Eyi Ne Nna a Edi Akyiri No Ampa?

WOTE korow bi a ɛrebɛn asubɔnten bi fã a nsu no ano yɛ den anim. Ahuruw ne asorɔkye twa abo akɛse ba soro. Wobɔ mmɔden sɛ wobɛdan afi ho. Ɛsɛ sɛ nea ɔte w’akyi no boa ma modan korow no ani, nanso onni mu suahu. Nea enye koraa ne sɛ, wunni asase ho mfonini biara, enti wunnim sɛ ebia saa asorɔkye yi ano bɛbrɛ ase wɔ nsuka bi a atɛm dinn mu anaasɛ ɛde mo bɛkɔ aworoeɛ bi.

Tebea no nyɛ anigye, ɛnte saa? Enti yɛnsesa no. Fa no sɛ wowɔ kwankyerɛfo a ne ho akokwaw bi ka wo ho, a onim saa asubɔnten yi mu ahum ne aham nyinaa. Ná onim dedaadaw sɛ morebɛn saa asorɔkye yi, onim sɛnea ɛbɛkɔ akowie, na onim ɔkwan a ɔbɛfa so atwam wɔ hɔ. Anka worentwa wo koma nto wo yam koraa?

Nokwarem no, yɛn nyinaa wɔ ɔhaw tebea a ɛte saa ara mu. Yɛadu adesamma abakɔsɛm mu bere a emu yɛ den mu a mfomso no mfi yɛn. Nnipa dodow no ara nnim bere tenten a tebea no bɛkɔ so ayɛ sɛnea ɛte yi, sɛ́ ebia tebea no bɛyɛ yiye, anaa nea ɛsen biara a wobetumi ayɛ de agyina ano seesei. Nanso ɛnsɛ sɛ yɛte nka sɛ wɔato yɛn asaworam. Yɛn Bɔfo no ama yɛn biribi a ɛkyerɛ yɛn kwan—nea ɛhyɛɛ saa abakɔsɛm mu bere bɔne yi ho nkɔm, ɛka sɛnea ɛbɛkɔ akowie to hɔ, na ɛma yɛn akwankyerɛ a yehia na ama yɛanya yɛn ti adidi mu no. Saa kwankyerɛfo no yɛ nhoma bi, Bible no. Ne Kyerɛwfo, Yehowa Nyankopɔn, frɛ ne ho Ɔkyerɛkyerɛfo Kunini, na ɔnam Yesaia so ka no awerɛhyem mu sɛ: “W’ankasa w’asõ bɛte w’akyi asɛm bi sɛ: ‘Eyi ne kwan no. Momfa so,’ sɛ nifa na mobɛfa oo, sɛ benkum nso na mobɛfa oo.” (Yesaia 30:20, 21, NW) Wubegye akwankyerɛ a ɛte saa atom? Ɛnde yensusuw ho nhwɛ sɛ Bible hyɛɛ sɛnea yɛn bere so tebea no bɛyɛ ho nkɔm ampa a.

Yesu Akyidifo no Bisa Asɛm a Aba Wom

Ɛbɛyɛ sɛ Yesu akyidifo no ho dwiriw wɔn. Ná ɛnkyɛe na Yesu ka kyerɛɛ wɔn pefee sɛ wɔbɛsɛe Yerusalem asɔrefie adan akɛse no korakora! Ná nkɔmhyɛ a ɛte saa no yɛ ahodwiriw. Ɛno akyi bere tiaa bi no, bere a wɔte Ngo Bepɔw so no, asuafo no baanan bisaa Yesu sɛ: “Kyerɛ yɛn da ko a eyinom bɛba, na ɛdɛn na ɛbɛyɛ wo ba [a woaba, NW] ne wiase awiei no ho sɛnkyerɛnne?” (Mateo 24:3; Marko 13:1-4) Sɛ́ wohui anaasɛ wɔanhu no, na Yesu mmuae no benya mmamu a ɛboro biako.

Ná ɛsono Yerusalem asɔrefie no sɛe ne Yudafo nneɛma nhyehyɛe no awiei, na ɛsono Kristo ba a waba ne wiase nyinaa nneɛma nhyehyɛe no awiei. Nanso, wɔ Yesu mmuae tenten no mu no, ɔde ahokokwaw kaa asɛmmisa no afã horow yi nyinaa ho asɛm. Ɔkaa sɛnea tebea no bɛyɛ ansa na Yerusalem sɛe aba kyerɛɛ wɔn; afei nso ɔkaa nea ɛsɛ sɛ wɔhwɛ kwan sɛ wiase no bɛyɛ bere a waba, na ɔredi ade sɛ Ɔhene wɔ soro a ɛnkyɛ ɔde wiase nneɛma nhyehyɛe no nyinaa awiei bɛba no ho asɛm kyerɛɛ wɔn.

