Bible No Adwene

Wobɛyɛ Dɛn Asiesie Wo ne Afoforo Ntam?

BIBLE no ka nnipa ho asɛm sɛ: “Wɔn nyinaa ayɛ bɔne na wonnu Onyankopɔn anuonyam ho.” (Romafo 3:23) Esiane sɛ nnipa bɛboro ɔpepepem ason a wɔte asase so no nyɛ pɛ nti, ɛnyɛ dɛn ara a, obi ne obi betumi anya asɛm. Yɛbɛyɛ dɛn asiesie yɛne afoforo ntam wɔ tebea horow a ɛtete saa mu?

Bible no de afotu pa ma. Ɛka Ɔbɔadeɛ no ho asɛm sɛ ɔyɛ “asomdwoe Nyankopɔn,” a ne din de Yehowa. (Hebrifo 13:20; Dwom 83:18) Onyankopɔn pɛ sɛ ne mma a wɔwɔ asase so no ne wɔn ho wɔn ho tena wɔ asomdwoe mu. Wɔ eyi mu no, Nyankopɔn yɛ ho nhwɛso ma yɛn. Bere a awarefo a wodi kan no yɛɛ bɔne tiaa Onyankopɔn ma ɛsɛee wɔne no ntam no, ntɛm ara na ɔyɛɛ nhyehyɛe a ɔde besiesie ɔne nnipa a wabɔ wɔn no ntam. (2 Korintofo 5:19) Susuw nneɛma abiɛsa a wubetumi ayɛ de asiesie wo ne afoforo ntam no ho hwɛ.

Fa Bɔne Firi Korakora

Dɛn na Bible no ka? “Sɛ obi wɔ asɛm tia ne yɔnko a, monkɔ so nnya mo ho abotare na momfa mfirifiri mo ho korakora. Sɛnea Yehowa de afiri mo no, mo nso monyɛ saa ara.”—Kolosefo 3:13.

Dɛn na ɛma ɛyɛ den? Ebia wowɔ ‘asɛm bi tia wo yɔnko’ na wote nka sɛ w’asɛm yɛ dɛ enti ɛsɛ sɛ wo ne no twa abusuabɔ mu. Ebi nso a wubesusuw sɛ ɛsɛ sɛ nea wafom wo no di kan pa wo kyɛw. Nanso sɛ onii no nnim mfomso a wadi, anaa osusuw sɛ wo mmom na woadi mfomso a, ɛnde ɛbɛyɛ den sɛ mubesiesie mo ntam.

Dɛn na wubetumi ayɛ? Tie Bible afotu na fa firi onii no korakora, titiriw bere a ɛnyɛ mfomso a anibere wom pii no. Na kae sɛ, sɛ mfomso na Onyankopɔn hwɛ a, anka yɛrentumi nnyina n’anim. (Dwom 130:3) Bible no ka sɛ, “Yehowa yɛ mmɔborɔhunufo ne ɔdomfo, ne bo kyɛ fuw na n’adɔe dɔɔso. Onim yɛn nipaban; ɔkae sɛ yɛyɛ mfutuma.”—Dwom 103:8, 14.

Afei susuw Bible mu abebusɛm yi ho hwɛ: “Onipa nhumu twentwɛn n’abufuw ase, na ɛyɛ anuonyam ma no sɛ obebu n’ani agu bɔne so.” (Mmebusɛm 19:11) Nhumu boa ma yehu nneɛma kɔ akyiri, na ɛma yehu nea enti a nnipa bi ka nsɛm anaasɛ wɔyɛ nneɛma bi no. Enti bisa wo ho sɛ, ‘So na onii a ɔfom me no abrɛ, ɔyare, anaa na ɔwɔ ahokyere mu?’ Hu a wubehu adwene ankasa a afoforo kura, wɔn nkate, ne wɔn nsɛm tebea no bɛma woahyɛ w’abufuw so na aboa ma woanya wɔn sintɔ ho koma.

Monka Ho Asɛm

Dɛn na Bible no ka? “Sɛ wo nua yɛ bɔne bi a, kɔda ne mfomso adi kyerɛ no wo ne ɔno nkutoo ntam. Sɛ otie wo a, woanya wo nua.”—Mateo 18:15.

