Agya ne Ɔpanyin—Asɛyɛde Ahorow Abien no Ho Dwumadi

“Sɛ obi nhu ne fi so di a, ɛbɛyɛ dɛn na ɔbɛhwɛ Onyankopɔn asafo so?”—1 TIMOTEO 3:5.

 1, 2. (a) Wɔ afeha a edi kan no mu no, ɔkwan bɛn so na ahwɛfo a na wɔyɛ asigyafo ne ahwɛfo a na wɔyɛ awarefo a wonni mma tumi som wɔn nuanom? (b) Ɔkwan bɛn so na Akwila ne Priskila yɛ nhwɛso ma awarefo pii nnɛ?

NÁ TETE Kristofo asafo no mu ahwɛfo no betumi ayɛ asigyafo anaa awarefo a wonni mma anaa awarefo a wɔwɔ mma. Akyinnye biara nni ho sɛ saa Kristofo no bi tumi dii ɔsomafo Paulo afotu a ɔde mae wɔ ne krataa a edi kan a ɔde kɔmaa Korintofo no, ti 7 no, akyi a wɔanware. Na Yesu aka sɛ: “Ayitotofo bi nso wɔ hɔ a ɔsoro ahenni nti na wɔayɛ wɔn ho saa.” (Mateo 19:12) Te sɛ Paulo ne ebia ne mfɛfo akwantufo no mu bi no, na asigyafo a wɔte saa no wɔ ahofadi a ɛbɛma wɔatumi atutu akwan akɔboa wɔn nuanom.

² Bible no nka sɛ ebia na Barnaba, Marko, Silas, Luka, Timoteo, ne Tito yɛ asigyafo. Sɛ na wɔyɛ awarefo a, ɛda adi sɛ na wonni abusua mu asɛyɛde pii nti na wotumi tutuu akwan pii kɔyɛɛ nnwuma ahorow no. (Asomafo no Nnwuma 13:2; 15:39-41; 2 Korintofo 8:16, 17; 2 Timoteo 4:9-11; Tito 1:5) Na wɔn yerenom betumi aka wɔn ho, te sɛ Petro ne “asomafo a aka no,” a ɛda adi sɛ wɔde wɔn yerenom kaa wɔn ho kɔɔ mmeae pii no. (1 Korintofo 9:5) Akwila ne Priskila yɛ awarefo a na wɔwɔ ɔpɛ sɛ wobetu akwan, a wodii Paulo akyi fi Korinto kɔɔ Efeso, na afei wɔkɔɔ Roma, na wɔbaa Efeso bio no ho nhwɛso. Bible no nka sɛ ebia na wɔwɔ mma. Ahofama mu a wofi som wɔn nuanom no ma “asafo a ɛwɔ amanaman nyinaa mu” no ani sɔɔ wɔn. (Romafo 16:3-5; Asomafo no Nnwuma 18:2, 18; 2 Timoteo 4:19) Ɛnnɛ, akyinnye biara nni ho sɛ awarefo pii te sɛ Akwila ne Priskila a wobetumi asom asafo afoforo, ebia denam baabi a mmoa ho hia kɛse a wobetu akɔtra so.

Agya ne Ɔpanyin

 3. Dɛn na ɛkyerɛ sɛ na afeha a edi kan no mu mpanyimfo pii yɛ mmarima awarefo a na wɔwɔ mma?

³ Ɛte sɛ nea na Kristofo mpanyimfo a na wɔwɔ afeha a edi kan Y.B. mu no dodow no ara yɛ awarefo a wɔwɔ mma. Bere a Paulo kyerɛɛ ahwehwɛde ahorow a ɛsɛ sɛ ɔbarima a ‘ɔrepɛ hwɛfodwuma’ no du ho no, ɔkae sɛ ɛsɛ sɛ Kristoni a ɔte saa no yɛ obi a “odi n’ankasa ne fi so yiye ma ne mma hyɛ n’ase animduru nyinaa mu.”—1 Timoteo 3:1, 4.

