Mfa Nsusuwii Hunu Nnaadaa Wo Ho

“DƐN na woayɛ yi?” Ɛyɛ bere a Hawa dii aduaba a na wɔabara sɛ ɛnsɛ sɛ wodi wiei no na Onyankopɔn bisaa no saa asɛm no. Hawa buae sɛ: “Ɔwɔ no na ɔdaadaa me ma midii.” (Gen. 3:13) Akyiri yi, wɔbɛfrɛɛ Satan a ɔyɛ ɔwɔ a n’ani atew no a ɔmaa Hawa yɛɛ Onyankopɔn so asoɔden no “ɔwɔ dedaw no, . . . a ɔredaadaa asase sofo nyinaa.”—Adi. 12:9.

Saa Genesis kyerɛwtohɔ yi ka Satan ho asɛm sɛ ɔyɛ onitefo, sɛ ɔyɛ obi a ɔka atosɛm a ne botae ne sɛ ɔde bɛdaadaa obi a n’ani nna ne ho so. Ɛda adi sɛ Hawa maa Satan daadaa no. Nanso, ɛnsɛ sɛ yenya adwene sɛ Satan nkutoo ne obi a obetumi adaadaa yɛn. Bible bɔ yɛn kɔkɔ nso wɔ asiane a ɛwom sɛ yɛde ‘nsusuwii hunu bɛdaadaa yɛn ho’ no ho.—Yak. 1:22.

Yebetumi anya adwene sɛ ɛrentumi mma da sɛ yɛn ankasa bɛdaadaa yɛn ho anaasɛ ɛrenyɛ yiye mpo. Nanso, biribi nti na Onyankopɔn de saa kɔkɔbɔ no mae. Enti, ɛsɛ sɛ yesusuw nea yɛyɛ a ebetumi ama yɛadaadaa yɛn ho ne nsusuwii hunu kõ a ebetumi adaadaa yɛn no ho. Asɛm bi a ɛwɔ Kyerɛwnsɛm no mu betumi aboa yɛn.

Sɛnea Ebinom Daadaa Wɔn Ho

Bɛyɛ afe 537 A.Y.B. mu na Kores Ɔkɛseɛ a ofi Persia no hyɛɛ mmara sɛ Yudafo a wɔwɔ nkoasom mu wɔ Babilon no nsan nkɔ Yerusalem na wɔnsan nkosi asɔrefie no. (Esra 1:1, 2) Afe a edi hɔ no, nkurɔfo no too asɔrefie foforo no fapem ma ɛne Yehowa atirimpɔw hyiae. Yudafo a wɔsan kɔɔ Yerusalem no dii ahurusi, na woyii Yehowa ayɛ sɛ ohyiraa asɔrefie a na wɔafi ase resi no so. (Esra 3:8, 10, 11) Nanso, ankyɛ na nkurɔfo sɔre tiaa ɔdan a na wɔresan asi no, na ɛmaa Yudafo no koma tui. (Esra 4:4) Bere a wɔsan baa Yerusalem akyi bɛyɛ mfe 15 no, Persia atumfoɔ no barae sɛ mma wonsisi adan biara wɔ Yerusalem. Nea ɛbɛyɛ na wɔahwɛ ma saa mmara no ayɛ adwuma no, amantam no mpanyimfo baa Yerusalem, na ‘wɔhyɛɛ Yudafo no ma wogyaee adwuma no.’—Esra 4:21-24.

Esiane sɛ wɔsɔre tiaa Yudafo no denneennen saa nti, Yudafo no de nsusuwii hunu daadaa wɔn ho. Wɔkae sɛ: “Bere nsoe sɛ wosi Yehowa fie no.” (Hag. 1:2) Wonyaa adwene sɛ Onyankopɔn mpɛ sɛ wosi asɔrefie no ntɛm ara. Sɛ́ anka wɔbɛfa ɔkwan bi so ayɛ Onyankopɔn apɛde no, wogyaee adwuma kronkron a na wɔreyɛ no, na wɔde wɔn adwene sii wɔn ankasa afie a na wobesiesie mu ma ayɛ fɛfɛɛfɛ no so. Onyankopɔn diyifo Hagai bisaa wɔn pefee sɛ: “Mo de, eye ma mo sɛ motete adan a wɔadi mu adwini mu bere a ofie [Yehowa asɔrefie] yi resɛe?”—Hag. 1:4.

