Edin a Ɛkorɔn Sen Biara no ho Ahintasɛm a Wɔma Emu Da Hɔ

Ɛyɛ anigye sɛ Nkramofo Koran ne Kristofo Bible no nyinaa ka edin a ɛkorɔn sen biara no ho asɛm. Saa asɛm yi kyerɛkyerɛ edin a ɛkorɔn sen biara no ase ne ɛso mfaso. Ɛsan kyerɛ sɛnea saa din no ka adesamma nyinaa ne yɛn daakye wɔ asase so.

MMARIMA ne mmea ɔpepem pii abɛtra asase yi so awuwu kɔ. Wɔn mu pii din ayera wɔ wɔn wu akyi, na wɔnkae wɔn bio. Nanso wɔda so ara kae din akɛse binom​—te sɛ Avicenna Edison, Pasteur, Beethoven, Gandhi, ne Newton. Wɔde din ahorow yi abata nneɛma akɛse a wɔn a wokura no yɛe, ne nea wohui ho.

Nanso, edin bi wɔ hɔ a ɛkorɔn sen afoforo nyinaa. Tete ne nnɛyi anwonwade a ɛwɔ amansan yi mu nyinaa bata ho. Hwɛ, nkwa tenten ne asetra a anigye wom a adesamma hwehwɛ no bata saa din yi ho!

Nnipa pii ahwehwɛ sɛ wobehu saa din yi. Wɔahwehwɛ, na wɔabisa ho asɛm, nanso wonhui. Wɔ wɔn fam no, akɔ so ayɛ ahintasɛm. Nokwarem no, obiara ntumi nhu saa din no, gye sɛ ne Wura no yi no adi kyerɛ no. Anigyesɛm ne sɛ, wɔama edin a enni sɛso yi ho ahintasɛm no mu ada hɔ. Onyankopɔn ankasa na wayɛ eyi sɛnea ɛbɛyɛ a, wɔn a wogye no di betumi ahu ne ho nsɛm. Oyii ne din adi kyerɛɛ Adam, na ɛno akyi no, Abraham; afei oyi kyerɛɛ Mose, ne afei tete asomfo anokwafo afoforo.

Edin a Ɛkorɔn Sen Biara no a Wɔhwehwɛ

Koran no ka obi ho asɛm sɛ “na onim Kyerɛwnsɛm no mu yiye.” (27:40) Bere a nkyerɛkyerɛmu nhoma bi a wɔfrɛ no Tafsīr Jalālayn rekyerɛkyerɛ nkyekyem yi mu no, ɛka sɛ: “Ná Barkhiyā ba Asaf yɛ ɔtreneeni. Ná onim Onyankopɔn din a ɛkorɔn sen biara, na bere biara a ɔbɔe no, wotiee no.” Eyi kae yɛn Bible ɔkyerɛwfo Asaf, a ɔkae wɔ Dwom 83:18 sɛ: “Na wonhu sɛ wo a wo din de [Yehowa] no, wo nko ara ne ɔsorosoroni, asase nyinaa so.”

Yɛkenkan wɔ Koran 17:2 sɛ: “Yɛde Kyerɛwnsɛm no maa Mose, na yɛma ɛkyerɛɛ Israelfo no kwan.” Wɔ saa Kyerɛwnsɛm no mu no, Mose ka kyerɛɛ Onyankopɔn sɛ: “Na sɛ midu Israelfo nkyɛn, na meka mekyerɛ wɔn sɛ: Mo agyanom Nyankopɔn na asoma me mo nkyɛn, na wɔka kyerɛ me sɛ: Ne din de dɛn a, dɛn na minse wɔn?” Onyankopɔn buaa Mose se: “Ka kyerɛ Israel mma sɛ: [Yehowa], mo agyanom Nyankopɔn, Abraham Nyankopɔn, Isak Nyankopɔn ne Yakob Nyankopɔn na wasoma me mo nkyɛn yi, eyi ne me din de kosi daa.”​—Exodus 3:13, 15.

