Bere A Wɔhwɛ Kwan No Reyɛ Adu!

MPƐN pii no, adesamma nsusuw asase ne adesamma Bɔfo no ho wɔ wɔn nkontaabu ahorow mu. Wohu daakye denam nea adesamma sodifo ne nyansahufo ka to hɔ nkutoo so. Nanso bere tenten a atwam ni no, Bible no kaa nsɛm a ebesisi wɔ yɛn bere yi mu ne nea ebefi mu aba ho asɛm pefee. Ne nkɔmhyɛ ahorow nyɛ nea ɛmma mu. Enti ntease pa wɔ hɔ sɛ yebesusuw ho yiye mprempren.

Wɔ saa Nhoma a wɔakyekyɛ sen foforo biara wɔ asase so yi mu no, wɔakyerɛw nea Yesu Kristo kaa ho asɛm sɛ ɛyɛ “wiase yi awiei ho sɛnkyerɛnne” ho asɛm wom. (Mateo 24:3) Nhoma yi ka bere a wɔrehwɛ kwan no befi ase ne nea n’awiei bɛkyerɛ no ho asɛm kyerɛ yɛn. Ne nkɔmhyɛ no nkyerɛ sɛ wɔbɛsɛe okyinsoromma a ɛyɛ Asase no, na mmom ɛkyerɛ mprempren nneɛma nhyehyɛe no awiei. Ɛyɛ nkɔmhyɛ a anidaso wom ma adesamma nyinaa na ɛnyɛ ɔsɛe mmom.

“Sɛnkyerɛnne” bɛn na Yesu kaa ho asɛm no? Ɛyɛ nea ɛbɛba wɔ mfe pii mu ma enti nnipa koma pafo a wɔwɔ baabiara benya hokwan ahu. Ɛyɛ nsɛm pii a ebesisi a ne nyinaa bɛba wɔ awo ntoatoaso pɔtee bi nkwa nna mu. Susuw emu kakraa bi ho hwɛ:

AKOKOAKOKO

“Ɔman bɛsɔre ɔman so ne ahenni ahenni so.”​—Mateo 24:7; Marko 13:8; Luka 21:7.

Wɔ nokwarem no, wɔadi ako pii fi bere a Yesu kaa saa nsɛm yi. Ɛnnɛ mpo no, Ahobammɔ ho Nsɛm Amanneɛbɔ Dwumadibea a ɛwɔ Washington D.C., no bu akontaa sɛ ebeduu May 1984 mu no, na nnipa ɔpepem anan de wɔn ho ahyɛ ɔko ahorow 42 mu. Nanso wɔ 1914 mu no, wofii ɔko bi a na ɛnte sɛ foforo biara wɔ abakɔsɛm mu besi saa bere no mu ase. Eyi maa asraafo a wɔn dodow bɛyɛ sɛ wɔn a wowuwui wɔ ɔko akɛse nyinaa a wɔkoe fi 1790 besi 1914 mu a wɔaka wɔn abom mmɔho abien wuwui!

● Wɔn a Wowuwui: Wokunkum asraafo 9,000,000; wɔn a wɔnyɛ asraafo 5,000,000 wuwui wɔ mmeae horow a wɔkoe ankasa no.

● Aman ahorow: Na bɛboro 25 de wɔn ho ahyɛ ɔko mu.

● Sika a Wɔsɛee: Wɔsɛee bɛboro (U.S.) $337,000,000. Wiase Nyinaa Ko II nso ɛ? Sɛnea United States Asraafo Panyin James L. Collins, Jr., kyerɛ no, na ɛyɛ “ɔko a ɛsɛee ade sen biara a adesamma ahu pɛn.”

● Wɔn a Wowuwui: Wokunkum asraafo 16,000,000; wɔn a wɔnyɛ asraafo 39,000,000 wuwui.

● Aman Ahorow: Bɛboro 50 koe.

● Sika a Wɔsɛee: $150,000,000,000, na nneɛma a ɛsɛe kaa ho bo boro $239,000,000,000.

Dɛn na wiase nyinaa ko a ɛto so abiɛsa de bɛba? Nea ebefi mu aba a ɛyɛ hu ne ɔsɛe koraa. Sɛ yenhuu nkɔmhyɛ yi a ɛkyerɛ bere a Yesu kaa ho asɛm too hɔ no mmamu dedaw a, ɛnde dɛn bio na ehia?

ADUANKƆM

‘Ɔkɔm bɛba mmeaemmeae.’​—Mateo 24:7; Marko 13:8; Luka 21:11.

