Bible No Adwene

So Onyankopɔn Sakra?

NNIPA asetra ho nimdefo George Dorsey kaa “Apam Dedaw” no Nyankopɔn ho asɛm sɛ “Onyankopɔn tirimɔdenfo.” Ɔde kaa ho sɛ: “Yahweh . . . nni dɔ koraa. Ɔyɛ afowfo, ayayadeyɛfo, ne akofofo Nyankopɔn.” Afoforo aka nsɛm a ɛte saa ara afa “Apam Dedaw” no Nyankopɔn—Yahweh, anaa Yehowa no ho. Enti ɛnnɛ, ebinom ntumi nhu sɛ ebia na Yehowa yɛ Onyankopɔn tirimɔdenfo a bere bi akyi ɔsakraa ne suban bɛyɛɛ “Apam Foforo” no Nyankopɔn a ɔwɔ ɔdɔ ne mmɔborɔhunu.

Bible Nyankopɔn no ho nsusuwii a ɛte saa no nyɛ ade foforo. Marcion a ɔtraa ase wɔ afeha a ɛto so abien Y.B. mu a na ogye honhom mu Nimdeɛ-som fã bi di no na odii kan de bae. Marcion poo “Apam Dedaw” Nyankopɔn no. Obuu saa Nyankopɔn no sɛ basabasayɛfo ne ɔweredifo, otirimɔdenfo a ɔde honam fam nneɛma na etua n’asomfo ka. Nea ɛne eyi bɔ abira no, Marcion ka “Apam Foforo” Nyankopɔn no ho asɛm sɛ wɔnam Yesu Kristo so ada no adi—sɛ Onyankopɔn a ɔyɛ pɛ, Onyankopɔn a ɔwɔ dɔ ne mmɔborɔhunu ankasa, ɔdomfo a ɔde bɔne kyɛ.

Yehowa Di Tebea Horow a Ɛsakra no Ho Dwuma

Nea Onyankopɔn din paa a ɛne Yehowa no kyerɛ ne sɛ “Ɔma Ɛyɛ Hɔ.” Eyi kyerɛ sɛ Yehowa ankasa na ɔma Ne bɔhyɛ ahorow nyinaa bam. Bere a Mose bisaa Onyankopɔn din no, Yehowa kyerɛkyerɛɛ nea ne din no kyerɛ mu kɔɔ akyiri sɛ: “Mɛyɛ me ho sɛnea mɛyɛ.” (Exodus 3:14, NW) Rotherham nkyerɛase no ka no sɛ: “Mɛyɛ me ho sɛnea mepɛ biara.”

Enti Yehowa yɛ ne ho anaa ɔpaw sɛ ɔbɛyɛ nea ehia sɛ ɔyɛ biara na ɔde ama ne trenee atirimpɔw ne bɔhyɛ ahorow anya mmamu. Nea edi eyi ho adanse ne nokwasɛm a ɛyɛ sɛ ɔwɔ abodin pii: Asafo Yehowa, Ɔtemmufo, Otumfo, Oninkufo, Amansan Hene, Ɔbɔadeɛ, Agya, Ɔkyerɛkyerɛfo Kunini, Oguanhwɛfo, mpaebɔ Tiefo, Ogyefo, anigye Nyankopɔn, ne afoforo pii. Wapaw sɛ ɔbɛyɛ eyinom nyinaa—ne afoforo pii—sɛnea ɛbɛyɛ a obedi n’atirimpɔw a ɔdɔ wom no ho dwuma.—Exodus 34:14; Atemmufo 11:27; Dwom 23:1; 65:2; 73:28; 89:26: Yesaia 8:13; 30:20; 40:28: 41:14; 1Timoteo 1:11.

Nanso, so eyi kyerɛ sɛ Onyankopɔn nipasu anaa ne gyinapɛn ahorow sakra? Dabi. Yakobo 1:17 ka Onyankopɔn ho asɛm sɛ: “Ɔno na nsakrae ne adannan sunsuma nni ne mu.” Ɔkwan bɛn so na Onyankopɔn tumi di tebea horow a ɛsakra ho dwuma bere a ɔno ankasa nsakra?

