:25; Kolosefo 2:16, 17; Hebrifo 10:1, 11-14) Yudafo—a na asomafo no ka ho—a wɔbɛyɛɛ Kristofo no dee wɔn ho fii mmara a na ɛsɛ sɛ wodi so wɔ Mmara apam no ase no ho. So wonwiinwii sɛ Onyankopɔn nhyehyɛe nteɛ sɛ ɔma wodii nneɛma bi so kan no a afei de ɛho nhia bio no? Dabi, wɔn ani gyee Yehowa atirimpɔw ho ntease a emu trɛwee no ho.—Asomafo no Nnwuma 16:4, 5.

 9. Dɛn na Adansefo binom afa mu, nanso dɛn nti na ɛnsɛ sɛ wonu wɔn ho?

⁹ Ɛnnɛ mmere yi mu no, Adansefo binom ayɛ katee wɔ nea wosusuw sɛ ɛsɛ sɛ wɔyɛ anaa nea ɛnsɛ sɛ wɔyɛ ho. Esiane eyi nti wohuu amane sen afoforo. Akyiri yi, nimdeɛ a ɛbɛdɔɔso boaa wɔn ma wosusuw nneɛma ho kɔɔ akyiri. Nanso wonni biribiara a wobegyina so anu wɔn ho sɛ wɔyɛɛ biribi a kan no na ɛne wɔn ahonim hyia, sɛ mpo eyi ma wohuu amane kɛse a. Nokwarem no, ɛfata nkamfo sɛ wɔdaa ɔpɛ a wɔwɔ adi sɛ wobehu amane de adi nokware ama Yehowa, ayɛ “eyi nyinaa, asɛmpa no nti.” Yehowa ani gye onyamesom pa a ɛte saa ho. (1 Korintofo 9:23; Hebrifo 6:10) Ɔsomafo Petro de nhumu kyerɛwee sɛ: “Na mmom sɛ moyɛ papa na muhu amane na motɔ mo bo ase a, eyi na ɛyɛ ɔdom, Onyankopɔn anim.”—1 Petro 2:20.

Sua a Yebesua Biribi Afi Yona Hɔ

10, 11. Ɔkwan bɛn so na Yona ankyerɛ Yehowa mu ahotoso (a) bere a wɔsomaa no Niniwe no? (b) bere a Onyankopɔn ansɛe Niniwefo no?

¹⁰ Bere a wɔsomaa Yona sɛ ɔnkɔ Niniwe no, wankyerɛ ahotoso a Yehowa nyaa wɔ ne mu no ho anisɔ. Bere a Yona asoɔden no ma onyaa osuahu a ɛyɛ hu akyi no, n’ani baa ne ho so, ohuu ne mfomso, gyee n’amannɔne dwumadi no toom, na ɔbɔɔ Niniwefo no kɔkɔ wɔ ɔsɛe a na ɛreba no ho. Afei nea ɔnhwɛ kwan no sii: Esiane adwensakra su a Niniwefo daa no adi nti, Yehowa sii gyinae sɛ ɔrensɛe wɔn.—Yona 1:1–3:10.

¹¹ Dɛn na Yona yɛe? Esiane sɛ ne bo afuw nti, onwiinwii hyɛɛ Onyankopɔn wɔ mpaebɔ mu. Ɔkaa nea enti a na onwiinwii no sɛ: ‘Mihui sɛ saa na ɛbɛba. Ɛno nti na na mempɛ sɛ mekɔ Niniwe mfiase no. Afei, nea mafa mu nyinaa, apataa kɛse a ɔmenee me ho hu ne animguase, ne adwumaden a meyɛe de bɔɔ Niniwefo kɔkɔ sɛ ɔsɛe reba nyinaa akyi no, hwɛ nea afi mu aba! M’adwuma ne amanehunu nyinaa ayɛ kwa! Miwui koraa a anka eye!’—Yona 4:1-3.

