Nea Enti A Bible No Yɛ Onyankopɔn Akyɛde A Efi Honhom Mut

BIBLE no se “Onyankopɔn ne dɔ,” na ɔwɔ nyansa ne tumi. (1 Yohane 4:8; Hiob 12:13; Yesaia 40:26) Ɛka kyerɛ yɛn sɛ “n’akwan nyinaa yɛ trenee.” (Deuteronomium 32:4) Sɛnea Bible no kyerɛ no, Onyankopɔn da su horow te sɛ mmɔborohunu ne ayamhyehye nso adi.​—Exodus 34:6; Romafo 9:15.

Esiane sɛ Bible no ka sɛ Yehowa Nyankopɔn wɔ su horow a ɛte sɛɛ nti, ɛtwe adesamma a wɔwɔ ntwɛtwɛdɛ bɛn no. Nhoma yi ka adebɔ, bɔne ne owu fibea, ne ɔkwan a wɔbɛfa so apata yɛne Onyankopɔn ntam ho asɛm. Ɛde Paradise a wɔasan de aba asase so ho anidaso a ɛyɛ anigye ma. Nanso sɛ yetumi kyerɛ sɛ Bible no yɛ Onyankopɔn akyɛde a efi honhom mu nkutoo a, na eyinom nyinaa bɛyɛ nea ɛsom bo.

Bible no ne Abɔde ho Nyansahu

Bible no adi ɔkasatia so nkonim bere nyinaa. Sɛ nhwɛso no, sɛ wɔde adwene a emu da hɔ kenkan a, wohu sɛ ɛne nokware abɔde ho nyansahu hyia. Nokwarem no, wɔyɛɛ Bible no sɛ ɛmfa honhom fam nneɛma ho akwankyerɛ mma, na wɔanyɛ no sɛ abɔde ho nyansahu ho nhoma. Nanso ma yɛnhwɛ sɛ Bible no ne abɔde ho nyansahu mu nokwasɛm ahorow hyia anaa.

Akwaa ho Nimdeɛ: Bible no ka no pɛpɛɛpɛ sɛ “wɔakyerɛw” onipa mogyatɔw ‘afã horow nyinaa ato hɔ.’ (Dwom 139:13-16) “Wɔakyerɛw” amemene no, koma, ahrawa, aniwa​—eyinom ne nipadua no akwaa afoforo nyinaa ho asɛm ato hɔ wɔ mmadwoa a ɛredan onipa no awosu ho mmara mu wɔ ɛna no awotwaa mu. Nea ɛwɔ mmara yi mu ne mmere a akwaa horow yi mu biara beyi ne ho adi wɔ ɔkwan a ɛfata so. Na susuw ho hwɛ! Wɔkyerɛw sɛnea onipa nipadua no nyin ho nokwasɛm yi wɔ Bible no mu bɛyɛ mfe 3,000 ansa na nyansahufo rehu awosu ho mmara no.

Mmoa: Sɛnea Bible no kyerɛ no, ‘adanko puw wesaw.’ (Leviticus 11:6) Francois Bourlière (The Natural History of Mammals, 1964, kratafa 41) ka sɛ: “Ɛte sɛ nea su a ɛne ‘puw a wopuw wesaw’ no, anaasɛ aduan a wɔma ɛfa nsono no mu mprenu na ɛnyɛ pɛnkoro pɛ no yɛ ade a ntwaboa ne adanko taa yɛ. Afie ntwaboa taa di tiafi a wɔkɔ anadwo a ɛyɛ aduan a ɛwɔ wɔn yam anɔpa no fã mene a wɔnwesaw. Wuram ntwaboa puw wesaw mprenu da koro, na, wɔbɔ amanneɛ sɛ Europa adanko no yɛ saa ara.” Mammals of the World (a E. P. Walker yɛe wɔ 1964 mu, Po II, kratafa 647) nhoma no ka eyi ho asɛm sɛ: “Ebia wɔyɛ no te sɛ nea mmoa a wopuw wesaw ade no ‘puw wesaw no.’”

Fam a Wotutu De Hwehwɛ Tetefo ho Nneɛma: Abopon, nkuku, nkyerɛwee ahorow ne nneɛma a ɛtete saa ama wɔahu Bible mu ahene, nkurow, ne aman. Sɛ nhwɛso no, nnipa te sɛ Hetifo a wɔbɔ wɔn din wɔ Kyerɛwnsɛm no mu no traa ase ampa. (Exodus 3:8) Sir Charles Marston kae wɔ ne nhoma The Bible Comes Alive no mu sɛ: “Adanse a wɔahu no abrɛ wɔn a wɔawosow gyidi a ɔmanfo wɔ wɔ Bible no mu, na wɔama ne tumi abrɛ ase no ankasa nso ase, na asɛe wɔn tumi. Sofi repia ɔkasatia a ɛsɛe ade afi nokwasɛm ahorow a wogye ho kyim mu akogu ayɛsɛm a wogye tom mu.”

