10. Wɔ Ngo Bepɔw a wowɔ so a wuhu asɔrefi no so no, asɛm bɛn na asomafo baanan bisaa Yesu na ɔkwan bɛn so na nkyerɛase ahorow kyerɛ wɔn asemmisa no ase?

¹⁰ Asomafo dumien no ammisa nkɔmhyɛ a ɛyɛ hu yi ho asɛm kosii sɛ woduu Ngo Bepɔw a wowɔ so a wuhu Yerusalem ne asɔrefi a na ɔhene Herode ɔkɛseɛ no asan asiesie no foforo yiye no so. Ɛkame ayɛ sɛ nea wofi bepɔw no so hui no maa asemmisa yi sɔree asomafo no baanan ntam, na afoforo no nso ani gyee ho, efisɛ yɛkenkan sɛ: “Na ɔte Ngo Bepɔw so no, asuafo no baa ne nkyɛn wɔ fã se: Kyerɛ yɛn da ko a eyinom bɛyɛ, na ɛdɛn na ɛbɛyɛ wo ba [pa.rou.si’a, Hela] ne wiase awiei ho sɛnkyerɛnne?” (Mat. 24:8) Young’s Literal Translation of the Holy Bible kyerɛ wɔn asɛm no ase fi Hela mu ma ɛkenkan sɛ: “Kyerɛ yɛn, bere bɛn na eyinom bɛyɛ? na dɛn ne wo ba a woaba ne bere no awiei koraa no ho sɛnkyerɛnne?” The Emphasized Bible a Rotherham yɛe no kenkan saa ara: “Kyerɛ yɛn bere ko a eyinom bɛyɛ​—ne nea wo ba a wɔaba ne bere no awiei ho sɛnkyerɛnne no bɛyɛ.” Ɔsɔfo Panyin Newcome Nkyerɛase Foforo (a Wɔasan Asiesie) no kenkan sɛ: “Dɛn na ɛbɛyɛ wo ahoyi ne bere no awiei ho sɛnkyerɛnne?”​—1808 de no.

11. (a) Bere bɛn na Yerusalem asɔrefi no sɛe bae, nanso dɛn na amma saa bere no? (b) Enti, dɛn na ɛbɛyɛ nea ɛfata sɛ yɛyɛ wɔ abakɔsɛm ho?

¹¹ Ɛnnɛ yenim bere a wɔsɛee ɔhonam fam asɔrefi a na ɛwɔ Yerusalem no. Mfeha dunkron ni, wɔ afe 70 Y.B. ahohurubere mu, bere a Roma asraafo a Ɔsahene Tito di wɔn anim sɛee kurow no nyinaa no. (Luka 21:20-24) Na nneɛma afoforo a ɛyɛ Kristo Parousia (ne ba a waba) ne wiase anaasɛ nneɛma nhyehyɛe (anaa tebeaa) no awiei ho “sɛnkyerɛnne,” a na ɛka asuafo no asemmisa no ho no nso ɛ? Ampa, Yudafo man anaasɛ nneɛma nhyehyɛe no awiei bae wɔ afe 70 Y.B. mu, nanso nneɛma nhyehyɛe kɛse a na saa Yudafo nhyehyɛe no yɛ nkɔmhyɛ nsusuwso anaasɛ mfonini ara kwa no amma awiei. Afei nso, Awurade Yesu Kristo Parousia, anaasɛ ne ba a waba, no anyɛ hɔ saa afe no mu. Esiane sɛ yɛte afeha a ɛto so aduonu yi mu nti, ade a ɛsɛ sɛ yɛyɛ ara ne sɛ yɛhwɛ yɛn afeha a ɛto so aduonu yi abakɔsɛm mu hwɛ sɛ ebia “sɛnkyerɛnne” a wɔkaa ho asɛm siei no ada adi wɔ yɛn awo ntoatoaso yi mu anaa.

12 Esiane nea stefano kae wɔ Kristo ba a edi kan no ho nti, dɛn nti na ɛsɛ sɛ yebisa sɛ ebia na asomafo no rebisa Yesu “ba” ho asɛm?

¹² Ɛsɛ sɛ yɛhyɛ no nsow sɛ asuafo no bisaa Awurade Yesu Kristo Parousia no ho asɛm. Saa yɛ mu no, so na wɔrebisa ne “ba” ho asɛm anaa? Anaasɛ ne “Advent” sɛnea ebinom frɛ no Brɔfo mu no? Ɛfata sɛ wobisa saa asɛm yi, efisɛ Kristoni Stefano a owui mogya dansefo wu no, bere a ɔreka Awurade Yesu “ba” a edi kan no ho asɛm no, ɔka kyerɛɛ Yudafo Sanhedrin a ɛwɔ Yerusalem no sɛ: “Adiyifo no mu hena na mo agyanom antaa no? Na wokum wɔn a wɔkaa ɔtreneeni no ba [Hela, e’leu.sis] ho asɛm kan no, ɔno na afei moayɛ ne so kwankyerɛfo ne awudifo.” (Aso. 7:52) Yehu sɛ, bere a ɔreka Kristo ba a edi kan no ho asɛm no. Stefano amfa asɛmfua parousia anni dwuma, na mmom Hela asɛmfua e’leu.sis. Ɛnyɛ sɛ ɛsono sɛnea wɔkyerɛw saa Hela nsɛmfua abien yi mu biara ara kwa, na mmom ɛsono wɔn mu biara asekyerɛ nso.

13. Ɛdefa asɛmfua a efi mu no ho no, dɛn na asɛm parousia kyerɛ ankasa, nanso wɔn a wonim Hela nsɛmfua no kyerɛ ase dɛn?

¹³ Asɛmfua pa.rou.si’a no asekyerɛ paara ne sɛ obi “ka ho wɔ hɔ,” na woyi fii Hela asɛmfua para’ (“ka ho”) ne ousia (“wɔ hɔ”) mu. Liddel ne Scott Greek English Lexicon Po II, kratafa 1343, ɔfa 2, de asɛntiaa “wɔ a ɔwɔ hɔ” ma sɛ parousia asekyerɛ a edi kan. Ɛde ba a waba ma sɛ asekyerɛ a ɛto so abien, afei ɛde ka ho sɛ: “Titiriw ɔhene anaasɛ ɔbirɛmpɔn bi nsrahwɛ.” Nea ɛne eyi hyia no, The Theological Dictionary of the New Testament (a Gerhard Friedrich yɛe) no, Po 5, de asɛmfua “wɔ a ɔwɔ hɔ” no ma sɛ n’asekyerɛ titiriw. (Kratafa 859) Afei, ɛdefa “nnwuma afoforo a wɔde asɛmfua no di” wɔ Hela mu no ho no, ɛde ma sɛ “1. Sodifo bi Nsrahwɛ.” Wɔ kratafa 865 no ɛka wɔ “nnwuma foforo a wɔde pareimi [adeyɛ asɛmfua] ne parousia di wɔ Apam Foforo no mu” no sɛ: “Apam Foforo no mu no wɔmfa asɛmfua no nni dwuma wɔ ba a Kristo bae wɔ honam mu no ho, na na parousia nni nkyerɛase biara a ɛfa sanba ho. Akyiri yi Asɔre no mu nko na nea ɛboro parousia biako ho adwene bɛdaa adi.”

14. (a) Sɛnea dwuma foforo a wɔde Hela asɛmfua yi di kyerɛ no, asɛm bɛn na anka wɔde bedi dwuma mmom asen “ba a waba”? (b) Nkyerɛase ahorow bɛn mu na wɔkyerɛ parousia ase bere nyinaa sɛ “ba a waba,” na abirabɔ bɛn na ɛda adi wɔ Filipifo 2:12?

