Wɔyɛɛ Yehowa Apɛde

Yesu Nyaa Mmofra Ho Adagyew

NÁ YESU som adwuma a ɔyɛɛ no mfe abiɛsa ne fa no rebɛn n’awiei. Ná ɛrenkyɛ ɔbɛkɔ Yerusalem akowu owu yayaw. Ná onim nea ɛda hɔ retwɛn no no, efisɛ na waka akyerɛ n’asuafo no sɛ: “Wɔde onipa ba no bɛhyɛ nnipa nsa, na wɔakum no.”—Marko 9:31.

Akyinnye biara nni ho sɛ, na Yesu bɛpɛ sɛ ɔde da biara, dɔnhwerew biara, ne bere biara a aka no di dwuma yiye. Na n’asuafo no da so ara hia mmoa. Yesu hui sɛ wɔda so ara hia afotu a emu yɛ den fa hia a ahobrɛase ho hia ne hintiduato a na ebetumi aba bere biara no ho. (Marko 9:35-37, 42-48) Na wɔsan hia aware, awaregyae, ne sigyadi ho akwankyerɛ. (Mateo 19:3-12) Esiane sɛ na onim sɛ ɛrenkyɛ na wawu nti, akyinnye biara nni ho sɛ Yesu kasa kyerɛɛ n’asuafo no ntiantia mu ne ɔkwan a egye ntɛmpɛ so. Ná bere ho yɛ den yiye—na ɛno na ɛmaa ade a edi hɔ a Yesu yɛe no daa nsow kɛse.

Yesu Maa Mmofra Baa Ne Nkyɛn

Bible kyerɛwtohɔ no ka sɛ: “Na wɔde [mmofra] brɛɛ no sɛ ɔmfa ne nsa ngu wɔn so.” Bere a n’asuafo no huu eyi no, ntɛm ara na wɔkasa tiae. Ebia wosusuw sɛ Yesu yɛ onipa titiriw dodo anaa onni adagyew koraa a ɔde besusuw mmofra ho. Afei, hwɛ sɛnea ɛbɛyɛ n’asuafo no nwonwa bere a Yesu bo fuw wɔn no! Ɔka kyerɛɛ wɔn sɛ: “Momma [mmofra] no kwan na wɔmmra me nkyɛn, na munnsiw wɔn kwan; na eyinom sɛɛ na Onyankopɔn ahenni yɛ wɔn dea.” Afei Yesu de kaa ho sɛ: “Nokware mise mo sɛ: Obiara a ɔrennye Onyankopɔn ahenni sɛ [abofra] no, ɔrenkɔ mu koraa.”—Marko 10:13-15.

Yesu huu su pa wɔ mmofra mu. Wɔtaa pɛ nsɛmmisa na wogye afoforo di. Wogye wɔn awofo nsɛm tom, na wogyina wɔn akyi wɔ mmofra foforo anim mpo. Ɛsɛ sɛ wɔn a wɔpɛ sɛ wɔkɔ Onyankopɔn Ahenni mu nyinaa suasua wɔn asoɔmmerɛw ne ahobrɛase a wɔde sua ade no. Sɛnea Yesu kae no, “eyinom sɛɛ na Onyankopɔn ahenni yɛ wɔn dea.”—Fa toto Mateo 18:1-5 ho.

Nanso Yesu amfa mmofra yi anyɛ mfatoho kɛkɛ. Kyerɛwtohɔ no ma emu da hɔ sɛ na Yesu ani gye ho sɛ ɔwɔ wɔn nkyɛn. Marko bɔ amanneɛ sɛ Yesu “[yɛɛ] wɔn atuu de ne nsa guu wɔn so hyiraa wɔn.” (Marko 10:16) Marko kyerɛwtohɔ no nkutoo na ɛde nkyerɛkyerɛmu a ɛka koma yi ka ho sɛ Yesu “[yɛɛ] wɔn atuu.”a Enti Yesu yɛɛ ade ma ɛboroo nea na mpanyimfo a wɔde mmofra no brɛɛ Yesu sɛ ebia ɔde ne nsa ‘begu’ wɔn so kɛkɛ no hwɛ kwan no.