Dɛn na ɛma ɛyɛ den? Atenka bɔne te sɛ ehu, abufuw ne aniwu nti, ebetumi ayɛ den sɛ wobɛkɔ onii a wayɛ wo bɔne no hɔ na wo ne no asiesie mo ntam. Ebia ɛbɛyɛ wo sɛ ka asɛm no kyerɛ afoforo na wɔntaa w’akyi, nanso ɛno bɛma asɛm no mu atrɛw na ayɛ den sɛ mubesiesie.

Dɛn na wubetumi ayɛ? Sɛ ɛyɛ aniberesɛm a wote nka sɛ worentumi mmu w’ani ngu so a, kɔ onipa no nkyɛn na wo ne no nkɔka ho asɛm. Bɔ mmɔden sɛ wobɛfa akwan a edidi so yi so adi ho dwuma:

(1) Ntwentwɛn wo nan ase: Nyɛ mmɔtohɔ. Sɛ woyɛ saa a, ɔhaw no mu bɛkɔ so ayɛ den. Bɔ mmɔden sɛ wode Yesu afotu yi bɛyɛ adwuma: “Afei sɛ wode w’akyɛde reba afɔremuka ho na wokae wɔ hɔ sɛ wo nua wɔ biribi tia wo a, gyaw w’akyɛde no afɔremuka no anim na kɔ; di kan ne wo nua no nkosiesie mo ntam, na sɛ wosan ba a, woabɛbɔ w’afɔre.”—Mateo 5:23, 24.

(2) Yɛ no kokoam: Kwati sɛ wubedi ho nseku akyerɛ afoforo. “Asɛm a ɛwɔ wo ne wo yɔnko ntam no, wo ne no nni, na nyi obi ahintasɛm adi.”—Mmebusɛm 25:9.

(3) Yɛ no asomdwoe mu: Bɔ mmɔden sɛ worenhwehwɛ nea odi bem anaa odi fɔ wɔ asɛm no mu. Wo botae ara ne sɛ mubesiesie mo ntam, ɛnyɛ sɛ wubedi bem. Fa asɛmfua “me” di dwuma wɔ wo kasa mu sen sɛ wode asɛmfua “wo” bedi dwuma. Sɛ woka kyerɛ onii no sɛ “midi yaw paa efisɛ . . . ” a, eye sen sɛ wobɛka sɛ: “Woama midi yaw paa!” Bible no ka no saa kwan yi so sɛ: “Momma yenni nneɛma a ɛde asomdwoe ba, ne nneɛma a ɛhyɛ yɛn den akyi.”—Romafo 14:19.

Nya Abotare

Dɛn na Bible no ka? “Mommfa bɔne nntua obiara bɔne so ka. . . . Mmom no, ‘sɛ ɔkɔm de wo tamfo a, ma no biribi nni; sɛ osukɔm de no a, ma no biribi nnom.’”—Romafo 12:17, 20.

Dɛn na ɛma ɛyɛ den? Sɛ mfiase no onii no antie wo a, ebia ɛbɛma w’abam abu sɛ wubesiesie asɛm no.

Dɛn na wubetumi ayɛ? Nya abotare. Nipasu gu ahorow, na ɛsono sɛnea obiara yɛ n’ade. Egye bere tenten ansa na ebinom bo adwo; afoforo nso gu so resua sɛ wɔbɛda su pa adi. Kɔ so da ayamye ne ɔdɔ adi kyerɛ wɔn. Bible no ka sɛ, “Mma bɔne nnni wo so nkonim, na mmom kɔ so fa papa di bɔne so nkonim.”—Romafo 12:21.

Sɛ yebetumi asiesie yɛne afoforo ntam a, ehia sɛ yɛda ahobrɛase, nhumu, ntoboase, ne ɔdɔ adi. Nanso akyinnye biara nni ho sɛ, asomdwoe a yɛbɛma atena yɛne afoforo ntam no so wɔ mfaso!—g12-E 03.

SO WOADWEN HO?

● Dɛn na ɛbɛboa wo na wode afiri obi korakora?—Kolosefo 3:13.

● Dɛn na ebetumi aboa wo ma woatumi akɔ onii no nkyɛn ne no akosiesie asɛm no?—Mateo 5:23, 24.

● Sɛ onii no antie wo a, dɛn na wubetumi ayɛ?—Romafo 12:17-21.

[Asɛm a wɔafa aka wɔ kratafa 15]

“Onipa nhumu twentwɛn n’abufuw ase, na ɛyɛ anuonyam ma no sɛ obebu n’ani agu bɔne so.”—MMEBUSƐM 19:11