Yerusalem Awiei

Di kan susuw nea Yesu ka faa Yerusalem ne n’asɔrefie ho no ho. Ɔka too hɔ bɛboro mfe aduasa sɛ ahokyere kɛse bi bɛba wiase nkurow akɛse a ɛsen biara no biako so. Ne titiriw no, hyɛ ne nsɛm a wɔayɛ ho kyerɛwtohɔ wɔ Luka 21:20, 21 no nsow: “Sɛ muhu sɛ dɔm atwa Yerusalem ho ahyia a, ɛnde munhu sɛ ne bɔ abɛn. Ɛnna momma wɔn a wɔwɔ Yudea nguan nkɔ mmepɔw so, na wɔn a wɔwɔ [Yerusalem] mfi mu nkɔ, na wɔn a wɔwɔ nkuraase no, mommma wɔnnkɔ mu.” Sɛ na asraafo dɔm betwa Yerusalem ho ahyia a, ɔkwan bɛn so na na “wɔn a wɔwɔ [Yerusalem]” no betumi ‘afi mu akɔ’ kɛkɛ sɛnea Yesu hyɛe no? Ɛda adi pefee sɛ na Yesu rekyerɛ sɛ hokwan bi bɛba abɛda hɔ ama wɔn. Ɛbaa saa anaa?

Wɔ 66 Y.B. mu no, Roma asraafo a Cestius Gallus di wɔn anim no taa Yudafo atuatewfo dɔm no so ma wɔsan wɔn akyi kɔɔ Yerusalem, na wɔkaa wɔn hyɛɛ kurow no mu. Romafo no bɔ wuraa kurow no ankasa mu mpo, na wɔkɔe araa koduu asɔrefie no fasu ho. Nanso Gallus de ahyɛde maa ne dɔm no ma wɔyɛɛ biribi a na ɛyɛ nwonwa ankasa. Ɔhyɛɛ wɔn sɛ wɔnsan wɔn akyi! Yudafo asraafo a na wɔn ani agye no toaa wɔn, na wopirapiraa wɔn atamfo Romafo a na wɔreguan no. Enti, hokwan a Yesu hyɛɛ nkɔm sɛ ɛbɛba abɛda hɔ no buei. Nokware Kristofo tiee ne kɔkɔbɔ no, na wofii Yerusalem. Ná nyansa wom, efisɛ mfe anan pɛ akyi no, Roma asraafo no san bae, a na Ɔsahene Titus na odi wɔn anim. Saa bere yi de wɔannya kwan anguan bio.

Roma asraafo no twaa Yerusalem ho hyiae bio; wɔde nnua a ano hwirenhwiren yɛɛ ɔfasu twaa ho hyiae. Ná Yesu ahyɛ Yerusalem ho nkɔm sɛ: “Nna bi bɛba wo so a w’atamfo de nnua a ano hwirenhwiren bɛyɛ ɔfasu, na wɔatwa wo ho kɔntɔnkrɔn, na wɔaka wo ahyɛ mu baabiara.”a (Luka 19:43, NW) Bere tiaa bi akyi no, Yerusalem hwee ase; wɔmaa n’asɔrefie fɛfɛ no danee amamfõ a nsõ na ɛwɔ so. Yesu nsɛm no nyinaa nyaa mmamu!

Nanso, na nsɛm pii wɔ Yesu adwene mu sen Yerusalem sɛe no ara kwa. N’asuafo no bisaa no ne ba a ɔbɛba nso ho sɛnkyerɛnne. Saa bere no na wonnim, nanso na eyi fa bere a wɔde no besi agua so sɛ Ɔhene wɔ soro no ho. Dɛn na ɔka too hɔ?

Akodi Wɔ Nna a Edi Akyiri no Mu

Sɛ wokenkan Mateo atiri 24, ne 25, Marko ti 13, ne Luka ti 21 a, wubehu adanse a edi mũ a ɛkyerɛ sɛ na Yesu reka yɛn bere yi ho asɛm. Ɔka too hɔ sɛ bere bi bɛba a wobedi ako—ɛnyɛ “ɔko ne akosɛm” a akɔ so a asɛe nneɛma wɔ adesamma abakɔsɛm nyinaa mu no nko, na mmom akodi a ‘ɔman sɔre ɔman so, na ahenni sɔre ahenni so’—yiw, amanaman ntam akodi akɛse.—Mateo 24:6-8.

