Ɔdɔ Ma Onyankopɔn​—Tumi A Ɛma Wobu Ɔbra Pa

NNIPA a wɔwɔ ntease begye atom ntɛm sɛ ɛho hia sɛ wosiw ɔbrasɛe ano. Sɛnea United Church a ɛwɔ Canada no sɔfo bi ka no: “Sɛ ankorankoro ne adesamma abusua no bu wɔn ani gu abrabɔ ho mmara so a, nneɛma a efi mu ba no yɛ hu; ɔko ahorow, nneɛma bo a ɛkɔ soro, Watergate ne basabasayɛ.” Sɛnea wɔakyerɛ wɔ asɛm a edi kan no mu no, ɛnyɛ nea wiase yi nyamesom atitiriw no ada no adi sɛ wɔyɛ tumi a ɛyɛ den a ɛma wobu ɔbra pa. Enti sɛ ankorankoro no, sɛ yɛpɛ sɛ yebu ɔbra pa a, ɛsɛ sɛ yɛde yɛn ani to tumi foforo so na yɛanya tumi a ɛte saa na afei yenya ɔpɛ sɛ yebetie saa tumi no.

Nkɛntɛnso a tumi a ɛkorɔn a ɛte saa wɔ no daa adi wɔ asɛm bi a esii wɔ Yosef a na ɔyɛ ofiehwɛfo ma ahemfie piani bi wɔ Misraim no asetra mu. Bere a ahemfie piani no yere daadaa Yosef sɛ ɔne no nna no, wampene so na ɔkae sɛ: “Na ɛdɛn na menyɛ amumɔyɛ kɛse yi, na menyɛ bɔne mintia Onyankopɔn?” (Genesis 39:7-9) Esiane sɛ na Yosef nim tumi a Onyankopɔn wɔ na ɔwɔ ɔpɛ sɛ ɔbɛsɔ n’ani nti, ɛma onyaa ahoɔden a ɔde ko tiaa ɔbea no nneyɛe no.

Wɔ mfe ahanu akyi no, Israel man a ɛyɛ Yosef Agya asefo no nsa kaa Mmara Nsɛm Du no sɛ Mmara a wɔnam Mose so de mae no fã. Bere a asoɔden a wɔyɛe no maa Yehowa bo fuw no, Mmara yi so a wodii no ma wonyaa ɔsoro nhyira. Enti mmara nsɛm no yɛɛ adwuma sɛ abrabɔ fam akwankyerɛ maa ɔman no.

Mmara Nsɛm Du No​—Tumi A Ɛma Wɔyɛ Adepa

Ɔkwan bɛn so na na Mmara Nsɛm Du no yɛ tumi a ɛyɛ den? Wɔda so ara te ne nkɛntɛnso nka wɔ afeha a ɛto so 20 yi mu mpo. Wɔ 1962 mu no, New Zealand amrado kae sɛ: “Misusuw sɛ nnipa binom dwen sɛ Mmara Nsɛm Du no bere atwam. Nanso sɛ yɛn nyinaa de nokwaredi di so a, ebetumi ayɛ nea ntease wom sɛ ɔman no mu mmara bɛyɛ nea ɛho nhia.”

Nanso, wɔ nkɔmmɔ a Yesu Kristo ne Yudani sodifo kumaa bi bɔe no mu no, ɔdaa no adi sɛ biribi foforo ho hia sen Mmara Nsɛm Du no so a wobedi no. Ná aberante no abisa sɛ: “Adepa bɛn na menyɛ na manya daa nkwa?” Bere a Yesu kae sɛ ɛsɛ sɛ ‘odi mmara nsɛm no so’ na ɔbobɔɔ mmara Nsɛm Du no mu bi din no, sodifo no buae sɛ: “Madi eyinom nyinaa so. Ɛdɛn na ɛka me bio?” Yesu buae sɛ: “Kɔ na kɔtɔn nea wowɔ, na fa ma ahiafo, na woanya ademude ɔsoro, na bra bedi m’akyi!” Kyerɛwtohɔ no toa so sɛ: “Aberante no tee asɛm no no, ɔde awerɛhow kɔe; efisɛ ɔwɔ ahonyade bebree.”​—Mateo 19:16-22.

