Yesu Asetra Ne Ne Som Adwuma

Mpaakyiri Wɔ Adiwo

BERE a Petro ne Yohane guan gyaw Yesu wɔ Getsemane turo no mu, na wɔne asomafo a wɔaka no de ehu guanee akyi no, wokogyinae. Ebia wɔkɔtoo Yesu bere a na wɔde no rekɔ Anna fie no. Bere a Anna de no ma Ɔsɔfo Panyin Kaiafa no, Petro ne Yohane di wɔn akyi wɔ akyirikyiri, ebia suro a wosuro sɛ wɔbɛyɛ wɔn biribi, ne nea ɛbɛto wɔn Wura no ho a na wodwen kɛse no nti na wɔyɛ saa.

Woduu Kaiafa fie a ɛhɔ sõ no mu no, Yohane tumi kɔɔ adiwo hɔ, efisɛ ɔsɔfo panyin no nim no. Nanso, ogyaw Petro gyina mfikyiri wɔ ɔpon no ano. Nanso ankyɛ Yohane san ba bɛkasa kyerɛ ɔpon no ano hwɛfo no, afenaa bi, na ɔma Petro kwan ma ɔhyɛn hɔ.

Saa bere yi na awɔw aba, na na ofie hɔ asomfo ne ɔsɔfo panyin no asafohene de gyabiriw asɔ gya. Petro kɔka wɔn ho kɔto bi na ne ho ayɛ no hyew bere a ɔretwɛn nea ebefi Yesu asenni no mu aba no. Wɔ hɔ, wɔ ogya a ɛhyerɛn no hann mu no, ɔpon no ano hwɛfo a wama Petro aba mu no hu no yiye. Ɔteɛm sɛ: “Wo nso wo ne Yesu Galileani no na ɛnam.”

Esiane sɛ Petro ayɛ basaa sɛ wɔahu no nti, ɔsan wɔn nyinaa anim sɛ onnim Yesu da. Ose: “Minnim na mente nea woka yi ase po.”

Afei, Petro fi hɔ kɔ baabi a ɛbɛn ɔpon no. Ɛhɔ no, abeawa foforo hu no, na ɔno nso ka kyerɛ wɔn a wogyinagyina hɔ no sɛ: “Oyi nso ne Yesu Nasareni no na ɛnam!” Petro de ntam san bio sɛ: “Minnim onipa no.”

Petro tra adiwo hɔ, na ɔbɔ mmɔden biara sɛnea obetumi na amma wɔanhu no. Ebia saa bere yi akokɔ a ɔbɔn wɔ ahemadakye sum no mu no ma ɔbɔ birim. Saa bere no na wɔredi Yesu asɛm, na na ɛda adi sɛ wɔredi asɛm no wɔ ofi a ɛwɔ adiwo no atifi no fa baabi. Ebia Petro ne afoforo a wɔretwɛn wɔ ase hɔ no hu akɔneaba a adansefo ahorow a wɔde wɔn ba sɛ wommedi adanse no di no.

Bɛyɛ dɔnhwerew biako atwam bere a wohuu Petro nea etwa to sɛ Yesu yɔnko no. Afei wɔn a wogyinagyina hɔ no mu dodow bi ba ne nkyɛn bɛka sɛ: “Ampa ara, wo nso woka wɔn ho; na wo kasa nso yi wo adi!” Na kuw no muni biako yɛ Malko a Petro twaa n’aso no busuani. Ose: “Manhu wo ne no turom hɔ?” Petro ka no denneennen sɛ: “Minnim onipa no!” Nokwarem no, ɔka ntam didi nsew de bɔ mmɔden sɛ ɔbɛma wɔagye adi sɛ wɔn nyinaa adi mfomso, na nokwarem no, na ɔfrɛ bɔne aba ne ho so, sɛ nea na ɔreka no nyɛ nokware a.

Bere a Petro san nea ɛto so abiɛsa yi ara pɛ, akokɔ bɔn. Na saa bere no Yesu a ɛda adi sɛ wabegyina abranaa bi a ɛwɔ adiwo no atifi so no dan ne ho hwɛ no. Ntɛm ara Petro kae nea Yesu kae wɔ nnɔnhwerew kakraa bi a na atwam no mu wɔ abansoro dan no mu no: “Akokɔ remmɔn mprenu, na woapa me mprensa.” Esiane sɛ na Petro bɔne no mu duru abubu no nti, ofi adi kosu pii.

Ɛbɛyɛ dɛn na eyi atumi aba? Ɔkwan bɛn so na bere a Petro gye honhom mu ahoɔden a ɔwɔ no di akyi no, otumi pa ne Wura mprensa toatoa so ntɛmntɛm saa? Akyinnye biara nni ho sɛ nsɛm tebea horow no fii Petro mpaase. Wɔrekyinkyim nokware, na wɔreda Yesu adi sɛ nsɛmmɔnedifo kɛse bi. Wɔrema nea ɛteɛ no ayɛ te sɛ ɛnteɛ, na nea odi bem no adi fɔ. Enti esiane bere no mu nhyɛso ahorow nti, Petro watiri. Adwene pa a ɔwɔ wɔ nokwaredi ho no asɛe mpofirim; na onipa ho suro ma ɔyɛ mmerɛw ma ɔyɛ mmɔbɔ. Mommma ebi nnto yɛn da! Mateo 26:57, 58, 69-75; Marko 14:30, 53, 54, 66-72; Luka 22:54-62; Yohane 18:15-18, 25-27.

▪ Ɔkwan bɛn so na Petro ne Yohane nya kwan kɔ ɔsɔfo panyin no adiwo hɔ?

▪ Bere a Petro ne Yohane wɔ adiwo hɔ no, na dɛn na ɛrekɔ so wɔ ofi no mu?

▪ Akokɔ bɔn mpɛn ahe, na mpɛn ahe na Petro san sɛ onnim Kristo?

▪ Dɛn na Petro ntamka ne nsewdi no kyerɛ?

▪ Dɛn na ɛma Petro san sɛ onnim Yesu?