Fa bere kakra susuw sɛnea akodi asesa wɔ yɛn afeha yi mu ho. Bere a na ɔko yɛ asraafo dɔm a wofi aman abien mu a wɔde bare ani na wotwitwa wɔn ho sekan anaa wɔbobɔ wɔn ho tuo mpo wɔ akono ara no, na ɛnyɛ asɛm papa. Nanso wɔ 1914 mu no, Ɔko Kɛse no pae gui. Amanaman de wɔn ho gyee ɔko no mu mmiako mmiako toatoaa so—ɔko a edi kan a ɛbaa wiase nyinaa no. Wɔyeyɛɛ akode ahorow a n’ankasa tumi yɛ adwuma na atumi akunkum nnipa pii afi akyirikyiri. Wɔtotow atufiri a na ɛmfom ma ɛyɛɛ awerɛhow; sinapi atuduru dɛwee, yɛɛ asraafo mpempem pii ayayade, dii wɔn dɛm, na ekunkum wɔn; ntwitwiridii twi faa atamfo nsra mu atirimɔden so, na n’atuo akɛse no totoe. Wobefii ase de wimhyɛn ne nsu ase akohyɛn nso dii dwuma—nea na ɛbɛba akyiri yi no ho mpopoe kɛkɛ.

Wiase Ko II no yɛɛ biribi a na wonsusuw ho—nokwarem no, ɛmaa nea edi kan no yɛɛ ketewa, kunkum nnipa ɔpepem pii. Ahyɛn a na ɛsõsõ wimhyɛn a na ɛte sɛ nsu mu nkurow, nenam po no so, na wim akohyɛn fii mu tu kɔɔ wim kohwiee atopae guu atamfo so de dii wɔn awu. Nsu ase akohyɛn totow atopae guu atamfo ahyɛn mu ma ɛbobɔe. Na wɔtotow atom atopae fii wim, ma biako biara tumi kunkum nnipa mpem mpem pii! Sɛnea Yesu hyɛɛ nkɔm no, “ahude” aba ama saa akodi mmere yi ada nsow.—Luka 21:11.

So akodi agyae fi Wiase Ko II no reba? Ɛnte saa koraa. Ɛtɔ mmere bi a, akodi pii kɔ so wɔ afe biako mu—wɔ 1990 mfe yi mpo mu—na ekunkum nnipa ɔpepepem pii. Na nnipa a akodi di wɔn awu titiriw no asesa. Ɛnyɛ asraafo nkutoo na wowuwu bio. Ɛnnɛ, nnipa dodow no ara a akodi kunkum wɔn—nokwarem no, wɔn mu bɛboro ɔha biara mu 90—no nyɛ asraafo.

Sɛnkyerɛnne no Afã Foforo

Akodi yɛ sɛnkyerɛnne a Yesu kaa ho asɛm no fã biako pɛ. Ɔbɔɔ kɔkɔ nso sɛ “ɔkɔm” bɛba. (Mateo 24:7) Na saa na aba, ɛmfa ho sɛ nea ɛyɛ nwonwa no, asase no bɔ aduan pii sen nea ehia na adesamma nyinaa anya aduan, kuayɛ mu nyansahu anya nkɔanim sen biara wɔ nnipa abakɔsɛm mu, na akwantu nhyehyɛe a ɛyɛ ntɛm na edi mũ wɔ hɔ a ebetumi ama wɔde aduan akɔ wiase baabiara no. Ne nyinaa akyi no, bɛyɛ wiase yi mu nnipa mu nkyem anum mu biako di kɔm da biara da.

Yesu hyɛɛ nkɔm nso sɛ “ɔyaredɔm” bɛba “mmeaemmeae.” (Luka 21:11) Anwonwasɛm foforo bi nso akɔ so wɔ yɛn bere yi mu—wɔanya aduruyɛ a etu mpɔn sen biara, mfiridwuma mu nkɔanim, nnuru a wɔde bɔ nkurɔfo ho ban wɔ nyarewa a abu so ho; nanso ɔyaredɔm nso abu so sen bere biara. Spania Influenza bae wɔ Wiase Ko I no akyi pɛɛ, na ekunkum nnipa pii sen ɔko no. Ná saa yare yi san nnipa araa ma wɔ nkuropɔn te sɛ New York mu no, sɛ obi nwansi kɛkɛ a, na wotumi bɔ no ka anaa wɔde no to afiase! Ɛnnɛ, kokoram ne komayare kunkum nnipa ɔpepem pii afe biara—ɔyaredɔm ankasa. Na AIDS gu so kunkum nnipa, a ɛkame ayɛ sɛ aduruyɛ mu nyansahu ntumi nnii so.

