So Woabu ho Akontaa?

“EEI! So wompɛ ade pa a ɛte sɛɛ?” Adwuma so panyin no annye nea ɔtee no anni. Odwumayeni bi a ɔhyɛ n’ase, ɔbea bi a n’ahokokwaw ne n’abrabɔ pa nti wobu no, apow sɛ ɔbɛkɔ amannɔne akosua ade mfe abien, a adwumakuw no na ɛbɛhwɛ no. Dɛn nti na ɔyɛɛ saa?

Ɔbea no kyerɛkyerɛɛ mu sɛ pene a ɔbɛpene so no bɛkyerɛ sɛ ɔne ne kunu ne ne mma baanu ntam bɛtetew mfe abien. N’ani begyina wɔn yiye. Nea ehia sen saa no, obebu n’ani agu adwuma a Onyankopɔn de ahyɛ no nsa sɛ ɔyere ne ɛna no so. Nea ɔbɛhwere wɔ nkate ne honhom mu no bɛyɛ nea ɛso dodo. Enti, bere a obuu ho akontaa wiei no, osii gyinae sɛ ɔrempene so.

Sɛ wone ɔno a, anka dɛn na wobɛyɛ? Ɛda adi sɛ ɛnyɛ obiara na ɔbɛpene gyinae a ɔbea a ɔyɛ Kristoni yi sii no so. Ebia ebinom, te sɛ ne mfɛfo adwumayɛfo sɛɛ, bɛte nka sɛ wahwere hokwan kɛse a ɛbɛma wanya nkɔanim wɔ n’adwuma mu. Afoforo mpo betumi akasa atia no sɛ onnwen n’abusua daakye ho, efisɛ anyɛ yiye koraa no, mfe abien betwam ntɛmntɛm. Nanso, gyinae a osii no nnyina nkate so. Na egyina nsusuwii pa ne nnyinasosɛm ahorow a egyina nhumu so no so. Eyinom yɛ dɛn ade?

Ɛnyɛ Nyansa Kɛkɛ

Onyansafo a ɔsen obiara a wanantew asase so pɛn, Yesu Kristo, de akwankyerɛ no mae wɔ ne mmebu no biako mu. Yesu bisae sɛ: “Na mo mu hena na ɔpɛ sɛ ɔto abantenten, na ɔrentra ase mmu ho akontaa ansa sɛ ɔwɔ nea ɔde betumi awie? Ebia wafi ase no, wantumi anwie a, na wɔn a wohu nyinaa fi ase goru ne ho sɛ: Onipa yi fii ase toe, na wantumi anwie.”​—Luka 14:28-30.

Obiara begye atom sɛ nyansa wom sɛ wobebu nneɛma ho akontaa ansa na wɔasi gyinae sɛ wɔbɛyɛ biribi a ɛho hia. Sɛ nhwɛso no, sɛ obi pɛ sɛ ɔtɔ ofie a, so ɔbɛpere ne ho de ne nsa akɔhyɛ nhyehyɛe bi ase a ɔnhwɛ sika a ɔbɛsɛe wɔn ho, nhwɛ nhu sɛ ɔwɔ sika a obetumi de atua ho ka awie? Sɛ ɔpere ne ho yɛ saa ampa a, wobebu no sɛ ɔyɛ ɔkwasea. Yiw, nyansa wom sɛ obi bebu nneɛma ho akontaa ansa na wafi adwuma bi ase.

Nanso, na dɛn ankasa na Yesu rekyerɛ wɔ saa abebu no mu? Bere tiaa bi ansa na ɔrebu bɛ no, ɔkae sɛ: “Na obiara a ɔnsoa n’asɛndua na onni m’akyi no, ontumi nyɛ me suani.” (Luka 14:27) Enti, nsɛm afoforo a ɛka ho no kyerɛ sɛ na ɛnyɛ da biara nnwuma ho afotu a nyansa wom bi kɛkɛ na na Yesu de rema. Mmom no, na ɔreka nneɛma ho akontaa a obi bebu ansa na wabɛyɛ ne suani no ho asɛm.