12. Dɛn na yebetumi asua afi Yona suahu no mu?

¹² So na ntease wɔ Yona anwiinwii no mu? So na Yehowa nteɛ sɛ ohuu abɔnefo a wɔsakraa wɔn adwene no mmɔbɔ? Nokwarem no, na anka ɛsɛ sɛ Yona di ahurusi; na nnipa ɔpedudu pii rebenya wɔn ti adidi mu! (Yona 4:11) Nanso aniammɔho ne anwiinwii su no kyerɛe sɛ na ɔnna ahotoso kɛse adi wɔ teɛ a Yehowa teɛ no mu. Ná odwen ne nkutoo ho dodo sen afoforo. Momma yensua biribi mfi Yona hɔ denam yɛn nkate ahorow a yɛremma ɛho nhia yɛn dodo nkyɛn afoforo de no so. Momma yennye nni sɛ Yehowa a yebetie no, akwankyerɛ a ɔnam n’ahyehyɛde no so de ma a yebedi akyi ne ne gyinaesi ahorow a yebegye atom no ne ade a ɛteɛ a ɛsɛ sɛ yɛyɛ. Yegye di sɛ “ebesi wɔn a wosuro Onyankopɔn . . . no yiye.”—Ɔsɛnkafo 8:12.

Bere Aso sɛ Yɛhyɛ Yɛn Ahotoso Mu Den!

13. Ɔkwan bɛn so na yɛn nyinaa betumi ahyɛ Yehowa mu ahotoso mu den?

¹³ Ɛyɛ ade a nyansa wom sɛ yɛbɛhyɛ Yehowa mu ahotoso a yɛwɔ no mu den. (Mmebusɛm 3:5-8) Ɛwom, ɛsɛ sɛ yɛyɛ pii sen sɛ yɛbɛbɔ mpae kɛkɛ sɛ Yehowa mmoa yɛn mma yɛn ahotoso mu nyɛ den. Nokware nimdeɛ na ɛma ahotoso mu yɛ den, enti ɛsɛ sɛ yɛde kokoam Bible adesua, kan a yɛbɛkenkan Bible ne nhoma ahorow a ɛkyerɛkyerɛ Bible mu no yɛ yɛn da biara da asetra fã. Kristofo nhyiam a yɛbɛkɔ no daa ho hia, saa ara nso na ahosiesie pa ne yɛn ho a yɛde bɛhyem sɛnea yebetumi biara no nso te. Yɛ a yɛde bɛyɛ yɛn su sɛ yɛbɛka Bible mu nokware akyerɛ afoforo, na yɛnam anifere kwan so adi anoyi ahorow ho dwuma nso ma ahotoso a yɛwɔ wɔ Yehowa ne N’asɛm mu no nso yɛ kɛse. Yɛnam saa kwan no so ne no nya abusuabɔ kɛse da biara da.

14. Dɛn nti na ɛnkyɛ biara, wɔbɛma Onyankopɔn nkurɔfo ada ahotoso a wɔwɔ wɔ Yehowa mu no adi sen bere biara a atwam?

¹⁴ Ɛrenkyɛ biara, ahohiahia kɛse a ebi mmaa adesamma abusua no so da bɛba mpofirim. (Mateo 24:21) Sɛ ɛba saa a, ebehia sɛ Onyankopɔn asomfo da ahotoso a ɛsen biara adi wɔ teɛ a Yehowa teɛ, ne akwankyerɛ a n’ahyehyɛde no de ma no mu. Sɛnkyerɛnne kwan so no, afei de wɔde ahotoso bedi Onyankopɔn ahyɛde yi so: “Me man, kɔ na kɔhyɛ wo mpia mu, hintaw kakraa bi kosi sɛ abufuw no betwam akɔ.” (Yesaia 26:20) Wɔahyɛn baabi a ahobammɔ wɔ wɔ asafo bɛboro 85,000 wɔ nsase 232 so mu dedaw. Ɛmfa ho nea ebia ɛka ahyɛde a ɛne sɛ “kɔ na kɔhyɛ wo mpia mu” ho no, yebetumi anya ahotoso sɛ Yehowa bɛboa yɛn ma yɛadi so.