Fam a wotutu de hwehwɛ tetefo ho nneɛma afoa Bible no nsɛmmoa wɔ akwan pii so. Sɛ nhwɛso no, nneɛma a wɔahu asi mmeae ne din a ɛwɔ Genesis ti 10 no so dua. Wɔn a wotutu fam ahu Kaldeafo kurow Ur, aguadi ne nyamesom kurow a wɔwoo Abraham wom no. (Genesis 11:27-31) Wɔn a wotutu fam de hwehwɛ tetefo ho nneɛma huu Yebusifo kurow a Ɔhene Dawid ko fae no wɔ asu Gihon atifi wɔ Yerusalem kesee fam apuei. (2 Samuel 5:4-10) Wohuu Siloam Nkyerɛwee a wɔakyerɛw agu Ɔhene Hesekia asubura anaa nsuka no ano no wɔ 1880 mu. (2 Ahene 20:20) Wɔka Babilon so nkonim a Kores Ɔkɛseɛ no dii wɔ 539 A.Y.B. mu no ho asɛm wɔ Nabonido Beresosɛm a wohui wɔ afeha a ɛto so 19 Y.B. mu no mu. Persepolis nkyerɛwee ahorow ne Ɔhene Xerxes (Ahasweros) ahemfie a wohui wɔ Susan anaa Susa wɔ 1880 ne 1890 Y.B. ntam no asi Ester nhoma no mu nsɛm so dua. Nkyerɛwee bi a wohui wɔ 1961 mu wɔ Romafo agodibea bi amamfo so wɔ Kaesarea no dii adanse sɛ Romafo amrado Pontio Pilato a ɔde Yesu mae sɛ wɔmmɔ no asɛndua mu no traa ase.​—Mateo 27:11-26.

Nsoromma ho Nimdeɛ: Bɛyɛ mfe 2,700 a atwam ni​—bere tenten ansa na nnipa rehu sɛ asase no yɛ kurukuruwa no​—odiyifo Yesaia kyerɛwee sɛ: “Ɔno na ɔte asase kontonkron so.” (Yesaia 40:22) Hebri asɛmfua chugh, a wɔakyerɛ ase wɔ ha sɛ “kontonkron” no betumi akyerɛ “kurukuruwa” nso. (A Concordance of the Hebrew and Chaldee Scriptures a B. Davidson yɛe) Afei nso, wofi wim ne ɛtɔ mmere bi a, wimhyɛn a etumi kɔ sorosoro mu hu asase no a ayɛ kurukuruwa no pefee. Na Hiob 26:7 ka sɛ Onyankopɔn de “asase asɛn nea biribi nni.” Eyi yɛ nokware efisɛ nsoromma ho animdefo nim sɛ asase no nsen biribi a wohu so.

Afifide ho Nimdeɛ: Ebinom di mfomso ka sɛ Bible no nka nokware esiane sɛ Yesu Kristo kaa “sinapi fua” ho asɛm sɛ ɛyɛ “aba horow . . . nyinaa mu ketewa” nti. (Marko 4:30-32) Ebia na Yesu kyerɛ sinapi dua tuntum (Brassica nigra anaa Sinapis nigra), a ne trɛw yɛ milimita 1 kosi 1.6 pɛ no. Ɛwom sɛ na orchid aba nketenkete koraa no wɔ hɔ de, nanso na ɛnyɛ nnipa a wodua orchid na Yesu rekasa akyerɛ wɔn. Na Galilea Yudafo no nim sɛ sinapi aba ne aba horow a hɔnom akuafo dua no mu ketewaa koraa. Na Yesu reka Ahenni no ho asɛm, na na ɔnkyerɛ afifide ho nimdeɛ.

