So Bible no Bɔ Ne Ho Abira?

NHOMA kyerɛwfo Henry Van Dyke kyerɛw bere bi sɛ: “Bible no a yenya fii Apuei Fam, a wɔde Apuei Fam kasa ne kasakoa na ɛkyerɛw emu nsɛm no, de anan a yenim anantew wiase no mu akwan nyinaa so, akɔ asase biara so akɔhwehwɛ n’ankasa de wɔ baabiara. Asua sɛnea ɛkasa kyerɛ onipa koma wɔ kasa horow ɔhaha pii mu. Mmofra de ahodwiriw ne anigye tie emu nsɛm, na anyansafo hwehwɛ mu sɛ asetra ho mmebusɛm. Emu kɔkɔbɔ ahorow ma nsɛmmɔnedifo ne ahantanfo ho popo, nanso ɛyɛ ɛna nne ma wɔn a wɔapira ne wɔn a wɔanu wɔn ho . . . Onipa biara a n’ankasa wɔ ademude yi bi no nyɛ ohiani anaasɛ ankonam.”

Nokwarem no, Bible no ‘asua kasa horow ɔhaha pii ka.’ Anyɛ yiye koraa no, wɔakyerɛ emu nhoma 66 no biako ase akɔ kasa horow 1,970 mu. Nnipa ɔpepem pii bu Bible no sɛ akyɛde a efi Onyankopɔn hɔ, na wɔde anigye kenkan nya mu mfaso. Nanso, afoforo ka sɛ abirabɔ ahorow wom, ma enti wɔrentumi mfa ho nto so. Dɛn na nhwehwɛmu a wɔde boasetɔ ayɛ da no adi?

Sɛnea yɛn nsɛmma nhoma yi anim mfonini no kyerɛ no, Onyankopɔn de nnipa anokwafo na ɛkyerɛw Bible no. Nokwarem no, boasetɔ a wɔde hwehwɛ Bible no mu da no adi sɛ nnipa bɛyɛ 40 na wɔkyerɛw wɔ bɛboro mfeha 16 mu. So na wɔyɛ nhoma akyerɛwfo a na nhomakyerɛw ne wɔn adwuma? Yebetumi ahu oguanhwɛfo, towgyeni, oduruyɛfo, ntamadan nwenefo, ɔsɔfo, odiyifo, ne ɔhene wɔ wɔn mu. Nsɛm a wɔkyerɛw no taa bobɔ nnipa ne amammerɛ a yennim wɔ afeha 20 yi mu din. Nokwarem no, ɛnyɛ bere nyinaa na na Bible akyerɛwfo no ankasa te nea nsɛm a wɔkyerɛw no kyerɛ ase. (Daniel 12:8-10) Enti sɛ yehyia nsɛm bi a asete yɛ den bere a yɛrekenkan Bible no a, ɛnsɛ sɛ ɛyɛ yɛn nwonwa.

So yebetumi ate nsɛm a asete yɛ den a ɛtete sɛɛ no ase? So Bible no bɔ ne ho abira? Momma yensusuw emu nhwɛso ahorow bi ho na ama yɛahu.

So Eyinom Yɛ Nsɛm a Asete Yɛ Den Ampa?

▪ Kain nyaa ne yere fii he? (Genesis 4:17)

Ebia obi besusuw sɛ bere a wokum Habel akyi no, ɛkaa ne nua Kain a wayɛ bɔne no ne wɔn awofo, Adam ne Hawa, nkutoo wɔ asase no so. Nanso, Adam ne Hawa nyaa abusua kɛse. Sɛnea Genesis 5:3, 4 kyerɛ no, Adam woo ɔbabarima a ɔtoo ne din sɛ Set. Kyerɛwtohɔ no de ka ho sɛ: “Na nna a Adam woo Set no akyi no odii si mfirihyia ahanwɔtwe, na ɔwoo mmabarima ne mmabea.” Enti Kain waree ne nua anaasɛ ebia ne wɔfasewanom no mu biako. Esiane sɛ saa bere no na adesamma bɛn nnipa pɛyɛ ho yiye nti, ɛda adi sɛ aware a ɛte saa no amma wɔannya nyarewa a ebetumi de aware a ɛte sɛɛ mu mma ato asiane mu nnɛ no.