¹⁴ Enti, na ɛnyɛ sɛ Yesu asuafo no rebisa ne “ba” ho asɛm, na mmom na wɔrebisa ne ba no akyi ho asɛm. Na wɔrebisa “ba a waba” no ho asɛm. Na sɛ, sɛ́ anka yɛde asɛmfua “ba a waba” no bedi dwuma no, yɛdan kɔ “nnwuma afoforo a wɔde asɛmfua no di” wɔ Hela mu no so a, yɛbɛte ase sɛ asuafo no bisaa Yesu sɛ: “Dɛn na ɛbɛyɛ wo [nsrahwɛ sɛ ɔhene] ne nneɛma nhyehyɛe no awiei ho sɛnkyerɛnne?” “Nsrahwɛ” kɔ akyiri sen “ba” a obi ba ara kwa. Ba a ɔba ma “ɔwɔ hɔ” nso ka ho. Wɔ nea wɔfrɛ no Apam Foforo no mu no, Hela asɛmfua parousia no pue mpɛn aduonu anan, na ne nyinaa mu no, ɛnyɛ New World Translation of the Holy Scriptures nkutoo na ɛkyerɛ asɛmfua no ase bere biara sɛ “ba a waba,” na mmom nkyerɛase afoforo nso yɛ saa, te sɛ Young’s Literal Translation of the Holy Bible, a wɔyɛɛ no 1862 Y.B. mu no; The Emphatic Diaglott a Wilson yɛe, wɔ 1857-1868 Y.B. mu; ne The Emphasized Bible a Rotherham yɛe wɔ 1897 Y.B. mu no. Yehu abirabɔ a ɛfata a ɛda “ɔwɔ hɔ” ne “onni hɔ” ntam no, wɔ Filipifo 2:12, baabi a ɔsomafo Paulo ka sɛ: “Mutie daa, ɛnyɛ sɛ bere a mewɔ mo nkyɛn nko mu, na mmom bere a minni mo nkyɛn yi titiriw.”

Ɔfã 12: Onyankopɔn Mfirihyia Apem Ahenni Abɛn

Kekã A Wɔkekãa Wɔn “Akanea”

15. (a) Afei asɛmti ketewa bɛn na na Ɔwɛn-Aban no betumi de adi dwuma ma afata? (b) Amanneɛbɔ bɛn na ɛwɔ April 15, 1919 de no mu a akanyan Ɔwɛn-Aban akenkanfo a wɔwɔ wiase nyinaa?

¹⁵ Afei de na Ɔwɛn-Aban nsɛmma nhoma no betumi de asɛmti ketewa “Ne Kristo Ba a Waba ho Kaseɛbɔ” no aka ho ama afata. Bible asuafo Kristofo baawɔtwe a woyii wɔn fii ɔman afiase wɔ March mu no nyaa hokwan kɔɔ afe afe Awurade Anwummeduan afahyɛ no ase Kwasida anadwo, April 13, 1919, na sɛnea nnipa a wɔbae ho amanneɛbɔ a enni mu a epuei wɔ May 15 Engiresi Ɔwɛn-Aban kratafa 151 kyerɛ no, nnipa a wɔn dodow bɛboro 17,961 na wodii afahyɛ no. April 15, 1919 Engiresi Ɔwɛn-Aban no nkratafa 117 ne 118 bɔɔ nnipa baawɔtwe a wɔtotoo wɔn ano yi a wɔde Amerika sika dɔla 10,000 dii wɔn mu biara agyinam gyaa wɔn ne anigye a wɔn mfɛfo Kristofo ɔhaha de hyiaa wɔn wɔ Brooklyn Betel no ho amanneɛ. Asɛm yi a wɔbɔɔ ho dawuru wiase nyinaa no kanyan The Watch Tower and Herald of Christ’s Presence akenkanfo anigye.

16. (a) Senea Yesaia 60:2 kyerɛ no, na saa bere no yɛ bere bɛn? (b) Ɔkwan bɛn so na wɔhyɛ Bible asuafo a “wɔahyira wɔn ho so” a wɔwɔ akokoduru no den, na amanaman ntam nhyiam bɛn na wɔyɛe?

¹⁶ Afei de, na ɛnyɛ bere a wɔde tɔ honhom mu nko na wɔda. Na ɛyɛ adwumayɛ bere a sɛnea Yesaia 60:2 ka siei no, “esum bɛkata asase so, na sum kabii akata aman so; nanso Awurade [Yehowa] bepue wo so, na n’anuonyam abɛda adi wo so.” (Twi Bible Foforo) Wiase tebea no maa adeyɛ a akokoduru wom ho behiae wɔ Bible asuafo a na “wɔahyira wɔn ho so” no fam. Wɔansɛe bere wɔ Kristofo a wɔwɔ akokoduru a wɔrehwɛ Ayeforokunu no kwan a wɔbɛhyɛ wɔn den no ho, efisɛ wɔ August 1 ne 15, 1919 Engiresi Ɔwɛn-Aban no mu no wotintim asɛm a ne ti ne sɛ “Nhyira Ne Akokodurufo” wɔ abien no nyinaa mu a nhyehyɛe ahorow a wɔreyɛ ama “Nhyiam Kɛse: Cedar Point, Lake Erie,” a ɛyɛ nnafua awotwe, fi September 1-8 a ɛyɛ amanaman ntam de no ho amanneɛbɔ ka ho. Wofi ahoɔden mu rekyerɛ sɛ wɔnnae wɔ honhom mu no, nnipa a wɔn dodow bɛboro 6,000 a “wɔahyira wɔn ho so” ama Onyankopɔn a wofi Canada ne United States titiriw baa nhyiam no ase da biara. Saa nhyiam a ɛkanyan yi bɛyɛɛ hokwan a “wɔn a wɔahyira wɔn ho so” no nyae de hyɛɛ wɔn tirim a wɔabɔ sɛ wɔbɛma wɔn ani ada hɔ a wɔnna, na wɔayere wɔn ho wɔ Onyankopɔn adwuma a ɛda wɔn anim no mu no mu den.

17, 18. (a) “Mfɛfo Adwumayɛfo Da” wɔ Nhyiam Kɛse no ase no, dɛn na wɔbɔɔ amanneɛ sɛ wobetintim, na dɛn na na wɔrehwɛ kwan? (b) Ɔkwan bɛn so na na afotu ahorow a wɔde mae wɔ sɛnea wɔbɛyɛ adwuma no ho no hyɛ nkuran, na so nea ɛkɔɔ so saa nhyiam da no yɛ biribi a ɛyɛ anigye a etwaam ara kwa anaa?

¹⁷ Anigye kɛse bae wɔ Fida, September 5, “Mfɛfo Adwumayɛfo Da” no, bere a Otitrani J. F. Rutherford de too gua sɛ wobetintim nsɛmma nhoma foforo fi October 1, 1919 a wɔbɛto din “The Golden Age” no. Na eyi rebɛyɛ Ɔwɛn-Aban nsɛmma nhoma no hokafo wɔ Onyankopɔn Mesia ahenni ho asɛmpa no ho dawurubɔ mu na wɔhyɛɛ Onyankopɔn nkurɔfo a “wɔahyira wɔn ho so” no nkuran sɛ wɔmfa wɔn ho nhyɛ afoforo a wobenya wɔn ma wɔakra bi no mu, bere a wɔretwɛn sɛ wɔbɛkyekyɛ nea ɛbɛba biara mfuamfua 4,000,000 no. Wɔde ɔkwan a wɔbɛfa so ayɛ wiase nyinaa dawurubɔ adwuma yi ho akwankyerɛ foforo bio bae akyiri yi wɔ September 15, 1919, Engiresi Ɔwɛn-Aban no nkratafa 279-281 a ekura asɛmti “Ɛka Ahenni no ho Asɛm Kyerɛ” no mu.

¹⁸ Ɔfrɛ a ɛhyɛ nkuran bɛn ara na asɛm a ɛto so abiɛsa na ɛde asɛm no aba awiei no yɛ maa wɔn a wɔkenkan no nyinaa: “Fa wo ho hyem ntɛm. Bere a wode wo ho hyɛ adwuma yi mu no kae sɛ wɔrensrɛ sɛ worebɛyɛ obi a ɔtɔn nsɛmma nhoma bi ara kwa, na mmom woyɛ ahene mu Hene ne awuranom mu Awurade no hemmɔfo a ɔreka yɛn Awurade no anuonyam ahenni no Bere Pa a ɛreba a ɛyɛ nokware Kristofo anidaso na wɔde mfehaha pii abɔ ho mpae akyerɛ nnipa no wɔ ɔkwan a nidi wom yi so”! Wogyee Ahenni no ho adwuma foforo yi ho ɔfrɛ no so amonom hɔ ara, na nnɛ, bɛboro mfirihyia aduonum abiɛsa akyi no, wotintim nsɛmma nhoma koro yi ara a afei wɔfrɛ no “Nyan” no nea ɛba biara mfuamfua 7,500,000. Ampa saa Kristofo 6,000 a “wɔahyira wɔn ho so” a na wɔwɔ Cedar Point, Ohio no ne anigye a wɔkyerɛe wɔ Golden Age nsɛmma nhoma no ho amanneɛbɔ wɔ Fida, September 5, 1919 no nyɛ ade a ɛnkyerɛ biribi titiriw biara wɔ Onyankopɔn “ababaa a ne ho tew” kuw no abakɔsɛm mu wɔ Kristo parousia a ɛyɛ nokware wɔ saa bere yi mu no ho. Saa mmabaa kuw yi nnae bio!