Yesu nam n’abebu no so daa no adi sɛ, sɛ obi bɛyɛ ne suani a, nsakrae ne afɔrebɔ ho hia. Dɛn ntia? Efisɛ mprempren nneɛma nhyehyɛe no pɛ honam fam ade dodow, na ahopɛ na ɛkanyan no. Nnipa no mu fã kɛse no ara dwen wɔn honam fam akɔnnɔ ano a wobedwudwo ho titiriw, wonnwen wɔn honhom fam ahiade anaa wɔne Onyankopɔn ntam abusuabɔ ho ahe biara, anaasɛ wɔnyɛ saa koraa. (2 Timoteo 3:1-4) Nanso, suban anaasɛ honhom yi ne nea Yesu Kristo kyerɛe no bɔ abira tẽẽ. Ose: “Onipa Ba no amma sɛ wɔnsom no, na ɔbɛsomee, na ɔde ne kra ayɛ agyede ama nnipa pii.” Obuu honhom fam nneɛma sɛ ɛho hia koraa sen honam fam nneɛma bere a ɔkaa asɛm yi no: “Honhom ne nea ɛma nkwa, ɔhonam de, ɛnyɛ hwee.”​—Mateo 20:28; Yohane 6:63.

Enti, bere a Yesu tuu wɔn a wɔpɛ sɛ wɔbɛyɛ n’asuafo no fo sɛ wommu nneɛma ho akontaa no, na ɔnka honam fam nneɛma ho asɛm titiriw, na mmom honhom fam nneɛma. Dɛn na ɛho hia wɔn titiriw, honam fam mfaso horow a wiase no de ma, anaasɛ honhom fam mfaso a asuafo a wɔyɛ no de ma no? Enti na obuu bɛ no ne biako bi a ɛne no sɛ wiei no, owiee asɛm no sɛ: “Saa ara nso na mo mu biara a onnyaw nea ɔwɔ nyinaa ntumi nyɛ me suani.” (Luka 14:33) So onii a ɔrebɛyɛ ne suani no pɛ, na wayɛ krado sɛ ɔbɛbɔ afɔre a ɛte sɛɛ anaasɛ ɛyɛ adehwere kɛse dodo ma no?

Adwene a Ɛkari Pɛ

Ɛwom mpo sɛ ebia honam fam nneɛma de mfaso horow a wohu no yiye bɛbrɛ wɔn ntɛm de, nanso honhom fam nneɛma akyidi mu mfaso horow tra hɔ kyɛ yiye na ɛma akomatɔyam. Yesu kae sɛ: “Monnhyehyɛ ademude asase so, nea nwewee ne nkannare sɛe no, na awifo bubu kowia. Na monhyehyɛ ademude ɔsoro, nea nwewee ne nkannare nsɛe no na awifo mmubu nkowia.” (Mateo 6:19, 20) Yɛn bere yi mu no, nneɛma bo a ɛkɔ soro, aguadeyɛ ne aguadi a ɛba fam, sikakorabea a ɛbɔ ka, ne ade asɛe nnipa pii a wɔde wɔn ho too honam fam ahonyade nkutoo so no. Nanso ɔsomafo Paulo hyɛ yɛn sɛ ‘yɛnnhwɛ nneɛma a wohu, na mmom yɛnhwɛ nneɛma a wonhu; efisɛ nneɛma a wohu no nkyɛ mu twa, na nneɛma a wonhu no na ɛtra hɔ daa.’ (2 Korintofo 4:18) Nanso, yɛbɛyɛ dɛn atumi anya saa adwene no?

Yɛnam yɛn nhwɛsofo, Yesu Kristo, a yebesuasua no so betumi anya saa adwene no. Bere a na ɔwɔ asase so no, wankwati anigyede, sɛnea nokwasɛm a ɛyɛ sɛ ɔkɔɔ ayeforo ne apontow ase dii ho adanse no. Nanso, ɛda adi sɛ nea ɔmaa ɛho hia no titiriw ne honhom fam nneɛma. Na ɔwɔ ɔpɛ sɛ ɔde nea wobu no sɛ ɛyɛ nneɛma atitiriw no bɛkame ne ho na ama wayɛ n’Agya apɛde. Ɔkaa bere bi sɛ: “Sakraman wɔ atu, na wim nnomaa wɔ mmerebuw; na onipa Ba no de, onni nea ɔde ne ti to.” (Luka 9:58) Obuu n’Agya apɛde a ɔyɛe no sɛ ɛho hia na ɛyɛ anigye araa ma ofi komam kae sɛ: “M’aduan ne sɛ mɛyɛ nea ɔsomaa me no apɛde, na miwie n’adwuma.”​—Yohane 4:34.

