Kaesare De A Yɛde Bɛma Kaesare

“Muntua obiara nea ɛsɛ no!”—ROMAFO 13:7.

 1, 2. (a) Sɛnea Yesu kyerɛe no, ɔkwan bɛn so na ɛsɛ sɛ Kristofo ma asɛyɛde a wɔwɔ wɔ Onyankopɔn ne Kaesare ho no kari pɛ? (b) Dɛn ne Yehowa Adansefo ahiade a edi kan?

SƐNEA Yesu kyerɛe no, yɛwɔ nneɛma a ɛsɛ sɛ yɛde ma Onyankopɔn ne nea ɛsɛ sɛ yɛde ma Kaesare anaa Ɔman no nso. Yesu kae sɛ: “Momfa Kaesare de mma Kaesare, na momfa Onyankopɔn de mma Onyankopɔn.” Saa nsɛntiaa yi na ɔde maa n’atamfo ani so tan wɔn, na ɔde bɔɔ adwene a ɛkari pɛ a ɛsɛ sɛ yenya wɔ yɛne Onyankopɔn ntam abusuabɔ ho ne sɛnea yɛne Ɔman di no mua tiawa. Ɛnyɛ nwonwa sɛ “ne ho yɛɛ” n’atiefo no “nwonwa”!—Marko 12:17.

² Nokwarem no, ade a ehia Yehowa asomfo kɛse ne sɛ wɔde Onyankopɔn de bɛma Onyankopɔn. (Dwom 116:12-14) Nanso bere a wɔyɛ saa no, wɔn werɛ mfi sɛ Yesu kae sɛ ɛsɛ sɛ wɔde nneɛma bi ma Kaesare. Wɔn ahonim a wɔde Bible atete no hwehwɛ sɛ wɔde mpaebɔ susuw baabi a wobetumi de nea Kaesare hwehwɛ no ama no akodu ho. (Romafo 13:7) Wɔ nnɛ mmere yi mu no, mmaranimfo pii ahu sɛ tumi a nniso horow di no wɔ anohyeto, na awosu mmara kyekyere nnipa ne nniso wɔ baabiara.

 3, 4. Nsɛm a ɛfata sɛ yɛhyɛ no nsow bɛn na wɔaka wɔ awosu mmara, adiyi mmara, ne nnipa mmara ho?

³ Ɔsomafo Paulo kaa saa awosu mmara yi ho asɛm bere a ɔkyerɛw wiase nnipa ho asɛm no: “Onyankopɔn ho ade a wonim no da adi pefee wɔ wɔn mu, na Onyankopɔn na wayi akyerɛ wɔn. Na efi wiasebɔ so beeme na n’ade a wonhu a ɛne ne daa tumi ne nyamesu ada adi nneɛma a ɔyɛe no ho, enti na wonni anoyi biara.” Sɛ wɔn a wonnye nni yi di awosu mmara so a, ɛbɛkanyan wɔn ahonim mpo. Enti Paulo toaa so kae sɛ: “Amanaman mufo a wonni mmara no de wɔn awosu yɛ mmara no mu nneɛma a, eyinom a wonni mmara no yɛ mmara ma wɔn ho. Wɔde eyi kyerɛ sɛ wɔakyerɛw mmara adwuma no wɔn komam, na wɔn ahonim nso di wɔn adanse.”—Romafo 1:19, 20; 2:14, 15.

⁴ Wɔ afeha a ɛto so 18 mu no, Engiresi mmaranimfo a wagye din William Blackstone kyerɛwee sɛ: “Nokwarem no, saa mmara a efi awosu mu [awosu mmara] yi a ɛne adesamma bɔ tipɛn [mfe a wɔadi yɛ pɛ] na Onyankopɔn ankasa na ɔde di dwuma no, wɔ tumi sen foforo biara. Ɛyɛ adwuma wɔ wiase baabiara, aman nyinaa mu, ne bere nyinaa: nnipa mmara biara a ɛne eyi nhyia no nni mũ.” Blackstone toaa so kaa “adiyi mmara” a wohu wɔ Bible mu no ho asɛm, na ɔkae sɛ: “Saa fapem abien yi, mmara a efi awosu mu ne adiyi mmara no so na nnipa mmara nyinaa gyina; ɛno kyerɛ sɛ ɛnsɛ sɛ wɔhwɛ ma [wɔma] nnipa mmara ne eyinom bɔ abira.” Eyi ne nea Yesu kae wɔ Onyankopɔn ne Kaesare ho sɛnea wɔakyerɛw wɔ Marko 12:17 no hyia. Ɛda adi pefee sɛ mmeae bi wɔ hɔ a Onyankopɔn to nea Kaesare betumi ahwehwɛ afi Kristoni bi hɔ no ano hye. Sanhedrin no de wɔn asɛm kɔɔ biribi a ɛte saa so bere a wɔhyɛɛ asomafo no sɛ wonnyae Yesu ho asɛnka no. Enti, asomafo no buae ɔkwampa so sɛ: “Ɛsɛ sɛ yetie Onyankopɔn mmom sen nnipa.”—Asomafo no Nnwuma 5:28, 29.