Sɛ yɛde kyerɛwtohɔ yi toto biako a ɛte sɛ eyi ara a ɛwɔ Luka 10:25-28 no ho a, ɛboa yɛn ma yehu ɔhaw titiriw a na sodifo kumaa no wɔ no. Yɛkenkan sɛ: “Mmarakyerɛfo bi sɔre gyinaa hɔ sɔɔ [Yesu] hwɛe sɛ: Kyerɛkyerɛfo, menyɛ dɛn na manya daa nkwa?” Yesu boaa no ma osusuw asɛm no ho na esiane eyi nti. ɔbarima no tumi maa n’ankasa asemmisa no ho mmuae na ɔkae sɛ: ‘Fa wo koma nyinaa ne wo kra nyinaa ne w’ahoɔden nyinaa dɔ [Yehowa] wo Nyankopɔn; na dɔ wo yɔnko sɛ wo ho.’ Afei Yesu de baa awiei sɛ: “Yɛ eyi, na wubenya daa nkwa.”

So afei wubetumi ahu ɔhaw a na sodifo kumaa a yɛadi kan aka ne ho asɛm no wɔ no? Ná ɔdɔ a ɔwɔ ma honam fam nneɛma no bunkam ɔdɔ a ɔwɔ ma Onyankopɔn ne ne yɔnko no so. Hwɛ sɛnea ɛyɛ awerɛhow! Wɔ mmɔden a ɔbɔe sɛ obedi Mmara Nsɛm Du no nyinaa so akyi no, na ɔwɔ asiane a ɛne hwere a ɔbɛhwere daa nkwa mu.

Dɛn Na Ɔdɔ A Obi Wɔ Ma Onyankopɔn No Kyerɛ?

Yɛte bere a wɔde ahodɔ, honam fam nneɛma ne ɔbarima ne ɔbea nna asi ɔdɔ a wɔwɔ ma Onyankopɔn ne mfɛfo nnipa no ananmu. Wɔde adannandi nkyerɛkyerɛ a ɛnyɛ nokware no mu gyidi asi gyidi wɔ Onyankopɔn mu sɛ ɔbɔadeɛ no ananmu mpo. Dɛn na ɛde eyi nyinaa aba?

Wɔ mfehaha pii mu no, Kristoman asɔfo de hell-gya a ɛyɛ hu ho nkyerɛkyerɛ a enni Bible mu no adi dwuma de abɔ mmɔden sɛ wɔde benya nnipa no abrabɔ so tumi. Encyclopedia International ka sɛ: “Akyinnye biara nni ho sɛ tumi a ɛyɛ den sen biara a ɛmaa nnipa mpapahweka yɛɛ adepa ne hell ho suro, nea ɛmaa Ahene ne Ahempɔn mpo brɛɛ wɔn ho ase maa Asɔre no a na ɛda adi sɛ ɛno ne ade biako pɛ a esiw wɔn akɔnnɔ ahorow a anohyeto nnim no ano.” Hell-gya nkyerɛkyerɛ yi maa wonyaa adwene sɛ Onyankopɔn nni dɔ, onni .ahummɔbɔ, na ɔyɛ ade de tua afoforo bɔne so ka. Ɛwom mpo sɛ ebia nkyerɛkyerɛ no maa nnipa binom gyaee nneɛma bi yɛ de, nanso ɛtwee afoforo fii Onyankopɔn ho na ɛma ɛyɛɛ mmerɛw sɛ wobegye nkyerɛkyerɛ ahorow a enni Kyerɛwnsɛm mu te sɛ adannandi atom.

Nanso, Bible no nkyerɛkyerɛ sɛ Onyankopɔn yɛ akra ayayade wɔ hell-gya mu. Mmom no, ɔsomafo Yohane ka kyerɛɛ yɛn sɛ: “Onyankopɔn ne dɔ.” “Oyɛ ɔnokwafo ne ɔtreneeni sɛ ɔde yɛn bɔne befiri yɛn.” Mose kyerɛwee sɛ: “[Yehowa], Onyankopɔn mmɔborohunufo ne ɔdomfo, nea n’abodwo kyɛ na n’adɔeyɛ ne ne nokware dɔɔso pii.” (1 Yohane 4:8; 1:9; Exodus 34:6) Eyi yɛ Onyankopɔn su horow a ɛyɛ nwonwa no mu kakraa bi. Ɛtwe yɛn bɛn no. Su horow yi, ne titiriw ɔdɔ a ɔwɔ no ma yenya ɔpɛ sɛ yɛbɛdɔ no. “Yɛdɔ, efisɛ ɔno na ɔdɔɔ yɛn kan.” (1 Yohane 4:19) Ɔdɔ a yɛwɔ ma Onyankopɔn yi ne tumi a ɛyɛ den sen biara a ɛma yebu ɔbra pa no; ebetumi ama yɛanya daa nkwa!