19 Wɔn akanea a wɔkekãe no gyee adeyɛ bɛn, na dɛn nti na eyi de mpaapaemu baa mmabaa no mu?

¹⁹ Na ɛno ne bere a “mmabaa no nyinaa sɔre kekaa wɔn akanea” ampa. (Mat. 25:7) Wɔ ɛbɛ no mu no, na eyi hwehwɛ sɛ wɔbɛsan de ngo agu wɔn akanea no mu, efisɛ na wɔn akanea no “redum.” Nanso, ao! mmabaa nkwasea no hui sɛ wɔrennya ngo ngu wɔn akanea no mu amonom hɔ ara; wɔamfa toa a ngo wom amma, bere a mmabaa mmadwemma no de wɔyɛɛ saa. Eyi de mpaapaemu baa mmabaa no mu. Dɛn ntia? Mateo 25:8, 9 kyerɛkyerɛ mu sɛ: “Nkwasea no see mmadwemma no sɛ; ‘Momma yɛn mo ngo no bi, na yɛn akanea redum.’ Na mmadwemma no buae sɛ: ‘Dabi, ɛrenso yɛne mo, na mmom monkɔ wɔn a wɔtɔn nkyɛn nkɔtɔ mo de.’”

20. So na ɛyɛ pɛsɛmenkominya adeyɛ wɔ mmabaa mmadwemma no fam sɛ wɔpoe sɛ wɔne nkwasea no bɛkyɛ wɔn ngo no, na dɛn na na mmadwemma no abɔ wɔn tirim sɛ wɔbɛyɛ?

²⁰ Yebetumi asusuw ɔbrɛ a ɛde bɛto mmabaa nkwasea no so, sɛ wobefi adi saa dɔnhwerew no mu anadwo, abɔ mmɔden sɛ wɔbɛhwehwɛ aguadidan a wɔabue a wɔtɔn ngo wɔ mu anaasɛ wɔbɛkɔ nnipa a wɔtɔn ngo a wobetumi ama wɔn ngo dodow a wohia no bi nkyɛn no ho. Na, so na ɛno nyɛ pɛsɛmenkominya adeyɛ wɔ mmabaa mmadwemma no fam? Dabi! efisɛ sɛ wɔyɛɛ saa a, anka mmabaa du no mu biara nni hɔ a obetumi akodu ayeforokunu no pon no ano akɔ ayeforohyia no ase bi. Anka ngo a nnipa du yi nyinaa akyɛ no bɛsa ansa na wɔadu hɔ. Mmabaa mmadwemma no kyerɛe sɛ wɔtee nka sɛ ɛyɛ wɔn asɛyɛde sɛ wodu hɔ denam ngo dodow a wobehia a wɔfae no so. Eyi kyerɛe nso sɛ, na wɔn nyinaa asi wɔn bo sɛ wobedu hɔ, enti afei na mmabaa mmadwemma yi remma biribi a ɛbɛhaw wɔn a ɛremma wontumi nni wɔn atirimpɔw pa a ɛhyɛ ayeforokunu no anuonyam no ho dwuma no kwan. Bio nso, na ngo da so ara wɔ mmeae afoforo a mmabaa nkwasea no betumi anya bi wɔ hɔ a wɔmmɔ mmabaa mmadwemma no mmɔdenbɔ mmataho anaasɛ wonnsiw wɔn kwan.

21. Dɛn na eyi nkyerɛ wɔ sɛnea mmabaa “mmadwemma” kuw no yɛ wɔn ade wɔ wɔn a wɔpɛ sɛ wosua Bible no na wosua Ayeforokunu no ho ade no ho?

²¹ Ɔkwan bɛn so na eyi nya mmamu wɔ ɛbɛ no mu wɔ saa bere a ɛyɛ ɔsoro Ayeforokunu no parousia anaasɛ ba a waba yi mu? So ɛkyerɛ sɛ, sɛ onipa a ɔyɛ nokwafo a wate ba a Awurade Yesu Kristo aba wɔ honhom mu no ho asɛm pɛ sɛ mmabaa “mmadwemma” kuw no ne no sua Bible no na obenya Ayeforokunu no anuonyam a wɔrehyɛ no mu kyɛfa a, mmabaa “mmadwemma” kuw no bɛpow sɛ wɔbɛyɛ saa na mmom wɔbɛka akyerɛ no sɛ ɔno ankasa nkɔbɔ ne ho mmɔden anaa? Sɛ ɔpɛ sɛ Onyankopɔn Asɛm ne ne honhom kronkron no yɛ no ma a, so ɛno bɛyɛ bu a wɔrebu ɛbɛ no mu asuade no so sɛ wɔbɛyɛ saa anaa? Ɛnte saa koraa.

22. Bere a yɛresusuw asɛm a ɛfa “ngo” no a wɔbɛkyɛ ho no, dɛn na ɛsɛ sɛ yɛkae sɛ kanea a wɔasɔ a wɔama so no kyerɛ, na “ngo” no yɛ dɛn ho sɛnkyerɛnne?

²² Enti afei, wɔ ne mmamu mu no, dɛn nti na mmabaa “mmadwemma” kuw no pow sɛ wɔne mmabaa “nkwasea” kuw no bɛkyɛ wɔn “ngo” no? Ɛsɛ sɛ yɛkae sɛ, wɔ a obi wɔ ngo wɔ ne ngo toaa mu no te sɛ nea obi wɔ sɛnkyerɛnne kwan so “ngo” wɔ n’ankasa mu ara pɛ. Afei nso, kanea a wɔasɔ a wokura a wɔama so no te sɛ hyerɛn a obi hyerɛn sɛ kanea, a ɛbɛma nnipa a wɔwɔ wiase a aduru sum yi mu no ahu yɛn nnwuma pa, na esiane ɛno nti wɔahyɛ Onyankopɔn anuonyam. (Mat. 5:14-16; Fil. 2:15) Ɛyɛ sɛnkyerɛnne kwan so “ngo” no na ɛma kanea no ahoɔden a ɛde dɛw, na saa “ngo” yi yɛ Onyankopɔn Asɛm a ɛyɛ kanea ne hann ma Onyankopɔn asomfo (Dw. 119:105) , ne afei nso Onyankopɔn honhom kronkron, a ɛma Onyankopɔn Asɛm no hyerɛn ma yɛn na ɛma wɔn a ɛwɔ wɔn so nyinaa nya su pa a wɔfrɛ no “honhom aba” no ho mfonini. (Gal. 5:22, 23; Efe. 5:18-20) Na, ɛnde so ɛsɛ sɛ mmabaa “mmadwemma” no tew saa “ngo,” saa kanea ahoɔden yi dodow a ɛwɔ wɔn mu no so na awiei koraa no wɔagyae hyerɛn anaa?

23. (a) Dɛn na mmabaa “nkwasea” kuw no pɛ sɛ “mmadwemma” kuw no yɛ ma wɔn? (b) “Kristofo” bɛn na mmabaa “nkwasea” kuw no yɛ?

²³ Eyi ne nea mmabaa “nkwasea” kuw no bɛpɛ sɛ “mmadwemma” no yɛ. “Nkwasea” no pɛ sɛ “mmadwemma” no ne wɔn bɛyɛ adwene. Ɔsoro Ayeforokunu no ba a waba wɔ honhom mu ho amanneɛ a wɔbɔe 1919 Y.B. mu no bɛyɛɛ mpoatwasɛm maa wɔn a wɔkyerɛ sɛ wɔyɛ “mmabun” a wɔpɛ sɛ wohyia saa Ayeforokunu no na wonya n’anigye no mu kyɛfa bi nyinaa. Wɔn a wɔte sɛ mmabaa “nkwasea” no de wɔn ano ara kwa na ɛka sɛ wɔyɛ Kristofo; dodow ara yɛ Kristofo a edin no da wɔn so kwa, nanso wɔmfata wɔ nneɛma ahorow a wɔhwehwɛ wɔ nokware Kristofo ho no mu. Ebia wɔwɔ Bible no mu nimdeɛ kakra; Bible mu nimdeɛ a egyina nyamesom kuw a atew ne ho ntease so titiriw. Ebia Kyerɛwsɛm mu nimdeɛ kõ a wɔwɔ no na enyaa wɔn so tumi, nanso ɛnyɛ nea ebetumi ama wɔanya Onyankopɔn honhom a tumi wom no wɔ wɔn mu a ɛbɛma wɔasow “honhom aba” no. Wɔn su ne nokware Kristofo de no nhyia. Wɔhyerɛn wɔ edin mu anaasɛ ka a wɔka sɛ wɔyɛ Kristofo no mu ara kwa wɔ wɔn nyamesom kuw a ɛwɔ Kristoman mu no mu. Wɔhwɛ kwan sɛ wowu a wɔbɛkɔ soro!

