‘Monsan Mmra Mo Akra So Hwɛfo No Nkyɛn’

MMƐ abien a ɛyɛ anigye a Yesu bui da ayamhyehye kɛse a Onyankopɔn wɔ ma wɔn a wɔda so yɛ ne nkurɔfo nanso wɔafom kwan no adi. Wo de susuw sɛnea oguanhwɛfo a ogyaw nguan 99 no hɔ kɔhwehwɛ oguan a wayera no ‘kosi sɛ obehu no’ ho hiahia no no ho hwɛ. Anaa susuw sɛnea ɔbea a ne nnwetɛbona dodow bi a ɛsom bo mu biako yera no ani bere fa no ho hwɛ. Ɔbɔ mmɔden sɛ obehu​—ɔsɔ kanea na ɔprapra ne dan no nyinaa mu ‘kosi sɛ obehu.’ Na sɛ ohu a, hwɛ anigye ara a ɛba!​—Luka 15:4-10.

Akyinnye biara nni ho sɛ wuhu sɛ na Yesu reka nnipa a na wɔahyira wɔn ho so ama Onyankopɔn ma wɔne no wɔ abusuabɔ, nanso esiane nneɛma ahorow bi nti wɔafom kwan anaasɛ ‘wɔayera’ no ho asɛm. Ebia woyɛ eyinom mu biako. Mmɔdenbɔ kɛse a wɔdaa no adi wɔ mmɛ ahorow no mu de hwehwɛɛ biribi a ɛsom bo ne anigye kɛse a ɛbae bere a wɔahu no betumi akanyan w’adwene. Ɛda anigye a Onyankopɔn, ne Ba, abɔfo kronkron no ne wo honhom mu nuanom mmarima ne mmea wɔ wɔ wo ho no adi. Ɛbɛ a edi abien yi akyi no da ɔkwan a nea “wayera” no faa so no ho nsɛm pii adi.

Ɔba Hohwini Ho Bɛ No

Wɔ ɔba hohwini no ho bɛ no mu no, Yesu ma (1) nea enti a obi bɛtwe ne ho, (2) nea ebetumi aba bere a watwe ne ho, (3) nea egye na wasan aba, ne (4) ayamye kwan a Onyankopɔn nam so gye obi no da adi pefee. Mmabarima baanu a wɔwɔ ɛbɛ no mu no yɛ nea wobetumi de ato nnipa a wɔte sɛ wo, a wɔabehu Agya no, anya ‘honhom mu aduan pii’ a ɛwɔ gyidi fie hɔ no mu anigye na wɔahyira wɔn nkwa so ama Yehowa no ho.​—Luka 15:11-32.

Nneɛma ahorow wɔ hɔ a enti ebinom, te sɛ ɔba kumaa no, fi yɛn soro Agya no “fie” hɔ. Mpɛn pii no ɛyɛ “nkwa yi mu nneɛma ho dadwen” a kɔ ara na ɛkɔ anim no nti. (Luka 21:34) Ɛtɔ da bi nso a nnamfo bɔne nkɛtɛnso siw ebinom kwan wɔ ‘nokware no a wɔbɛkɔ so atie’ no ho. (Galatifo 5:7, 8, 10, 12) Ebetumi aba sɛ nkyerɛkyerɛ bi a ɛnyɛ ebinom dɛ ama wɔasan ‘kɔ nneɛma a wɔagyaw wɔ akyiri no so.’ (Yohane 6:60-66) Mpɛn pii no, ebinom abu asetra wɔ Yehowa honhom mu fie sɛ nea esiw ahofadi ano dodo. Eyinom, te sɛ ɔba hohwini no, mpɛ sɛ wɔtra Agya no hwɛ ase bio. Wɔhwehwɛ ahofadi wɔ “akyirikyiri asase bi so.”

Nea Nkutoo Wɔ Akyirikyiri Asase Bi So

Ɔba hohwini no​—bere a odii ne sika no nyinaa akyi no​—hui sɛ onni ahofadi ne anigye. Ne bra sɛee araa kosii sɛ ‘ɔde ne ho hyɛɛ ahohwibɔ mu.’ Bere a ne ho kyeree no no, ɔde abasamtu ‘de ne ho kɔbataa’ asase no soni bi ho, “na ɔma ɔkɔɔ ne mfuw mu” kɔhwɛɛ mprako​—adwuma a ɛba fam sen biara ma Yudani. Ne kɔn dɔɔ mprako aduan no mpo!​—Luka 15:13-16.