15. Ɔkwan bɛn so na wɔasi ahotoso asɛm no so dua wɔ 1998 mu, na dɛn nti na ɛfata saa?

¹⁵ Ehia sɛ yɛhyɛ yɛn ahotoso mu den nnɛ. Sɛ yɛannya yɛn nuanom Kristofo, Yehowa ahyehyɛde, ne nea ɛsen biara no, Yehowa ankasa mu ahotoso a, yɛrentumi nnya yɛn ti nnidi mu. Enti hwɛ fata a ɛfata sɛ wɔ 1998 mu no, wɔnam afe asɛm a ɛne sɛ: “Obiara a ɔbɔ Yehowa din no benya nkwa” no so akɔ so abɔ Yehowa Adansefo a wɔwɔ wiase nyinaa nkae! (Romafo 10:13, NW) Ɛsɛ sɛ yɛkɔ so nya ɛno mu ahotoso. Sɛ yehu adwenem naayɛ ketewaa biara wɔ ahotoso yi mu a, ɛsɛ sɛ yɛyere yɛn ho sɛ yebeyi afi hɔ mprempren yi ara, yiw, ɛnnɛ.

Yehowa Atemmu Bɛyɛ Trenee

16. Sɛ yɛanhyɛ yɛn ahotoso mu den a, dɛn na ebetumi aba so, na ɔkwan bɛn so na yebetumi asiw eyi ano?

¹⁶ Wɔbɔ Kristofo a wɔasra wɔn kɔkɔ wɔ Hebrifo 3:14 sɛ: “Yɛanya Kristo ho biribi, nanso gye sɛ, nea yefii ase de yɛn ho too so no, yeso mu pintinn kosi ase.” Emu nnyinasosɛm no nso fa Kristofo a wɔwɔ asase so anidaso no ho. Sɛ yɛanhyɛ ahotoso a yedii kan nyae no mu den a, ebetumi asɛe. Hwɛ hia a ɛho hia sɛ yɛkɔ so di nokware nimdeɛ akyi, na ama yɛahyɛ nnyinaso a yɛn ahotoso gyina so no mu den!

17. Ɛdefa yɛn ti a yebenya adidi mu ho no, dɛn nti na yebetumi anya ahotoso sɛ Yesu bebu atɛn trenee mu?

¹⁷ Ɛrenkyɛ, Kristo bɛhwehwɛ amanaman nyinaa mu sɛnea ɛbɛyɛ a “ɔbɛpaapae wɔn mu, sɛnea oguanhwɛfo paapae nguanten ne mpapo mu.” (Mateo 25:31-33) Yebetumi anya ahotoso sɛ Kristo bedi asɛntrenee wɔ atɛn a obebu wɔn a wɔfata sɛ wonya wɔn ti didi mu no mu. Yehowa ama no nyansa, nhumu, ne su afoforo a ehia a ɔde “bebu wiase ntɛn trenee mu.” (Asomafo no Nnwuma 17:30, 31) Momma yennya gyidi te sɛ Abraham a ɔkae sɛ: “Eyi mpare wo [Yehowa] sɛ wubedi saa asɛm yi, sɛ wubekum ɔtreneeni ne ɔbɔnefo afra, na ɔtreneeni ayɛ sɛ ɔbɔnefo; eyi mpare wo. Nea obu asase nyinaa atɛn no remmu atɛntrenee anaa?”—Genesis 18:25.