24. So nneɛma a ɛkɔ so wɔ mmabaa “nkwasea” kuw no nyamesom mu no tumi ma wogye adanse a ɛda adi wɔ Ayeforokunu no ba a waba no ho no tom? (b) Kristofoyɛ tebea bɛn na nkwasea no pɛ sɛ mmadwemma no bam na ama wɔn nyinaa ayɛ biako?

²⁴ Nanso, wɔn nyamesom mu ntetee no mma wontumi nyɛ nea ɛsɛ sɛ wɔyɛ bere a wɔteɛm ɔdasu mu sɛ, “Hwɛ ayeforokunu no ni oo! Mumfi nkohyia no” no. Nokwarem, wonni nhumu, wonnye nokwasɛm a ɛda adi wɔ Ayeforokunu no ba a waba fi afe 1914 mu no ntom. Wɔde wɔn ano ka sɛ wogye Ayeforokunu no di na enti asɔre no yɛ n’ayeforo, nanso wɔpɛ sɛ wɔfa ɔkwan a wɔn ankasa pɛ so, wɔn nyamesom kwan so, hyia Ayeforokunu no na wonya n’anigye no bi. Enti, sɛ mmabaa “mmadwemma” kuw no ne no benya fekubɔ a, ɛnde na ɛsɛ sɛ wɔne wɔn yɛ adwene. Ebehia sɛ wɔn a wɔka sɛ wɔyɛ Kristofo ne ɔsoro adedifo no nyinaa ka bom wɔ gyidi afrafradi mu. Ɛsɛ sɛ “mmadwemma” kuw no tew wɔn honhom mu “ngo” a wɔwɔ no so, na ama wɔn Kristofo onyin no aba fam na wɔne nyamesomfo nkwasea no ayɛ pɛ. Enti ɛsɛ sɛ “mmadwemma” no yɛ wɔn ho nkwasea wɔ nyamesom mu na wɔatumi ne “nkwasea” no, wɔn a wɔka sɛ wɔyɛ Kristofo a wonnim nyansa no abɔ.

25. (a) Afei, dɛn ne asɛm a ɛfa mmabaa “mmadwemma” kuw no ho no? (b) Awiei koraa no, sɛnea ɛbɛyɛ a wobedu nneɛma a wɔhwehwɛ wɔ wɔn ho no ho no, Petro ne Paulo nsɛm bɛn na eho hia sɛ wodi ho dwuma?

²⁵ Asɛm no mu da hɔ: So ɛsɛ sɛ nyamesom mu nkate ara kwa te sɛ nea wohu wɔ Kristoman mu no nya mmabaa “mmadwemma” kuw yi so tumi anaa? So wɔbɛma wɔn honhom mu “ngo” no asã na wɔayɛ wɔn a wɔrentumi nhyerɛn sɛ nokware Kristofo nkodu ase, a bere a bere kɔ so no ɛbɛma wɔafi wɔn a wokurakura akanea di Ayeforokunu no akyi rekowura ɔdan a wɔrehyia ayeforo wɔ mu no mu anaa? Sɛnea 2 Petro 1:10 ka no, ɛho hia sɛ ‘wɔbɔ mmɔden hyɛ wɔn frɛ ne wɔn paw den.’ Ebehia sɛ wosuasua ɔsomafo Paulo, a ɛde rekɔ n’asase so asetra awiei no ɔkyerɛwee sɛ: “Mmirika no, mawie tu; gyidi no maso mu masie; nea aka a ɛda me hɔ ne trenee abotiri a Awurade, ɔtemmufo trenee no, de bɛma me ɛda no.” Ɛsɛ sɛ wodu nneɛma ahorow a wɔhwehwɛ wɔ Kristofo ho no nyinaa ho bere a wodu Ayeforokunu no ayeforohyia pon yi ano no.​—2 Tim. 4:7, 8.

26. Ɔkwan bɛn so na wosiw mmabaa “mmadwemma” kuw no ano wɔ Wiase Ko l mu, na dɛn nti na wɔne mmabaa “nkwasea” kuw no paapaee mu wɔ 1919 mu?

²⁶ Esiane ɛno nti, te sɛ nwura a na ɛwɔ awi ne nwura ho bɛ no mu no, mmabaa “mmadwemma” kuw no ne wɔn a wɔde wɔn ano ara kwa ka sɛ wɔyɛ Kristofo no dii mpaapaemu Wɔ Wiase Ko I mu no wɔbɛyɛɛ Babilon Kɛse, wiase atoro som ahemman no ne n’asraafo, n’amammuifo ne n’atemmufo a ɔne wɔn bɔ aguaman no nneduafo. Ɛnyɛ nnipa a wodi tumi no ho hu nko na na asiw wɔn ano, na mmom na wɔwɔ nnommumfa mu ankasa denam afiasenna ahorow ne wɔn ano a wosiwii wɔ asraafo atrae horow ne mmeae afoforo a wɔkyekyeree wɔn kogui no so. Wɔ 1919 mu no wodii ɔsoro frɛ a ɛfa Babilon Kɛse no ho no ho dwuma: “Me man mumfi no mu, na moamfra ne nnebɔne, na moannya ne haw no bi.” (Adi. 18:4) Ná wɔne mmabaa “nkwasea” kuw no rentumi nyɛ adwene wɔ saa asɛm yi mu. Ɛsɛ sɛ wotie Onyankopɔn mmom sen Babilon Kɛse no ne wɔn a ɔne wɔn bɔ aguaman wɔ wiase no mu no. Afei nso wɔantumi ne Babilon Kɛse no annantew wɔ som a ɔsom aboa no honi a ɛyɛ Amanaman Apam no a Babilon Kɛse no foro traa ne so afe 1919 Y.B. mu no mu.​—Adi. 13:14, 15; 14:11, 12; 17:1-18.

27. Ɔkwan bɛn so na na mmabaa “mmadwemma” kuw no adwene mu nyɛ wɔn nãa wɔ wɔn gyinabea no ho fi mfiase, sɛnea ɛdaa adi wɔ baguam ɔkasa a wɔmae Kwasida, September 7, 1919 no mu no?

²⁷ Mmabaa “mmadwemma” kuw no gyinabea wɔ asɛm yi ho fi mfiase no nyɛ nea na wɔn adwenem yɛ wɔn naa wɔ ho. Nea edi eyi ho adanse no, wɔ Cedar Point nhyiam a wɔyɛɛ no September 7, 1919, no ase, Kwasida awia no, Otitrani Rutherford maa baguam ɔkasa a ɛne “Anidaso ma Adesamma a Wɔahaw,” a emu na ɔkyerɛɛ sɛnea Onyankopɔn tan Amanaman Apam no. Amanneɛbɔ a wotintimii wɔ Sandusky (Ohio) Star-Journal mu Dwoda, September 8, 1919 a yɛafa de reka asɛm no se: “Otitrani Rutherford kasa kyerɛɛ nnipa bɛyɛ 7,000 Kwasida awia wɔ nnua no ase. Ɔkyerɛe sɛ Amanaman Apam a akuw a wɔhwɛ amammui ne sikasɛm so ahyehyɛ esiane ɔpɛ a wɔwɔ sɛ wɔbɛma adesamma anya asetra pa denam asomdwoe ne nea wohia a wɔbɛma wɔn nsa aka so nti no bɛboa yiye ara, na afei ɔde kaa ho sɛ esiane sɛ Katolek ne Protestant asɔfo a wɔka sɛ wogyina Onyankopɔn ananmu no agyaw ne nhyehyɛe na wɔapene Amanaman Apam no so, akamfo akyerɛ sɛ ɛne Onyankopɔn ahenni a wɔde asi asase so wɔ amammui kwan so nti, ɛda adi sɛ Awurade abufuw bɛba Apam no so.”​—Engiresi Ɔwɛn-Aban October 1, 1919 de no krat. 298 ɔfã 1.

28, 29. Dɛn nti na mmabaa “mmadwemma” kuw no sii gyinae yi, na ahohorabɔ din a Yakobo de dii dwuma bɛn na wontumi mfa mfrɛ wɔn?