Bere a Yesu gyinaa nsɛm a ebesisi abakɔsɛm ne amammuisɛm mu so titiriw kaa nna a edi akyiri no ho asɛm no, asetram nsɛnnennen ne su a ɛbɛda adi ho asɛm titiriw na Paulo kae. Nsɛm a ɔkyerɛwee no fã bi ka sɛ: “Hu eyi sɛ, nna a edi akyiri mu no, mmere a emu yɛ den bɛba. Efisɛ nnipa bɛyɛ ahopɛfo, . . . wɔn a biribiara ho ntew mma wɔn, wɔn a wonni dɔ, apamsɛefo, . . . wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa, afatwafo, anuɔdenfo, wɔn a wɔhoman, wɔn a wɔdɔ anigyede sen Nyankopɔn.”—2 Timoteo 3:1-5.

So saa nsɛm no nyɛ wo ade dedaw? Susuw abrabɔ fam tebea a asɛe wɔ nnɛ wiase yi mu no fã biako pɛ ho—abusua a emu apaapae. Mmusua pii a emu atetew, ahokafo a wɔhwe wɔn, mmofra a wɔto wɔn mmonnaa, ne awofo a wɔanyinyin a wodi wɔn ani, a adɔɔso—hwɛ sɛnea eyinom kyerɛ sɛ nnipa ‘nni dɔ,’ wɔyɛ “keka,” na wɔyɛ “afatwafo” mpo a “wɔmpɛ papa”! Yiw, yehu sɛ saa su ahorow yi abu so nnɛ.

Yɛn Awo Ntoatoaso Yi na Wɔhyɛɛ Ho Nkɔm no Anaa?

Nanso ebia wubebisa wo ho sɛ, ‘So saa tebea horow yi mmaa adesamma so bere nyinaa? Yɛyɛ dɛn hu sɛ yɛn bere yi so awo ntoatoaso no na wɔhyɛɛ ho nkɔm wɔ tete nkɔmhyɛ ahorow yi mu?’ Ma yensusuw adanse ahorow abiɛsa a ɛkyerɛ sɛ na Yesu reka yɛn bere yi ho asɛm ho.

Nea edi kan, ɛmfa ho sɛ Yesu nsɛm no fã bi nyaa mmamu a edi kan wɔ Yerusalem ne n’asɔrefie no sɛe mu no, akyinnye biara nni ho sɛ ɛtwee adwene sii daakye bi a na ɛwɔ akyiri so. Wɔ ahude a ɛsɛee Yerusalem no akyi bɛyɛ mfe 30 no, Yesu maa ɔsomafo Yohane a na ne mfe akɔ anim no anisoadehu bi a ɛkyerɛe sɛ tebea horow a wɔhyɛɛ ho nkɔm—akodi, ɔkɔm, ɔyaredɔm, ne owu a ebedi akyi aba—no yɛ nea ɛbɛba wiase nyinaa daakye. Yiw, na saa ahohia ahorow yi remma faako, na mmom ɛbɛka “asase” nyinaa.—Adiyisɛm 6:2-8.

Nea ɛto so abien, wɔ afeha yi mu no, Yesu sɛnkyerɛnne no afã bi renya mmamu bi a ɛkyɛn so. Sɛ́ nhwɛso no, yebetumi anya akodi mmere a ɛsen nea aba fi 1914 no anaa? Sɛ Wiase Ko III bi ba ma aman a wɔwɔ nuklea akode no nyinaa de wɔn akode di dwuma a, ɛda adi sɛ anka asase yi bɛdan nsõ na ada mpan—na adesamma ase ahyew dwerɛbee. Saa ara na Adiyisɛm 11:18 hyɛɛ nkɔm sɛ wɔ saa nna a amanaman no “bo afuw” yi mu no, adesamma ‘bɛsɛe asase.’ Bere a edi kan wɔ abakɔsɛm mu no, mframa ne nsu a wɔsɛe no ne nneɛma a atwa yɛn ho ahyia a wɔyɛ no basabasa no de nkwa ankasa a ɛwɔ saa okyinnsoromma yi so no reto asiane mu! Enti eyi nso renya, anaa ɛreyɛ anya mmamu a ɛkyɛn so. So akodi ne mframa ne nsu a wɔresɛe no no bɛkɔ so araa akosi sɛ onipa bɛsɛe ne ho ne okyinnsoromma yi? Dabi; efisɛ Bible ankasa ka sɛ asase bɛtra hɔ daa, na nnipa a wɔwɔ komapa atra so.—Dwom 37:29; Mateo 5:5.