▪ Henanom na wɔtɔn Yosef kɔɔ Misraim?

Genesis 37:27 ka sɛ Yosef nuanom no bɔɔ wɔn tirim sɛ wɔbɛtɔn no ama Ismaelfo bi. Nanso nkyekyem a edi hɔ no ka sɛ: “Na Midianfo aguadifo bi bɛsenee. Na [Yosef nuanom no] twetwee Yosef yii no fii abura no mu, na wɔtɔn Yosef maa Ismaelfo no gyee nnwetɛbona aduonu. Na wɔde Yosef kɔɔ Misraim.” So wɔtɔn Yosef maa Ismaelfo anaasɛ Midianfo? Wiɛ, ebia na wɔfrɛ Midianfo no sɛ Ismaelfo, a na wɔnam wɔn nana Abraham so ne wɔn bɔ abusua no nso. Anaasɛ ebia na Midianfo aguadifo no ne Ismaelfo akwantufo retu kwan. Sɛnea ɛte biara no, Yosef nuanom no na wɔtɔn no, na akyiri yi otumi ka kyerɛɛ wɔn sɛ: “Mene mo nua Yosef a motɔn no baa Misraim no.”​—Genesis 45:4.

▪ Israelfo baahe na wowuwui wɔ aguaman a wɔne Moabfo mmea bɔe, ne Baal a ofi Peor som a wɔde wɔn ho hyɛɛ mu no mu?

Numeri 25:9 ka sɛ: “Na nnipa a wowuwui wɔ ɔhaw [a wɔn abrabɔ bɔne no nti Onyankopɔn de bae] no mu ano si ɔpeduonu anan.” Nanso, ɔsomafo Paulo kae sɛ: “Nso mommma yɛmmmɔ aguaman sɛ [Israelfo a na wɔwɔ sare no so] mu binom bɔe na wɔn mu mpem aduonu abiɛsa totɔe da koro no.” (1 Korintofo 10:8) Ebia wɔn a wokunkum wɔn no dodow fi 23,000 kosi 24,000, ma enti dodow no mu biara bɛyɛ nea ɛfata. Nanso, Numeri nhoma no titiriw kyerɛ sɛ atemmufo kunkum “ɔman no mu atitiriw no nyinaa” a wɔyɛɛ bɔne yi bi no. (Numeri 25:4, 5) Ebia “atitiriw” a wɔyɛɛ bɔne no yɛ 1,000, na sɛ wɔde ka 23,000 a Paulo kaa ho asɛm no ho a, wɔn dodow bɛyɛ 24,000. Ɛwom sɛ ɛda adi sɛ nnipa 23,000 na ɔhaw a efi Yehowa hɔ no kunkum wɔn tee de, nanso 24,000 na Yehowa ɔhaw no baa wɔn so efisɛ wɔn mu biara wui esiane n’atemmu mmara no nti.​—Deuteronomium 4:3.

▪ Esiane sɛ Agag traa ase wɔ Israelfo hene Saul bere so nti, so Amalekfo hene bi a okura saa din no a Bileam dii kan kaa ne ho asɛm no mma ɛnyɛ asɛm a abirabɔ wom?

Wɔ bɛyɛ 1473 A.Y.B. mu no, Bileam hyɛɛ nkɔm sɛ Israel hene bi ‘bɛso asen Agag.’ (Numeri 24:7) Wɔanka Agag ho asɛm bio akyiri yi kosii Ɔhene Saul ahenni so (1117-1078 A.Y.B.). (1 Samuel 15:8) Nanso, eyi nyɛ abirabɔ efisɛ ebia na “Agag” yɛ ahemfo abodin te sɛ Misraim Farao. Ebetumi aba nso sɛ na Agag yɛ din ankasa a Amalek ahene de dii dwuma mpɛn pii.

▪ Hena na ɔmaa Dawid kan Israelfo no?