 4. Dɛn na na wɔhwehwɛ fi mpanyimfo a wɔaware na wɔwɔ mma no hɔ?

⁴ Sɛnea yɛahu no, na ɛnyɛ nhyɛ sɛ ɔhwɛfo bi wo mma, anaasɛ ɔware mpo. Nanso sɛ na Kristoni bi aware a, ansa na ɔbɛfata sɛ ɔpanyin anaa asafo mu ɔsomfo no, na ɛsɛ sɛ otumi di ne tiyɛ no ho dwuma ɔkwampa so wɔ ɔdɔ mu wɔ ne yere so, na ɔkyerɛ sɛ otumi ma ne mma hyɛ n’ase sɛnea ɛfata. (1 Korintofo 11:3; 1 Timoteo 3:12, 13) Mmerɛwyɛ biara a anibere wom a ɛbɛda adi wɔ onua bi fie so hwɛ mu no bɛma ɔremfata mma ɔsom hokwan ahorow wɔ asafo no mu. Dɛn ntia? Paulo kyerɛkyerɛ mu sɛ: “Na sɛ obi nhu ne fi so di a, ɛbɛyɛ dɛn na ɔbɛhwɛ Onyankopɔn asafo so?” (1 Timoteo 3:5) Sɛ wɔn a wɔyɛ n’ankasa ho nnipa mpɛ sɛ wɔbɛbrɛ wɔn ho ase ahyɛ ne hwɛ ase a, dɛn na afoforo bɛyɛ wɔ ho?

“Ɔwɔ Mma Gyidifo”

 5, 6. (a) Mmofra ho ahwehwɛde bɛn na Paulo ka kyerɛɛ Tito? (b) Dɛn na na wɔhwehwɛ fi mpanyimfo a wɔwɔ mma no hɔ?

⁵ Bere a Paulo rema Tito akwankyerɛ sɛ ɔmpaw ahwɛfo wɔ asafo ahorow a ɛwɔ Kreta mu no, osii so dua sɛ: “Nea ne ho nni asɛm bi, ɔyere biako kunu a ɔwɔ mma gyidifo a wɔnte ahohwi anaa asoɔden nka wɔ wɔn ho. Na nea ɛsɛ ɔhwɛfo ne sɛ: wonni ne ho asɛm bi ka, sɛ Onyankopɔn fiehwɛfo.” Dɛn ankasa na ahwehwɛde a ɛne sɛ “ɔwɔ mma gyidifo” no kyerɛ?—Tito 1:6, 7.

⁶ Asɛm “mma gyidifo” no fa mmofra a wɔahyira wɔn nkwa so ama Yehowa dedaw na wɔabɔ wɔn asu anaa mmofra a wɔrenya nkɔso akodu ahosohyira ne asubɔ ho no ho. Mpɛn pii no, asafo no mufo hwɛ kwan sɛ mpanyimfo mma beyi su pa adi na wɔayɛ osetie. Ɛsɛ sɛ ɛda adi sɛ ɔpanyin bi reyɛ nea obetumi nyinaa de ama ne mma anya gyidi. Ɔhene Salomo kyerɛwee sɛ: “Kyerɛ abofra ɔkwan a ɔmfa so, na sɛ onyin nso a, ɔremfi ho.” (Mmebusɛm 22:6) Nanso sɛ abofra bi a wanya ntetee a ɛte saa no ansom Yehowa, anaasɛ ɔyɛ bɔne a anibere wom nso ɛ?

 7. (a) Dɛn nti na ɛda adi sɛ Mmebusɛm 22:6 nyɛ mmara katee bi? (b) Sɛ ɔpanyin bi ba ankasa ansom Yehowa a, dɛn nti na ɛno nkyerɛ sɛ ɔpanyin no som hokwan ahorow befi ne nsa ɔkwan biara so?

⁷ Ɛda adi sɛ abebusɛm a wɔafa aka asɛm wɔ atifi hɔ no nyɛ mmara katee bi. Entwa obi pɛ mu a ofi yɛ nea ɔpɛ ho nnyinasosɛm no mu. (Deuteronomium 30:15, 16, 19) Sɛ ɔbabarima anaa ɔbabea bi nyin du baabi a otumi sisi gyinae a, ɛsɛ sɛ ɔno ankasa si n’ahosohyira ne asubɔ ho gyinae. Sɛ ɔpanyin no de honhom fam mmoa, akwankyerɛ, ne nteɛso a ehia ama abofra no pefee, nanso n’ankasa ansom Yehowa a, ɛnkyerɛ sɛ ɔkwan biara so no, agya no mfata sɛ ɔsom sɛ ɔhwɛfo. Nanso, sɛ ɔpanyin bi wɔ mma nkumaa pii a wɔwɔ fie, na wɔbɛyare honhom fam mmiako mmiako na wɔtotɔ asiane mu a, ebia wɔrenkɔ so mmu no sɛ obi a “odi n’ankasa ne fi so yiye.” (1 Timoteo 3:4) Asɛm no ne sɛ, ɛsɛ sɛ ɛda adi sɛ ɔhwɛfo bi reyɛ nea obetumi nyinaa sɛ obenya ‘mma gyidifo a wɔnyɛ ahohwifo anaa asoɔdenfo.’a

Obi a Ɔwɔ “Ɔyere a Onnye Nni”

 8. Ɔkwan bɛn so na ɛsɛ sɛ ɔpanyin ne ne yere a onnye nni di nsɛm?