Abotan ne Asase Ani Dɔte ho Nyansa: Abotan ne asase ani dɔte ho nimdefo a wagye din, Wallace Pratt, reka Bible mu kyerɛwtohɔ a ɛfa adebɔ ho ho asɛm no, ɔkae sɛ: “Sɛ abotan ne asase ani dɔte ho nimdefo no, sɛ wɔfrɛ me sɛ memmɛkyerɛkyerɛ nnɛyi adwenhorow a yekura wɔ faako a asase no fi bae ne sɛnea nkwa baa so no mu tiawa nkyerɛ nguanhwɛfo a wɔba fam, te sɛ mmusuakuw a wɔkyerɛw Genesis Nhoma no kɔmaa wɔn no a, merentumi nyɛ saa yiye gye sɛ midi Genesis ti a edi kan no mu nsɛm no akyi yiye.” Pratt kae sɛ sɛnea wɔahyehyɛ Genesis mu nsɛm no nnidiso nnidiso​—po, asase, ne afei nsu mu mmoa, nnomaa ne ntɔteboa fibea​—te sɛ abotan ne asase so dɔte ho mmere nkyekyem ara pɛ.

Aduyɛ: C. Raimer Smith kyerɛwee wɔ ne nhoma The Physician Examines the Bible no mu sɛ: “Ɛyɛ me nwonwa yiye sɛ Bible no ka aduyɛ ho asɛm pɛpɛɛpɛ . . . Sɛ ɛka ayaresa ho asɛm, te sɛ ebia pɔmpɔ, apirakuru ne ade a wɔsa ho asɛm a, nnɛ gyinapɛn ahorow kyerɛ sɛ nea ɛka no yɛ nokware. . . . Nnipa bebree gye gyidi hunu pii di, te sɛ dua a wɔfrɛ no buckeye aba a ɛhyɛ kotoku mu remma wonnya ɔkwaha; apɔtorɔ mu a wobeso bɛma ɛpɔ agu wɔn ho; ntama kɔkɔɔ a wɔde bɛkyekye wɔn kɔn mu no bɛsa menewam kuru; asafetida bag bɛma wɔakwati nyarewa; ne sɛ bere biara a abofra bi yare no na asunson wɔ ne yam; ne ade, nanso nsɛm a ɛte sɛɛ nni Bible no mu. Eyi ankasa yɛ anwonwasɛm, na mibu no sɛ ɛyɛ adanse foforo a ɛkyerɛ sɛ wofi soro na wɔma wɔkyerɛwee.”

Wotumi De Ho To N’abakɔsɛm Mu Nsɛm So

Mmaranimfo Irwin H. Linton kae wɔ ne nhoma A Lawyer Examines the Bible no mu sɛ: “Bere a nhoma ahorow, atetesɛm ne adansekrum de ahwɛyiye ka sɛ nsɛm a na ɛka no sisii wɔ akyirikyiri baabi ne bere a ɛnyɛ pɔtee mu, ma enti ebu mmara horow a edi kan a yɛn mmaranimfo suae wɔ asɛm a wodi no yiye wɔ asennibea ho no so, kyerɛ sɛ ‘ɛsɛ sɛ mpaemuka no kyerɛ bere ne beae no,’ Bible no mu nsɛm kyerɛ bere ne beae a ɛka ho asɛm no pɛpɛɛpɛ.”

Linton de Luka 3:1, 2 kyerɛe sɛ nea ɔka no yɛ nokware. Ɛhɔ no, Asɛmpa no kyerɛwfo bobɔ atumfo baason din sɛnea ɛbɛyɛ na wakyerɛ bere a Yesu Kristo fii Ne som adwuma no ase. Hyɛ nkyerɛkyerɛmu a Luka de mae wɔ nsɛm yi mu no nsow: “Na Kaesare Tiberio ahenni afe a ɛto so dunnum so a Pontio Pilato di Yudea amrado, na Herode di Galilea mansinhene, na ne nua Filipo di Iturea ne Trakoniti asase so, na Lisania di Abilene mansinhene, na Hana ne Kaiafa di asɔfo mpanyin no, Onyankopɔn asɛm baa Sakaria ba Yohane nkyɛn sare so.”