Samuel nhoma a ɛto so abien 24:1 ka sɛ: “Na Yehowa bo huru hyɛɛ Israel bio, na opiapiaa Dawid [anaasɛ “bere a wopiapiaa Dawid,” New World Translation Reference Bible ase hɔ asɛm] hyɛɛ wɔn sɛ: Kɔ na kɔkan Israel ne Yuda.” Nanso ɛnyɛ Yehowa na opiapiaa Ɔhene Dawid sɛ ɔnkɔyɛ bɔne, efisɛ 1 Beresosɛm 21:1 ka sɛ: “Satan [anaasɛ ɔsɔretiafo,” New World Translation Reference Bible ase hɔ asɛm] gyina hyɛɛ Israel, na opiapiaa Dawid sɛ ɔnkan Israel.” Onyankopɔn ani annye Israelfo no ho, ma enti ɔmaa Satan Ɔbonsam kwan sɛ ɔmfa bɔne yi mmra wɔn so. Esiane eyi nti, 2 Samuel 24:1 kenkan te sɛ nea Onyankopɔn ankasa na ɔyɛe. Anigyesɛm ne sɛ, Joseph B. Rotherham nkyerɛase no kenkan sɛ: “Yahwe abufuw dɛw hyɛɛ Israel, ma enti ɔma wopiapiaa Dawid tiaa wɔn kae sɛ, Kɔkan Israel ne Yuda.”

▪ Ɔkwan bɛn so na obi betumi ama Israelfo ne Yudafo a Dawid kan wɔn no dodow a ɛsono emu biara no ahyia?

Wɔ 2 Samuel 24:9 no, Israelfo no dodow yɛ 800,000, Yudafo no yɛ 500,000, nanso 1 Beresosɛm 21:5 ka sɛ Israel akofofo ano si 1,100,000 na Yudafo no ano si 470,000. Na ahemman no bere nyinaa asraafo ano si 288,000, na wɔakyekyɛ wɔn mu akuw 12 a kuw biara mu asraafo yɛ 24,000, a kuw biara som ɔsram biako wɔ afe no mu. Na afoforo 12,000 a wɔsom mmusua no mmapɔmma 12 no wɔ hɔ, a ne nyinaa nkabom yɛ 300,000. Ɛda adi sɛ 300,000 a wɔyɛ asraafo dedaw no ka 1,100,000 a wɔka wɔn ho asɛm wɔ 1 Beresosɛm 21:5 no ho, nanso 2 Samuel 24:9 mfa wɔn nka ho. (Numeri 1:16; Deuteronomium 1:15; 1 Beresosɛm 27:1-22) Ɛdefa Yuda ho no, ɛda adi sɛ 2 Samuel 24:9 de asraafo 80,000 a wɔyɛ asraafo awɛmfo a wɔwɔ Filistifo ahye so no mufo kaa ho, nanso wɔamfa wɔn anka dodow a wɔka wɔn ho asɛm wɔ 1 Beresosɛm 21:5 no ho. (2 Samuel 6:1) Sɛ yɛkae sɛ nnipa baanu a ɛsono akwan a wɔn mu biara nam so hwɛ ade, na ɛsono wɔn mu biara adwene na wɔkyerɛw 2 Samuel ne 1 Beresosɛm a, yebetumi ama dodow no ahyia ntɛm ara.

▪ Na hena ne Sealtiel agya?

Kyerɛw nsɛm bi kyerɛ sɛ Yekonia (Ɔhene Yehoiakin) ne Sealtiel honam fam agya. (1 Beresosɛm 3:16-18; Mateo 1:12) Nanso Asɛmpa kyerɛwfo Luka frɛɛ Sealtiel sɛ “Neri ba.” (Luka 3:27) Ɛda adi sɛ Neri de ne babea maa Sealtiel sɛ ɔyere. Esiane sɛ Hebrifo no taa frɛ wɔn ase sɛ ɔbabarima, ne titiriw wɔ anato mu nti, Luka betumi afrɛ Sealtiel sɛ Neri ba ma afata. Saa ara nso na Luka kaa Yosef ho asɛm sɛ Eli, a na ɔyɛ Yosef yere Maria agya no ba.​—Luka 3:23.