So wuhu asuade bi wɔ saa asɛm yi mu? Sɛ yenya bere a Onyankopɔn atirimpɔw bɛba mu ho adwene a ɛnteɛ saa a, ebetumi ama yɛabu yɛn ani agu nneɛma a ɛfa yɛn som ho so na yɛama yɛn ankasa nneɛma a ɛho hia yɛn agye yɛn adwene. Mfatoho bi ni, fa no sɛ worehwɛ ahɔho bi kwan. Esiane sɛ worehwɛ wɔn kwan nti, ebetumi ama wode ahopere ayɛ nnwuma pii bere a woresiesie fie hɔ de asom wɔn hɔho no. Nanso, afei wunya nkra sɛ ɛbɛkyɛ kakra ansa na ahɔho no aba. So wubegyae nneɛma a woreyɛ de ahwɛ wɔn kwan no yɛ?

Kae sɛ, Hagai ne Sakaria boaa Yudafo no ma wɔtee ase sɛ na Yehowa da so ara hwɛ kwan sɛ wɔbɛsan asi asɔrefie no ntɛm ara. Hagai ka kyerɛɛ wɔn sɛ: “Asase no sofo nyinaa, . . . monhyɛ mo ho den, na monyɛ adwuma.” (Hag. 2:4) Ná ɛsɛ sɛ wɔkɔ so yɛ adwuma no, na wonya ahotoso sɛ Onyankopɔn honhom bɛboa wɔn. (Sak. 4:6, 7) So saa asɛm yi betumi aboa yɛn na amma yɛannya adwene sɛ Yehowa da no nnya mmae?—1 Kor. 10:11.

Fa Adwempa Si Nsusuwii Hunu Ananmu

Ɔsomafo Petro kaa “ɔsoro foforo ne asase foforo” a Yehowa de bɛba no ho asɛm wɔ ne krataa a ɛto so abien no mu. (2 Pet. 3:13) Ɔkae sɛ fɛwdifo bi kekaa nsɛm bi de kyerɛe sɛ Onyankopɔn remfa ne ho nnye nnipa nsɛm mu da. Fɛwdifo no dii mfomso kekae sɛ biribiara rensi, na “biribiara te sɛ nea [na] ɛte fi abɔde mfiase.” (2 Pet. 3:4) Ná Petro pɛ sɛ ɔbɔ nsusuwii hunu a ɛte saa no gu. Ɔkyerɛwee sɛ: “Merekaakae mo de akanyan mo adwene ma emu ada hɔ fann.” Ɔkaee ne mfɛfo Kristofo sɛ nsɛm a na fɛwdifo no rekeka no nyɛ nokware. Ná Onyankopɔn de ne ho agye adesamma nsɛm mu bere bi ma ɔde nsuyiri asɛe wiase nyinaa.—2 Pet. 3:1, 5-7.

Hagai de afotu a ɛte saa ara maa Yudafo a na wɔn koma atu ma wɔayɛ mmerɛw no wɔ afe 520 A.Y.B. mu. Hagai tuu wɔn fo sɛ: “Monhwɛ mo akwan yiye.” (Hag. 1:5) Nea ɛbɛyɛ na Hagai akanyan ne mfɛfo asomfo adwene no, ɔkaee wɔn Onyankopɔn atirimpɔw ne ne bɔhyɛ ahorow a na ɛfa Ne nkurɔfo ho no. (Hag. 1:8; 2:4, 5) Bere a ɔhyɛɛ wɔn nkuran no, ankyɛ koraa na wofii ase sii ɔdan no bio, ɛmfa ho sɛ na wɔabara wɔn. Atamfo no san bɔɔ mmɔden bio sɛ wɔbɛma wɔagyae ɔdan no si, nanso wɔantumi. Afei wɔmaa kwan sɛ wonsi ɔdan no ma enti wowiee asɔrefie no si wɔ mfe anum ntam.—Esra 6:14, 15; Hag. 1:14, 15.

