Atuhoama Adwuma a Mfaso Wɔ So Kɛse

YESU KRISTO yɛɛ nneɛma pa maa nkurɔfo bere nyinaa. Sɛ nhwɛso no, ɔmaa wɔn a ɔkɔm de wɔn aduan na ɔsaa ayarefo yare. (Mateo 14:14-21) Nanso, adwuma bɛn na na ɛho hia no paa? Asɛm bi a esii Yesu som adwuma no mfiase no de mmuae no ma. Wɔayɛ ho kyerɛwtohɔ wɔ Marko Asɛmpa no ti a edi kan no.

Bere a na Yesu wɔ Kapernaum, a ɛbɛn Galilea Po no, wɔde no kɔɔ Simon anaa Petro fie. Bere a woduu hɔ no, ‘na Simon asebea da hɔ yare atiridii,’ na Yesu saa no yare. (Marko 1:29-31) Akyiri yi, nnipakuw bi, a na afoforo pii a “wɔyare nyarewa pii” ka ho no, fii ase betwaa Petro pon ano hyiae, na Yesu saa wɔn nso yare. (Marko 1:32-34) Na ade sae no, wɔn nyinaa kɔɔ wɔn fie.

Da a edi hɔ no, Yesu nkutoo fii fie hɔ ‘ahemadakye kɔɔ baabi kɔbɔɔ mpae.’ Ankyɛ na asuafo no nso nyanee, hwɛɛ fie hɔ hui sɛ nnipakuw pii retwɛn wɔ pon no ano. Nanso na dɛn na wɔbɛyɛ? Ná wonhu Yesu! Ntɛm ara, Petro ne wɔn a wɔka ne ho no tiw Yesu kɔka kyerɛɛ no sɛ: “Nnipa nyinaa hwehwɛ wo.” (Marko 1:35-37; Luka 4:42) Enti, ɛte sɛ nea na wɔreka akyerɛ Yesu sɛ: ‘Dɛn na woreyɛ wɔ ha? Yare a wosaa no nnɛra anadwo no so aba mfaso kɛse. Ɛnnɛ nso ɛdɔm pii retwɛn wo!’

Nanso, hyɛ nea Yesu kae no nsow: ‘Momma yɛnkɔ nkurow a ɛdeda hɔ no mu, na menkɔka asɛmpa no ɛhɔ nso.’ Saa mmuae yi ho hia. Yesu ansan ankɔ Petro fie ankɔsa afoforo yare. Ɔkyerɛkyerɛɛ nea enti a ɛte saa no mu sɛ: “Eyi [asɛmpa no a ɔbɛka] nti na mebae.” (Marko 1:38, 39; Luka 4:43) Dɛn na na Yesu reka akyerɛ n’asuafo no? Ná nneɛma pa a ɔbɛyɛ no som bo ma no, nanso na Onyankopɔn asɛm a Yesu bɛkyerɛkyerɛ no ne ne botae titiriw.—Marko 1:14.

Esiane sɛ Bible hyɛ Kristofo nkuran sɛ ‘wonni Yesu anammɔn akyi’ nti, nokware Kristofo a wɔwɔ hɔ nnɛ no nya akwankyerɛ a edi mu bere a wɔresusuw adwuma ko a ɛsɛ sɛ wotu wɔn ho ma yɛ ho no. (1 Petro 2:21) Te sɛ Yesu no, wɔboa nkurɔfo a ahia wɔn—sɛnea asɛm a edi eyi anim kyerɛkyerɛɛ mu no. Afei nso, te sɛ Yesu no, wɔde Bible mu asɛmpa a ɛfa Onyankopɔn Ahenni ho a wɔbɛkyerɛkyerɛ no yɛ wɔn botae titiriw.a (Mateo 5:14-16; 24:14; 28:19, 20) Nanso, dɛn nti na wotu wɔn ho ma kyerɛkyerɛ afoforo Bible mu asɛm no kɛse sen nnwuma pa foforo a wɔbɛyɛ no?

Nea Enti a Bible Nkyerɛkyerɛ So Wɔ Mfaso ne Sɛnea Ɛso Wɔ Mfaso

Asiafo bɛ bi de mmuae no ma. Ɛka sɛ: “Sɛ woyɛ afe biako nhyehyɛe a, dua nnuaba. Sɛ woyɛ mfe du nhyehyɛe a, dua nnua. Sɛ woyɛ mfe ɔha nhyehyɛe a, kyerɛkyerɛ nkurɔfo.” Nokwarem no, nhomasua nkutoo na etumi de mfaso a ɛtra hɔ daa ba efisɛ ɛma obi tumi si gyinae a ɛbɛma n’asetra atu mpɔn. Ne saa nti na nnɛ nnipa bɛboro ɔpepem asia, a ebinom de wɔn bere fã anaa wɔn bere nyinaa atu wɔn ho ama, de wɔn bere, wɔn ahoɔden, ne wɔn nneɛma rekyerɛkyerɛ nkurɔfo Bible no kwa no. Adwuma a ɛte saa a Yehowa Adansefo atu wɔn ho ama reyɛ bere tenten ni no renya nkurɔfo so nkɛntɛnso pa wɔ wiase nyinaa. Ɔkwan bɛn so?