“Onyankopɔn De”

 5, 6. (a) Esiane sɛ wɔwoo Onyankopɔn Ahenni no wɔ 1914 mu nti, dɛn na ɛsɛ sɛ Kristofo ma ɛtra wɔn adwene mu fann? (b) Ɔkwan bɛn so na Kristoni da no adi sɛ ɔyɛ ɔsomfo?

⁵ Efi 1914 titiriw, a Yehowa Nyankopɔn, Ade Nyinaa so Tumfoɔ, no fii ase dii hene denam Kristo Mesia Ahenni no so na Kristofo ahwɛ yiye sɛ wɔmfa Onyankopɔn de nkɔma Kaesare. (Adiyisɛm 11:15, 17) Ɛnnɛ ne bere a Onyankopɔn mmara hwehwɛ sɛ Kristofo ‘renyɛ wiase no fã’ sen bere biara. (Yohane 17:16) Esiane sɛ wɔahyira wɔn ho so ama Onyankopɔn, wɔn Nkwamafo no nti, ɛsɛ sɛ wɔda no adi pefee sɛ wɔnyɛ nea wɔn ankasa pɛ bio. (Dwom 100:2, 3) Sɛnea Paulo kyerɛwee no, ‘yɛyɛ Awurade dea.’ (Romafo 14:8) Bio nso, sɛ wɔbɔ Kristoni bi asu a, ɔbɛyɛ Onyankopɔn somfo, ma enti obetumi aka Paulo asɛm no bi sɛ: “Nyankopɔn . . . na wama yɛafata ayɛ . . . asomfo.”—2 Korintofo 3:5, 6.

⁶ Ɔsomafo Paulo kyerɛwee nso sɛ: “Mekamfo me som.” (Romafo 11:13) Nokwarem no, ɛsɛ sɛ yɛyɛ saa ara. Sɛ́ yɛyɛ ɔsom adwuma no bere nyinaa anaa bere fã no, yɛma ɛtra yɛn adwene mu sɛ Yehowa ankasa na ɔde yɛn som adwuma no ahyɛ yɛn nsa. (2 Korintofo 2:17) Esiane sɛ ebia ebinom rennye yɛn gyinabea no ntom nti, ɛsɛ sɛ Kristoni a wahyira ne ho so agye asubɔ biara siesie ne ho sɛ ɔde adanse a emu da hɔ na etu mpɔn bɛma de akyerɛ sɛ ɔyɛ asɛmpa no somfo ampa. (1 Petro 3:15) Ɛsɛ sɛ wohu ne som adwuma no wɔ n’abrabɔ mu nso. Sɛ́ Onyankopɔn somfo no, ɛsɛ sɛ Kristoni ka abrabɔ a ɛho tew ho asɛm kyerɛ na ɔde yɛ adwuma, boa abusua biakoyɛ, odi nokware na ɔkyerɛ obu ma mmara ne nhyehyɛe pa. (Romafo 12:17, 18; 1 Tesalonikafo 5:15) Kristoni ne Onyankopɔn ntam abusuabɔ ne ne som adwuma a Onyankopɔn de ama no no ne n’asetra mu nneɛma a ɛho hia no sen biara. Kaesare ntumi nhyɛ no mma ɔmfa eyinom nto nkyɛn. Ɛda adi pefee sɛ ɛsɛ sɛ yebu no sɛ ɛka “Onyankopɔn de” ho.