Nkyerɛkyerɛmu a ɛte saa ayɛ Bible no mu ma. Afei nso, wɔkyerɛw n’afã horow te sɛ Nsɛmpa no wɔ bere a na Yudafo, Helafo ne Romafo amammerɛ anya nkɔanim yiye mu. Na ɛyɛ mmaranimfo, nhoma akyerɛwfo, ne nnwuma so ahwɛfo ne nnipa a wɔtete saa bere so. Ɛnde, akyinnye biara nni ho sɛ sɛ Nsɛmpa no ne Bible no afã afoforo mu nsɛm no nyɛ nokwasɛm a, anka wɔbɛda no adi sɛ ɛyɛ nnaadaasɛm. Nanso wiasefo abakɔsɛm akyerɛwfo asi nsɛm te sɛ Yesu Kristo asetra so dua. Sɛ nhwɛso no, Romani abakɔsɛm kyerɛwfo Tacitus kyerɛw Yesu ne N’akyidifo ho asɛm sɛ: “Christus a wɔnam no so nyaa edin [Kristofo] no huu asotwe a ɛsen biara mu amane wɔ Tiberio ahenni ase wɔ yɛn amrado biako, Pontio Pilato, nsam.” (Annals, Book XV, 44) Bible no mu abakɔsɛm a ɛyɛ nokware turodoo no boa ma yehu sɛ ɛyɛ akyɛde a Onyankopɔn de ama adesamma.

Adanse a Ɛso Sen Biara

Ɛwom sɛ fam a wotutu de hwehwɛ tetefo ho nneɛma, nsoromma ho nimdeɛ, abakɔsɛm ne nneɛma afoforo ho nimdeɛ afoa Bible no nsɛmmoa de, nanso emu gyidi nnyina ɛso duasi a ɛte sɛɛ no so. Wɔ adanse pii a ɛkyerɛ sɛ Bible no yɛ akyɛde a Onyankopɔn nam honhom so de ama yɛn no mu no, adanse kɛse biara nni hɔ a wobetumi de ama sen emu nkɔmhyɛ ahorow a anya mmamu no.

Yehowa Nyankopɔn ne nokware nkɔmhyɛ Fibea. Ɔnam ne diyifo Yesaia so kae sɛ: “Kan de no, hwɛ, aba mu, na nneɛma foforo na merekyerɛ, ennya mfii yi merema moate.” (Yesaia 42:9) Bio nso, Bible no ka sɛ Onyankopɔn nam ne honhom kronkron, anaasɛ n’adeyɛ tumi so de honhom kaa n’akyerɛwfo. Sɛ nhwɛso no, Kristoni ɔsomafo Paulo kyerɛwee sɛ: “Kyerɛw nyinaa fi Nyankopɔn home mu.” (2 Timoteo 3:16) Ɔsomafo Petro kyerɛwee sɛ: “Kyerɛw mu adiyisɛm biara nnam onipa nkyerɛase so; efisɛ adiyisɛm bi amfa nnipa pɛ so amma pɛn, na Onyankopɔn nnipa kronkron no, sɛnea honhom kronkron de wɔn rekɔ no na wɔkasae.” (2 Petro 1:20, 21) Enti ma yɛnhwɛ Bible nkɔmhyɛ mu.

Bible no mu nkɔmhyɛ ɔhaha pii no mu bi ne nea ɛfa Asiria ahenkurow, Niniwe, “mogya kurow,” a ɛkanyan ehu wɔ tete Mfinimfini Apuei Fam bɛyɛ mfeha 15 ne akyi no ho no. (Nahum 3:1) Nanso, bere a Niniwe tumi duu ne pɔmpɔn so no, Bible no ka siei sɛ: “[Onyankopɔn bɛdan] Niniwe amamfõ, na awo kesee sɛ sare so, na mmoakuw abutubutuw mu, mmoadoma nyinaa; pokupoku ne, apɛsɛe nso bɛtra n’adum no so; wɔbɛte nnomaa sũ mfɛnsere mu, nwura dodow begugu apongua ase, efisɛ wama ne nkyeneduru no ho ada hɔ.” (Sefania 2:13, 14) Ɛnnɛ nsrahwɛfo hu sɛ nkoko nkutoo na ɛma wohu tete Niniwe amamfo so. Afei nso, nguankuw didi wɔ hɔ, sɛnea wɔka siei no.