Ná John yɛ asafo mu ɔpanyin ansa na ɔretu kwan akɔ honhom mu “akyirikyiri asase” bi so. John kyerɛkyerɛ mu sɛ: “Nokware no akyidi yɛ ahobammɔ ankasa, nanso sɛ wommfa wo ho nnhyɛ dwumadi ahorow mu a, ɛma w’ahobammɔ kɔ fam. Ɛwom sɛ ebia worenyɛ ade bɔne bi ankasa de, nanso ebia wubefi ase ama nneɛma nketenkete bi ho kwan. Ebia wobɛka akyerɛ wo ho sɛ, ‘Menkɔ asafo nhyiam horow biara, enti so nea meyɛ no fa ho ankasa?’” Ɔdansefo foforo nso a na ɔde mmɔdenbɔ ayɛ adwuma mfe pii no gye toom sɛ: “Mammu bra bɔne bi ankasa. Mihuu no ntɛm sɛ baabi a wiasefo fekubɔ betumi ama obi afom akodu no yɛ nea enni ano. Ɔkwan koro pɛ a wubetumi afa so anya wɔn fekubɔ mu anigye ne sɛ wobɛka w’ano atom wɔ Yehowa ho. Sɛ woyɛ saa a, ɛnde na worekɔ ɔhaw ahorow pii mu.”

Pii a wɔyɛ mmerɛw no nsan nkɔ “ahohwibɔ” asetra mu sɛnea Yesu bɛ no mu ɔba hohwini no yɛe no. Nanso wɔn nyinaa hu sɛ wɔatwe wɔn ho afi wɔne Onyankopɔn ntam abusuabɔ a emu yɛ den ho. Ɔbarima bi ne ne yere a wogyaee asɛnka no “ammue Bible mu mfe 15,” nanso wɔkɔɔ so kuraa abrabɔ fam ahotew mu. Ɔyere no kyerɛkyerɛ mu sɛ: “Ɔhonam fam no nneɛma kɔɔ so fɛfɛ maa yɛn wɔ saa bere no mu. Ebetumi ama woagye adi sɛ: ɛho nhia sɛ wosan ba Yehowa nkyɛn. Ná yɛn asetra nyinaa gyina yɛn nnwuma ne yɛn ankasa so. Yɛbɔɔ mmɔden sɛ yebeyi nokware no ho biribiara afi yɛn tirim, ma mpo yetu kɔtraa baabi a obiara nnim yɛn. Nanso na saa anigye yi nyinaa te sɛ biribi a wɔde asikre adura ho ara kwa. Yɛn mu ankasa no na yenni anigye. Me kunu yɛɛ basaa mfe pii. Yegyaee mpaebɔ, ansa na yebedidi mpo. Anadwo horow pii wɔ hɔ a na mintumi nna esiane nokware no ho a misusuw na mete afodi nka nti.” Okunu no de kaa ho sɛ: “Yɛtee nka sɛ wɔakyerɛw yɛn din ato hɔ ama owu.”

Sɛ́ obi bɛtwe ne ho afi Yehowa ho, sɛ́ obi bɛyɛ ankonam honhom mu no, yɛ tebea a ɛyɛ awerɛhow. Kristoni bea bi a ogyaee asɛnka bere bi no kae sɛ: “Biribiara nni hɔ a ɛte sɛ Yehowa dom a obi benya. Sɛ biribi haw wo a wuntumi mmɔ no mpae, anaasɛ wunni ahotoso sɛ obebua wo mpaebɔ, ɛyɛ tebea a ɛyɛ awerɛhow.”

“N’ani Baa Ne Ho So”

Ɔba hohwini no huu ne honhom mu nkate horow na odii ho dwuma. Yesu se: “N’ani baa ne ho so.” Mfitiase Hela nsɛmfua no asekyerɛ ankasa ne sɛ, “N’ani so tetee no.” Ná anka “ɔnenam kɛkɛ,” wɔ wiase a ɛmfata mu. Na afei obehuu sɛnea ɔte ankasa wɔ honhom mu. Osusuw asomdwoe ne nneɛma pii a na anka onya mu anigye wɔ n’agya fie no ho.​—Luka 15:17.