“Kaesare De”

 7. Edin bɛn na Yehowa Adansefo agye wɔ towtua mu?

⁷ Yehowa Adansefo nim sɛ ɛsɛ sɛ ‘wɔbrɛbrɛ wɔn ho ase ma atumfoɔ a wɔkorɔn no,’ tumidifo nniso ahorow no. (Romafo 13:1) Enti, sɛ Kaesare, Ɔman no, hwehwɛ nneɛma a ɛfata a, wɔn ahonim a wɔde Bible atete no ma wɔn kwan ma wodi ahwehwɛde ahorow yi ho dwuma. Sɛ nhwɛso no, nokware Kristofo ka wɔn a wɔyɛ towtua mu nhwɛso pa sen biara wɔ asase so no ho. Wɔ Germany no, Münchner Merkur atesɛm krataa no kaa Yehowa Adansefo ho asɛm sɛ: “Wɔn na wodi towtua mu nokware na wɔde ba ntɛm sen biara wɔ Adehyeman Nkabom no mu.” Wɔ Italy no, La Stampa atesɛm krataa no kae sɛ: “[Yehowa Adansefo yɛ] ɔmamma a wodi nokware sen biara a obiara betumi anya: wonguan towtua anaa wɔmmɔ mmɔden sɛ wɔbɛkwati mmara ahorow a enye mma wɔn no esiane wɔn ankasa mfaso nti.” Yehowa asomfo yɛ eyi ‘esiane wɔn ahonim’ nti.—Romafo 13:5, 6.

 8. Sika fam tow nkutoo ne ade a ɛsɛ sɛ yɛde ma Kaesare?

⁸ “Kaesare de” ara ne tow a wotua anaa? Dabi. Paulo bobɔɔ nneɛma foforo din te sɛ osuro ne nidi. Germanni nhomanimfo Heinrich Meyer kyerɛwee wɔ ne Critical and Exegetical Hand-Book to the Gospel of Matthew no mu sɛ: “Sɛ wɔka sɛ [Kaesare de] . . . a, ɛnsɛ sɛ yɛte ase sɛ ɛyɛ ɔman tow kɛkɛ, na mmom biribiara a ɛsɛ Kaesare esiane ne tumidi a ɛfata no nti.” Abakɔsɛm kyerɛwfo E. W. Barnes kae wɔ ne nhoma The Rise of Christianity mu sɛ Kristoni de towtua ho ka a, otua na “ogye Ɔman ahwehwɛde a aka nyinaa tom, bere dodow a wɔnka sɛ ɔmfa Onyankopɔn de mma Kaesare no.”

 9, 10. Dɛn na ebia ɛbɛma Kristoni atwentwɛn ne nan ase sɛ ɔde nea ɛsɛ Kaesare bɛma no, nanso nokwasɛm ahorow bɛn na ɛsɛ sɛ yɛma ɛtra yɛn adwene mu?

⁹ Dɛn nneɛma na Ɔman betumi ahwehwɛ a ɛntra nkɔ nneɛma a ɛfata sɛ yɛde ma Onyankopɔn no so? Ebinom ate nka sɛ wobetumi ama Kaesare sika wɔ towtua mu ma afata, nanso wontumi nyɛ biribi foforo biara. Ɛda adi sɛ wɔrempɛ sɛ wɔbɛma Kaesare biribiara a ebegye bere a anka wobetumi de ayɛ teokrase nnwuma bi. Nanso, ɛmfa ho sɛ ɛyɛ nokware sɛ ɛsɛ sɛ ‘yɛdɔ Yehowa yɛn Nyankopɔn fi yɛn koma nyinaa mu ne yɛn kra nyinaa mu ne yɛn adwene nyinaa mu ne yɛn ahoɔden nyinaa mu’ no, Yehowa hwɛ kwan sɛ yɛde bere bi bɛyɛ nneɛma foforo a ɛnka yɛn som adwuma ho. (Marko 12:30; Filipifo 3:3) Sɛ nhwɛso no, wotu Kristoni warefo fo sɛ ɔnhwehwɛ bere mfa nyɛ nneɛma a ɛsɔ n’aware mu ɔhokafo ani. Dwumadi a ɛtete saa nyɛ mfomso, nanso ɔsomafo Paulo ka sɛ ɛyɛ “wiase de,” ɛnyɛ “Awurade de.”—1 Korintofo 7:32-34; fa toto 1 Timoteo 5:8 ho.

¹⁰ Bio nso, Kristo maa n’akyidifo kwan sɛ wontua tow “mma” wɔn, na akyinnye biara nni ho sɛ eyi bɛma wɔde bere a wɔahyira so ama Yehowa no adi dwuma—efisɛ yɛahyira yɛn asetra nyinaa so wɔ saa kwan yi so. Sɛ tow a wogye nkurɔfo no yɛ adwumayɛfo akatua mu ɔha biara mu nkyem 33 (ɛwɔ soro sen saa wɔ aman bi mu) a, eyi kyerɛ sɛ afe biara odwumayɛni tua n’asram anan akatua to Ɔman Foto mu. Sɛ yɛbɛka no ɔkwan foforo so a, wɔ mfe a odwumayɛni bi de bɛyɛ adwuma nyinaa mu no, ɔde mfe 15 na ɛyɛ tow sika a “Kaesare” hwehwɛ no ho adwuma. Afei susuw sukuukɔ nso ho. Wɔ aman dodow no ara mu no, mmara hwehwɛ sɛ anyɛ yiye koraa no awofo de wɔn mma kɔ sukuu mfe dodow bi. Ɛsono ɔman biara ne mfe dodow a wɔde kɔ sukuu. Wɔ mmeae dodow no ara no, ɛyɛ bere tenten. Ampa, sukuu a ɛte saa ho wɔ mfaso mpɛn pii, nanso ɛyɛ Kaesare na ɔkyerɛ abofra asetra mu mfe dodow a ɔmfa nni dwuma saa kwan yi so, na Kristofo awofo di Kaesare gyinaesi no so.