²⁸ Mmabaa “mmadwemma” kuw no nyaa gyidi sɛ wɔde Onyankopɔn dɔ Ba no ahenni no asi hɔ wɔ soro wɔ Amanaman Mmere no awiei 1914 mu na wogyinaa hɔ pintinn mae, na wɔpoe sɛ wobegye nea wɔde ayɛ ne nsiananmu biara atom na wɔasom no. Wɔrentumi mfa wɔn honhom mu “ngo” no biara mma obi na atew wɔn ho nyinaa a wɔde ama Onyankopɔn Mesia no so. Saa wɔn ho a wɔde afam Ahenni no ho denneennen yi amma wɔannye din wɔ wiase yi mu anaasɛ wɔanyɛ wiase no adamfo. Ɛmaa wiase no tan a ɛtan wɔn no mu bɛyɛɛ den. Nanso saa ɔtan a wiase no tan wɔn no ma ɛbɛdaa adi kɛse sɛ wɔn na wɔadi abusuabɔ a ɛda wɔne ɔsoro Ayeforokunu ne ɔhene no ntam no mu nokware. Ná wɔrentumi mfa ahohorabɔ din “awaresɛefo” no mfrɛ wɔn sɛnea osuani Yakobo de frɛɛ afeha a edi kan asafo no mufo bi no, sɛ:

²⁹ “Awaresɛefo, munnim sɛ wiase adamfofa ne Nyankopɔn tan? Enti obiara a ɔpɛ sɛ ɔyɛ wiase adamfo no gyina hɔ sɛ Onyankopɔn tamfo.”​—Yak. 4: 4.

30, 31. Hena afei na mmabaa “mmadwemma” kuw no daa ababaa a wagye no aware su horow adi kyerɛe, na ɔkwan bɛn so na wɔaka ayeforo ahoɔfɛ a ɛte saa ho asɛm wɔ Yesaia nkɔmhyɛ no mu?

³⁰ Enti denam pintinn a wɔyɛ de kora wɔn honhom mu “ngo” a wɔwɔ no so, na wɔde di dwuma ma wɔn ankasa bɛyɛ sɛ “akanea” a ɛkɔ so de ogyaframa a ɛhyerɛn dɛw so no, na mmabaa “mmadwemma” kuw no rehyɛ wɔn soro Ayeforokunu a wagye wɔn aware anaasɛ wasi wɔn asiwa no anuonyam. Na su horow a ɛne nokwaredi, ahotew ne kronnyɛ a wɔhwehwɛ wɔ wɔn a wɔbɛyɛ Awurade Yesu Kristo wɔn “kunu biako” no ɔsoro ayeforo ho no da adi wɔ wɔn mu. Wɔne no nya anigye sɛ Onyankopɔn bere a ɔde ama ne dɔ Ba no sɛ ɔmfa “n’ayeforo” no anim nkɔ n’ankasa fi no adu; wonya n’ahosɛpɛw no mu kyɛfa te sɛnea wɔakyerɛw no: “Sɛ ayeforokunu ho sɛpɛw no ayeforo ho no, saa nso na wo Nyankopɔn ho bɛsɛpɛw no wo ho.” (Yes. 62:5) Wɔn nso pɛ sɛ wɔn ho yɛ fɛ te sɛ ayeforo wɔ ayeforohyia da, na wɔafata ama n’anuonyam ahoyi no nti, wogye atade a ɔsoro Agya no de ma wɔn no. Saa ahoɔfɛ a ɛkari pɛ na ɔdɔ wom wɔ ayeforokunu ne ayeforo ntam yi yɛ nea wɔaka ho asɛm wɔ Yesaia 61:10 sɛ:

³¹ “Na ɔde nkwagye atade ahyɛ me, ɔde trenee batakari asi me, sɛ ayeforokunu a ɔbɔ n’abotiri ɔsɔfo ahokeka so, ne ayeforo a wahyɛ n’ahohyehyɛde.”

32. Ɔkwan bɛn so na mmabaa “mmadwemma” kuw no hyerɛn hyɛ n’Ayeforokunu no anuonyam?

³² Ɛnsɛ sɛ biribiara a mmabaa “mmadwemma” kuw no yɛ wɔ asase so no siw ɔsoro Ayeforokunu a ɔhyerɛn sɛ owia no anuonyam kwan: “Na ofi adi sɛ ayeforokunu a ofi ne pia mu.” (Dw. 19:4, 5, Twi Bible Foforo) Enti ɛho behia sɛ mmabaa “mmadwemma” kuw no hyerɛn sɛ akanea de hyɛ wɔn Ayeforokunu no anuonyam denam su horow a ɛte sɛ Kristo de no a wɔda no adi a ɛma wɔdɛnsow wɔ Babilon Kɛse, nyamesom mu aguaman no, ne ne “mmabea” a wɔn nyinaa bra asɛe wɔ nyamesom mu no ho no so. Enti ɛdenam hyerɛn a wɔhyerɛn no so no wɔmma adesamma nnya wɔn Ayeforokunu a wɔdɔ no no ho adwene a ɛmfata.

KANEA MU NGO A WƆTƆ FI WƆN A WƆTƆN NKYƐN

33. Sɛnea Yesu bɛ no kyerɛ no, asɛm bɛn nkutoo na mmabaa “mmadwemma” no betumi aka akyerɛ “nkwasea” no, na dɛn na “mmadwemma” no daa no adi?

³³ Esiane honhom mu “ngo” a mmabaa “nkwasea” kuw no nni nti, wɔantumi anhyerɛn anhyɛ Ayeforokunu a waba na ɔwɔ hɔ a ɔrehyia ayeforo no anuonyam. Wɔmfata sɛ wonya “ngo” a “mmadwemma” no de bae a wohia na wɔde adi Ayeforokunu no anammɔn akyi no bi. Enti sɛnea ɛbɛ no kyerɛ no, nea “mmadwemma” no betumi aka akyerɛ “nkwasea” no nyinaa ne sɛ: “Dabi, ɛrenso yɛne mo; na mmom monkɔ wɔn a wɔtɔn nkyɛn nkɔtɔ mo de!” (Mat. 25:9) Wɔ saa gyinae a wosii yi mu no, mmabaa “mmadwemma” no kɔɔ so daa mmadwemma a wɔyɛ adi, na nkwasea no nkwaseasɛm no bɛyɛɛ asiane maa wɔn ankasa. Ná ɛsɛ sɛ wɔkɔhwehwɛ wɔn a wɔtɔn ngo akyi kwan ansa na wɔanya bi asan agu wɔn akanea mu.

34, 35. Wɔ ɛbɛ no mmamu mu no, ɔkwan bɛn so na wodii saa ngo a wɔtɔ yi ho dwuma, nanso dɛn na ɛbɛ no kyerɛ sɛ ɛbɛba ansa?

³⁴ Saa ara na wɔ ɛbɛ no mmamu mu no, na wɔhwehwɛ sɛ “nkwasea” no nya wɔn honhom mu “ngo” a wohia. Wɔkɔɔ nyamesom mu beae a wɔtee nka sɛ wobetumi anya “ngo” a, sɛnea wɔn nyamesom gyidi kyerɛ no ebetumi abɔ kwan ama wɔn soro a wɔbɛkɔ no. Ne saa nti wɔkɔhwehwɛɛ “ngo” a wɔn nyamesom nhyehyɛe ahorow ahorow no wɔ a wɔtɔn, na ɛyɛ eyinom hɔ na wonyaa “ngo” a wɔrepɛ atɔ no bi a na ahofama a edi mu ma wɔn soro Ayeforokunu no ho nhia. Nanso so nyamesom kwan so “ngo” a wɔtɔ fii wɔn a wɔtɔn ngo no nkyɛn wɔ ɛbo a wɔpɛ so no bɛyɛ nea eye a ɛbɛma wɔanya kwan akɔ ayeforohyia no ase anaa? Wɔ eyi ho no yɛkenkan sɛ:

³⁵ “Na wɔrekɔ akɔtɔ no, ayeforokunu no bae; na wɔn a wɔasiesie wɔn ho no ne no kɔɔ ayeforohyia no ase, na wɔtoo pon mu.”​—Mat. 25:10.

36. Mmabaa bɛn na wonyaa ayeforokunu no ba a waba ho dwumadi no mu anigye, na dɛn na ɛma wɔfatae bere a wɔbɛhweɛ wɔn wɔ “ɔpon” no ano no?