Yesu ho Kyerɛw Nsɛm a Wɔbɛma Ɛne ne ho Ahyia

▪ Nnipa baahe mu na Yesu Kristo tuu adaemone a wɔkɔhyɛɛ mprakokuw kɛse bi mu no fii?

Asɛmpa kyerɛwfo Mateo ka nnipa baanu ho asɛm, nanso Marko ne Luka ka obiako pɛ ho asɛm. (Mateo 8:28; Marko 5:2; Luka 8:27 ) Ɛte sɛ nea Marko ne Luka twee adwene sii onipa biako pɛ a ahonhommɔne wɔ no so so, efisɛ ɔno na Yesu kasa kyerɛɛ no, na na n’asɛm no da nsow koraa. Ebetumi aba sɛ na saa ɔbarima no yɛ keka yiye, anaasɛ na wahu adaemone nsam amane akyɛ. Akyiri yi, ebia na saa ɔbarima no nkutoo na ɔpɛe sɛ ɔka Yesu ho kɔ. (Marko 5:18-20) Wɔ tebea bi a ɛne no sɛ mu no, Mateo kaa anifuraefo baanu a Yesu saa wɔn yare ho asɛm, nanso Marko ne Luka kaa obiako pɛ ho asɛm. (Mateo 20:29-34; Marko 10:46; Luka 18:35) Abirabɔ nni eyi mu, efisɛ anyɛ yiye koraa no, na onipa biako a ɔte saa wɔ hɔ.

▪ Da a Yesu wui no, na atade a ɔhyɛ no color te dɛn?

Sɛnea Marko (15:17, NW) ne Yohane (19:2, NW) kyerɛ no, asraafo no de ntama afasebiri guu Yesu so. Nanso Mateo (27:28) frɛ no “nkatakonmu kɔkɔɔ,” de sii kɔkɔɔ a ɛyɛ no so dua. Esiane sɛ afasebiri yɛ color biara a ɛyɛ kɔkɔɔ a kɔkɔɔ ne bruu fra mu nti, Marko ne Yohane gye tom sɛ na atade nguguso no su yɛ kɔkɔɔ. Ebetumi aba sɛ hann mu a na ogyina no betumi ama atade no ani asakrasakra, na Asɛmpa no akyerɛwfo anaasɛ wɔn a wɔkaa asɛm no kyerɛɛ wɔn no kaa color a wohuu no yiye no ho asɛm. Nsonsonoe ketewaa bi a ɛwom no kyerɛ sɛ akyerɛwfo no mu biara kyerɛw nea ohui na adi adanse sɛ wɔammom ankyerɛw ade koraa.

▪ Hena na ɔsoaa Yesu asɛndua no?

Yohane (19:17) kae sɛ: “Na ɔso n’asɛndua fii adi koduu baabi a wɔfrɛ hɔ Nitiriso a Hebri mu wɔfrɛ no Golgota.” Nanso Mateo (27:32), Marko (15:21), ne Luka (23:26) ka sɛ ‘na wɔde no rekɔ no, wosoo Simon a ofi Kirene no mu ma wɔde asɛndua no too no so sɛ ɔnsoa.’ Sɛnea Yohane kae no, Yesu soaa n’asɛndua. Nanso, wɔ kyerɛwtohɔ tiawa yi mu no, wanka anka ho sɛ akyiri yi wɔhyɛɛ Simon ma ɔsoaa asɛndua no. Enti, Asɛmpa no mu kyerɛwtohɔ ahorow no ne wɔn ho hyia wɔ eyi mu.

▪ Ɔkwan bɛn so na Yuda Iskariot wui?

Mateo 27:5 ka sɛ Yuda sɛn ne ho, nanso Asomafo no Nnwuma 1:18 ka sɛ “na ɔhyɛɛ akɔmfo no, ne mu paee, na n’ayamde nyinaa tu gui.” Bere a ɛte sɛ nea Mateo ka ɔkwan ko a ɔfaa so sɛ anka obedi ne ho dɔm ho asɛm no, Asomafo no Nnwuma ka nea efii mu bae no ho asɛm. Ɛda adi sɛ Yuda de hama kɔsaa dubaa bi, na ɔbɔɔ hentia de hyɛɛ ne kɔn, na ohuruw fii ɔbotan bi so de bɔɔ mmɔden sɛ ɔbɛsɛn ne ho. Ɛte sɛ nea hama no tew anaasɛ dubaa no bui, ma enti ɔbɛhwee hɔ ma ne mu paee wɔ abotan a ɛwɔ ase hɔ no so. Sɛnea asase no te wɔ Yerusalem mpɔtam hɔ no ma adwene a ɛte sɛɛ no yɛ nea ntease wom.