⁸ Ɛdefa Kristofo mmarima a waware wɔn a wonnye nni ho no, Paulo kyerɛwee sɛ: “Sɛ onua bi wɔ ɔyere a onnye nni, na ɔbea no pene sɛ ɔne no tra a, onnnyaa no. . . . Na ɔyere a onnye nni no ho atew okunu no mu; anyɛ saa de a, na mo mma ho wɔ fi, na afei de, wɔn ho atew. Na, . . . ɔbarima, wunim sɛ ebia wo na wubegye wo yere nkwa?” (1 Korintofo 7:12-14, 16) Asɛm “onnye nni” no mfa ɔyere bi a onni nyamesom mu gyidi biara ho na mmom nea onhyiraa ne ho so mmaa Yehowa. Na obetumi ayɛ Yudani, anaa obi a ogye abosom di. Ɛnnɛ, ebia na ɔpanyin bi ware ɔbea bi a ɔwɔ ɔsom foforo mu, nea ontumi nhu sɛ Onyankopɔn wɔ hɔ, anaa mpo obi a onnye nni sɛ Onyankopɔn wɔ hɔ. Sɛ ɔbea no pɛ sɛ ɔne no tra a, ɛnsɛ sɛ ogyaa no esiane sɛ ɔne no nni gyidi biako ara kwa nti. Ɛsɛ sɛ ɔkɔ so ‘ne no tra nimdeɛ mu saa ara, sɛ ɔyere ne ade a ne ho nyɛ den na odi no ni,’ a ɔwɔ anidaso sɛ obegye no nkwa.—1 Petro 3:7; Kolosefo 3:19.

 9. Wɔ nsase a mmara ma okunu ne ɔyere nyinaa nya hokwan de wɔn som mu gyidi ahorow kyerɛkyerɛ wɔn mma so no, ɔkwan bɛn so na ɛsɛ sɛ ɔpanyin bi yɛ n’ade, na ɔkwan bɛn so na eyi bɛka ɔsom mu hokwan ahorow a ɔwɔ no?

⁹ Sɛ ɔhwɛfo bi wɔ mma a, obedi ne tiyɛ sɛ okunu ne agya no ho dwuma wɔ ɔkwampa so de atete “wɔn Awurade [Yehowa, NW] kasakyerɛ ne nyansakyerɛ mu.” (Efesofo 6:4) Wɔ nsase pii so no mmara ma kwan ma awarefo baanu no nyinaa de nyamesom nkyerɛkyerɛ ma wɔn mma. Wɔ eyi mu no ebia ɔyere no bɛpɛ sɛ ɔde hokwan a ɔwɔ no di dwuma de ne som mu gyidi ne nneyɛe kyerɛkyerɛ mmofra no, a ebia n’asɔre a ɔde wɔn bɛkɔ ka ho.b Nokwarem no, ɛsɛ sɛ mmofra no de wɔn ahonim a wɔde Bible atete no no di dwuma wɔ atoro som mu guasodeyɛ ahorow mu a wɔremfa wɔn ho nhyɛ no ho. Sɛ́ abusua ti no, agya no de n’ankasa hokwan a ɔwɔ no bedi dwuma ne ne mma asua ade, na ɔde wɔn akɔ asafo nhyiam ahorow wɔ Ahenni Asa so bere biara a ɛbɛyɛ yiye. Sɛ wodu baabi a wɔn ankasa betumi asisi wɔn gyinae ahorow a, wɔn ankasa besi ɔkwan a wɔpɛ sɛ wɔfa so no ho gyinae. (Yosua 24:15) Sɛ ne mfɛfo mpanyimfo ne asafo no mufo tumi hu sɛ ɔreyɛ nea mmara ma kwan sɛ obetumi ayɛ nyinaa de nokware kwan no rekyerɛkyerɛ ne mma yiye a, wɔremmu no sɛ ɔmfata sɛ ɔhwɛfo.