Yesu nam ɔkwan a ɔfaa so pow Satan sɔhwɛ ahorow no so kyerɛɛ nea ɛsom bo ma no. Ɔbonsam bɔɔ mmɔden sɛ ɔbɛma Yesu de tumi a Onyankopɔn de maa no no adi dwuma ma N’ankasa anya mu mfaso, wiase anuonyam ne din. Na Yesu nim yiye sɛ mfaso a ɛte sɛɛ a asɛm wɔ ho no betumi ama wahwere ade kɛse mmom​—Onyankopɔn anim dom bɛbɔ no​—adehwere kɛse a ɛsen nea ɔwɔ ɔpɛ sɛ ɔbɛma afi ne nsa, efisɛ na obu ɔne n’Agya ntam abusuabɔ pa no sɛ eye sen biribi foforo biara. Enti na ɔpow nea Satan de maa no no pefee ntɛm ara no.​—Mateo 4:1-10.

Sɛ Kristo akyidifo no, ɛda adi sɛ yɛpɛ sɛ yenya biribi a ɛsom bo te sɛ yɛn Wura no ara pɛ. Wɔ mprempren nneɛma nhyehyɛe a Satan di so tumi yi mu no, nneɛma pii a ɛte sɛ nea ɛde mfaso pa ho bɔhyɛ ma no betumi asɛe yɛne Onyankopɔn ntam abusuabɔ ankasa. Nneɛma te sɛ honam fam adwuma mu dibea a ɛkorɔn a yɛkɔ so hwehwɛ, nhomasua a ɛkɔ anim a obi hwehwɛ na ama ne dibea akɔ anim, wɔn a wɔnyɛ gyidifo a yɛne wɔn yɛ nhyehyɛe fi adi, anaa nnwuma ho nhyehyɛe a asɛm wɔ ho a yɛyɛ betumi ama yɛahwere yɛn gyidi ntɛm ara, ne afei Yehowa anim dom. Ɛsɛ sɛ yɛde boasetɔ bu nneɛma ho akontaa bere a yehyia sɔhwɛ horow a ɛte sɛɛ no.

Nokware Nyansa Yɛ Ahobammɔ

Mfe kakraa bi a atwam ni no, aberantewa Kristoni bi a ɔte kuropɔn bi mu wɔ Apuei Fam no nyaa hokwan a ɛbɛma wakɔtoa n’adesua so wɔ amannɔne. Ɛwom sɛ na ne nhomasua kɔ anim na okura adwuma a n’akatua ye de, nanso ɔtee nka sɛ ɛnnɔɔso; na ɔpɛ sɛ ɔma ne n’asetra mu gyinabea kɔ anim sen saa. Ne mfɛfo Kristofo bɔɔ mmɔden sɛ wobegyina Kyerɛwnsɛm mu nsɛm a yɛaka ho asɛm seesei ara no so ne no asusuw ho de, nanso wantie na ɔtoaa ne nhyehyɛe no so. Ɛwom sɛ ɔbɔɔ mmɔden sɛ obekura ne gyidi mu mfiase no de, nanso Bible mu nokware ho anisɔ a ɔwɔ no fii ne nsa nkakrankakra, na n’adwenem fii ase yɛɛ no naa. Afe biako anaa nea ɛte saa pɛ mu no, ɔhweree ne gyidi koraa na ɔbɛyɛ obi a ontumi nhu sɛ Onyankopɔn wɔ hɔ anaa onni hɔ. Nokwarem no, wiase nhomasua a ɛkɔ anim a ɔnam so nyaa abodin kɛse no ma onyaa akomatɔyam bi. Nanso, hwɛ ade kɛse a ɔhweree ansa na ɔrenya bere tiaa mu anuonyam​—ne gyidi a eguu asu, ne asiane a ɛwom sɛ daa nkwa bɛbɔ no!​—1 Timoteo 1:19.

Nea ɛne eyi bɔ abira no, wɔn a wɔmpene sɛ wɔbɛma biribi asɛe wɔne Onyankopɔn ntam abusuabɔ no anya nhyira pii afi Yehowa hɔ.