Momma Yɛnhwɛ Yɛn Akwan Yiye

So wususuw sɛ sɛnea Yudafo no koma tui wɔ Hagai bere so no, sɛ nsɛnnennen sɔre a, yɛn nso yɛn koma betumi atu? Sɛ yɛn koma tu a, ebetumi ayɛ den ama yɛn sɛ yɛde nsi bɛkɔ so aka asɛmpa no. Nanso, dɛn na ebetumi ama yɛn koma atu? Esiane asisisɛm a ɛrekɔ so wɔ wiase yi mu nti, yɛn ankasa betumi ahu amane. Susuw Habakuk a obisaa asɛm a edi hɔ yi ho hwɛ. Obisae sɛ: “Minsu nkosi da bɛn ansa na woatie, ansa na woagye yɛn afi amumɔyɛsɛm mu?” (Hab. 1:2, Today’s English Version) Esiane sɛ ebinom betumi anya adwene sɛ ɛda no rekyɛ nti, ebetumi ama Kristoni bi werɛ afi sɛ nneɛma gye ntɛmpɛ, na ɔde n’adwene asi asetena pa a ɔbɛhwehwɛ so mmom. So wuhu sɛ woreyɛ ayɛ saa? Sɛ yenya adwene a ɛte saa a, na yɛredaadaa yɛn ho. Hwɛ sɛnea ɛho hia sɛ yetie afotu a Kyerɛwnsɛm no de ma sɛ ‘yɛnhwɛ yɛn akwan yiye’ na ‘yɛnkanyan yɛn adwene mma emu nna hɔ fann’ no! Yebetumi abisa yɛn ho sɛ, ‘So ɛsɛ sɛ ɛyɛ me nwonwa sɛ wiase bɔne yi atena hɔ akyɛ asen sɛnea na mehwɛ kwan no?’

Bere Bi a Bible Kae sɛ Yɛnhwɛ Kwan

Gye bere susuw asɛm a Yesu ka faa wiase yi awiei no ho hwɛ. Marko kyerɛwtohɔ a ɛfa nkɔm a Yesu hyɛ faa nna a edi akyiri no ho no ma yehu sɛ Yesu tuu yɛn fo mpɛn pii sɛ yɛnwɛn. (Mar. 13:33-37) Yehu kɔkɔbɔ a ɛte saa ara wɔ Yehowa da kɛse a ɛbɛba wɔ Harmagedon ho nkɔmhyɛ no mu. (Adi. 16:14-16) Dɛn nti na wɔbɔ yɛn kɔkɔ mpɛn pii saa? Esiane sɛ nkurɔfo adwene ayɛ wɔn sɛ wɔatwɛn bere tenten na ɛno betumi ama wɔn werɛ afi sɛ nneɛma gye ntɛmpɛ nti, yehia nkaesɛm a ɛte saa.

Yesu maa mfatoho de kyerɛɛ hia a ehia sɛ yɛkɔ so wɛn bere a yɛretwɛn wiase awiei no. Ɔkaa ofiewura bi a ɔkorɔmfo kowiaa ne fie nneɛma ho asɛm. Dɛn na anka obetumi ayɛ na amma ɔkorɔmfo no anwia no? Ná anka ɛsɛ sɛ ɔwɛn anadwo mũ no nyinaa. Yesu tuu yɛn fo de wiee mfatoho yi sɛ: “Munsiesie mo ho, efisɛ dɔn a mo ani nna so mu na onipa Ba no bɛba.”—Mat. 24:43, 44.