Sɛ́ nhwɛso no, awofo a wodwen wɔn mma ho a mmofra no yiyedi nti wodi asɛyɛde ahorow ho dwuma no kyerɛkyerɛ sɛnea eyi tumi yɛ yiye no mu. Da koro pɛ, ɔwofo betumi ayɛ oduannoafo, ofisiesiefo, anyinam ahoɔden ho dwumayɛni, ɔyarehwɛfo, adamfo, ofotufo, ɔkyerɛkyerɛfo, obi a ɔde nteɛso ma, ne afoforo pii. Ɔwofo no nsakra ne nipasu bere a ɔredi saa asɛyɛde ahorow yi ho dwuma no; ɔyɛ nea ɛbɛma wadi ahiade ahorow a odi ho dwuma no so. Saa na Yehowa te, nanso ne de no korɔn sen saa koraa. Anohyeto biara nni sɛnea obetumi ayɛ ne ho de adi n’atirimpɔw ho dwuma no mu na ama n’abɔde anya so mfaso.—Romafo 11:33.

Sɛ nhwɛso no, Hebri ne Kristofo Hela Kyerɛwnsɛm abien no nyinaa ka Yehowa ho asɛm sɛ Onyankopɔn a ɔwɔ ɔdɔ ne mmɔborɔhunu. Odiyifo Mika a ɔtraa ase afeha a ɛto so awotwe A.Y.B. no bisaa Yehowa ho asɛm sɛ: “Hena ne Onyankopɔn sɛ wo a wode amumɔyɛ firi na wutwa mmarato ho ma w’agyapade nkae no? Ɔrenso n’abufuw mu daa, na adɔe mmom na ɔpɛ.” (Mika 7:18) Saa ara nso na ɔsomafo Yohane kyerɛw nsɛm a agye din yi sɛ: “Onyankopɔn ne dɔ.”—1 Yohane 4:8.

Ɔkwan foforo so no, Bible afa abien no nyinaa da Yehowa adi sɛ Obu wɔn a wɔhyɛ da bu ne mmara so na wɔhaw afoforo, a wɔnsakra wɔn adwene no atɛn trenee mu. Odwontofo no kae sɛ: “[Yehowa] bɛsɛe abɔnefo nyinaa.” (Dwom 145:20, NW) Yohane 3:36 nso ka sɛ: “Nea ogye ɔba no di no wɔ daa nkwa; na nea ontie ɔba no no renhu nkwa, na Onyankopɔn abufuw da no so.”

Ɔnsakra Ne Su Horow

Yehowa nipasu ne ne su atitiriw—ɔdɔ, nyansa, atɛntrenee, ne tumi—nsakrae. Osee Israelfo no sɛ: “Mene Yehowa; Mensakrae.” (Malaki 3:6, NW) Na eyi bɛyɛ bere a Onyankopɔn bɔɔ nnipa akyi mfe 3,500. Nea ɛne saa asɛm a Onyankopɔn kae yi hyia no, Bible mũ no mu nhwehwɛmu da no adi sɛ Onyankopɔn nsakra ne gyinapɛn ne ne su horow. Yehowa Nyankopɔn nipasu ansakra wɔ mfeha pii a atwam no mu, esiane sɛ na enhia sɛ ɛsakra.

Sɛnea Onyankopɔn ntoto ade treneeyɛ ase a ɛda adi wɔ Bible no mu nyinaa no nyɛ ketewaa bi na saa ara nso na ne dɔ nyɛɛ kɛse nsen sɛnea na ɛte bere a ofii ase ne nnipa dii wɔ Eden no. Nsonsonoe a ɛwɔ ne nipasu mu a ɛte sɛ nea ɛda adi wɔ Bible no afa horow mu no yɛ ne saa nipasu a ɛnsakra no ara afa horow bi ankasa. Na eyi fi tebea ne nnipa a wogu ahorow a ɔne wɔn dii a ɛhwehwɛ su anaa abusuabɔ a egu ahorow.

Enti Kyerɛwnsɛm no da no adi pefee sɛ Onyankopɔn nipasu nsakrae wɔ mfeha pii a atwam no mu na ɛrensakra daakye nso. Yehowa yɛ obi a ɔnsakra da ho nhwɛso a ɛkyɛn biara. Ɔyɛ ɔnokwafo bere nyinaa. Yebetumi de yɛn ho ato no so daa.

[Mfonini ahorow wɔ kratafa 18, 19]

Onyankopɔn a ɔsɛee Sodom ne Gomora no . . .

. . . ara de trenee wiase foforo bɛba