Sraadi a Wɔhyɛ Nkurɔfo Ma Wɔkɔ

11, 12. (a) Dɛn na Kaesare hwehwɛ wɔ nsase pii so? (b) Tete Kristofo no buu sraadi dɛn?

¹¹ Ade foforo a Kaesare hwehwɛ wɔ aman bi mu ne sraadi a wɔhyɛ nkurɔfo ma wɔkɔ. Wɔ afeha a ɛto so 20 yi mu no, aman dodow no ara yɛ saa nhyehyɛe yi wɔ ɔko mmere mu, na ebi yɛ saa wɔ asomdwoe mmere mu nso. Wɔ France no, mfe pii mu no na wɔfrɛ saa asɛyɛde yi mogya ho tow, a ɛkyerɛ sɛ ɛsɛ sɛ aberante biara nya ɔpɛ sɛ ɔde ne nkwa bɛto hɔ ama Ɔman no. Eyi yɛ biribi a wɔn a wɔahyira wɔn ho so ama Yehowa betumi afi ahonim pa mu de ama? Afeha a edi kan no mu Kristofo buu saa asɛm yi dɛn?

¹² Bere a Kristofo a wodi kan no bɔɔ mmɔden sɛ wɔbɛyɛ ɔmamma pa no, wɔn gyidi amma wɔanni afoforo awu anaasɛ wɔamfa wɔn ankasa nkwa ammɔ afɔre amma Ɔman. The Encyclopedia of Religion ka sɛ: “Tete asɔre agyanom a Tertullian ne Origen ka ho no sii so dua sɛ Kristofo nni hokwan sɛ wokum nnipa, nnyinasosɛm a amma wɔamfa wɔn ho anhyɛ Roma sraadi mu.” Ɔbenfo C. J. Cadoux kyerɛw wɔ ne nhoma The Early Church and the World mu sɛ: “Anyɛ yiye koraa ɛde besi Marcus Aurelius nniso so [161-180 Y.B.] no, na Kristoni biara nkɔ sraadi wɔ n’asubɔ akyi.”

13. Dɛn nti na adwene a Kristoman mufo dodow no ara kura wɔ sraadi ho no nte sɛ tete Kristofo no de?

¹³ Dɛn nti na Kristoman asɔre ahorow no mufo nni adwene a ɛte saa nnɛ? Efi nsakrae kɛse bi a ɛbae wɔ afeha a ɛto so anan no mu. Katolek nhoma A History of the Christian Councils kyerɛkyerɛ mu sɛ: “Na Kristofo bebree, . . . a na wɔwɔ ahempɔn abosonsomfo no nniso ase no wɔ sraadi ho adwene bi a egyina nyamesom so, na wogyinaa pintinn a wɔankɔ ko ɔkwan biara so, anaasɛ wɔtwe sanee. Bere a Asɔre Bagua [a wɔyɛe wɔ Arles wɔ 314 Y.B.] no resusuw nsakrae ahorow a Constantine de bae no ho no, wɔde ahyɛde mae sɛ ɛsɛ sɛ Kristofo kɔ ko, . . . efisɛ Asɔre no anya asomdwoe (in pace) wɔ ɔhene bi a na n’ani gye Kristofo ho nniso ase.” Esiane sɛ wɔpow Yesu nkyerɛkyerɛ no saa nti, efi saa bere no besi nnɛ, Kristoman asɔfo ahyɛ wɔn nguan nkuran ma wɔde wɔn ho ahyɛ amanaman no sraadi mu, ɛwom sɛ ankorankoro bi asi gyinae sɛ wɔyɛ nnipa a wofi ahonim pa mu kwati sraadi de.

14, 15. (a) Dɛn so na Kristofo a wɔwɔ mmeae bi gyina ma woyi wɔn fi sraadi mu? (b) Baabi a wonyi obiara mfi mu no, Kyerɛwnsɛm mu nnyinasosɛm bɛn na ɛbɛboa Kristoni ma wasi gyinae a ɛfata wɔ sraadi ho?

