“Monkae Wɔn a Wodi Mo Anim” No

ƆSOMAFO Paulo kaa wɔ Hebrifo 13:7 sɛ, “Monkae wɔn a wodi mo anim” no. Yebetumi akyerɛ ase nso sɛ: “Monkae wɔn a wɔde akwankyerɛ ma mo no.” Efi Pentekoste afe 33 Y.B. no, Awurade Yesu Kristo asomafo anokwafo no na na wɔyɛ akwankyerɛ kuw no. Wɔn na wodii anim de akwankyerɛ maa Kristofo asafo a na wɔatew no foforo no. (Aso. 6:2-4) Mfiase no, na Yesu asomafo no na na wɔyɛ akwankyerɛ kuw no mufo, nanso eduu bɛyɛ afe 49 Y.B. no, na wɔanya afoforo abɛka ho. Enti bere a wosii twetiatwa ho gyinae no, “asomafo no ne mpanyimfo a wɔwɔ Yerusalem” no na na wɔyɛ akwankyerɛ kuw no mufo. (Aso. 15:1, 2) Ná wɔn adwuma ne sɛ wɔbɛhwɛ Kristofo asafo no so. Wɔde nkrataa ne ahyɛde kɔmaa asafo ahorow no wɔ baabiara. Wei hyɛɛ asuafo no nyinaa den ma wɔyɛɛ baako wɔ biribiara mu. Asafo ahorow no tiee akwankyerɛ kuw no, na wɔbrɛɛ wɔn ho ase maa wɔn. Yehowa nso hyiraa wɔn ma wɔn dodow kɔɔ anim.—Aso. 8:1, 14, 15; 15:22-31; 16:4, 5; Heb. 13:17.

² Asomafo no wu akyi no, awaefo baa asafo no mu. (2 Tes. 2:3-12) Yesu kaa ho asɛm wɔ ne mfatoho a ɛfa awi ne nwura bɔne ho no mu. Nwura bɔne (atoro Kristofo) no nyin faa awi (Kristofo a wɔasra wɔn) no so. Efi asomafo no bere so reba nyinaa, wɔmaa kwan ma akuw mmienu no nyinaa boom nyin kosii twabere anaa “wiase nhyehyɛe no awiei.” (Mat. 13:24-30, 36-43) Kristofo a wɔasra wɔn a na wɔwɔ hɔ saa bere no kɔɔ so nyaa Yesu anim dom, nanso na akwankyerɛ kuw biara nni hɔ. Enti ná wɔnhyɛ da nni ɔkwan pɔtee biara wɔ asase so a Yesu nam so de akwankyerɛ bɛma n’akyidifo. (Mat. 28:20) Nanso, Yesu hyɛɛ nkɔm sɛ edu twabere a, nneɛma bɛsesa.

³ “Hena koraa ne akoa nokwafo ne ɔbadwemma” no? Yesu Kristo bisaa asɛm yi de fii ne mfatoho bi ase. Ná ɛfa “sɛnkyerɛnne” a ɛbɛma yɛahu sɛ yɛwɔ “bere a ɛwɔ hɔ yi awiei” mu no ho. (Mat. 24:3, 42-47) Yesu kyerɛe sɛ akoa nokwafo no bɛma Onyankopɔn nkurɔfo honhom fam aduan “bere a ɛsɛ mu.” Yesu amfa onipa baako anni adwuma no anim wɔ asomafo no bere so, na mmom ɔkaa mmarima bi boom sɛ kuw de wɔn yɛɛ adwuma. Awiei bere yi mu nso, akoa nokwafo a Yesu de reyɛ adwuma no nyɛ onipa baako bi pɛ.