³⁶ Mmabaa “mmadwemma” no ne mmabaa “nkwasea” no ankɔ faako​—“nkwasea” no gyaw Ayeforokunu no na “mmadwemma” no twɛnee Ayeforokunu a ɔreba no. Ɛdefi beae a mmabaa “mmadwemma” no hyiaa ayeforokunu no kosi ofie a wɔrehyia ayeforo wom no “pon” ano no ware. Wɔ mmeae abien yi ntam no, wɔtoo santen tuu aprenten bere tenten bi a na wokurakura akanea, na wɔ saa bere no mu no na mmabaa “mmadwemma” no ka ayeforokunu no ho na ayeforokunu no ne wɔn wɔ hɔ. Bere a wɔn a wɔde anigye di n’akyi no duu beae a wɔrekɔ, na wɔnam pon no ano kɔɔ ayeforokunu no fi no, na mmabaa “mmadwemma” no akanea no redɛw yiye. Woduu “ɔpon no ano” no na wɔn ngo no nsae. Afei mmabaa “mmadwemma” no kyerɛe sɛ wɔka wɔn a wodi ayeforokunu no akyi no ho. Eyi ma wɔfatae sɛ wɔma wɔn kwan ma wɔkɔ ayeforohyia no ase. Wɔn ho a na wɔasiesie ama bere a ɔbɛba abɛhwɛ wɔn no ho hia a ehia no yɛ nea wɔasi so dua bere a ɛbɛ no ka sɛ: “Na wɔn a wɔasiesie wɔn ho no ne no kɔɔ ayeforohyia no ase.” Wowuraa mu ansa na wɔreto ɔpon no mu!

37. Wɔ beae a wɔbɛba abɛhwɛ wɔn no, “mmabaa” a wɔwɔ hɔ nnɛ no da wɔn ho adi sɛ wɔhyerɛn wɔ ɔkwan bɛn so, na Ayeforokunu no gye wɔn ka “ayeforo” kuw no ho esiane tebea bɛn a wɔwɔ mu nti?

³⁷ Wɔ ɛbɛ no mmamu wɔ yɛn bere yi mu no, mmabaa “mmadwemma” kuw no kɔ so wɔ wɔn adeyɛ a ɛde nidi brɛ Ayeforokunu nuonyamfo no na ɛda ne kɛseyɛ adi no mu kosi awiei. Bere a wodu “ɔpon” no ano, beae a wɔbɛba abɛhwɛ wɔn no, wɔda wɔn ho adi sɛ wɔfata sɛ wɔma wɔn kwan kɔ ayeforohyia no ase. Hwɛ a ɔsorosoroni a wɔagye wɔn aware ama no no ba bɛhwɛ wɔn no ma ɛda adi sɛ wokura Kristofo su a Ayeforokunu no gye tom wɔ ne soro “ayeforo” no ho no. Wɔda wɔn ho adi ‘sɛ ababaa a efi nkaa no ɛ [a wɔde no] kɔma Kristo.’ Wɔmmaa kwan ma ‘wɔnsɛee wɔn adwene mfii Kristo fam kronnyɛ no ho.’ (2 Kor. 11:2, 3) Ayeforokunu no betumi agye mmabaa “mmadwemma” a wɔwɔ hɔ nnɛ yi no sɛ Kristofo asafo no fã, a wɔakyerɛw wɔ wɔn ho sɛ: “Na ɔde asafo no asi hɔ afa anuonyam mu, a enni nkekae anaa mpomponoe anaa eyinom biara, na mmom ayɛ kronkron a enni dɛm.”​—Efe. 5:27.

“NA WƆTOO ƆPON NO MU”

38. Awiei koraa no, nnipa baahe na wobegye wɔn akɔ ayeforohyia no ase, na bere bɛn na wɔbɛto “ɔpon” no mu ankasa? Na dɛn ntia?

³⁸ Ɛyɛ nokware sɛ, wɔremma obiara kwan ma ɔmfa “ɔpon” no ano nkɔ ayeforohyia no ase bio gye wɔn a wɔbɛka ɔsoro “ayeforo” kuw 144,000 no mufo ho no nko. (Adi. 7:4-8; 14:1-5) Nanso bere bɛn na wɔhyɛ da to “ɔpon” no mu ankasa? Eyi bɛyɛ bere a “ahohiahia kɛse” no apae agu na wɔafi ase resɛe Kristoman ne saa nyamesom mu aguaman, Babilon Kɛse, wiase atoro som ahemman no nyinaa wɔ Onyankopɔn bere a wahyɛ mu no. Ná ɛbɛyɛ nea aka akyi dodo ama wɔn a wɔka sɛ wɔyɛ Kristofo no sɛ wobefi Babilon Kɛse no mu sɛnea ɛbɛyɛ a wɔremfra ne nnebɔne no na wonnya ne haw kɛse no bi. (Adi. 18:4) Esiane sɛ “wobetwa” “ahohiahia kɛse” no nna no so, “wɔn a wɔapaw wɔn” no nti no, ɛda adi sɛ “wɔn a wɔapaw wɔn” a wɔne 144,000 no dodow bewie du ansa na “ahohiahia kɛse” no apae agu. Eyi na ɛma wɔto ɔpon no mu.

39. Wɔ “mmabaa du” bɛ no mu no, dɛn na esi awiei koraa no?

³⁹ Dɛn na na bere adu sɛ ɛba afei? “Mmabaa du” bɛ no kyerɛ, bere a ɛde ba awiei sɛ: “Na akyiri no, mmabaa a aka no nso bae bɛkae sɛ: Owura, owura, hiɛ yɛn! Na obuae sɛ: Nokware mise mo sɛ, minnim mo.”​—Mat. 25:11, 12, Twi Bible Foforo.

40. Dɛn nti na na ɛteɛ sɛ ayeforokunu no ka kyerɛ mmabaa “nkwasea” no sɛ “Minnim mo”?

⁴⁰ Mmabaa “nkwasea” baanum no tɔɔ ngo a wonya fii wɔn a wɔtɔn ngo a wohuu wɔn saa anadwo dɔnhwerew no mu no nkyɛn no, na wɔsan baa ɔpon no ano a wɔn akanea no redɛw. Nanso wɔn akanea no anhyerɛn anhyɛ ayeforokunu no anuonyam. Ná wɔnka wɔn a wohyiaa no na wodii n’akyi anigye mu wɔ ne dwumadi mu no ho. Enti afei na dɛn na ayeforokunu no wɔ a obegyina so agye wɔn atom sɛ wɔka wɔn a ɔne wɔn rehyia ayeforo no ho? Biribiara nni hɔ! Wɔanyɛ biribi a ɛbɛma n’ayeforohyia dwumadi no ase ahyerɛn. Enti, nokwarem no, na obetumi aka akyerɛ wɔn sɛ: “Minnim mo.” Eyi ma ɛyɛɛ nea ɛfata sɛ ɔto ɔpon no mu a wonnya kwan.

41. Bere a “ahohiaha kɛse” no aka Kristoman no, dɛn na saa mmabaa “nkwasea” kuw no behu wɔ wɔn ankasa ho?

⁴¹ Saa ara nso na bere a “ahohiahia kɛse” no befi ase wɔ nyamesom mu aguaman, Babilon Kɛse no fã titiriw a ɛne Kristoman so no, wɔn anidaso a ɛne sɛ wowu a wɔbɛkɔ soro no bɛyɛ nea ayɛ basaa na wontumi mfa wɔn ho nto so. Wobehu sɛ wɔamfa wɔn ho ammɔ nyamesom ahyehyɛde a ɛteɛ a ɛyɛ “ababaa a ne ho tew,” “ayeforo,” Oguammaa no “yere” no ho. Wɔrenhu sɛ ‘wɔaba abɛfa wɔn’ nipadua mu anigye so wɔ amununkum mu sɛ ‘wonkohyia Awurade ewim,’ te sɛnea wɔn nyamesom mu akyerɛkyerɛfo no kyerɛ 1 Tesalonikafo 4:17 ase no. Ampa, wɔahyerɛn sɛ Kristoman kuw biako anaasɛ foforo mufo de, nanso wɔyɛ wɔn a wɔwɔ hɔ wɔ edin mu anaasɛ ka ara kwa na wɔka sɛ wɔyɛ Kristofo, na ɛnyɛ nea ɛyɛ ankasa no. Nea ehia afei bere a wowura “ahohiahia kɛse” no mu ne nea ɔsoro Ayeforokunu no ka sɛ wɔyɛ, na ɛnyɛ nea wɔn asɔfo anaasɛ asɛnkafo no susuwii anaasɛ wɔka faa wɔn ho no.

42. Saa bere no a na wɔn nyamesom ahyehyɛde no nni hɔ bio sɛ ntamgyinafo no, dɛn so na wobegyina asrɛ sɛ Ayeforokunu no nnye wɔn ntom?