Wɔ tete mmere mu no, na Israelfo no nim Onyankopɔn din kɛse yi. Ná wɔde ka wɔn ankasa din ho mpo. Sɛnea edin Abdulla, a ɛkyerɛ sɛ “Onyankopɔn Ɔsomfo” wɔ hɔ nnɛ no, saa ara na na tete Israelfo wɔ edin Obadia, a ɛkyerɛ sɛ “Yehowa Ɔsomfo.” Ná wɔfrɛ odiyifo Mose maame Yokebed, a ɛbɛyɛ sɛ ɛkyerɛ sɛ “Yehowa Ne Anuonyam.” Edin Yohane kyerɛ sɛ “Yehowa Akyerɛ Ayamye.” Na odiyifo Elia din kyerɛ sɛ “Me Nyankopɔn Ne Yehowa.”

Ná adiyifo no nim saa din kɛse yi na wɔde dii dwuma wɔ obu a emu dɔ mu. Epue wɔ Kyerɛw Kronkron no mu bɛboro mpɛn 7,000. Yesu Kristo, Maria ba no, sii so dua wɔ mpae a ɔbɔɔ Onyankopɔn mu sɛ: “Mayi wo din adi makyerɛ nnipa a wɔde wɔn fi wiase ama me no . . . mayi wo din makyerɛ wɔn, na meyi makyerɛ; na ɔdɔ a wode dɔ me no atra wɔn mu.” (Yohane 17:6, 26) Wɔ ne nhoma a agye din a ɔde kyerɛkyerɛ Koran mu no mu no, Bayḍāwī ka Koran 2:87 ho asɛm sɛ na Yesu “de Onyankopɔn din kɛse no nyan awufo.”

Ɛnde, dɛn na esii maa din no bɛyɛɛ ahintasɛm? Dɛn na saa din no ne yɛn mu biara daakye wɔ yɛ?

Ɛyɛɛ Dɛn na Edin no Bɛyɛɛ Ahintasɛm?

Ebinom susuw sɛ wɔ Hebri mu no “Yehowa” kyerɛ “Allah” (Onyankopɔn). Nanso “Allah” te sɛ Hebri din ‘Elo-him’, a ɛyɛ ‘elo-h’ah (onyame) dodow kabeɛ a egyina hɔ ma kɛseyɛ. Gyidihunu bi sɔree wɔ Yudafo no mu, na amma wɔammɔ edin kronkron, a ɛne Yehowa no. Enti, ɛbɛyɛɛ wɔn amanneɛ sɛ, sɛ wɔrekenkan Kyerɛw Kronkron no na sɛ wohu edin Yehowa a, wɔka sɛ ‘Adho-nai’, a ɛkyerɛ “Awurade.” Wɔsakraa mfiase Hebri nkyerɛwee no afã bi mpo fii “Yehowa” yɛɛ no ‘Adhonai’.

Kristoman nyamesom akannifo nso yɛɛ saa ara. Wɔde “Onyankopɔn” (“Allah” wɔ Arabik mu) ne “Awurade” sii din Yehowa ananmu. Ɛboa maa wonyaa atoro nkyerɛkyerɛ a ɛne Baasakoro, a enni nnyinasoɔ biara wɔ Kyerɛw Kronkron mu no. Esiane eyi nti, ɔpepem pii di mfomso som Yesu ne honhom kronkron no, na wobu wɔn sɛ wɔne Onyankopɔn yɛ pɛ.’a

Enti, Yudasom ne Kristoman akannifo nso di fɔ wɔ edin a ɛkorɔn sen biara a nnipa pii nnim no ho. Nanso Onyankopɔn hyɛɛ nkɔm sɛ: “Mɛyɛ me din kokuroko . . . na amanaman no ahu sɛ mene [Yehowa].” Yiw, Yehowa bɛma amanaman no nyinaa ahu ne din. Dɛn nti? Efisɛ ɔnyɛ Yudafo no anaa ɔman anaa abusua biako biara Nyankopɔn kɛkɛ. Yehowa yɛ adesamma nyinaa Nyankopɔn.​—Hesekiel 36:23; Genesis 22:18; Dwom 145:21; Malaki 1:11.