Nhwɛso biako fa aberante bi a na ɔwɔ adwuma a esiesie adan mu wɔ kuropɔn koro no ara a yɛabɔ din wɔ atifi hɔ mu no ho. Asram kakraa bi wɔ bere a ofii ase ne Yehowa Adansefo suaa Bible no akyi no, onyaa adwuma a sɔhwɛ wom​—sɛ onsiesie ɔdan bi mu na wontua no ¢12,000,000. Nanso, na ɛhwehwɛ sɛ obu adansi ho mmara so ansa na wasi ɔdan bi a mmara mma ho kwan. Esiane sɛ na wasua sɛ ɛsɛ sɛ Kristofo di mmara so nti, ohui sɛ adwuma no a obegye no bɛma wahwere Onyankopɔn anim dom. (Romafo 13:1, 2) Bere a odwen asɛm no ho yiye wiei no, wannye adwuma no. Dɛn na efii mu bae? Ɛdaa adi sɛ saa gyidi adeyɛ yi bɛyɛ nsakrae titiriw wɔ ne honhom mu nkɔso mu. Afe biako ntam no, onyaa nkɔanim duu baabi a obehyira ne ho so ma wɔabɔ no asu. Ɔtɔn n’adwuma no na onyaa adwuma foforo a ɛma onya bere pii de yɛ honhom fam nneɛma. Mprempren ɔde anigye ne nnamyɛ resom Yehowa.

Mmerante baanu yi nyinaa buu nneɛma ho akontaa. Dɛn na amma wɔampaw ade koro no? Ɔsoro nyansa! Ɔkwan bɛn so? Nyansa kyerɛ sɛnea wotumi de nimdeɛ di dwuma wɔ ɔkwan a ɛtaa de daa mfaso ba no so, na ɔsoro nyansa kyerɛ nimdeɛ a wɔde di dwuma ma ɛne Onyankopɔn atirimpɔw ma yɛn no hyia. Ɛwom sɛ na mmerante baanu no nyinaa wɔ Bible mu nimdeɛ a ehia no de, nanso sɛnea wɔde dii dwuma no na amma wɔannya ade koro no. Mmebusɛm nhoma no se: “Sɛ nyansa ba wo koma mu, na nimdeɛ sɔ wo kra ani a, adwempa bɛhwɛ wo so, na ntease abɔ wo ho ban, na ayi wo afi bɔne mu.”​—Mmebusɛm 2:10-12.

Onyankopɔn Asɛm Bible no ne nokware nyansa a wubetumi anya akwankyerɛ afi mu bere nyinaa, bere a ɛsɛ sɛ wusi gyinae ahorow a ɛho hia no fibea. Sɛ anka wobɛyɛ w’ankasa ani so onyansafo no, tie afotu yi: “Fa wo koma nyinaa bata [Yehowa] ho, na mfa wo ho ntweri wo nhumu. Hu no w’akwan nyinaa mu, na ɔno na ɔbɛteɛ w’akwan.” (Mmebusɛm 3:5, 6) Ɛsɛ sɛ yenya ahobrɛase ne ɔpɛ sɛ yɛbɛma wɔakyerɛkyerɛ yɛn, na yɛkwati wiase no ahopɛ ne ahofadi honhom a abu so kɛse nnɛ no.

Yiw, yebetwa nea yegu no, ɛfata na ɛteɛ sɛ yegye nea efi gyinaesi ahorow ne nea yɛpaw mu ba no to yɛn ho so. (Galatifo 6:7, 8) Enti bu nneɛma ho akontaa ansa na wafi adwuma biara ase. Mma biribi a ɛte sɛ nea ɛyɛ mfaso nsɛe wo honhom mu yiyedi anaa wo ne Yehowa Nyankopɔn ntam abusuabɔ. Bɔ mpae bisa nyansa ne atɛmpa na wode asi gyinae a ɛteɛ, efisɛ gyinae ahorow a wusi nnɛ no betumi akyerɛ daa​—nkwa anaa owu!​—Fa toto Deuteronomium 30:19, 20 ho.

[Mfonini wɔ kratafa 28]

Honhom fam dwumadi na ɔde bedi kan wɔ n’asetra mu anaasɛ honam fam adwuma?