Wɔhyɛɛ bɔ wɔ Wiase Nyinaa Aduan Nhyiam a wɔyɛe wɔ Rome wɔ 1974 mu no ase sɛ ebedu 1985 no na wɔama ɔkɔm a ɛwɔ wiase nyinaa agyae. Ɛnnɛ, ɛte sɛ nea hwɛ a wɔhwɛ kwan sɛ wobesiw nya a wɔn a ɔkɔm de wɔn kɛse dodow renya nkɔanim no ano anaasɛ ɛho dwuma a wobedi mpo​—no, ayɛ nea anidaso biara nni mu sen bere biara. Amanaman Nkabom no nhoma Unesco Courier ka sɛ, “Ɔkɔm a emu yɛ den ka nnipa mpem dudu bere nyinaa. Ɛkame ayɛ sɛ nnipa bɛyɛ ɔpepem 500 a ohia aka wɔn no redi kɔm da biara da.” So biribi a ɛsen saa ho hia ankasa na ama obi a ɔyɛ koma pafo agye adi sɛ ɔrehu Yesu nkɔmhyɛ no mmamu?

ASASEWOSOW

‘Asasewosow bɛba mmeaemmeae.’​—Mateo 24:7; Marko 13:8; Luka 21:11.

Asasewosow bɛboro ɔpepem biako si afe biara, na emu 3,000 yɛ nea ano yɛ den araa ma enti etumi ma asase ani wosow ma wohu. Nnɛyi nyansahu mfiri horow yɛ nea wɔasiesie no yiye sɛnea ɛbɛma wɔahu asasewosow a ano nyɛ den koraa mpo no. Nanso Yesu kaa ‘asasewosow kɛse” ho asɛm too hɔ. (Luka 21:11) So sɛnea ɛwosow ntoatoaso no asakra ankasa? Ɛho nhia mfiri akɛse a ɛbɛma yɛahu asasewosow kɛse bere a ebi asi no. Efi 1914 no, sɛ wɔkyekyem a, asasewosow a emu yɛ den a ɛba afe biara no boro nea ɛbaa wɔ mfe apem a atwam mu no so mpɛn 11. So biribi a ɛsen saa ho hia na ama nkɔmhyɛ no anya mmamu?

ƆYAREDƆM

“Ɔyaredɔm bɛba.”​—Luka 21:11.

The World Book Encyclopedia ka sɛ, “Nyarewa ahorow akunkum anaasɛ abubu nnipa pii sen ɔko nyinaa a wɔako pɛn.” Nyarewa ahorow a ɛhaw nnipa kɛse ne nnipa a ɛyɛ wɔn wɔ wiase nyinaa afe biara no bi ni:

● Akisikuru ka ɔpepem 37.

● Ɔyare bi a ɛwɔ Amerika atɔe fam a wɔfrɛ no chagas ka ɔpepem 10.

● Ɔpepem 150 yare atiridii.

● Ani yare a wɔfrɛ no borɔfo mu sɛ river blindness yɛ ɔpepem 40.

● Dwensɔyaw ka ɔpepem 200.

● Anyɛ yiye koraa no, nyarewa horow a emu yɛ den a ɛka ɔhome nkwaadɔm no kum ɔpepem 2.

● Ɛkame ayɛ sɛ ayamtu ma mmofra ɔpepem 5 wuwu​—wɔkyekyem a mmofra du wu simma biako biara da biara da wɔ afe biara mu wɔ nsase horow a ɛrenya nkɔso no so! Eyinom nyinaa aba, ɛmfa ho sɛ nnuruyɛ anya nkɔanim! Hena, na obetumi apow nokwarem sɛ Yesu nkɔmhyɛ a ɛyɛ nokware no nyɛ nea ɛrenya mmamu wɔ yɛn bere yi mu?

Nneɛma afoforo pii a ɛka ‘wiase yi awiei ho sɛnkyerɛnne’ no ho yɛ nea ɛda adi. Nanso nea yɛaka ho asɛm no yɛ nea ɛdɔɔso a ebetumi akyerɛ sɛnea Bible nkɔmhyɛ renya mmamu wɔ yɛn bere yi mu.

Nanso mprempren nneɛma nhyehyɛe no bɛkɔ so atra hɔ bere tenten ahe? Yesu nsɛm yi ma mmuae:

“Nokware mise mo sɛ awo ntoatoaso yi rentwam gye sɛ eyinom nyinaa aba mu ansa.”​—Mateo 24:34; Marko 13:30; Luka 21:32.