⁴ Hena na Yesu apaw no sɛ ɔmma n’akyidifo aduan? Ɛda adi pefee sɛ ɔbɛpaw Kristofo a wɔasra wɔn a wɔwɔ asase so. Bible frɛ wɔn “adehye asɔfokuw,” na wɔn adwuma ne sɛ ‘wɔbɛka nea ɔfrɛɛ wɔn fii sum mu baa ne hann nwonwaso mu no nneyɛe pa akyerɛ.’ (1 Pet. 2:9; Mal. 2:7; Adi. 12:17) Wɔn a wɔasra wɔn a wɔwɔ asase so nyinaa na wɔbom yɛ akoa nokwafo no anaa? Dabi. Bere bi Yesu maa nnipakuw bi aduan anwonwakwan so. Ná mmarima a wɔwom bɛyɛ 5,000; mmea ne mmofra mpo de, wɔankan wɔn anka ho. Yesu dii kan de aduan no maa asuafo no, na asuafo no nso kyekyɛ maa nnipakuw no. (Mat. 14:19) Ɔnam nnipa kakraa bi so maa nnipa mpempem aduan. Ɛnnɛ nso, saa kwan yi ara so na Yesu nam ma yɛn honhom fam aduan.

⁵ Enti anuanom mmarima kakraa bi a wɔasra wɔn na wɔbom yɛ ‘ofiehwɛfo nokwafo, ɔbadwemma’ no. Wɔn na wosiesie honhom fam aduan kyekyɛ, bere a Kristo aba n’Ahenni mu yi. (Luka 12:42) Enti nna a edi akyiri yi mu no, anuanom mmarima a wɔbom yɛ “akoa nokwafo ne ɔbadwemma” no yɛ adwuma wɔ Yehowa Adansefo adwumayɛbea ti. Ɛnnɛ, saa anuanom mmarima a wɔde honhom asra wɔn no na wɔyɛ Yehowa Adansefo Akwankyerɛ Kuw no.

⁶ Kristo nam saa kuw yi so ma yehu Bible nkɔmhyɛ a ɛreba mu. Ɔnam wɔn so ma yɛn akwankyerɛ wɔ bere a ɛsɛ mu na ɛboa ma yɛde Bible nnyinasosɛm bɔ yɛn bra. Honhom fam aduan a yɛreka ho asɛm yi, wɔnam Yehowa Adansefo asafo ahorow no so na ɛkyekyɛ. (Yes. 43:10; Gal. 6:16) Tete no, sɛ akoa bi di nokware a, na ne wura ma ɔhwɛ ne fie so. Saa ara na wɔama akoa nokwafo ne ɔbadwemma no adwuma sɛ ɔnhwɛ gyidi fiefo so. Enti akoa nokwafo no hwɛ nneɛma a edidi so yi so; asafo no agyapade, asɛnka adwuma, ne ɔmansin ne ɔmantam nhyiam. Afei ɔhwɛ ma wɔpaw ahwɛfo a wodi nneɛma anim wɔ Yehowa ahyehyɛde no mu, na ɔhwɛ ma wɔyɛ nhoma a yɛde sua Bible nso. Weinom nyinaa boa ‘asomfo’ no.—Mat. 24:45.

⁷ Ɛnde, henanom ne ‘asomfo’ no? Ne tiaa mu no, wɔn na wodi aduan no. Mfiase no, na asomfo no nyinaa yɛ wɔn a wɔasra wɔn. Akyiri yi, “nguan foforo” no mu nnipakuw kɛse no bɛkaa asomfo no ho. (Yoh. 10:16) Akoa nokwafo no ma kuw mmienu no nyinaa honhom fam aduan.

⁸ Ahohiahia kɛse no mu no, sɛ Yesu ba bebu wiase bɔne yi atɛn a, ɔde akoa nokwafo no besi “nea ɔwɔ nyinaa so.” (Mat. 24:46, 47) Wɔn a wɔka bom yɛ akoa nokwafo no nyinaa benya ɔsoro akatua. Wɔne wɔn mfɛfo a wɔn nyinaa dodow yɛ 144,000 no bɛka Kristo ho ne no adi ade wɔ soro. Sɛ wɔkɔ soro a, yɛrennya akoa nokwafo ne ɔbadwemma wɔ asase so bio. Nanso, Yehowa ne Yesu nam “mpanyimfo” a wɔbɛpaw wɔn no so de akwankyerɛ bɛma nnipa a Mesia Ahenni no bedi wɔn so wɔ asase so no.—Dw. 45:16.