Ɛwom sɛ ɔba hohwini no ani baa ne ho so a obi ammoa no de, nanso mpɛn pii no honhom mu nkɔmmɔbɔ ahorow a ɛkanyan nkate horow a ano abrɛ ase na ɛde eyi ba. Sɛ nhwɛso no, bere a wagyae no, Diane ka kyerɛɛ ɔdansefo bi a ohyiaa no no sɛ: “Mintumi nsan mma Yehowa nkyɛn. Mennɔ no na minim sɛ ɛno na ɛsɛ sɛ obi de yɛ saa.” Ɔdansefo no bisae sɛ: “So ná wodɔ wo kunu ansa na morefi mo adamfofa no ase?” Diane buae sɛ: “Dabi, ná ɛbɛyɛ dɛn na matumi adɔ no. Ná minnim no.” Diane kae sɛ: “Afei mihui sɛ, sɛ mesan hu Yehowa bio a, ne ho dɔ bɛsan aba. Akyiri mikohuu asafo no kɔhwehwɛɛ mmoa. Wɔ mpanyimfo no akwankyerɛ ase no, obi ne ne yere ne me ne me kunu suaa Bible no bɛboro afe, na yɛsan fii ase bio.”

Nanso, nneɛma akɛse a esiw wɔn a wɔpɛ sɛ wɔsan ba kwan no mu biako ne afodi nkate a ebunkam wɔn so no.

So Makɔ Akyiri Dodo?

“Agya, mayɛ ɔsoro ne w’anim bɔne. Na mensɛ sɛ wɔfrɛ me wo ba bio,” saa na ɔba hohwini no tee nka bere a “n’ani baa ne ho so” no. Afoforo ate nka saa ara​—sɛ wɔmfata sɛ wɔfrɛ wɔn Onyankopɔn abusua no mufo.​—Luka 15:17-19

Virginia gye toom sɛ: “Wuhu sɛ woahyɛ da adan wo ho atia Yehowa. Saa nkate yi maa me werɛ howee. Bere a mesan fii ase no, ná ɛyɛ me den sɛ mefi ase abɔ mpae bio. Mekɔɔ so susuwii sɛ: ‘Yehowa hwehwɛ me ayɛ dɛn, bere a madan me ho atia no no.’” Afoforo nso ate nka sɛ wɔayɛ “bɔne a wɔmfa mfiri.”

So agya no a na onim sɛ ne ba no bɔne sõ no buu no sɛ ɛyɛ nea wontumi mfa mfiri? So oyii n’ani too nkyɛn yɛɛ te sɛ nea hwee mfa ne ho bere a abofra no san puei no? Dabida! Ná ɔhwehwɛ ne ba no. Sɛnea Yesu kyerɛe no, “Ɔda so wɔ akyirikyiri no, n’agya huu no.” (Luka 15:20) Ebia ne ho a atetew, ne ho fĩ ne ne nan a egu fam no nkutoo na afipamfo no hui, nanso n’agya huu “no.” Ná onim akyirikyiri a ne ba no fi aba. Ɛda adi sɛ na watwe ne ho afi ‘n’ahohwibɔ asetra’ no ho na wanu ne ho ankasa.​—Mmebusɛm 28:13.

Agya no tuu mmirika kɔyɛɛ ne ba no atuu. Ná nea ɔba no ahwɛ kwan ara ne sɛ ɔbɛba abɛyɛ ‘ɔpaani,’ obi a omfi fie hɔ na akwan horow bi so no ɔba fam sen akoa. Ná ɔrentumi nhwɛ kwan sɛ n’agya bɛka sɛ: “Momfa atade a eye no mmra mmɛhyɛ no, na momfa pɛtea nhyɛ ne nsa ne mpaboa nhyɛ ne nan; na momfa nantwi ba a wadɔ srade no mmra mmekum no, na yenni, na yɛn ani nnye.” Hwɛ sɛnea Yesu yɛɛ agya no adeyɛ a efi koma nyinaa mu no ho mfonini fɛfɛɛfɛ!​—Luka 15:22, 23.

