Bɔhyɛ Asase No So Mmeae Ahorow

Basan​—Asase Pa

BERE a worekenkan Bible no, so wunhuu mmeae pii a wuntumi nyɛ ho mfonini wɔ w’adwenem din? May ne June no, Yehowa Adansefo bɛkenkan Mika de akosi Sakaria. Sɛ wudi akenkan nhyehyɛe no akyi a, wubehu sɛ wɔabɔ Basan din wɔ kyerɛw nsɛm abiɛsa mu. (Mika 7:14; Nahum 1:4; Sakaria 11:2) Sɛ wubetumi de w’adwene aniwa ahu Basan a, saa nkyekyem ahorow no ne afoforo a ɛyɛ anigye no bɛkyerɛ nneɛma pii.

Na ɛhe na Basan wɔ? Wiɛ, wubetumi ahu ɛno ne Golan Heights a ebia woahu wɔ atesɛm nkrataa mu asase mfonini ahorow so no. Na Basan wɔ Galilea Po apuei fam ne Yordan Bon no atifi fam. Efi Asubɔnten Yarmuk (Jordan ne Syria mprempren ɔhye no fã) kusuu fam kosi Hermon Bepɔw ho.

Ansa na tete Israelfo no rehyɛn Bɔhyɛ Asase no so no, na ɛsɛ sɛ wodi Kanaanni ɔbran Og, Basan hene asraafo so nkonim. Wɔ ɛno akyi no, Manase abusua no traa Basan asase no fã kɛse so. (Deuteronomium 3:1-7, 11, 13; Numeri 32:33; 34:14) Na beae a Bible ka ho asɛm yi te dɛn? Ɛwom sɛ kwae wɔ Basan fã a ɛyɛ mmepɔmmepɔw no de, nanso ne fã kɛse yɛ mmepɔw asase a ɛso yɛ tratraa.

Akwan horow pii so no, na Basan yɛ beae a awi tumi yɛ yiye wɔ hɔ. Eyi te saa efisɛ sare asase pa kɛse wɔ beae yi fã kɛse. (Yeremia 50:19) Mfonini ahorow a ɛka ho no betumi ama woakae nea Bible no ka fa Basan ho no bi.* Nnipa pii akenkan “Basan anantwinini” ho asɛm. (Dwom 22:12, King James Version) Yiw, tete no anantwi ne anantwi mma a wɔwɔ ahoɔden maa beae yi gyee din. Nanso nyɛmmoa afoforo te sɛ nguan ne mmirekyi a na wɔboa ma wonya nufusu ne buturu a eye ase fɛe wɔ hɔ nso.​—Deuteronomium 32:14.

Ebia wubesusuw nea enti a Basan yɛ asase pa no ho, esiane sɛ ɛwɔ Yordan apuei fam wɔ baabi a yɛn mu pii susuw sɛ ɛyɛ kesee dodo nti. Nokwasɛm no ne sɛ Galilea mmepɔw a ɛwɔ atɔe fam no nware ma enti Mediterranea amununkum fa so ma nsu tɔ wɔ Basan kɛse. Afei nso, mframa a nsu wom ne nsusunsuwa fi Hermon Bepɔw so gu so. Susuw nnɔbae a wobetumi anya no ho bere a saa fonwini a mfaso wɔ so no fra ogya bepɔw mu dɔte pa a wohu wɔ Basan mu no! Ná beae no bɔ aburow pii. Bere tenten ansa na Basan rebɛyɛ awikorabea titiriw ama Romafo no, na Salomo nya n’aduan fi hɔ. Ɛnde, na wobetumi de ntease pa aka Onyankopɔn nsiesiei a ɔyɛ maa ne manfo a ogyee wɔn no ho asɛm akyiri yi sɛɛ se: “Ma wonnidi Basan ne Gilead sɛ tete nna no mu.”​—Mika 7:14; 1 Ahene 4:7, 13.