Nokware dɔ a obi wɔ ma Onyankopɔn no nyɛ su bi ara kwa. Ɛkanyan no ma ɔyɛ ade de boa obi foforo. ɔsomafo Paulo kaa akwan horow a wɔbɛfa so ada ɔdɔ yi adi ho asɛm. Emu kakraa bi ni: “Ɔdɔ wɔ abodwokyɛre, ne yam ye; ɔdɔ nyɛ ahoɔyaw; ɔdɔ nyɛ ahoahoa, ɛnhoran, ɛnyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no.” (1 Korintofo 13:4, 5) Saa ɔdɔ yi a yɛbɛda no adi no kyerɛ mmɔden a yɛbɔ sɛ yebesuasua yɛn soro Agya no. Yesu kae sɛ: “Mmara nsɛm abien yi (Onyankopɔn ne yɛn yɔnko a yɛbɛdɔ wɔn no) ka Mmara Nsɛm no nyinaa ne Adiyifo no bom biako.” (Mateo 22:40, An American Translation) Wɔ ɔkwan foforo so no,. sɛ yɛda saa ɔdɔ yi adi a, yɛrenwia yɛn yɔnko ade, yɛrenkum no anaasɛ yɛne ne yere rensɛe aware. Ɔsomafo Yohane gye eyi tom na ɔka sɛ: “Na eyi ne Nyankopɔn dɔ, sɛ yebedi n’ahyɛde so.”​—1 Yohane 5:3.

Ɔdɔ A Wɔwɔ Ma Onyankopɔn Yɛ Tumi A Ɛma Wɔyɛ Adepa

Hyɛ tumi a ɔdɔ a wɔwɔ ma Onyankopɔn nyaa wɔ Kristofo a wodi kan no so no nsow sɛnea Tertullian a ɔtraa ase wɔ afeha a ɛto so abien no mu no ada no adi no. Ogyee n’atamfo akyinnye sɛ wɔnkyerɛ no wɔn nsɛmmɔnedifo no mu biako a ɔyɛ Kristoni. Bere a wɔantumi ankyerɛ no, ɔde kaa ho sɛ: “Ɛnde yɛn nkutoo na yenni nsɛmmɔne.” The Old Roman World nhoma no gye adwene yi tom na ɛka sɛ: “Yɛwɔ wɔn asetra ne wɔn abrabɔ a asɛm biara nni ho no ho adanse.” Afei nso, Christianity Today fa asɔre ho abakɔsɛm kyerɛwfo Roland Baiton asɛm ka sɛ: “Efi Apam Foforo bere no awiei de besi mfe du a ɛne 170-180 no, adanse biara nni hɔ oa ɛkyerɛ sɛ na Kristofo yɛ asraafo.” Ɔdɔ a na wɔwɔ ma Onyankopɔn no kaa wɔn ma wotiee no denam ɔbra pa a wobui no so. Nanso ebia wubebisa sɛ, ‘So abrabɔ so tumi a mfaso wɔ so yi ho adanse bi wɔ hɔ nnɛ?

Nokwarem no, ɛte saa! Atesɛm krataa sɛnkyerɛwfo Mike McManus kyerɛw wɔ Herald and Review mu sɛ ɔntee da sɛ wɔreyɛ asɔre atia mpenatwe ɔsram biako akyi no, ɔbɔɔ amanneɛ sɛ na Yehowa ɔdansefo bi a wadi mfe 14 krataa ka nea onyae a wɔde maa n’asɛm no ho mmuae no ho, nea ɔkyerɛw sɛ: “Ɛsɛ sɛ adwene a wonya ara kwa sɛ nyarewa yi bɛyɛ wɔn yɛ nea ɛdɔɔso a ɛsɛ sɛ ɛma nkurɔfo pii gyae [mpenatwe]. Nanso nea enti a Yehowa Adansefo mfa wɔn ho nhyem ne sɛ Yehowa de ahyɛde ama yɛn sɛ yenguan aguamammɔ.” (Yɛn na yɛde nkyerɛwde soronko akyerɛw afã bi no.) Bere a McManus reka krataa no ho asɛm no, obisae sɛ: “W’asafo no mu nnipa a wɔadi mfe 14 no mu baahe na wobetumi afa ɔhotefo Paulo asɛm aka ma emu ada hɔ pefee saa (1 Korintofo 6:18) ?”