⁹ Nneɛma pii nti ɛsɛ sɛ ‘yɛkae wɔn a wodi yɛn anim’ no na yenya wɔn mu ahotoso. Sɛ yɛyɛ saa a mfaso bɛn na yebenya? Ɔsomafo Paulo kaa sɛ: “Wɔn na wɔhwɛ mo kra so sɛ nnipa a wobebu ho akontaa; ɛno bɛma wɔde anigye ayɛ eyi, na ɛnyɛ ahomegu, anyɛ saa a ɛrensi mo yiye.” (Heb. 13:17) Wɔn a wodi yɛn anim ma yɛn akwankyerɛ no, ɛho hia paa sɛ yetie wɔn na yɛbrɛ yɛn ho ase ma wɔn. Efisɛ wɔhwɛ yɛn so na wɔboa yɛn ma yedi yiye wɔ Onyankopɔn som mu.

¹⁰ Wohwɛ 1 Korintofo 16:14 a, Paulo kaa sɛ: “Monyɛ biribiara ɔdɔ mu.” Ɔdɔ na ɛka mpanyimfo no ma wogyina Onyankopɔn nkurɔfo ananmu sisi nneɛma ho gyinae. Wɔaka ɔdɔ ho asɛm wɔ 1 Korintofo 13:4-8 sɛ: “Ɔdɔ wɔ abodwokyɛre na ne yam ye. Ɔdɔ nyɛ ahoɔyaw, entu ne ho, ɛnhoman, ɛnyɛ ade a ɛnsɛ, ɛnhwehwɛ nea n’ankasa hia, ne bo nhaw no. Ɛmfa bɔne nhyɛ ne mu. Enni nea ɛnteɛ ho ahurusi, na mmom edi nokware ho ahurusi. Ɛtɔ ne bo ase biribiara mu, egye biribiara di, ɛwɔ biribiara mu anidaso, na egyina biribiara ano. Ɔdɔ to ntwa da.” Esiane sɛ mpanyimfo no dɔ Yehowa asomfo nyinaa nti, wosisi gyinae a ɛbɛboa yɛn. Wei nti, ɛnsɛ sɛ yesuro sɛ yɛde wɔn akwankyerɛ bɛyɛ adwuma. Ɛsɛ sɛ yɛkae sɛ wɔyɛ wei nyinaa de suasua Yehowa dɔ.

¹¹ Asomafo no bere so no, nnipa a Yehowa ma wodii ne nkurɔfo anim no, na wɔnyɛ pɛ. Saa ara na ɛte nnɛ. Tete mmere mu nso, Yehowa de nnipa a wɔnyɛ pɛ yɛɛ adwuma maa nea na wabɔ ne tirim sɛ ɔbɛyɛ baa mu. Noa sei, ɔpam adaka, na ɔkaa ɔsɛe a na ɛreba wɔ ne bere so no ho asɛm. (Gen. 6:13, 14, 22; 2 Pet. 2:5) Afei nso, Yehowa paw Mose ma odii ne nkurɔfo anim yii wɔn fii Egypt. (Ex. 3:10) Mmarima a wɔnyɛ pɛ na Yehowa de ne honhom kaa wɔn ma wɔkyerɛw Bible no. (2 Tim. 3:16; 2 Pet. 1:21) Ɛnnɛ, nnipa a wɔnyɛ pɛ na Yehowa ma wodi asɛnka ne asuafoyɛ adwuma no anim. Nanso wei mma ahotoso a yɛwɔ wɔ Onyankopɔn ahyehyɛde mu no mmrɛ ase. Mmom no, ɛhyɛ yɛn den efisɛ yenim sɛ ɛnyɛ Yehowa na ɔtaa yɛn akyi a, anka ahyehyɛde yi ntumi nyɛ hwee. Akoa nokwafo no afa ɔhaw pii mu, na wɔanya osuahu pii. Ne nyinaa mu no, wɔakyerɛ sɛ Onyankopɔn honhom na ɛrekyerɛ wɔn kwan. Ɛnnɛ, yehu sɛ Yehowa ahyira n’ahyehyɛde no fã a ɛwɔ asase so no paa. Enti yɛn nso, yɛwɔ saa ahyehyɛde yi mu ahotoso, na yefi yɛn kra nyinaa mu taa akyi.