18. Dɛn nti na ɛnsɛ sɛ yɛma nea ebia yennim mprempren no ho asɛm haw yɛn dodo?

¹⁸ Bere a yɛwɔ teɛ a Yehowa teɛ mu ahotoso a edi mu no, ɛnsɛ sɛ yɛhaw yɛn ho sɛ yebenya mmuae ama nsɛmmisa te sɛ: ‘Ɔkwan bɛn so na wobebu nkokoaa ne mmofra nketewa atɛn? So ebetumi aba sɛ bere a Harmagedon bɛba no, na nnipa pii ntee asɛmpa no? Wɔn a wɔwɔ adwenem yare no nso ɛ? Na . . . nso ɛ?’ Nokwarem no, mprempren de, yɛrentumi nhu ɔkwan a Yehowa bɛfa so adi nsɛm yi ho dwuma. Nanso, ɔbɛyɛ saa wɔ ɔkwan a ɛteɛ na ɛda mmɔborohunu adi so. Ɛnsɛ sɛ yɛma yɛn adwenem yɛ yɛn naa wɔ ho da. Nokwasɛm ne sɛ, ebia yɛn ho bedwiriw yɛn sɛ yebehu sɛ odi ho dwuma wɔ ɔkwan a yɛansusuw ho da mpo so.—Fa toto Hiob 42:3; Dwom 78:11-16; 136:4-9; Mateo 15:31; Luka 2:47 ho.

19, 20. (a) Dɛn nti na ɛnyɛ mfomso sɛ yebebisa nsɛm a ntease wom? (b) Bere bɛn na Yehowa de ho mmuae a yehia no bɛma?

¹⁹ Yehowa ahyehyɛde no nka sɛ obiara mmmisa nsɛm a efi koma pa mu a ɛyɛ ne bere mu de, sɛnea asɔretiafo bi di mfomso kyerɛ no. (1 Petro 1:10-12) Nanso Bible tu yɛn fo sɛ yɛnkwati nsɛmmisa hunu. (Tito 3:9) Nsɛm a ɛtɔ asom a yebebisa, ne Onyankopɔn Asɛm ne Kristofo nhoma horow a yɛbɛhwehwɛ mu apɛ mmuae a egyina Kyerɛwnsɛm so betumi ama nokware nimdeɛ a yɛwɔ no mu adɔ, na yɛnam saayɛ so betumi ahyɛ Yehowa mu ahotoso a yɛwɔ mu den. Ahyehyɛde no di Yesu nhwɛso akyi. Ɔkwatii sɛ ɔbɛka nsɛm a na bere nsoe sɛ obua ho biribi. Ɔkyerɛkyerɛɛ mu sɛ: “Mewɔ nsɛm pii bio meka mekyerɛ mo, nanso muntumi nsoa mprempren.” (Yohane 16:12) Afei nso ogye toom sɛ na nneɛma bi wɔ hɔ a na nankasa nnim saa bere no.—Mateo 24:36.

²⁰ Yehowa wɔ nneɛma pii a ɛsɛ sɛ ɔda no adi. Hwɛ nyansa ara a ɛyɛ sɛ yɛbɛtwɛn no, bere a yɛwɔ ahotoso sɛ obedi n’atirimpɔw ahorow ho dwuma wɔ bere a ɛfata mu no. Yebetumi anya ahotoso sɛ sɛ Yehowa bere a wahyɛ ato hɔ no du a, yɛn ani begye sɛ yebenya n’akwan ho nhumu pii. Yiw, sɛ yenya Yehowa ne n’ahyehyɛde a ɔde redi dwuma no mu ahotoso koraa a, yebenya so akatua. Mmebusɛm 14:26, NW, ma yɛn awerɛhyem sɛ: “Yehowa suro mu na ahotoso a emu yɛ den wɔ, na ɔbɛyɛ guankɔbea ama ne mma.”

[Ase hɔ asɛm]

Wususuw Ho Dɛn?

◻ Dɛn nti na nyansa nnim sɛ yɛbɛma yɛn nkate asɛe ahotoso a yɛwɔ wɔ Yehowa mu no?

◻ Dɛn na yebetumi asua afi Yona suahu no mu?

◻ Dɛn nti na Bible adesua ne nhyiamkɔ ho hia saa?

[Kratafa 16 mfonini]

Bere a yɛahwere biribi mpo no, yebetumi anya Yehowa mu ahotoso sɛ ɔteɛ

[Kratafa 18 mfonini ahorow]

So wugye di sɛ wowɔ Yehowa mu ahotoso?