So Wokae?

So w’ani agye Ɔwɛn-Aban a aba nnansa yi akenkan ho? Sɛ saa a, akyinnye biara nni ho sɛ w’ani begye ho sɛ wobɛkaakae nea edidi so yi:

▫ Adanse a edi mu bɛn na honhom kronkron no dwumadi ahorow wɔ afeha a edi kan no mu de mae?

Dwumadi ahorow yi de adanse a aniwa hu a ɛkyerɛ sɛ Onyankopɔn mfa Israel asafo a na adi mfe 1,500 no nni dwuma bio sɛ ne nkurɔfo a wɔda nsow, na mmom Kristofo asafo foforo a ne Ba a ɔwoo no koro no hyehyɛe no na ɔpene so mae. (Fa toto Hebrifo 2:2-4 ho.)​—8/15, kratafa 5.

▫ Dɛn na ɛma Yehowa Adansefo kɔ so dɔɔso pii saa?

Eyi fi Onyankopɔn nhyira titiriw. Ɛyɛ Onyankopɔn adwuma. Nea Yehowa Adansefo kyerɛkyerɛ wɔ wɔn asɛmpaka adwuma no mu no gyina Bible no so. Ade foforo a ɛma wodi nkonim ne gye a wogye Yesu Kristo tom koraa sɛ Kristofo asafo no Ti a wɔapaw no no.​—9/1, kratafa 19.

▫ Dɛn nti na Yehowa yii mmɔborohunu adi kyerɛɛ Dawid wɔ bɔne kɛse a ɔne Bat-Seba yɛe no ho?

Ahenni apam a Onyankopɔn ne Dawid yɛe titiriw nti na ɔyɛɛ saa, nanso na Dawid ankasa mmɔborohunu ne ne nokware ahonu nso ka ho bi. (1 Samuel 24:4-7; 2 Samuel 7:12; 12:13; Dwom 51:1, 2, 17)​—9/15, nkratafa 10, 11.

▫ Adanse ahorow abiɛsa bɛn na Kristofo Hela Kyerɛwnsɛm no de ma de gyina Mesia a Yesu yɛ no akyi?

Yesu anato ne adanse a edi kan. (Mateo 1:1-16; Luka 3:23-38) Adanse foforo nso ne nkɔmhyɛ a anya mmamu. Nkɔmhyɛ ahorow pii wɔ hɔ a ɛda Yesu adi sɛ ɔne Mesia no, te sɛ nea ɛwɔ Daniel 9:25 no. Adanse a ɛto so abiɛsa ne adanse a Onyankopɔn ankasa de mae; ɔnam n’ankasa nne so de eyi mae mprensa. (Mateo 17:5; Luka 3:21, 22; Yohane 12:28)​—10/1, nkratafa 10, 12.

▫ Na dɛn na Yesu kyerɛ, bere a ɔkaa asɛm a wɔakyerɛw wɔ Mateo 24:37 sɛ: “Sɛnea Noa nna no yɛe no, saa ara nso na onipa Ba no ba bɛyɛ” no?

Noa pam adaka no na ɔbɔɔ abɔnefo kɔkɔ mfe du du pii ansa na Nsuyiri no ba bɛpopaa wiase nhyehyɛe a aporɔw no fii hɔ. Saa ara na Kristo ba a waba a aniwa nhu no bɛkɔ so mfe du du bi, a wobedi wiase nyinaa adanse wom, ansa na ɛno nso akowie ɔsɛe kɛse mu.​—10/1, kratafa 16.

▫ Nneɛma a ɛho hia ma abusua Bible adesua pa no bi ne nea ɛwɔ he?

Ɛsɛ sɛ yɛtɔ bere ma adesua no. Ɛnsɛ sɛ yɛma TV anaa nneɛma afoforo a ɛtwetwe adwene pia to nkyɛn. Ɛsɛ sɛ mususuw abusua no ahiade ahorow pɔtee ho. Ɛsɛ sɛ mode nsemmisa a ɛma wuhu obi adwene di dwuma de hwɛ hu sɛ mmofra no te nea wɔresua no ase. (Mateo 17:25) Momma bere no nyɛ nea akomatu nnim. Monna anigye adi na momma obiara mfa ne ho nhyɛ adesua no mu.​—10/15, kratafa 17.

▫ Ɛsɛ sɛ mogya mu nneɛma a ebia wɔde aka nnuan ho no ho asɛm hia Kristofo dɛn?

Ɛsɛ sɛ Kristofo hwɛ yiye na wɔamma tumi a wobetumi ayɛ saa anaa atesɛm kɛkɛ anhaw wɔn, na ntease mpo ho hia wɔ nkankyee mu nnuan ho nkrataa mu hwɛ anaa nankwasefo a wɔhwehwɛ wɔn no mu. Nanso, sɛ wonim sɛ wɔde mogya di dwuma pii wɔ ɔman no mu​—sɛ ebia wɔ aduan anaa ayaresabea ayaresa mu​—a, ɛsɛ sɛ Kristofo hwɛ yiye sɛ wobedi Onyankopɔn mmara a ese wɔntwe wɔn ho mfi mogya ho no so. (Asomafo no Nnwuma 15:28, 29)​—10/15, nkratafa 30-1.

▫ Ɔkwan bɛn so na Mmebusɛm nhoma no si sɛnea na akwan a wɔfa so kyerɛ ade wɔ Israel no mu dɔ wɔ honhom mu no so dua?

Mmebusɛm nhoma no kyerɛ sɛ n’atirimpɔw ne sɛ ɛbɛkyerɛkyerɛ “ntetekwa” nneɛma a ɛkorɔn te sɛ nyansa, nteɛso, ntease, nhumu, atemmu, anitew, nimdeɛ, ne adwene​—eyi nyinaa wɔ “[Yehowa] suro mu.” (Mmebusɛm 1:1-7; 2:1-14)​—11/1, kratafa 12.

▫ Nhomasua ho adwene a ɛkari pɛ bɛn na ɛsɛ sɛ mmofra nya nnɛ?

Ɛsɛ sɛ Kristofo bu nhomasua sɛ nea wɔnam so du botae bi ho. Wɔn atirimpɔw wɔ nna a edi akyiri yi mu​—ne sɛ wɔbɛsom Yehowa wɔ ɔkwan a etu mpɔn so wɔ bere nyinaa som adwuma no mu sɛnea wobetumi biara.​—11/1, kratafa 18.

▫ Dɛn nti na Yehowa kyerɛe sɛ Israel man ntua ntotoso du du no?

Nea edi kan no, na ɛbɛma wɔatumi afa biribi a wotumi hu so akyerɛ Yehowa papayɛ ho anisɔ. Nea etia abien no, na ɛbɛma wɔatumi ayi ntoboa de aboa Lewifo no, na ama wɔn nso wɔn ani atumi aku wɔn asɛyɛde ahorow ho, a Mmara no kyerɛkyerɛ ka ho. (Hwɛ 2 Beresosɛm 17:7-9.)​—12/1, kratafa 9.

▫ Ntotoso du du a wɔka kyerɛ Kristofo sɛ wɔmfa mmra no yɛ dɛn? (Malaki 3:10)

Ntotoso du du no gyina hɔ ma nea yɛwɔ a yɛde ma Yehowa anaa yɛde di dwuma wɔ ne som mu. Eyi yɛ ɔdɔ a yɛwɔ ma no ne nim a yenim sɛ yɛyɛ ne dea ho sɛnkyerɛnne.​—12/1, kratafa 15.