Esiane sɛ woahu nnɔbae a asase no tumi bɔ nti, wubetumi ahu nea Onyankopɔn abufuw de bɛba no ho nkyerɛkyerɛmu a ɛyɛ awerɛhow a Nahum de ma no: “Basan ne Karmel [bepɔw a afifide ma adan ahabammono a ɛbɛn Po Kɛse no] twintwam.”​—Nahum 1:4b.

Basan ho asɛm a yɛabɔ no mua no bɛboa wo ma woayɛ nneɛma ahorow a wɔaka ho asɛm wɔ Bible mu no nso ho mfonini wɔ ɔkwan a ɛyɛ mmerɛw kɛse so. Sɛ nhwɛso no, ɛda adi sɛ ebia woakenkan awitwa, te sɛ awi a wodua no pii wɔ Basan no ho asɛm. Wotwa awi no wɔ asram Iyyar ne Sivan (Yudafo kalenda so asram a ɛne April, May awiei ne June mfiase hyia) mu. Adapɛn Afahyɛ (Pentekoste) no du wɔ saa bere yi mu. Sɛ afahyɛ no fã no, wɔde awitwa no mu aba a edi kan ma sɛ ayɛyɛde na wɔde nguammaa, adwennini ne nantwi bɔ afɔre. So ebetumi aba sɛ wɔtɔɔ mmoa no fii Basan?​—Exodus 34:22; Leviticus 23:15-18.

Wɔ twabere mu no wɔde kantankrankyi a wɔakɔntɔn no te sɛ biako a wuhu wɔ atifi hɔ a wɔde dade ayɛ a dua a wɔso mu no nni hɔ no twitwa awi a egyinagyina hɔ no. (Deuteronomium 16:9, 10; 23:25) Afei wɔboaboa ano de kɔ awiporobea, faako a wɔde abɔsobaa (a abo hyehyɛ ase) bobɔ so de yiyi ntɛtɛwa no. (Rut 2:2-7, 23; 3:3, 6; Yesaia 41:15) Bere a wohwɛ eyi mfonini a wotwae wɔ Golan Heights no, wubetumi asusuw Onyankopɔn ahyɛde a ntease wom yi ho: “Nkata nantwi a ɔporow awi ano.”​—Deuteronomium 25:4; 1 Korintofo 9:9.

Awiei koraa no, kae sɛ na tete Basan mmeae bi yɛ kwaebirentuw a emu nnua pii yɛ akɛse te sɛ odum, te sɛ nea ne mfonini wɔ benkum so ha no. Foinikefo de Basan odum akɛse ntabo yɛɛ atabon. (Hesekiel 27:6) Nanso ‘Basan adum ne kwae a ɔkwan nnim’ a ɛte saa no antumi annyina Onyankopɔn abufuw a ɛbaa so no ano. (Sakaria 11:2; Yesaia 2:13) Nnua a ɛte saa a wuhu no ma ɛyɛ mmerɛw kɛse sɛ wubehu nea enti a kwae a ɛte saa no bɛyɛ ɔhaw ama asraafo a wɔreguan no ho mfonini wɔ w’adwenem. Ɔpɔnkɔsotefo bi a ne nkutoo nam betumi aka ne mmaa ntam te sɛ nea ɛtoo Absalom wɔ baabi foforo mpo no.​—2 Samuel 18:8, 9.

Yebetumi ahu sɛ ɛwom mpo sɛ na Basan yɛ Bɔhyɛ Asase no fã bi a nsɛm a Bible ka ho asɛm pii ansisi wɔ hɔ de, nanso ɛho mfonini ahorow ma yɛn Bible akenkan nya nkɔanim.

[Ase hɔ asɛm]

Hwɛ 1989 Calendar of Jehovah’s Witnesses no nso so.

[Mfonini Fibea wɔ kratafa 16]

Pictorial Archive (Near Eastern History) Est.

[Mfonini Fibea wɔ kratafa 17]

Pictorial Archive (Near Eastern History) Est.

Inset: Badè Institute of Biblical Archaeology

Pictorial Archive (Near Eastern History) Est.