Ɛyɛ awo ntoatoaso bɛn? Ɛdɛn, ɛyɛ nea ehuu Yesu nkɔmhyɛ no mmamu mfiase no. Wɔne nnipa a na wɔte ase wɔ afe 1914 mu no. Wɔn mu baahe na wɔaka? Akontaa a wobuu nnansa yi a ɛwɔ hɔ kyerɛ sɛ nnipa ɔpepem 259 a wɔanya mfe 65 anaa nea ɛboro saa na na wɔte ase wɔ 1980 mu.a Efi 1980 reba no, eyinom mu pii awuwu. Wɔn a wɔwoo wɔn wɔ bɛyɛ afe 1914 a ɛyɛ soronko no mu no anya mfe 70 mprempren, na afoforo a na wɔte ase wɔ 1914 mu no anya mfe 80 anaa 90 na wɔn mu kakraa bi mpo anya mfe 100. Nanso wɔn dodow so rehuan ntɛmntɛm.

Henanom na Wɔte Nea 1914 Kyerɛ no Ase?

Ɛnyɛ afei na Yehowa Adansefo reka nea saa nsɛm a esisii yi kyerɛ ho asɛm. Ɛnyɛ sɛ na wɔaka sɛnea na saa afe no yɛ titiriw ho asɛm mpɛn pii ansa na 1914 reba nko, na mmom na wɔaka ho asɛm fi saa bere no mu nso.b Sɛ nhwɛso no, bɛboro mfe aduasa a atwam ni no, wɔ wɔn nhyiam bi a wɔyɛe wɔ Philadelphia wɔ November 22, 1947 ase no, Yehowa Adansefo yɛɛ tirimbɔ bi a ne fã bi kyerɛe sɛ:

“Wiase nsɛm a esisii fi 1914 reba no a Wiase Nyinaa Ko a edi kan ne ne mfiase ka ho no ma nkɔmhyɛ ahorow a ɛfa wiase yi awiei ho nya mmamu.”

Yɛahyɛn ‘wiase yi awiei ho sɛnkyerɛnne’ no mfe 70 mu dedaw. Nea ɛkyerɛ saa no da so ara rekɔ so bere a mfe no retwam no. Wɔ ɔkwan foforo so no, emu ayɛ den na abu so.

Sɛnea nkurow, aman ne ahemman ahorow mpo sɛee tete no, saa ara nso na mprempren yɛadu bere bi a aman ne ahenni nyinaa awiei abɛn wɔ bere koro mu.

Dɛn na ɛbɛba asase ne nnipa a wɔwɔ so no so bere a awiei koraa no wiase yi awiei ba no?

[Ase hɔ nsɛm]

[Kratafa 6 adaka]

Efi 1914 reba no wɔako wiase ko ahorow abien. Wɔde atomik ɔtopae nketewa abien dii dwuma de nea ɛtwa to no baa awiei. Mprempren no, nuklea akode ahorow a ɛwɔ nuklea akode korabea ahorow mu no wɔ ahoɔden a ɛsɛe ade sen ɔtopae a wɔtow too Hiroshima so no bɛyɛ mpɛn ɔpepem biako. Sɛ wɔbɛma nkurɔfo agye adi sɛ Yesu nkɔmhyɛ no renya mmamu ankasa a, so ɛsɛ sɛ nuklea ɔsɛe a ɛbɛtɔre adesamma abusua no ase ba?

[Kratafa 6 adaka]

Sɛ wɔkyekyem a, asasewosow a ɛba afe biara fi 1914 reba no dodow akɔ anim. Sɛ wɔkyekyem a, anya nkɔanim mpɛn 11 wɔ afe biara mu sen dodow a ɛbae wɔ mfirihyia 1,000 a atwam no mu ansa na saa bere no reba. Na sɛ wɔkyekyem wɔ afe biara mu a, anya nkɔanim mpɛn 20 sen dodow a ɛbae wɔ mfe 2,000 a edi 1914 anim no mu.c So ɛho hia sɛ enya nkɔanim kɛse sen saa na ama nkɔmhyɛ no aba mu?

[Ase hɔ nsɛm]

Emu Den 7.5 anaa nea ɛsen saa wɔ Nsenia a wɔde susuw asasewosow mu den so

Nnipa a Wowu 100 anaa nea ɛboro saa

Nneɛma a ɛsɛe (U.S.) $5,000,000, anaa nneɛma a ne bo boro saa a ɛsɛe

[Box/Graph on page 7]

1914 Awo Ntoatoaso a Emu Resa No

Nnipa a na wɔte ase wɔ 1914 mu wɔ United States, Great Britain ne Japan mu bɛyɛ nkyem abiɛsa mu biako wui wɔ mfe a ɛda 1970 ne 1980 mfe no mu no ntam.

Wɔ nnipa nyinaa a na wɔte ase wɔ 1914 mu no, wɔn mu bɛyɛ ɔha biara mu nkyem 15 na na wɔda so ara te ase wɔ wiase nyinaa wɔ 1980 mu. Bɛyɛ bere ahe na aka ansa na ‘awo ntoatoaso yi atwam akɔ’?

