Ɛbɛyɛ sɛ na Pilato pɛ sɛ ɔyɛ adepa, nanso na ɔpɛ sɛ ɔbɔ ne dibea ho ban na ɔyɛ nea ɛbɛsɔ dɔm no ani. Awiei koraa no, ɔdwenee ne dibea ho sɛ ehia sen ahonim pa a obenya ne atɛntrenee a obebu. Ɔsrɛe sɛ wɔmma no nsu, na ɔde hohoroo ne nsa de kyerɛe sɛ odi onipa a afei de wapene so sɛ wonkum no no wu ho bem.a Ɛwom sɛ na Pilato gye di sɛ asɛm biara nni Yesu ho de, nanso ɔmaa wɔyɛɛ no ayayade na asraafo no dii ne ho fɛw, wɔkaa no mpire san totoo ntasu guu ne so.—Mateo 27:24-31.