‘Odi Ne Fie so Yiye’

10. Sɛ ɔbarima bi a ɔwɔ yere ne mma yɛ ɔpanyin a, dɛn na ɛyɛ n’asɛyɛde titiriw?

¹⁰ Wɔ ɔpanyin a ɔyɛ agya na ne yere yɛ ne yɔnko Kristoni mpo fam no, ɛnyɛ adwuma a ɛda fam sɛ ɔbɛkyekyɛ ne bere mu yiye na ama wanya bi ama ne yere, ne mma, ne asafo mu asɛyɛde ahorow. Kyerɛwnsɛm no ma emu da hɔ pefee sɛ Kristoni a ɔyɛ agya wɔ asɛyɛde sɛ ɔbɛhwɛ ne yere ne ne mma. Paulo kyerɛwee sɛ: “Sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.” (1 Timoteo 5:8) Wɔ saa krataa koro no ara mu no, Paulo kae sɛ mmarima awarefo a wɔada wɔn ho adi dedaw sɛ okununom ne agyanom pa nkutoo na ɛsɛ sɛ wɔkamfo wɔn kyerɛ ma wɔsom sɛ ahwɛfo.—1 Timoteo 3:1-5.

11. (a) Akwan bɛn so na ɛsɛ sɛ ɔpanyin bi ‘hwɛ n’ankasa ne nnipa’? (b) Ɔkwan bɛn so na eyi betumi aboa ɔpanyin bi ma wadi n’asafo mu asɛyɛde ahorow ho dwuma?

¹¹ Ɛnyɛ honam fam ahiade nko na ɛsɛ sɛ ɔpanyin ‘hwɛ’ de ma ne ho nnipa na mmom honhom fam ne nkate fam de nso. Ɔhene Salomo nyansafo no kyerɛwee sɛ: “Siesie w’adwuma wɔ baabi, na yɛ w’asase so kua fa, na ɛno akyi woakyekye wo fi.” (Mmebusɛm 24:27) Enti bere a ɔhwɛfo hwɛ ma ne yere ne ne mma honam fam, nkate fam, ne ahomegye ho ahiade no, ɛsɛ sɛ ɔma wonya nkɔso wɔ honhom fam nso. Eyi gye bere—bere a ontumi mfa nni asafo mu nneɛma ho dwuma. Nanso ɛyɛ bere a akatua pa betumi afi mu aba wɔ abusua anigye ne honhom fam yiyedi mu. Awiei koraa no, sɛ ɔpanyin bi abusua yɛ den wɔ honhom fam a, ebia ɔmfa bere pii nni abusua mu haw ahorow ho dwuma. Eyi bɛma n’adwenem ada hɔ fann na ɔde adi asafo mu nneɛma ho dwuma. Ne nhwɛso sɛ okumpa ne agya pa no so bɛba asafo no so mfaso.—1 Petro 5:1-3.

12. Abusua mu asɛm bɛn mu na ɛsɛ sɛ agyanom a wɔyɛ mpanyimfo yɛ nhwɛso pa?

¹² Nea ɛka obi fie so a ɔhwɛ no yiye ho ne bere nhyehyɛe a ɔbɛyɛ de ahwɛ abusua adesua so. Ɛho hia titiriw sɛ mpanyimfo yɛ nhwɛso pa wɔ eyi mu, efisɛ mmusua a ɛyɛ den na ɛma wonya asafo ahorow a ɛyɛ den. Ɛnsɛ sɛ ɔhwɛfo bi ma ɔsom hokwan foforo gye ne bere pii daa ma onnya bere ne ne yere ne ne mma nsua ade. Sɛ eyi te saa wɔ ne fam a, ɛsɛ sɛ ɔsan hwehwɛ ne bere nhyehyɛe mu yiye. Ebia ɛho behia sɛ ɔsan yɛ ne bere nhyehyɛe foforo anaasɛ ɔtew bere a ɔde yɛ nneɛma foforo no so, na ɛtɔ da bi a ɔpow hokwan ahorow bi mpo.

Ɔhwɛ Adwuma a Ɛkari Pɛ

13, 14. Afotu bɛn na “akoa nokwafo ne ɔbadwemma” no de ama mpanyimfo a wɔwɔ yerenom ne mma no?