Bere a wɔboa nkurɔfo ma wɔte Bible mu afotu pa ase na wɔde di dwuma no, esiesie wɔn yiye ma wogyina asetra mu haw ahorow ano. Ɛhyɛ wɔn den ma wotumi kwati su horow a ɛmfata. Nelson, aberante bi a ɔwɔ Brazil, ka mfaso foforo a ɛwɔ Bible nkyerɛkyerɛ so ho asɛm sɛ: “Efi bere a Yehowa Adansefo fii ase ne me suaa Bible no, manya anigye efisɛ seesei mewɔ asetra mu atirimpɔw.” (Ɔsɛnkafo 12:13) Afoforo ɔpehaha pii—mmofra ne mpanyin—a wɔafi ase resua Onyankopɔn Asɛm nnansa yi no ne Nelson yɛ adwene. Sɛ asetram atirimpɔw a edi mu a nkurɔfo anya no da nkyɛn a, Onyankopɔn Ahenni no ho asɛm a wɔate no ma wonya daakye ho anidaso pa—anidaso a ɛma asetra yɛ nea mfaso wɔ so, wɔ tebea a emu yɛ den yiye mpo mu. (1 Timoteo 4:8)—Hwɛ adaka mu asɛm a ɛne “Nhyira a Onyankopɔn Ahenni De Bɛba” no.

Yehowa Adansefo nam Bible nkyerɛkyerɛ a wɔde ma so fi wɔn pɛ mu yɛ adwuma a mfaso wɔ so kɛse. Ɔkwan bɛn so na mfaso wɔ so? Onyankopɔn Asɛm ka sɛ: ‘Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.’ (Yohane 17:3) Fa no sɛ woreyɛ adwuma bi a mfaso wɔ so kɛse—adwuma a woatu wo ho ama reyɛ na nkurɔfo nya so mfaso kɛse! So ɛnyɛ ɛno ne adwuma a wobɛpɛ sɛ wusua ho ade pii? Sɛ saa a, hu Yehowa Adansefo a wɔwɔ wo mpɔtam hɔ no. Sɛ wugye ɔfrɛ a ɛte saa so a, worennu wo ho da.

[Ase hɔ asɛm]

[Asɛm a wɔafa aka wɔ kratafa 21]

“Sɛ woyɛ afe biako nhyehyɛe a, dua nnuaba. Sɛ woyɛ mfe du nhyehyɛe a, dua nnua. Sɛ woyɛ mfe ɔha nhyehyɛe a, kyerɛkyerɛ nkurɔfo.”

[Adaka/Mfonini wɔ kratafa 20]

Ɔboa Nkurɔfo na Ɔma Wonya Anidaso Nso

Nadine, Franceni ɔyarehwɛfo bi a wadi mfe 43, a ɔhwɛ nyarewa a esisi wɔ mmeae a ɔhyew wɔ no yɛ wɔn a wɔatu wɔn ho ama yɛ adwuma wɔ Central Africa no mu biako. Bere a wobisabisaa no nsɛm nnansa yi ara no, ɔkae sɛ: “Sɛ nkurɔfo bisa me nea enti a meyɛ eyi a, meka sɛ, Migye Onyankopɔn di; medɔ nkurɔfo, na mepɛ sɛ mede me bere boa afoforo. Na esiane sɛ meyɛ Yehowa Dansefo nti, mepɛ sɛ mesa ayarefo yare na mema wonya anidaso nso.” Bere a Nadine atu ne ho ama reboa wɔ Afrika no, ɔde ne bere no bi yɛ ayaresa adwuma na ɔde nea aka no boa Bible sua adwuma a ɛhɔnom Adansefo no yɛ no nso.

[Mfonini ahorow]

Nadine wɔ Afrika

[Adaka wɔ kratafa 22]

Nhyira a Onyankopɔn Ahenni De Bɛba

Yɛsrɛ wo kenkan kyerɛw nsɛm ahorow yi wɔ w’ankasa Bible mu na hwɛ sɛnea Onyankopɔn bedi nnipa ahiade a edidi so yi ho dwuma no:

Akwahosan “Ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:4; Yesaia 33:24; 35:5, 6.

Nimdeɛ ‘Wɔrenyɛ bɔne na wɔrensɛe ade bio, me bepɔw kronkron no nyinaa so, na Yehowa ho nimdeɛ bɛyɛ asase ma, sɛ nsu kata po so no.’—Yesaia 11:9; Habakuk 2:14.

Adwumayɛ “Wobesisi adan atra mu, na wɔayeyɛ bobe nturo adi mu aba. Wɔrensisi adan mma obi ntra mu, na wɔrennua mma obi nni . . . Wɔrenyɛ adwumayɛhunu.”—Yesaia 65:21-23.

Aduan “Asase abɔ n’aduan, Onyankopɔn, yɛn Nyankopɔn behyira yɛn.”—Dwom 67:6; 72:16; Yesaia 25:6.

Asetram Nsɛm “[Yehowa, “NW”] abubu abɔnefo abaa . . . Asase nyinaa so adwo, ayɛ komm: wɔma dwom so.”—Yesaia 14:5, 7.

Adetreneeyɛ “Hwɛ, trenee so na ɔhene bi bedi hene, na asafohene nso, atemmu so na wobedi asafohene.”—Yesaia 11:3-5; 32:1, 2.