[Graph]

(For fully formatted text, see publication.)

1914

1980

15%

DODOW A WƆTE ASE

[Kratafa 8 adaka/mfoni]

‘Ehu Rema Nnipa Atotɔ Beraw’​—Dɛn Ntia?

Sɛ́ wohwɛ wiase no nnɛ a, so wuhu sɛ nkyerɛkyerɛmu a edi so yi kyerɛ biribi?

“Na nsɛnkyerɛnne bɛba owia ne ɔsram ne nsoromma mu. na amanaman ho bɛyeraw wɔn asase so, ɛpo ne asorɔkye a ɛrehuru nti; na ehu ne nneɛma a wɔhwɛ a ɛreba wiase bɛma nnipa atotɔ beraw; efisɛ wɔbɛwosow ɔsoro ahoɔden.”​—Luka 21:25, 26.

Wɔ bere bi mu no, sɛ owia pue a nkurɔfo ani gye​—wɔde anigye hwɛ da foforo ne nsɛm a ebesisi wom no kwan. Mprempren pii suro nea ebia ɛbɛba wɔ wɔn bere so. Sɛ ɔsram ne nsoromma pue a, na anka eyi yɛ bere a nkurɔfo de gye wɔn ahome ne bere a wotumi tu mpase a ɛyɛ anigye. Ɛnnɛ de, ɛyɛ bere a pii suro sɛ wɔbɛnantew mmorɔn so esiane nsɛmmɔnedifo ne mmonnaatofo nti. Nsakrae afoforo a aba wiase no mu ama ahunmu nso ayɛ hu.

SIPRI Yearbook 1983 a nhwehwɛmufo a wɔwɔ Stockholm Amanaman Ntam Asomdwoe ho Nhwehwɛmu Sukuu mu atintim no bɔ nokwasɛm a edi so yi a ɛyɛ aniberesɛm no ho amanneɛ:

NUKLEA MMƐMMA AHOROW: Nuklea akode ahorow a wiase no aboaboa ano no adu mmɛmma ahorow 50,000 mprempren. Sɛnea SIPRI panyin Frank Blackaby kyerɛ no, eyi kyerɛ sɛ, sɛ wɔkyekyem a, aman ahorow a wɔwɔ tumi kɛse no nyinaa de Hiroshima ɔtopae no biako ka nea wiase no aboaboa ano no ho wɔ simma aduonu biara mu awia ne anadwo fi bere a Wiase Nyinaa Ko II baa awiei wɔ 1945 mu no! SIPRI aka ato hɔ sɛ nea wiase no reboaboa ano no bɛboro nuklea mmɛmma 60,000 wɔ 1990 mfiase pɛɛ. Nea eyi de bɛba no bɛma ‘nnipa pii atotɔ beraw esiane ehu nti.’

KO A WOBETUMI AKO WƆ AHUNMU: Sraadi ho nneɛma a wɔde akɔ ahunmu no yɛ nea anya nkɔso. Aman a wɔwɔ tumi no kɔ so yɛ ahunmu hyɛn a wɔde di ako ne ahunmu akode ahorow. Wɔsɔɔ sraadi mu ade titiriw bi hwɛe wɔ ahunmu wɔ 1982 mu bere a aman a wɔwɔ tumi no mu biako de ahunmu hyɛn a wɔde ko hwehwɛɛ foforo a na ɛnenam ahunmu ma ɛsɛee no no. Efi saa bere no, aman a wɔwɔ tumi no nyinaa anya nkɔanim kɛse wɔ ahunmu sraadi mfiridwuma ho nyansahu mu a nea ɛka ho ne ahunmu hyɛn ahorow a etumi fa sraadi ho nneɛma tons 30 ne afei nso mfiri a wɔde di dwuma de tow ahunmu hyɛn ahorow kɔ ahunmu ne ahunmu akode a wɔde di dwuma tow wimhyɛn a obiara nte mu tuo ma efi soro bɛhwe fam no. Ampa, wɔama soro ayɛ hu.

PO NNEƐMA A EDI AWU WOM: Po so akohyɛn adɔɔso. Po ase akohyɛn ahorow a wɔde tow nuklea aprɛm ayɛ krado wɔ po so a ekura wɔn akode a wɔde sɛe nneɛma wɔ aman pii mpoano pɛɛ. Kurow biara nni asase so a wɔn akode ahorow no ntumi nnu mu. Ampa, po “rehuru.”

Wɔ eyi nyinaa akyi no. Yesu kae sɛ n’asuafo benya ntease pa ahorow a ɛbɛma ‘wɔama wɔn ti so na wɔadi ahurusi.’ Dɛn ntia?​—Luka 21:28-31.