¹² Wɔn a wɔapaw wɔn sɛ wonni asafo no anim no, wodi nneɛma ho dwuma pɛpɛɛpɛ de kyerɛ sɛ wɔwɔ ahyehyɛde no mu ahotoso. (Aso. 20:28) Yɛn a yɛrebɔ Ahenni no ho dawuru nso, yɛde nsi ne ahokeka ka asɛm no wɔ afie afie mu, na yɛyɛ sankɔhwɛ ne Bible adesua. (Mat. 24:14; 28:19, 20) Yɛpɛ sɛ yenya honhom fam aduan a akoa nokwafo no de ma yɛn no so mfaso, enti ɛyɛ a yesiesie yɛn ho ansa na yɛakɔ Kristofo nhyiam. Nhyiam akɛse ne nketewa nso, yɛmma ɛmpa yɛn ti so. Sɛ yɛne yɛn nuanom hyiam wɔ Kristofo nhyiam ahorow ase a, yɛhyɛ yɛn ho yɛn ho nkuran, na ɛboa yɛn paa.—Heb. 10:24, 25.

¹³ Sɛ yɛde yɛn ahonyade boa ahyehyɛde no a, ɛkyerɛ sɛ yɛwɔ ahyehyɛde no mu ahotoso. (Mmeb. 3:9, 10) Yehu sɛ yɛn nuanom ho akyere wɔn a, yɛyɛ ntɛm boa wɔn. (Gal. 6:10; 1 Tim. 6:18) Yɛdɔ yɛn nuanom, enti yɛhwehwɛ hokwan a yɛde bɛyɛ biribi de akyerɛ sɛ yɛn ani sɔ nneɛma pa a Yehowa ne n’ahyehyɛde no ayɛ ama yɛn no nyinaa.—Yoh. 13:35.

¹⁴ Ade foforo a yɛbɛyɛ de akyerɛ sɛ yɛwɔ ahyehyɛde no mu ahotoso ne sɛ yebegye gyinae ahorow a ahyehyɛde no sisi atom. Ɔkwan baako a yɛbɛfa so ayɛ saa ne sɛ yɛbɛbrɛ yɛn ho ase atie akwankyerɛ a wɔn a wodi nneɛma anim no de ma yɛn no. Wɔn mu bi ne amansin so ahwɛfo ne asafo mu mpanyimfo. Saa anuanom yi nyinaa ka ‘wɔn a wodi yɛn anim’ no ho, enti ɛsɛ sɛ yetie wɔn na yɛbrɛ yɛn ho ase ma wɔn. (Heb. 13:7, 17) Sɛ wosi gyinae bi na yɛnte ase mpo a, ɛsɛ sɛ yegye tom, efisɛ yenim sɛ wɔpɛ sɛ esi yɛn yiye. Afei nso, Yehowa behu sɛ yetie n’Asɛm na yɛbrɛ yɛn ho ase ma n’ahyehyɛde no, enti obehyira yɛn. Yɛyɛ saa a, ɛkyerɛ sɛ yɛbrɛ yɛn ho ase ma yɛn Wura Yesu Kristo nso.

¹⁵ Anokwa, yɛwɔ nneɛma pii a enti ɛsɛ sɛ yenya akoa nokwafo ne ɔbadwemma no mu ahotoso. Satan na ɔyɛ wiase yi nyame. Ɔreyɛ nea obetumi biara sɛ obegu Yehowa din ne n’ahyehyɛde no ho fĩ. (2 Kor. 4:4) Ma w’ani nna hɔ na Satan mfiri bɔne no bi anyi wo! (2 Kor. 2:11) Onim sɛ “ne bere a aka yɛ tiaa,” na ɛrenkyɛ koraa wɔde no bɛto amoa donkudonku mu. Wei nti, wasi ne bo sɛ ɔbɛtwe Yehowa nkurɔfo dodow biara a obenya afi Onyankopɔn ho. (Adi. 12:12) Satan ani abere denneennen, enti momma yɛnkɔ so mmata Yehowa ho papee. Momma yɛmfa yɛn ho nto Yehowa so, na yennya ahyehyɛde a ɔnam so rekyerɛ ne nkurɔfo kwan nnɛ no mu ahotoso. Yɛyɛ saa a, ɛbɛma baakoyɛ atena yɛn ntam.