¹³ Afotu a ɛkyerɛ sɛ ɛsɛ sɛ wɔma abusua ne asafo mu asɛyɛde ahorow kari pɛ no nyɛ ade foforo. “Akoa nokwafo ne ɔbadwemma” no akɔ so de afotu ama wɔ eyi ho mfe pii. (Mateo 24:45) Bɛboro mfe 36 ni no, March 1, 1960, Ɔwɛn-Aban no de afotu mae wɔ kratafa 70 nkyekyem 22 sɛ: “Nokwarem no, ɛnyɛ asɛm no ne sɛ yɛbɛkyekyɛ yɛn bere no amã nneɛma a egye yɛn bere yi nyinaa pɛpɛɛpɛ ana? Bere a wobɛkyekyɛ amã nneɛma nyinaa pɛpɛɛpɛ saa mu no, mã wo adwene mmera wo ankasa abusua no nneɛma so di hõ dwuma sɛnea ɛsɛ. Ampa, Iehowa Nyankopɔn renhwɛ kwan sɛ ɔbarima bi de ne bere nyinaa bɛyɛ asafo nnwuma, aboa nè nuanom nè ne mfɛfo mã wɔanyã nkwãgye, nanso ɔrenhwɛ nankasa ne fifo nkwagye so. Obi yere nè ne mma hõ asɛm yɛ asɛyɛde a edi kan.”

¹⁴ April 1, 1987, Ɔwɛn-Aban no de afotu mae wɔ kratafa 22 sɛ: “Mo ho a mode bɛhyɛ ɔsom adwuma mu sɛ abusua no bɛka mo abom kɛse, nanso mmofra ahiade ahorow a ɛda nsow no hwehwɛ sɛ wode wo bere ne wo ho bɛma wɔn. Enti kari a wubekari pɛ ho hia na ama woahu bere dodow a wubetumi de ayɛ . . . asafo mu nnwuma ahorow bere a wudi ‘w’ankasa wo fifo’ honhom [fam,] nkate ne honam fam nneɛma ho dwuma no. Ɛsɛ sɛ [Kristoni] ‘sua onyamesom pa wɔ [ne] fi mu kan.’ (1 Timoteo 5:4, 8)”

15. Dɛn nti na ɔpanyin a ɔwɔ yere ne mma no hia nyansa ne nhumu?

¹⁵ Kyerɛwnsɛm mu abebusɛm bi ka sɛ: “Wɔde nyansa na esi dan, na wɔde nhumu ma egyina.” (Mmebusɛm 24:3) Yiw, akyinnye biara nni ho sɛ sɛ ɔhwɛfo bi betumi ayɛ ne teokrase nnwuma na bere koro no ara wakyekye ne fie a, ohia nyansa ne nhumu kɛse. Kyerɛwnsɛm mu no, ɔwɔ ɔhwɛ adwuma a ɛboro biako. N’abusua ne n’asafo mu asɛyɛde ahorow ka ho. Ohia nhumu a ɔde bɛkari pɛ wɔ eyinom mu. (Filipifo 1:9, 10) Ohia nyansa a ɔde bɛyɛ n’ahiade titiriw ho nhyehyɛe. (Mmebusɛm 2:10, 11) Ɛmfa ho sɛnea ɔte nka kɛse sɛ ɔwɔ asɛyɛde kɛse sɛ obedi n’asafo mu ɔsom hokwan ahorow ho dwuma no, ɛsɛ sɛ ohu sɛ, sɛ́ okunu ne agya no, n’asɛyɛde a edi kan a Onyankopɔn de ama no ne n’abusua hwɛ ne wɔn nkwagye.

Agyanom Pa a Wɔyɛ Mpanyimfo Pa

16. Sɛ ɔpanyin bi san yɛ agya a, mfaso bɛn na ɔwɔ?

¹⁶ Ɔpanyin a ɔwɔ mma a wɔn suban ye betumi ayɛ obi a ne ho wɔ mfaso ankasa. Sɛ wasua sɛ ɔbɛhwɛ n’abusua yiye a, ɔbɛyɛ obi a otumi boa mmusua foforo wɔ asafo no mu. Ɔte wɔn haw ahorow ase yiye, na otumi fi n’ankasa suahu mu de afotu ma. Anigyesɛm ne sɛ mpanyimfo mpempem pii reyɛ adwuma sɛ okununom, agyanom, ne ahwɛfo pa wɔ wiase nyinaa.