Wɔ anisoadehu mu no, Onyankopɔn diyifo Daniel buu odwennini a ɔwɔ mmɛn abien ne ɔpapo a abɛn kɛse bi wɔ n’ani ntam. Ɔpapo no sii odwennini no too fam na obubuu ne mmɛn abien no. Ɛno akyi no, ɔpapo no abɛn kɛse no bui, na mmɛn anan besii ananmu. (Daniel 8:1-8) Ɔbɔfo Gabriel kyerɛkyerɛe mu sɛ: “Odwennini a wuhuu no a ɔwɔ mmɛn abien no ne Media ne Persia ahene; na ɔpapo a ɔyɛ kekã no ne Hela hene; na abɛn kɛse a ɛwɔ n’ani ntam no ne ɔhene a odi kan; na nea ebui a anan fifii sii ananmu no, ahenni anan bɛsɔre ɔman no mu, nso ennu kan de no ahoɔden.” (Daniel 8:20-22) Sɛnea abakɔsɛm ada no adi no, “Hela hene” na otuu​—odwennini a ɔwɔ mmɛn abien​—Medo-Persia Ahemman no​—gui. Na sɛnkyerɛnne kwan so ɔpapo no wɔ “abɛn kɛse” a ɛne Aleksanda Ɔkɛseɛ no. Ne wu akyi no, n’asraafo mpanyimfo baanan besii saa “abɛn kɛse” no ananmu denam tumi a wɔfae wɔ “ahenni anan” no mu no so. Hebri Kyerɛwnsɛm (“Apam Dedaw”) no mu nkɔmhyɛ ahorow pii anya mmamu wɔ Yesu Kristo so. Kristofo Hela Kyerɛwnsɛm (“Apam Foforo”) no akyerɛwfo a wɔde honhom kaa wɔn no de eyinom bi kaa ne ho asɛm. Sɛ nhwɛso no, Asɛmpa no kyerɛwfo Mateo daa Yesu a ɔbaabun woo no, odikanfo a Onyae, ne Yerusalem a ɔtraa afurum ba so kɔe ho nkɔmhyɛ ahorow mmamu adi. (Fa Mateo 1:18-23; 3:1-3; 21:1-9 toto Yesaia 7:14; 40:3; Sakaria 9:9 ho.) Nkɔmhyɛ ahorow a ɛte sɛɛ a anya mmamu no di adanse sɛ Bible no yɛ Onyankopɔn akyɛde a efi honhom mu ampa.

Bible mu nkɔmhyɛ mprempren mmamu di adanse sɛ yɛte “nna a edi akyiri” no mu. (2 Timoteo 3:1-5) Akodi, aduankɔm, ɔyaredɔm, ne asasewosow ahorow a ebi mmae da yɛ Yesu “ba” wɔ Ahenni tumi mu ho “sɛnkyerɛnne” no fã. Yehowa Adansefo bɛboro ɔpepem anan, a wɔka Ahenni a wɔde asi hɔ no ho asɛmpa dwumadi wɔ wiase nyinaa no nso ka saa sɛnkyerɛnne no ho. (Mateo 24:3-14; Luka 21:10, 11) Bible nkɔmhyɛ a mprempren ɛrenya mmamu no nso ma yɛn awerɛhyem sɛ, ɛrenkyɛ ɔsoro ahenni a Yesu di so hene no de wiase foforo a daa anigye wom bɛbrɛ adesamma asoɔmmerɛfo.​—2 Petro 3:18; Adiyisɛm 21:1-5.

Nsɛm a wɔahyehyɛ a ɛka ho a eti no ne sɛ “Bible Nkɔmhyɛ Ahorow a Anya Mmamu” no de Bible mu nkɔmhyɛ ahorow ɔhaha pii a wobetumi akyerɛw no kakraa bi pɛ ma. Wɔaka eyinom mu binom mmamu ho asɛm wɔ Kyerɛwnsɛm no ankasa mu, nanso nea ɛsɛ sɛ yɛhyɛ no nsow titiriw ne nkɔmhyɛ ahorow a ɛrenya mmamu nnɛ no.

Ebia, wubetumi ahu nsɛm bi a esisi wɔ wiase nyinaa a wɔkaa ho asɛm siei wɔ Bible no mu. Nanso, dɛn nti na wonkɔ so nyɛ nhwehwɛmu no? Sɛ wubisa a, Yehowa Adansefo de nkyerɛkyerɛmu pii bɛma wo wɔ anigye so. Na ɛmmra sɛ wo koma mu a wufi hwehwɛ Ɔsorosoroni no ne n’atirimpɔw ahorow ho nimdeɛ no bɛma woagye adi sɛ Bible no yɛ Onyankopɔn akyɛde a efi honhom mu ampa.

[Nsɛm a wɔahyehyɛ wɔ kratafa 7]

BIBLE NKƆMHYƐ AHOROW ANYA MMAMU

NKƆMHYƐ MMAMU

Sefania 2:13, 14 Wɔsɛee Niniwe wɔ bɛyɛ 632 A.Y.B. mu

[Mfonini wɔ kratafa 8]

Ɔko, ɔkɔm, ɔyaredɔm, ne asasewosow sɛe nneɛma pii nnɛ, nanso wiase foforo a asomdwoe ne anigye wom abɛn