⁴² Sɛ́ “wɔn a aka ɔpon akyi” no, na aka akyiri dodo bere a “ahohiahia kɛse” no sɛe nyamesom nhyehyɛe a wogyinaa so no, na wɔbɛn tebea a ɛte sɛ ɔpon a wɔato mu no. Bere a wɔasɛe wɔn nyamesom ahyehyɛde a edii dwuma maa wɔn sɛ ntamgyinafo no, ɛsɛ sɛ wɔne nokware asafo no Ti, a ɔne Ayeforokunu no hyia tẽe. Esiane sɛ ne parousia anaasɛ ba a waba no yɛ honhom mu de, na wɔmfa wɔn aniwa nhu te sɛ nea ɔwɔ ɔdan a wɔato mu mu nti, wɔbɛteɛm afrɛ no ahwɛ sɛ ebia wɔn ano ara kwa a wɔde ka sɛ wɔyɛ Kristofo a nnwuma pa nka ho no betumi agye wɔn na ɛde wɔn akɔ ɔsoro anaa? Wɔde wɔn ano agye no atom, na afei so ɛnsɛ sɛ ɔno nso gye wɔn tom? Wɔbɛfrɛ, “Owura, Owura” anaasɛ “Awurade, Awurade” a wɔwɔ anidaso sɛ ɔbɛte. Ɛsɛ sɛ ɛno ma wobue pon no ma wɔn. Nanso so wobue?

43. (a) Yesu Bepɔw so Asɛnka no mu nsɛm bɛn a ɛfa Yesu a wɔbɛfrɛ no “Awurade” ho na mmabaa “nkwasea” kuw no mufo amfa no aniberesɛm? (b) Dɛn na ɛbɛba wɔn so bere a awiei koraa no Yesu fa saa nsɛm no aniberesɛm no?

⁴³ Wɔamfa nea ɔsoro Ayeforokunu no kae wɔ ne Bepɔw so Asɛnka no mu wɔ asase so no aniberesɛm sɛ: “Ɛnyɛ wɔn a wose me sɛ ‘Awurade, Awurade’ no nyinaa na ɛbɛkɔ ɔsoro ahenni no mu, na nea ɔyɛ m’agya a ɔwɔ soro no apɛde no. Nnipa pii bese me da no sɛ: Awurade, Awurade, yɛmfaa wo din nhyɛɛ nkɔm, na yɛmfaa wo din ntuu adaemone, na yɛmfaa wo din nyɛɛ ahoɔdenne pii anaa? Na ɛno na mɛpaem maka makyerɛ wɔn sɛ: minhuu mo da, mumfi me so nkɔ mo a moyɛ nea ɛnteɛ no!” (Mat. 7:21-23) Nanso afei, mmabaa “nkwasea” kuw no behu wɔ “ahohiahia kɛse” no mu sɛ Ayeforokunu no kaa saa nsɛm yi anibere so paa sɛ nnyinasosɛm a ɛbɛkyerɛ no kwan. Ɔremmue ɔsoro ayeforohyia apontow pon no ano mma wɔn. Obegyaw wɔn wɔ wiase anadwo sum a emu yɛ duru no mu na wɔne “wɔn a wɔyɛ nea ɛnteɛ” no asɛe. Wɔremfi wɔn sɛe no mu nnya owusɔre a ɛkɔ ɔsoro asetra mu.

44. Nsɛm bɛn na Yesu de wiee “mmabaa du” bɛ no, na dɛn na “mmadwemma” no amma kwan wɔ honhom mu ngo a wɔwɔ no ho?

⁴⁴ Enti, Yesu nsɛm a ɔde sii “mmabaa du” bɛ no so dua no yɛ nea aba wɔ ne bere mu titiriw ma yɛn a yɛte “nneɛma nhyehyɛe yi awiei” mu no, a ɛne sɛ, “Enti monwɛn, na munnim da anaa dɔn ko a onipa ba no reba.” (Mat. 25:13) Afei ne bere a wɔn a wɔpɛ sɛ wɔyɛ te sɛ mmabaa “mmadwemma” baanum no kɔ so hyerɛn wɔ Kristofo su a ɛyɛ den a ɛne nea wɔrehwehwɛ wɔ ɔsoro “ayeforo” kuw no mufo ho hyia no mu. Wɔmpɛ sɛ wɔne wɔn a wɔhwehwɛ sɛ wɔbɛma wɔanya ɔhaw a afoforo no nkwaseasɛm de ba no mu kyɛfa no bɛyɛ adwene a ɛno bɛma wɔahwere wɔn honhom mu “ngo” a wɔwɔ no kakra anaasɛ pii no.

45. Henanom na “mmadwemma” no mpɛ sɛ wɔne wɔn bɛbɔ nyamesom mu fekuw, na hena na ɛsɛ sɛ wɔkɔ so hyerɛn hyɛ no anuonyam, na dɛn ntia?

⁴⁵ Yɛmpɛ sɛ yɛde yɛn ho to asiane a ɛne yɛn akanea no a yɛbɛma ano abrɛ ase, na yɛde yɛn ho akɔhyɛ wɔn nyamesom kuw mu no. Yehia honhom mu “ngo” a yɛn ankasa yebetumi anya nyinaa. Ɛsɛ sɛ yɛn gyidi wɔ Ayeforokunu no ba a waba no mu kɔ so yɛ den, na ehia sɛ yɛkɔ so sɛ wɔn a wɔde adeyɛ a ɛhyerɛn di n’akyi no mufo kosi sɛ ɔde n’ayeforo a ɛne asafo no bɛba fie koraa. Ayeforokunu no ba a akyɛ no aba awiei. Ɔwɔ ha wɔ ne parousia a anuonyam wom no mu. Bere a wɔde tɔ nko na wɔda no atwam! Ɛyɛ bere a wɔde hyerɛn hyɛ no anuonyam ‘wɔ n’anigye no mu sɛ ɔsoro agya no de ama no sɛ ɔmfa ne honhom mu “ayeforo” no nkɔ ne nkyɛn na ɔmfa ayeforohyia nhyɛ eyi ho fã. Ɛho hia yiye mprempren sɛ yɛwɛn, efisɛ yennim da anaa dɔn ko a wɔbɛto hokwan a ɛte sɛ “pon” no mu, a wɔrensan mmue bio.

NE PAROUSIA HO SƐNKYERƐNNE NO FÃ

46. (a) “Mmabaa du” bɛ no yɛ Yesu asuafo no asemmisa bɛn ho mmuae fã? (b) Ɔkwan bɛn so na “mmadwemma” kuw no hu bɛ no mmamu fã a edi akyiri no, na nokwasɛm bɛn na eyi ma wɔgye tom?

⁴⁶ Wɔde “mmabaa du” bɛ no mae sɛ Yesu asomafo no asemmisa: “Ɛdɛn na ɛbɛyɛ wo ba [pa.rou.si’a] ne wiase awiei ho sɛnkyerɛnne?” no ho mmuae no fã. (Mat. 24:3) Saa bɛ no fã a edi akyiri no renya mmamu fi afe 1914 Y.B. Wiase no nyinaa tumi hu ɛbɛ yi fã a edi akyiri no sɛ ɛrenya mmamu nnɛ. Nsɛm a wɔakyerɛkyerɛ mu wɔ atifi hɔ no nyɛ nea wɔyɛɛ no kokoam, esum mu baabi a wontumi nhu, na mmom akɔ so wɔ petee mu, baabi a nnipa a wɔhwɛ ade yiye betumi ahu, ɛmfa ho sɛ ebia wɔte nea ɛkyerɛ no ase anaasɛ wɔnte ase. Anyɛ yiye koraa no, mmabaa “mmadwemma” kuw no mufo ahu nneɛma a ɛresisi a ɛkyerɛ biribi no, na wɔ wɔn mu no wɔwɔ adanse a edi mu sɛ ɔsoro Ayeforokunu no bae wɔ 1914 Y.B. mu, na ne parousia anaasɛ ba a waba no rekɔ so mprempren wɔ honhom mu. Wɔde gyidi ani na ehu ne ba a waba no esiane adanse a wɔde mae wɔ “mmabaa du” bɛ no mmamu mu no nti. Asi so dua ama wɔn sɛ ‘nneɛma nhyehyɛe no awiei’ no fii ase wɔ afe 1914 Y.B. mu.

47. Ɔkwan bɛn so na Hela asɛmfua pa.rou.si’a no nkyerɛase ankasa bɛdaa adi denam nea mmabaa “mmadwemma” a wɔwɔ ɛbɛ no mu no yɛe bere a wɔteɛm bɔɔ amanneɛ a ɛfa ayeforokunu no ho wɔ ɔdasu mu akyi no so?