Saa mfatoho no ma yehu hia a ehia sɛ yesiesie yɛn ho sɛ yɛbɛtwɛn, sɛ mpo ɛsɛ sɛ yɛtwɛn bere tenten a, ɛsɛ sɛ yɛyɛ saa. Ɛnsɛ sɛ yɛma ɛhaw yɛn pii sɛ ebia wiase bɔne yi atena hɔ akyɛ asen sɛnea na yɛhwɛ kwan no. Ɛnsɛ sɛ yɛde nsusuwii hunu daadaa yɛn ho sɛ ‘Yehowa bere no nsoe.’ Sɛ yenya adwene a ɛte saa a, ɛbɛma ɔpɛ a yɛwɔ sɛ yɛbɛka Ahenni no ho asɛmpa no ano abrɛ ase.—Rom. 12:11.

Sɛnea Yebetutu Nsusuwii Hunu Ase

Nnyinasosɛm a ɛwɔ Galatifo 6:7 no fa nsusuwii hunu ho. Ɛhɔ ka sɛ: “Mommma wɔnnnaadaa mo . . . Nea onipa gu no, ɛno ara na obetwa.” Sɛ asase bi da hɔ na wɔangu so aba a, ɛnyɛ den koraa sɛ nwura begye afa. Saa ara na sɛ yɛankanyan yɛn adwene amma emu anna hɔ fann a, nsusuwii hunu betumi agye ntini wɔ yɛn adwene mu. Sɛ nhwɛso no, yebetumi aka wɔ yɛn tirim sɛ, ‘Yehowa da no bɛba ɔkwan biara so, nanso ɛnyɛ seesei.’ Sɛ yenya adwene a ɛte saa a, ebetumi ama yɛagow yɛn ho wɔ Yehowa som adwuma no mu. Bere bi akyi no, yebetumi abrɛ nsi a yɛde yɛ ɔsom adwuma no ase. Sɛ ɛba saa a, Yehowa da no betumi abɛto yɛn mpofirim.—2 Pet. 3:10.

Nanso, sɛ yɛkɔ so sɔ nea “Onyankopɔn pɛ a eye na ɛsɔ ani na edi mũ” no hwɛ na yehu a, nsusuwii hunu rennye ntini wɔ yɛn adwene mu. (Rom. 12:2) Nneɛma a yɛyɛ a ebetumi aboa yɛn paa ma yɛayɛ eyi no mu biako ne Onyankopɔn Asɛm a yɛbɛkenkan no daa. Kyerɛwnsɛm no betumi ama ahotoso a yɛwɔ sɛ Yehowa yɛ ade wɔ ne bere mu bere nyinaa no mu ayɛ den.—Hab. 2:3.

Sɛ yesua ade, yɛbɔ mpae, yɛkɔ asafo nhyiam daa, yɛka asɛm no, na yɛda ayamye adi kyerɛ afoforo a, ɛbɛma ‘Yehowa da no ba ayɛ ntɛm wɔ yɛn adwenem.’ (2 Pet. 3:11, 12) Yehowa behu sɛnea yɛde nnamyɛ som no daa no. Ɔsomafo Paulo kae yɛn sɛ: “Mommmrɛ papayɛ mu, na sɛ yɛampa abaw a, yebetwa so aba bere a ɛsɛ mu.”—Gal. 6:9.

Ɛda adi paa sɛ, ɛnyɛ ɛnnɛ ne bere a ɛsɛ sɛ yɛma nsusuwii hunu daadaa yɛn ma yenya adwene sɛ wɔatu Yehowa da no ahyɛ da. Mmom no, ɛnnɛ ne bere a ɛsɛ sɛ yɛma yɛn koma gyina pintinn, efisɛ Yehowa da no abɛn.

[Mfonini wɔ kratafa 4]

Hagai ne Sakaria hyɛɛ Yudafo no nkuran sɛ wonsi ɔdan no

[Mfonini wɔ kratafa 5]

Sɛ na ofiewura no nim sɛ ɔkorɔmfo no reba a, anka dɛn na ɔbɛyɛ?