Yesu de “ne nsa guu” mmofra no so yɛɛ dɛn? Biribiara nni eyi mu a ɛkyerɛ sɛ nyamesom amanne bi te sɛ asubɔ, kɔɔ so. Bere a ɛtɔ mmere bi a, nsa a wɔde gu obi so kyerɛ dwumadi bi a wɔde ma no no, ɛtɔ mmere bi nso a ɛkyerɛ nhyira a wɔde ma kɛkɛ. (Genesis 48:14; Asomafo no Nnwuma 6:6) Ɛno nti ebetumi aba sɛ na Yesu rehyira mmofra no kɛkɛ.

Sɛnea ɛte biara no, Marko de asɛmfua a emu yɛ duru a wɔde gyina hɔ ma “nhyira” (ka·teu·lo··geʹo), a ɛkyerɛ nkate a emu yɛ den, na edii dwuma. Eyi kyerɛ sɛ Yesu fi komam, odwo mu, ne ayamye mu na ohyiraa mmofra no. Ɛda adi sɛ, wammu mmofra sɛ nnesoa a wɔsɛe bere.

Asuade a Ɛwom Ma Yɛn

Ná ɔkwan a Yesu fa so ne mmofra ne mpanyin nyinaa di nsɛm no nyɛ nea adwoodwoo anaa animtiaabu wom. Nhoma bi ka sɛ: “Ɛbɛyɛ sɛ na ɔtaa nwenwene, de anigye serew nso.” Ɛnyɛ nwonwa sɛ nnipa nyinaa tumi kɔɔ ne nkyɛn. Sɛ yesusuw Yesu nhwɛso ho a, yebetumi abisa yɛn ho sɛ, ‘So afoforo tumi bɛn me?’ ‘So minnya me ho adagyew koraa a mede besusuw afoforo ne nea wɔyɛ ho?’ Koma mu a yebefi asusuw nkurɔfo ho no bɛkanyan yɛn ma yɛde yɛn ho ama, sɛnea Yesu yɛe no. Afoforo behu sɛ yɛpɛ wɔn asɛm ankasa, na ɛbɛma wɔabɛn yɛn.—Mmebusɛm 11:25.

Sɛnea Marko kyerɛwtohɔ no kyerɛ no, mmofra a Yesu ne wɔn bɔe no maa n’ani gyei. Ɛda adi sɛ, ogyee bere hwɛɛ wɔn sɛ wɔredi agoru, efisɛ ɔkaa wɔn agodie ho asɛm wɔ ne mfatoho biako mu. (Mateo 11:16-19) Ebia na mmofra a Yesu hyiraa wɔn no bi susua dodo sɛ wobehu nipa ko a ɔyɛ ate ne nkyerɛkyerɛ ase. Nanso eyi amma no ante nka sɛ ɔresɛe ne bere. Onyaa mmofra ho adagyew efisɛ na ɔdɔ wɔn. Ebetumi aba sɛ akyiri yi mmofra a Yesu hyiaa wɔn wɔ ne som adwuma no mu no koma kaa wɔn ma wɔkyerɛɛ ne dɔ ho anisɔ bɛyɛɛ n’asuafo.

Sɛ Yesu nyaa mmofra ho adagyew wɔ n’asetra mu adapɛn a etwa to a na emu yɛ den no mu a, akyinnye biara nni ho sɛ yebetumi anya mmofra ho adagyew wɔ yɛn bere nhyehyɛe a adagyew nnim no mu. Wɔn a wɔwɔ ahiade titiriw, te sɛ nyisaa na ɛsɛ sɛ yɛde yɛn adwene si wɔn so kɛse. Nokwarem no, mmofra nyinaa nya nkɔso bere a wonya wɔn ho adagyew no, na ɛyɛ Yehowa pɛ sɛ yɛde ɔdɔ ne mmoa a yebenya nyinaa ma wɔn.—Dwom 10:14.

[Ase hɔ asɛm]