Ná agya no nim sɛ ɔba hohwini no anya asotwe kɛse dedaw​—nkate bɔne a onyae sɛ ‘ɔde ne ho hyɛɛ ahohwibɔ asetra mu’ ne ne sika nyinaa a ɔhweree, ne ho hia a ehiahiaa no sɛ na onni adamfo, onni aduan na onni baabi da wɔ ɔkɔm bere mu, animguase a na ɛyɛ sɛ obedi mprako aduan, ne awiei koraa no, ɔkwan tenten a otwa baa fie no. Saa nso na Yehowa hu sɛ obi hu amane ankasa bere a “wayera,” ne sɛ ɛnyɛ mmerɛw sɛ onii bɛsan n’akyi. Nanso, yɛn soro Agya a ɔwɔ ayamhyehye, a “n’adɔe dɔɔso” no ‘renkɔ so nhwehwɛ mfomso anaasɛ ɔremfa nea ɛfata yɛn mma yɛn so,’ sɛ yenu yɛn ho ampa na “yesiesie” yɛne ne ntam a. Ebinom a wɔyɛ bɔne a emu yɛ duru mpo bere a wɔatwe wɔn ho afi Kristofo asafo no ho nanso wɔsan ba wɔ nokware ahonu mu, ka wɔn bɔne kyerɛ mpanyimfo no, betumi ahwɛ kwan sɛ wɔne wɔn bedi no ɔdɔ ne mmɔborohunu mu na wɔasan asi wɔn dedaw mu.​—Dwom 103:8-10; 130:3; Yesaia 1:18, 19.

Ampa, Bible no ka Kristofo bi a wonni nokware a wɔmfa wɔn bɔne mfiri wɔn ho asɛm. Nanso, Paulo da no adi sɛ eyinom “sɔre tia” Nokware no na wotiatia ogye afɔre no so animtiaabu mu denam bu a wobu no sɛ ɛho nni mfaso no so. (Hebrifo 10:26-31) Nanso so woayɛ ade akɔ akyiri saa da? Koma pa mu a wufi susuw saa asɛm yi ho, mmom sen sɛ wubebu no animtiaa, no da no adi sɛ woda so wɔ ɔdɔ bi ma honhom fam nneɛma. Nokwasɛm a ɛyɛ sɛ wote nka sɛ wudi fɔ na ɛhaw wo no da no adi sɛ wonkɔɔ akyiri dodo. Nya ahotoso sɛ Yehowa bebua wo mpaebɔ mu adesrɛ sɛnea obuaa Dawid de no, nea ɔsrɛe sɛ: “Fa me bɔne firi me, na ɛdɔɔso pii.”​—Dwom 25:11.

‘Nsuro. Mɛboa Ankasa’

Mpanyimfo baanu kɔsraa ɔbarima bi ne ne yere a bere bi a atwam no na anka wɔyɛ Adansefo mmɔdenbɔfo ankasa. Wofii nkɔmmɔbɔ no ase ara pɛ na okunu a wayɛ mmerɛw no kaa no anoyi kwan so sɛ onim sɛ ɛsɛ sɛ ɔkɔ asɛnka kɔkyerɛkyerɛ afoforo. Mmuae a ɔnhwɛ kwan a mpanyimfo no mu biako a wɔfrɛ no Russell de mae ne sɛ: “Mprempren de minnye nni sɛ ɛsɛ sɛ woyɛ saa. Sɛ wo busuani bi yare a, so wode afoa bɛhyɛ ne nsa sɛ ɔnkɔdɔw? Na yɛrenka nkyerɛ wo nso sɛ kɔdɔw. Yɛpɛ sɛ wunya ahoɔden. Dɛn na yebetumi ayɛ de aboa?” Mmoa a wofi ɔdɔ mu de mae, ne gye a mpanyimfo afoforo gyee wɔn anigye so no boaa ɔbarima no ne ne yere ma wɔsan nyaa ahoɔden honhom mu, na okunu no asan resom sɛ ɔpanyin.​—Fa toto Yakobo 5:14, 15 ho.