Edin a Ɛkorɔn Sen Biara no ne Yɛn Daakye

Kyerɛw Kronkron no se: “Obiara a ɔbɛbɔ [Yehowa] din no benya nkwa.” (Romafo 10:13) Nkwa a yebenya wɔ atemmu da no mu no begyina Onyankopɔn din a yenim no so. Ne su horow, ne nnwuma, ne n’atirimpɔw ahorow a obi behu na watra ase ma ɛne ne nnyinasosɛm ahorow a ɛkorɔn no ahyia no ka ne din a obi behu no ho. Sɛ́ nhwɛso no, na Abraham nim Onyankopɔn din na ɔfrɛɛ saa din no. Ɛno nti, ɔne Onyankopɔn nyaa abusuabɔ pa, kyerɛɛ ne mu gyidi, de ne ho too no so, na otiee no. Enti Abraham bɛyɛɛ Onyankopɔn adamfo. Saa ara na Onyankopɔn din a yenim no twe yɛn bɛn no, na ɛboa yɛn ma yɛn ankasa ne no nya abusuabɔ pa, na yekura ne dɔ no mu.​—Genesis 12:8; Dwom 9:10; Mmebusɛm 18:10; Yakobo 2:23.

Yɛkenkan wɔ Bible no mu sɛ: “[Yehowa] yɛɛ asõ na ɔtee, na wɔkyerɛw n’anim nkae nhoma maa wɔn a wosuro [Yehowa] na wobu ne din no.” (Malaki 3:16) Dɛn nti na ɛsɛ sɛ ‘yebu’ edin a ɛkorɔn sen biara no? Nea edin Yehowa no kyerɛ ankasa ne sɛ “Ɔma Ɛbam.” Eyi da Yehowa adi sɛ Onii a n’ankasa Ma ne bɔhyɛ ahorow nya mmamu. Ɔma n’atirimpɔw ahorow ba mu. Ɔno ne ade nyinaa so tumfoɔ Onyankopɔn, Ɔbɔadeɛ koro no, a okura su pa biara bi. Asɛmfua biako biara nni hɔ a wobetumi de akyerɛkyerɛ Onyankopɔn nyamesu mu yiye. Nanso Onyankopɔn ankasa maa ne ho din a ɛkorɔn sen biara no​—Yehowa​—na ɛtwe adwene si ne su ne n’atirimpɔw ahorow so.

Wɔ Kyerɛw Kronkron no mu no, Onyankopɔn ka atirimpɔw a ɔwɔ ma adesamma ho asɛm kyerɛ yɛn. Yehowa Nyankopɔn bɔɔ nnipa sɛ wonya anigye asetra daa wɔ Paradise. Ɔpɛ sɛ nnipa nyinaa yɛ abusua biako, a ɔdɔ ne asomdwoe aka wɔn abom. Ɔdɔ Nyankopɔn no bɛma saa atirimpɔw yi abam daakye a enni akyiri.​—Mateo 24:3-14, 32-42; 1 Yohane 4:14-21.

Onyankopɔn kyerɛ nea enti a adesemma hu amane no, na ɔda no adi sɛ nkwagye betumi ayɛ yiye (Adiyisɛm 21:4) Yɛkenkan wɔ Dwom 37:10, 11 sɛ: “Aka kakraa sɛ na ɔbɔnefo nni hɔ, na wɔhwehwɛ ne trabere a, na onni hɔ. Na ahobrɛasefo benya asase no adi, na wɔagye wɔn ani asomdwoe bebree mu.”​—Hwɛ Koran 21:105 nso mu.

Yiw wɔnam Onyankopɔn din kɛse no so behu no. Amanaman no behu sɛ ɔne Yehowa. Hokwan nwonwaso bɛn ara na ɛyɛ sɛ yebehu edin a ɛkorɔn sen biara no, adi ho adanse, na yɛabata ho! Wɔ saa kwan no so no, Onyankopɔn atirimpɔw a ɛyɛ anigye yi bɛbam wɔ yɛn mu biara ho: “Na sɛ ɔfam me ho yi, megye no, mɛma no so, na onim me din. Osu frɛ me, na megye no so. . . .Mɛma wadi nkwa tenten amee, na mama wahu me nkwagye.”​—Dwom 91:14-16.

[Ase hɔ asɛm]

[Mfonini wɔ kratafa 5]

Wɔ wura a ɛrehyew no mu no, Onyankopɔn daa ne ho adi kyerɛɛ Mose sɛ ‘Yehowa, Abraham Nyankopɔn’

[Mfonini Fibea]

Moses and the Burning Bush, a W. Thomas, Sr. kyerɛwee