Kyerɛwnsɛm Mu Asuade Ahorow: Malaki 1:1–4:6

Nokware Awurade Reba Abebu Ntɛn

“ONYANKOPƆN ɔsom yɛ ɔkwa.” (Malaki 3:14) Onyankopɔn ankasa nkurɔfo na wɔdaa saa adwenem naayɛ no adi bere a Malaki hyɛɛ nkɔm wɔ afeha a ɛto so anum A.Y.B. mu no. Dɛn ntia? Efisɛ na wɔyɛ nneɛma bɔne wɔ Yuda, ne titiriw asɔfo no mu. Na wɔn botae titiriw ne pɛsɛmenkominya mfaso. Malaki paa saa nyamesom akannifo nyaatwomfo no ho ntama wɔ ɔkwan a ɛyɛ tẽẽ na ahoɔden wom so na ɔde kɔkɔbɔ mae sɛ nokware Awurade no reba abebu ntɛn​—Malaki 1:6-8; 2:6-9; 3:1.

Malaki nkɔmhyɛ no wɔ mmamu bi wɔ yɛn bere yi so. Enti, eye sɛ yebesusuw asuade ahorow a ɛwom no ho.

Onyankopɔn Din a Wobu No Animtiaa

Yehowa hwɛ kwan sɛ ne nkurɔfo de nea eye sen biara bɛma no. Onyankopɔn di kan da ɔdɔ a ɔwɔ ma ne nkurɔfo adi. Nanso, asɔfo no rebu ne din animtiaa denam mmoa afurafo, ayarefo, ne apakye a wogye fi nnipa no nkyɛn de bɔ afɔre ma no no so. Na Yehowa ani nnye asɔfo a wɔsom wɔn ankasa ho anaasɛ wɔde wɔn nsam ayɛyɛde a ɛnsom bo ma no ho. Nanso sɛnea wɔyɛ biara mfa ho, Yehowa ‘din ho bɛyɛ hu, amanaman no mu.’​—1:1-14.

Wɔn a wɔyɛ akyerɛkyerɛfo wɔ asɛyɛde a emu yɛ duru. (Yakobo 3:1) Na asɔfo no ama “nnipa bebree ahintiw mmara no.” Ɔkwan bɛn so? Ɛdenam tumi a wɔantumi ankyerɛkyerɛ nnipa no Onyankopɔn mmara ne denam nnipa animhwɛ a wɔdaa no adi no so. Ɛteɛ sɛ Yehowa bo fuw wɔn, ‘efisɛ ɔsɔfo ano kora nimdeɛ, na wɔhwehwɛ mmara fi n’anom.’​—2:1-9.

Yehowa ani bere wɔn a wobu aware nhyehyɛe no animtiaa no so. Nea ɛne Onyankopɔn mmara bɔ abira no, na Yuda mmarima akɔwareware mmea ananafo. (Deuteronomium 7:3, 4) Na wɔne wɔn mmerantebere mu yerenom adi no ɔkwammɔne so denam gyae a wogyaee wɔn aware no so. Malaki bɔ kɔkɔ sɛ Yehowa ‘tan awaregu.’​—2:10-17.

Atemmu ne Nan a Wɔnan Wɔn De Tew Wɔn Ho

Yehowa nnya bɔne ho koma daa. ‘Nokware Awurade’ no bɛba n’asɔrefi a “apam bɔfo” no ka ne ho. Ɔbɛnan Lewi mma no na wɔatew wɔn ho. Yehowa bɛyɛ ɔdansefo a ne ho yɛ hare a ɔsɔre tia ntafowayifo, awaresɛefo, wɔn a wɔkeka ntanhunu, amimfo ne nhyɛsofo.​—3:1-5.

Wɔn a wɔde wɔn ayɛyɛde kame Yehowa no ankasa redan wɔn ho ahiafo. Yehowa nsakra. Sɛ nnipa asowuifo no san ba ne nkyɛn a, ofi mmɔborohunu mu bɛsan akɔ wɔn nkyɛn. Na wɔnam wɔn ntotoso du du ne ntoaboa ahorow a wɔde kame Onyankopɔn no so rebɔ no korɔn. Nanso sɛ wɔde ntotoso du du no ba, Yehowa hyɛ bɔ sɛ obehyira wɔn ‘ma aboro so.’ Wobenya nnɔbae daa.​—3:6-12.

Yehowa ani wɔ ne nkurɔfo so. Onyankopɔn ne wɔn a wɔakasa atia no denneennen no ham. Nea ɛne eyi bɔ abira no, ɔyɛ aso tie wɔn a wosuro no no yiye. Wɔbɛkyerɛw “nkae nhoma” ama wɔn a “wobu ne din” no. Ne nkurɔfo behu nsonoe a ɛda ɔtreneeni ne ɔbɔnefo ntam.​—3:13-18.

Yehowa Da no Reba!

Yehowa da no bɛkyerɛ ɔsɛe pasaa ama abɔnefo. Yehowa da reba, na abɔnefo bɛhyew sɛ sakran a ɛwɔ fononoo a ogya dɛw wom mu. Wɔbɛsɛe wɔn a wɔrennyaw ‘wɔn ntini anaa bãa.’ Wɔn a wosuro Yehowa din de, wobenya “trenee awia” mu ayaresa mu mfaso. Ansa na da a ɛyɛ hu yi bɛba no, Yehowa bɛsoma odiyifo Elia ma wabɛyɛ ɔsesɛw adwuma bi.​—4:1-6.