17. (a) Dɛn na ɛnsɛ sɛ ɔbarima a ɔyɛ agya ne ɔpanyin ma ne werɛ fi da? (b) Ɔkwan bɛn so na ɛsɛ sɛ asafo no mufo foforo da tema adi?

¹⁷ Sɛ obi a ɔwɔ yere ne mma bɛyɛ ɔpanyin a, ɛsɛ sɛ ɔyɛ Kristoni a ne ho akokwaw, a bere a ɔrehwɛ ne yere ne ne mma no, obetumi ayɛ ne nhyehyɛe ma watumi anya bere ahwɛ asafo no mufo foforo. Ɛnsɛ sɛ ne werɛ fi da sɛ ne nguanhwɛ adwuma no fi ase wɔ ne fie. Bere a wonim sɛ mpanyimfo a wɔwɔ yere ne mma no wɔ wɔn abusua ne wɔn asafo mu nnwuma ho asɛyɛde no, asafo no mufo no bɛbɔ mmɔden sɛ wɔrennye wɔn bere sɛnea ɛnsɛ. Sɛ́ nhwɛso no, ɛnyɛ bere nyinaa na ebia ɔpanyin bi a ɔwɔ mma a ɛsɛ sɛ wɔkɔ sukuu ɛda a edi hɔ anɔpa no betumi akyɛ pii wɔ bere a wɔapɔn asafo nhyiam horow anwummere no. Ɛsɛ sɛ asafo no mufo foforo te eyi ase, na wonya tema ma no.—Filipifo 4:5.

Ɛsɛ sɛ Yedi Yɛn Mpanyimfo Ni

18, 19. (a) Dɛn na 1 Korintofo ti 7 mu a yɛahwehwɛ no ama yɛahu? (b) Ɛsɛ sɛ yebu Kristofo mmarima a wɔte saa no dɛn?

¹⁸ Paulo krataa a edi kan a ɔkyerɛw kɔmaa Korintofo no ti 7 mu a yɛahwehwɛ no aboa yɛn ma yɛahu sɛ, mmarima asigyafo pii adi Paulo afotu no akyi de wɔn ahofadi no redi Ahenni nneɛma ho dwuma. Anuanom mmarima awarefo mpempem pii nso wɔ hɔ a wonni mma a bere a wɔrehwɛ wɔn yerenom sɛnea ɛfata no, wɔsom sɛ ahwɛfo pa wɔ amantam, amansin, asafo ahorow, ne Ɔwɛn Aban Asafo no baa dwumadibea horow mu, a wɔn yerenom ne wɔn ayɛ biako, na ɛfata nkamfo. Awiei koraa no, wɔ Yehowa nkurɔfo asafo ahorow a ɛreyɛ adu 80,000 mu no, agyanom pii wɔ hɔ a ɛnyɛ wɔn yerenom ne wɔn mma nko na wofi ɔdɔ mu hwɛ wɔn, na mmom wogye bere nso de som wɔn nuanom sɛ nguanhwɛfo a wodwen afoforo ho.—Asomafo no Nnwuma 20:28.

¹⁹ Ɔsomafo Paulo kyerɛwee sɛ: “Mpanyimfo a wɔhwɛ asafo no so yiye no, wɔmfa nidi mmɔho nni wɔn, ne titiriw no wɔn a wɔyɛ asɛnka ne kyerɛkyerɛ ho adwuma.” (1 Timoteo 5:17) Yiw, mpanyimfo a wodi wɔn afie ne asafo no so yiye no fata yɛn dɔ ne obu. Nokwarem no, ɛsɛ sɛ ‘yekura mmarima a wɔte saa mu wɔ nidi mu.’—Filipifo 2:29.

[Ase hɔ nsɛm]

Ntimu

◻ Yɛyɛ dɛn hu sɛ mpanyimfo pii a na wɔwɔ afeha a edi kan Y.B. mu no yɛ mmarima a na wɔwɔ yerenom ne mma?

◻ Dɛn na wɔhwehwɛ fi mpanyimfo awarefo a wɔwɔ mma hɔ, na dɛn ntia?

◻ Dɛn na “mma gyidifo” a obi wɔ no kyerɛ, nanso sɛ ɔpanyin bi ba ankasa ansom Yehowa a, dɛn na ɛba?

◻ Akwan bɛn so na ɛsɛ sɛ ɔpanyin bi ‘hwɛ n’ankasa ne nnipa’?

[Kratafa 23 mfonini]

Mmusua a ɛyɛ den na ɛma wonya asafo ahorow a ɛyɛ den