Ebinom a wɔanya ahonu no twentwɛn wɔn nan ase sɛ wɔbɛsan de wɔn ho abɔ asafo no ho efisɛ wɔte nka sɛ wɔrentumi nyɛ nea ɛsɛ sɛ ɔdansefo yɛ no nyinaa bere koro mu. Nanso, Yehowa wɔ ntease. Ahoɔden nkakrankakra a wubenya taa yɛ nea ɛho wɔ mfaso kɛse. Paulo kae sɛ ebinom a na “wɔn asõ asen” honhom mu wɔ ne bere so no hia obi ma wakyerɛkyerɛ wɔn Nokware no mu mfitiasesɛm no bio. (Hebrifo 5:11, 12) Saa honhom mu aduan yi ma ahoɔden na ɛma nneɛma afoforo tumi kɔ so. Wɔ nkɔmmɔ a wɔne Adansefo dodow bi a wɔyɛɛ mmerɛw nanso akyiri yi wɔsan nyaa ahoɔden bɔe no mu no, dodow no ara kae sɛ ná wohia mmoa a wɔde ma bere nyinaa. Nanso wɔn a wɔwɔ asafo no mu no ani gye kɛse sɛ wɔde mmoa a ɛte saa bɛma. Wɔte nka sɛnea Yehowa a ɔka kyerɛɛ ne nkurɔfo a wapaw wɔn sɛ, “Nsuro, na me ne wo wɔ hɔ, mma wo bo ntu, na me ne wo Nyankopɔn. Mɛhyɛ wo den, mɛboa wo” no te nka no.​—Yesaia 41:10.

Yiw, Onyankopɔn se: “Mɛboa wo.” Ebia ɛho behia sɛ wotwe wo ho fi nnamfo bɔne bi ho. Ebia ɛho behia sɛ wugyina ɔsɔretia a efi abusuafo a wɔn ani nnye Kristofo nhyiam horow a wokɔ ho nkyɛn no ano. Ebia asɛm bi wɔ hɔ a ebehia sɛ woka kyerɛ mpanyimfo no. (Dwom 32:3-5) Nanso mma wo werɛ mfi sɛ Yehowa wɔ hɔ sɛ ɔbɛboa. Ɔdansefo bi a ɔsan nyaa ahoɔden kae sɛ: “Yehowa ma mihuu nea ɛsɛ sɛ meyɛ no mmiako mmiako na ɔboaa me.” Ɔfoforo nso de kaa ho sɛ: “Mede me nan sii Ahenni Asa so ara pɛ no, me kan nnamfo no nyinaa yɛɛ me atuu. Wɔn anigye no maa me ho dwiriw me. Mekãe wɔ me tirim sɛ ‘Dɛn nti na na misuro?’” Ɛwom sɛ ebia ebinom benya su bi te sɛ ɔba hohwini no nua panyin no de, nanso dodow no ara ani begye sɛ wobehu sɛ woasan aba.​—Luka 15:25-32

Dɛn nti na wo ankasa wonsɔ nhwɛ? Kristoni bea bi a ɔsan nyaa ahoɔden bere a watwe ne ho bere tenten bi akyi no kae sɛ: “Baabi foforo biara nni hɔ a obi tumi nya akomatɔyam. Biribiara kɔɔ so fɛfɛɛfɛ bio bere a mesan nyaa ahoɔden honhom mu no. Wiase yi mma biribiara a ɛsom bo. Wunya atenka pa bere a wunim sɛ woreyɛ nea ɛsɔ Yehowa ani na wowɔ n’ahobammɔ no. Wutumi da anadwo. W’asetra yɛ nea anigye wom na wutumi nya asetra wɔ Nhyehyɛe Foforo no mu ho anidaso ankasa.”

Sɛ woyɛ oguanten a wayera a, dɛn nti na wonto nsa mfrɛ Ɔdansefo a ɔde nsɛmma nhoma yi brɛɛ wo no mma ɔmmɛboa wo sɛnea ɛbɛyɛ na woahu mpanyimfo a wɔwɔ asafo a ɛbɛn wo no mu no. Nya anigye ne abotɔyam a efi adeyɛ a Petro kaa ho asɛm no mu ba no: “Na anka mote sɛ nguan a wɔayera, na afei moasan aba mo kra hwɛfo ne wɛmfo nkyɛn.”​—1 Petro 2:25.