Adansefo a wɔwɔ mmeae afoforo nso de nnyinasosɛm koro no ara a ɛne Yehowa ahyɛde horow a wobedi so a abeawa no kaa ho asɛm no di dwuma. Nea Onyankopɔn ahyɛde horow a wɔakyerɛw wɔ Kyerɛwnsɛm no mu no bi kyerɛ ni: ‘Di nokware wɔ nneɛma nyinaa mu,’ ‘Kwati abosom,’ ‘Twe Wo ho fi mogya ne aguamammɔ ho,’ ‘Di nokware,’ ‘Tete wo mma wɔ Onyankopɔn akwan so.’ (Hebrifo 13:18; 1 Yohane 5:21; Asomafo no Nnwuma 15:29; Efesofo 4:25; 6:4) So woahu sɛ Yehowa Adansefo a wɔte mo mpɔtam hɔ anaasɛ wɔwɔ mo adwuma mu no rebɔ mmɔden sɛ wobedi ahyɛde horow yi so? So woabisa nea enti a wɔyɛ saa no pɛn, nea enti a wɔpow mogya a wɔde ma, nea enti a wɔmpene so sɛ wɔbɛkɔ ɔko, nea enti a wɔbɛsra wo wɔ wo fie, ne tiaa mu no, nea enti a wɔyɛ soronko no? Ɔdɔ a wɔwɔ ma Onyankopɔn no ne mmuae no.

Ɔdɔ To Ntwa Da

Esiane sɛ Yehowa Adansefo pɛ sɛ wɔsɔ Onyankopɔn ani nti, wotie afotu yi: “Momfa adwenem foforoyɛ nsakra mo ho, na moasɔ nea Onyankopɔn pɛ a eye, na ɛsɔ n’ani, na ɛyɛ pɛ no ahwɛ.” (Romafo 12:2) Sɛ wohu “nea Onyankopɔn pɛ” sɛ wɔyɛ a, wɔpɛ sɛ wɔyɛ. ɔdɔ a wɔwɔ ma Onyankopɔn no ne tumi a ɛhyɛ ɔpɛ yi akyi. So wote nka sɛ ɛnyɛ nea wobetumi de eyi adi dwuma wɔ yɛn bere yi mu? Fa bere kakraa bi susuw nsɛm a asisi ankasa a edidi so yi ho.

Wɔ 1963 mu no, Jose a ɔwɔ Sao Paulo, Brazil, no fii ase ne Eugenia a waware dedaw no trae. Mfe abien akyi no, wofii ase ne Yehowa Adansefo suaa Bible no. Nnipa baanu yi sua fii adesua no mu sɛ Onyankopɔn hwehwɛ sɛ ‘wobedi aware ni.’ (Hebrifo 13:4) Wohui sɛ ɛsɛ sɛ wɔware nanso na Brazil nni awaregu ho mmara a ɛbɛma Eugenia ade ne ho ma waware Jose. Nanso bere a wɔyɛɛ awaregu ho mmara wɔ 1977 mu no, ɔkyerɛe sɛ ɔpɛ sɛ ogyae aware na wotumi waree wɔ 1980 mu de dii nea Onyankopɔn hwehwɛ no so. Wonyaa ɔdɔ a wɔwɔ ma Onyankopɔn no so akatua.

Ebia obi bɛte nka sɛ, ‘Wiɛ, eyi yɛ asɛm biako bi a asi.’ Nanso ɛnte saa. Nsakrae a ɛte sɛɛ aba mpɛn pii wɔ mmeae a Yehowa Adansefo yɛ adwuma wɔ hɔ no. Dɛn nti na wonkɔ so nhwehwɛ mu? W’ankasa ma ɛnna adi sɛ ɔdɔ ma Onyankopɔn sɛnea wɔka ho asɛm wɔ nokware som mu no da so ara yɛ tumi a ɛma wobu ɔbra pa.

[Asɛm a wɔafa aka wɔ kratafa 6]

Ɛdefa Kristofo a wodi kan no ho no. “The Old Roman World” no ka sɛ: “Yɛwɔ wɔn asetra ne wɔn abrabɔ a asɛm biara nni ho no ho adanse.” Ná tumi bɛn na ɛhyɛ “wɔn abrabɔ a asɛm biara nni ho” no akyi?

[Kratafa 7 mfonini]

Ɔdɔ a wowɔ ma Onyankopɔn no betumi aboa wo ma woako atia sɔ a wɔbɛsɔ wo ahwɛ ma woayɛ bɔne no