“Wuram Sukooko”

ADWUMA a wonnya nyɛ. Nneɛma bo a ɛrekɔ soro. Ohia. Sikasɛm mu ahokyere. Sɛnea saa nsɛm yi taa pue wɔ atesɛm mu no redɔɔso. Na ɛda nsɛnneennen a nnipa ɔpepem pii hyia wɔ mmɔden a wɔbɔ sɛ wobenya aduan ne ntama ama wɔn mmusua na wɔanya dabere no mu adi.

Ɛkã gyidifo ne wɔn a wonnye nni nyinaa. Nanso wonnyaw gyidifo sɛ wɔn nko ara nni ɔhaw ahorow no ho dwuma. Bere a Yesu rekasa akyerɛ afeha a edi kan mu nnipa ahobrɛasefo no, ɔkae sɛ: “Monhwɛ wim nnomaa sɛ wongu na wontwa, na wɔmmoaboa ano ngu asan so, nanso mo soro Agya yɛn wɔn; na monsom bo nsen wɔn anaa?”​—Mateo 6:26.

Yesu kae nso sɛ: “Monhwɛ wuram sukooko, sɛnea enyin; ɛnyɛ adwuma, nso ɛnto asaawa, nanso mise mo sɛ Salomo anuonyam nyinaa mu po wankekã ne ho sɛ eyinom mu biako. Na sɛ Onyankopɔn fura wuram ahaban . . . ntama saa a, ɔrenyɛ nea ɛkyɛn eyi mma mo?”​—Mateo 6: 28-30.

So eyi kyerɛ sɛ enhia sɛ Kristoni yɛ adwuma de hwɛ ne ho? Dabida! Ɛsɛ sɛ Kristoni yɛ adwuma sɛnea ehia de tua ne ho aka. Ɔsomafo Paulo kae sɛ: “Sɛ obi mpɛ sɛ ɔyɛ adwuma a, mma onnidi nso.” (2 Tesalonikafo 3:10)Nanso Kristoni no nim sɛ Onyankopɔn fi ɔdɔ mu dwen ne ho na ɔwɔ gyidi sɛ ne soro Agya no hwɛ ne so. Enti asetra mu dadwen ahorow nnyɛ n’adwene. Wɔ mmere a emu yɛ den mu mpo no, ɔde nneɛma a ehia​—honhom fam nneɛma​—di kan. Ogye Yesu nsɛm yi di: “Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.’”​—Mateo 6:33.