⁴⁷ Yiw, Hela asɛmfua nso a ɔsomafo Mateo de dii dwuma wɔ n’Asɛmpa no ti aduonu anan, nkyekyem abiɛsa no kyerɛ “ba a waba” na ɛnyɛ “ba a ɔrebɛba” sɛnea nhoma asekyerɛfo pii kyerɛ Hela asɛmfua no ase no. Eyi da adi wɔ nea wɔkyerɛkyerɛɛ mu wɔ ɛbɛ no mu no mu. “Mmabaa du” no nyan fi nna ne nkotɔ mu bere a wɔte nteɛm no ɔdasu mu sɛ: “Hwɛ ayeforokunu no ni oo!” no. Bere a wɔde ahopere hui sɛ dɔm a wɔasosɔ akanea di n’akyi no adu beae a wɔwɔ no, afei wɔkɔkaa dɔm a wodi n’akyi no ho. Wofii hɔ no egyee bere ansa na wɔn nyinaa redu Ayeforokunu no atrae hɔ, baabi a wɔrehyia ayeforo no a na wɔretwɛn wɔn a wɔfata a wɔato nsa afrɛ wɔn nyinaa no. Ne saa nti, Ayeforokunu no ba a waba anaasɛ parousia no akyi no, bere bi twaam ansa na ɔde n’ayeforo no reba ofie a wasiesie ama no no mu.

NTEASE A ƐNTEƐ A WOSIESIE

48. (a) Zion’s Watch Tower no samufo ne ne kyerɛwfo no buu akontaa sɛ Kristo ba a waba no fii ase wɔ afe bɛn mu? (b) Afei nso, sɛnea wotintimii wɔ Ɔwɛn-Aban no kratafa a edi kan no mfe dodow bi no, bere bɛn na wɔbɔɔ onipa?

⁴⁸ Ɛyɛ ampa sɛ Zion’s Watch Tower and Herald of Christ’s Presence no kyerɛwfo ne ne samufo no buu akontaa sɛ ɔsoro Ayeforokunu no parousia anaasɛ ba a waba no fii ase wɔ afe 1874 Y.B. mu. Afei nso sɛnea Russell ne n’ahokafo buu akontaa no, bere a Yehowa Nyankopɔn bɔɔ onipa a odi kan no yɛ afe 4128 A.Y.B. mu, a ɛkyerɛ sɛ mfirihyia mpem nsia a onipa de atra asase so no baa awiei wɔ afe 1872 Y.B. mu. Wofii ase bɔɔ saa akontaabu yi ho dawuru wɔ Zion’s Watch Tower and Herald of Christ’s Presence no kratafa a edi kan, wɔ July 1, 1906 de no mu na eyi kɔɔ so de besii September 15, 1928 de no so. Sɛ nhwɛso no, nea edii kan bae wɔ saa nsɛmma nhoma ahorow yi mu no akyi no, date a wɔkyerɛwee no yɛ: “July 1, A.D. 1906​—A.M., 6034”; bere a date a ɛwɔ nea etwa to no akyi no yɛ: “Anno Mundi 6056​—September, 15, 1928.” Wɔkyerɛe sɛ wobuu Anno Mundi anaasɛ “Wiase Afe” bere no sɛ ɛne afe 4128 ansa na Yɛn Bɛre yi reba.

49. Wobuu akontaa sɛ bere bɛn na bɔne bae? (b) Enti na bere bɛn na mfirihyia apem no befi ase ama wɔatow Satan akyene bun a emu dɔ no mu na Kristo adi hene?

⁴⁹ Nanso wogyaw mfirihyia abien maa bere a ɔbarima ne ɔbea a wɔyɛ pɛ no traa ase a na wɔn ho nni asɛm wɔ Eden Turo no mu ansa na bɔne reba no, na enti wobuu akontaa sɛ afe a bɔne nyaa kwan bae no yɛ 4126 A.Y.B. Eyi ma wobuu akontaa sɛ mfirihyia mpem nsia a bɔne atra wiase no ba awiei 1874 Y.B., na saa afe no ara ofupɛ bere mu nso na mfirihyia apem a ɛto so ason no befi ase, na wɔakyekyere Satan Ɔbonsam, nea opiapia nnipa ma wɔyɛ bɔne no, atow no akyene ebun a emu dɔ no mu, na Kristo afi ase adi hene wɔ mfirihyia apem a wɔaka ato hɔ no mu. Ná eyi kyerɛ sɛ afe a Kristo befi n’ahenni ase no, saa afe no ara na ne ba a aniwa nhu anaasɛ ne parousia no befi ase.

50. Saa mmerebu yi dii nkyerɛkyerɛmu bɛn a ɛwɔ Asomafo no Nnwuma 13:20 ase sɛnea wohu wɔ Emphatic Diaglott mu no akyi?

⁵⁰ Mmerebu a ɛwɔ atifi hɔ no dii asɛm a ɛwɔ The Emphatic Diaglott a Wilson yɛe no mu wɔ Asomafo no Nnwuma 13:20 ase hɔ no akyi, nkyekyem a ɛkenkan sɛ: “Na ɛno akyi no bɛyɛ sɛ mfirihyia ahannan aduonum no, ɔmaa wɔn atemmufo besii odiyifo Samuel so.” Ase hɔ nkyerɛkyerɛmu a ɔde mae wɔ nkyekyem yi ho no kae sɛ: “Asɛm bi a emu yɛ den sɔre wɔ ha a ahaw Bible mmerebufo yiye. Bere a wɔakyerɛ wɔ ha no ne asɛm a ɛwɔ 1 Ahene 6:1 no nhyia. Wɔde ɛho nkyerɛkyerɛmu ahorow pii ama, nanso biako pɛ na ɛte sɛnea ntease wom ankasa, na ɛne sɛ wɔasɛe asɛm a ɛwɔ 1 Ahene 6:1 no denam Hebri nkyerɛwde daleth (4) a wɔde sii hay (5) a ɛne no di nsɛ wɔ ne kyerɛw mu no anan mu no so. Eyi bɛyɛ mfe 580 (ɛnyɛ 480) fi bere a wotui no kosi bere a wosii asɔrefi no, na ɛne Paulo mmerebu no hyia pɛpɛɛpɛ.”

51. (a) Saa nti, dɛn na “The Time Is at Hand” no kyerɛwfo C. T. Russell kae wɔ kratafa 53 wɔ 1 Ahene 6:1 ho? (b) Sɛnɛa ɛno kyerɛ no, bere bɛn na wɔbɔɔ onipa, bere bɛn na mfirihyia 6,000 a wɔde ayɛ bɔne no baa awiei, na bere bɛn na Ahosɛpɛw Kɛse no fii ase?

⁵¹ Saa ara nso na wɔ nhoma a wɔato din “The Time Is at Hand” no kratafa 53 no, ɔkyerɛwfo C. T. Russell kyerɛw faa 1 Ahene 6:1 ho sɛ: “Ɛda adi sɛ, ɛsɛ sɛ ɛyɛ mfirihyia ahannum ne aduɔwɔtwe, na ebetumi aba sɛ ɛyɛ mfomso wɔ ne kyerɛw mu; esiane sɛ, sɛ yɛde Salomo mfirihyia anan no, ne Dawid mfirihyia aduanan no ne Saul de aduanan no kɔka mfirihyia aduanan asia fi bere a wofii Misraim kosi bere a wɔkyekyɛɛ asase no mu no ho a, sɛ́ anka ɛbɛyɛ mfirihyia ahannan ne aduonum a wɔbɔɔ din wo Atemmufo Nhoma no mu, na Paulo nso kae, sɛnea yɛadi kan akyerɛ, no mu no, ɛbɛka mfirihyia ahasa aduonum pɛ ama Atemmufo bere no. Hebri nkyerɛwde “daleth” (4) no ne nkyerɛwde “hay” (5) no sɛ yiye, na ɛbɛyɛ sɛ eyi na ɛde mfomso no bae, a ebetumi aba sɛ onii a na ɔrehwɛ so akyerɛw no yɛɛ mfomso. Enti, ɛsɛ sɛ 1 Ahene 6:1 no yɛ ahannum ne aduɔwɔtwe, na ɛne nsɛm afoforo a aka no ahyia pɛpɛɛpɛ.” Enti, ɛdenam mfirihyia 100 a wɔde kaa Atemmufo no mmere ho wɔ Bible mmerebu mu so no, wɔmaa bere a wɔde bɔɔ onipa no san akyi mfirihyia 100 ma ebesii 4128 A.Y.B. na mfirihyia mpem nsia a nnipa de afra asase so no baa awiei wɔ 1872 Y.B. (The Time Is at Hand, krat. 42) Afei mfirihyia abien a wɔde sii hɔ sɛ etwaam ansa na bɔne reba no ma ekosii afe 1874 so, sɛ afe a emu na mfirihyia mpem nsia a nnipa de ayɛ bɔne no baa awiei, na mfirihyia apem a ɛto so ason a Kristo ahenni de beyi bɔne afi hɔ no fii ase. Enti afei na bere adu sɛ Ahosɛpɛw Kɛse no fi ase.