Asuade ma nnɛ: Sɛ ɛba ɔsom so a, Yehowa hwehwɛ sɛ ne nkurɔfo de nea eye sen biara bɛma no. (Fa toto Mateo 22:37, 38 ho.) Onyankopɔn Asɛm ho akyerɛkyerɛfo wɔ asɛyɛde a ɛne sɛ wɔbɛkyerɛkyerɛ yiye na wɔakyerɛ afoforo kwan wɔ nokware som mu. Eye sɛ yɛbɛkae sɛ atɛntrenee Nyankopɔn no aniwa rehwɛ wɔn a wɔnkyerɛ nidi a ɛfata mma aware ne wɔn a wɔyɛ bɔne no. Ɛmmra sɛ yɛbɛbrɛ yɛn ho ase ama nokware Awurade no adenan ne ahotew adwuma no bere a yɛde ahopere hwɛ ‘Yehowa da kɛse a ɛyɛ hu no ba’ kwan no!

[Adaka wɔ kratafa 30]

BIBLE MU NSƐM A WƆAHWEHWƐ MU

○ 1:10​—Na asɔfo pɛsɛmenkominyafo ne sikaniberefo no resom esiane mfaso a wɔn ankasa benya nti. Na wogye sika wɔ asɔrefi nnwuma a esua koraa te sɛ apon mu a wɔtoto anaasɛ afɔremuka so gya a wɔsɔ no ho. Ɛnyɛ nwonwa sɛ ‘na wɔn nsam ayɛyɛde nyɛ Yehowa fɛ’!

○ 1:13​—Na asɔfo a wonni gyidi no bu afɔrebɔ ahorow no sɛ guasodeyɛ bi a ɔbrɛ wom, adesoa. Na wɔpeepee Yehowa akronkronne anaasɛ wobu no animtiaa. Mommma yɛmmfa ‘yɛn ano anantwinini’ no mma sɛ biribi a ɛsɛ sɛ yɛde ma ara kwa!​—Hosea 14:2; Hebrifo 13:15.

○ 2:13​—Na Yudafo okununom pii regyae wɔn mmerantebere mu yerenom, ebia sɛnea ɛbɛyɛ na wɔakɔware abosonsomfo mmea a wonnyinii sɛ wɔn. Na nusu akata Yehowa afɔremuka so​—ɛda adi sɛ na ɛyɛ ɔyerenom a wɔapow wɔn a wɔbaa trabea hɔ bɛdaa wɔn awerɛhowdi wɔn Onyankopɔn anim no nusu.​—Malaki 2:11, 14, 16

○ 3:1​—​—‘Nokware Awurade’ no ne Yehowa Nyankopɔn, na “apam bɔfo” no ne Yesu Kristo. Nkɔmhyɛ no nyaa ne mmamu a edi kan bere a Yesu bɛtew asɔrefi hɔ no. (Marko 11:15-17) Eyi sii wɔ bere a wɔsraa no sɛ Ɔhene a Wɔapaw no no akyi mfe abiɛsa ne fã. Saa ara nso na wɔ bere a wosii Yesu Hene1914 wɔ ofupɛ bere mu akyi mfe abiɛsa ne fã no, ɔne Yehowa baa honhom mu asɔrefi no mu na ohui sɛ ehia sɛ wɔnan Onyankopɔn nkurɔfo na wɔtew wɔn ho.

○ 3:2, 3​—Na ade a wɔnan tete no gye bere. Enti na ɔnanfo no taa ‘tra ase’ kosi sɛ ade no ho bɛtew na ahyerɛn te sɛ ahwehwɛ a wɔapopa anim yiye a obetumi ahu ne ho wom. Saa ara nso na Yehowa akɔ so anan ne nkurɔfo nnɛ na wayi nkyerɛkyerɛ ne nneyɛe a ɛho ntew agu. Eyi aboa wɔn ma wɔada ne su adi pɛpɛɛpɛ.​—Efesofo 5:1.

○ 4:2​—Eyi yɛ daa nhyira a wɔn a wosuro Onyankopɔn din benya no ho nkyerɛkyerɛmu. Wɔwɔ anidaso a ɛne sɛ wɔbɛto owia a ɛne Onyankopɔn anim dom bere a wɔasa honam mu, adwene mu, ne nkate mu nyarewa a ahaw adesamma abusua no.​—Adiyisɛm 21:3, 4.

○ 4:5​—Odiyifo Elia traa ase bɛyɛ mfe 500 ansa na wɔrehyɛ nkɔm yi. Wɔ afeha a edi kan Y.B. mu no. Yesu Kristo huu Osuboni Yohane sɛ Elia nsusuwso a wɔkaa ne ho asɛm siei no. (Mateo 11:12-14; Marko 9:11-13) Nanso, na “Elia” bɛyɛ “[Yehowa] da” no dikanfo, kyerɛ sɛ ɛbɛsan anya mmamu bio wɔ bere a Kristo ‘aba’ yi mu.​—2 Tesalonikafo 2:1, 2.

[Mfonini wɔ kratafa 31]

Wɔ Yesu asase so som adwuma no mu no, ɔtew asɔrefi hɔ. Ɔne Yehowa baa honhom mu asɔrefi hɔ betew Onyankopɔn nkurɔfo ho wɔ 1918 mu