Nea ɛto so abiɛsa no, sɛ yɛka ne nyinaa bom a, na nna a edi akyiri ho sɛnkyerɛnne no yɛ nea edi mũ kɛse. Yɛbɛbɔ no mua a, sɛ yesusuw nneɛma a Yesu kaa ho asɛm wɔ Nsɛmpa abiɛsa no mu, nea ɛwɔ Paulo nkyerɛwee mu no, ne nea ɛwɔ Adiyisɛm no ho a, saa sɛnkyerɛnne yi wɔ afã bebree. Ebia obi bɛpɛ emu biara ho asɛm aka, na wagye kyim sɛ ɔhaw a ɛtete saa no akɔ so wɔ mmere foforo mu, nanso sɛ yesusuw ne nyinaa ho bom a, akyinnye biara nni ho sɛ ɛtwe adwene si bere biako pɛ so—yɛn de yi.

Nanso, dɛn na eyinom nyinaa kyerɛ? Ɛkyerɛ sɛ Bible ka yɛn bere yi ho asɛm sɛ ɛyɛ ahoyeraw bere a anidaso biara nnim kɛkɛ anaa? Ɛnte saa koraa!

Asɛmpa

Wɔayɛ nna a edi akyiri ho sɛnkyerɛnne no afã titiriw no biako ho kyerɛwtohɔ wɔ Mateo 24:14: “Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.” Wɔ saa afeha yi mu no, Yehowa Adansefo ayɛ adwuma bi a ɛda nsow wɔ nnipa abakɔsɛm mu. Wɔagye Bible mu asɛm a ɛfa Yehowa Nyankopɔn Ahenni—dekode a ɛyɛ, sɛnea edi tumi, ne nea ɛbɛyɛ—ho no atom, na wɔatrɛw saa asɛm no mu wɔ asase nyinaa so. Wɔatintim saa asɛm yi ho nhoma horow wɔ kasa bɛboro 300 mu, na ɛkame ayɛ sɛ wɔde akɔmema nkurɔfo wɔ wɔn afie mu anaa mmɔnten so anaa mmeae a wɔyɛ adwuma wɔ asase so aman nyinaa mu.

Saayɛ so no, wɔama saa nkɔmhyɛ yi anya mmamu. Na wɔreka anidaso ho asɛm nso. Hyɛ no nsow sɛ Yesu frɛɛ eyi “asɛmpa,” ɛnyɛ asɛmmɔne. Ɛbɛyɛ dɛn na ɛno atumi ayɛ yiye wɔ saa esum mmere yi mu? Efisɛ Bible no mu asɛntitiriw no mfa sɛnea tebea no besi asɛe wɔ saa wiase dedaw yi awiei ho. Emu asɛntitiriw no fa Onyankopɔn Ahenni ho, na saa Ahenni no hyɛ biribi a onipa biara a ɔpɛ asomdwoe koma da so ho bɔ—ogye.

Dɛn ankasa ne saa ogye no, na ɔkwan bɛn so na ebetumi ayɛ wo de? Yɛsrɛ wo susuw nsɛm a edidi so a ɛfa saa asɛm yi ho no ho.

[Ase hɔ asɛm]

[Asɛm a wɔafa aka wɔ kratafa 5]

Nkurɔfo rehwehwɛ mmuae ama nsɛmmisa a ɛkyere adwene te sɛ, Dɛn nti na tebea no asɛe saa? Ɛhe na adesamma ani kyerɛ?

[Asɛm a wɔafa aka wɔ kratafa 6]

Ɛnnɛ, nnipa a wowuwu wɔ akodi mu no mu bɛboro ɔha biara mu 90 na wɔnyɛ asraafo

[Kratafa 7 mfonini]

Yesu nkɔmhyɛ a ɛfa Yerusalem sɛe ho no fã biara nyaa mmamu