Wubebu Nsɛm Dɛn?

Sɛ yehyia nsɛm a ɛte sɛ nea abirabɔ wom wɔ Bible no mu a, eye sɛ yebehu sɛ nkurɔfo taa ka nsɛm a ɛte sɛ nea abirabɔ wom, nanso wotumi kyerɛkyerɛ mu anaasɛ wɔte ase ntɛm ara. Sɛ nhwɛso no, ebia adwumawura bi bɛkyerɛw obi krataa denam nsɛm no a ɔbɛka ma ne kyerɛwfo akyerɛw no so. Sɛ wobisa no a, ɔbɛka sɛ ɔno na ɔde krataa no manae. Nanso esiane sɛ ne kyerɛwfo na ɔkyerɛw krataa no na ɔde manae nti, obetumi aka sɛ ɔno na ɔde manae. Saa ara nso na abirabɔ nnim sɛ Mateo (8:5) ka sɛ ɔsraani panyin bi bebisaa biribi fii Yesu hɔ, bere a Luka (7:2, 3) kae sɛ ɔsomaa n’ananmusifo no.

Nhwɛso a yɛaka ho asɛm no kyerɛ sɛ wobetumi ate Bible mu nsɛm a asete yɛ den no ase. Enti, ntease pa wom sɛ yebenya Kyerɛwnsɛm no ho adwempa. Wɔkamfo su a ɛte saa no kyerɛ wɔ nsɛm yi a epuei wɔ abusua Bible bi a wotintimii wɔ afe 1876 mu no mu sɛ:

“Su pa a ɛsɛ sɛ wɔde te nsɛm a asete yɛ den saa no ase ne sɛ wobeyi wɔn afi mu, na wɔde nokwaredi apɛɛpɛɛ mu, sɛ mpo wontumi nte biribiara a asete yɛ den no ase mpo a. Ɛsɛ sɛ yesuasua asomafo no nhwɛso no, bere a nea wose ɛyɛ ‘asɛm a ɛyɛ den’ no haw asuafo no mu binom ma wɔpow Yesu no, fa asɛm a edi so yi di anoyi biara ho dwuma: ‘Awurade, hena nkyɛn na yɛbɛkɔ? Wo na wowɔ daa nkwa nsɛm; na yɛagye adi, na yɛahu sɛ wone Nyankopɔn kronkronni no [Ba].’ . . . Sɛ yehu nokware bi a ɛte sɛ nea ɛne nokware foforo bɔ abira a, momma yɛmmɔ mmɔden sɛ yɛbɛma ɛne wɔn ho ahyia, na yɛnam saayɛ so ama ɛne wɔn ho ahyia ama obiara.”​—Yohane 6:60-69.

So wobɛyɛ ade a ɛte saa? Bere a yɛahwehwɛ nhwɛso kakra a ɛkyerɛ sɛnea Kyerɛwnsɛm no ne ne ho hyia mu no, yɛwɔ anidaso sɛ wo ne odwontofo no a ɔkaa asɛm yi kyerɛɛ Onyankopɔn no bɛyɛ adwene: “W’asɛm ntoano yɛ nokware.” (Dwom 119:160) Yehowa Adansefo gye Bible mũ no nyinaa tom, na wɔde anigye bɛkyerɛ wo nea enti a wogye di. Dɛn nti na wo ne wɔn nsusuw nhoma a ɛso nni no ho? Emu nkrasɛm a ɛyɛ anigye no bɛma woanya nokware anidaso ne anigye.

[Mfonini wɔ kratafa 7]

So woabisa Yehowa Adansefo nea enti a wogye Bible no di no?