¹⁴ So ɛsɛ sɛ ɛnnɛ Kristofo di nnipa dodow akyi wɔ saa asɛm yi mu? Dabi. Sɛ Kristoni a wahyira ne ho so agye asubɔ te ɔman a woyi nyamesomfo fi sraadi mu mu a, obetumi de saa nsiesiei yi adi dwuma, efisɛ ɔyɛ ɔsomfo ampa. (2 Timoteo 4:5) Aman dodow bi, a United States ne Australia ka ho, ayi ebinom afi mu saa wɔ ɔko bere mu mpo. Na nsase pii a wɔhyɛ nkurɔfo ma wɔkɔ sraadi so no, wɔ asomdwoe mmere mu no, woyi Yehowa Adansefo fi mu sɛ nyamesomfo. Saa kwan no so no, wobetumi akɔ so de wɔn baguam som adwuma no aboa nkurɔfo no.

¹⁵ Na sɛ Kristoni no te asase a wonyi nyamesomfo mfi mu so nso ɛ? Ɛnde ɛho behia sɛ ogyina n’ahonim a ɔde Bible atete no so si n’ankasa gyinae. (Galatifo 6:5) Bere a ɔwɔ obu ma Kaesare tumidi no, ɔde ahwɛyiye besusuw nea ɛsɛ sɛ ɔde ma Yehowa no ho. (Dwom 36:9; 116:12-14; Asomafo no Nnwuma 17:28) Kristoni bɛkae sɛ nea ɛhyɛ nokware Kristoni agyirae ne ɔdɔ a ɔwɔ ma ne mfɛfo gyidifo, a wɔn a wɔte nsase foforo so anaa ɛsono wɔn mmusua mpo ka ho. (Yohane 13:34, 35; 1 Petro 2:17) Afei nso, ne werɛ remfi Kyerɛwnsɛm mu nnyinasosɛm ahorow a ɛwɔ kyerɛw nsɛm te sɛ Yesaia 2:2-4; Mateo 26:52; Romafo 12:18; 14:19; 2 Korintofo 10:4; ne Hebrifo 12:14 no.

Adwuma a Ɛmfa Sraadi Ho

16. Wɔ nsase bi so no, adwuma a ɛmfa sraadi ho bɛn na Kaesare hwehwɛ sɛ wɔn a wonnye sraadi ntom no yɛ?

¹⁶ Nanso nsase bi wɔ hɔ a ɛmfa ho sɛ Ɔman no nyi nyamesomfo mfi mu no, wogye tom sɛ ankorankoro bi betumi apow sraadi. Saa nsase yi mu pii yɛ nsiesiei ma ankorankoro yi a wofi ahonim pa mu yɛ wɔn ade no na wɔanhyɛ wɔn ma wɔanyɛ asraafo. Wɔ mmeae bi no, wobu adwuma a ɛmfa sraadi ho a wɔma obi yɛ, te sɛ adwuma pa a ɔyɛ wɔ mpɔtam hɔ, sɛ ɔman adwuma a ɛmfa sraadi ho. Kristoni a wahyira ne ho so betumi ayɛ adwuma a ɛte saa? Ɛha nso, ebehia sɛ Kristoni a wahyira ne ho so agye asubɔ no gyina n’ahonim a ɔde Bible atete so si n’ankasa gyinae.

17. Ɔman adwuma a ɛmfa sraadi ho no ho nhwɛso bi wɔ Bible mu?

¹⁷ Ɛte sɛ nea na wɔyɛ kwasafodwuma wɔ Bible mmere mu. Abakɔsɛm nhoma bi ka sɛ: “Tow ne amanne a na wogyigye fi wɔn a na wɔwɔ Yudea no hɔ akyi no, na adwumatow [adwuma a wonnye ho akatua a wɔyɛ ma ɔman atumfoɔ] nso wɔ hɔ. Na eyi yɛ nhyehyɛe a ɛwɔ Apuei fam fi tete, a Hela ne Roma atumfoɔ no ma ɛtraa hɔ. . . . Apam Foforo no nso ma adwumatow a na ɛkɔ so wɔ Yudea no ho nhwɛso, na ɛkyerɛ sɛnea na ahyeta. Nea ɛne saa amammerɛ yi hyia no, asraafo no hyɛɛ Simon a ofi Kireneni no sɛ ɔnsoa Yesu mmeamudua [asɛndua] (Mateo 5:41; 27:32; Marko 15:21; Luka 23:26).”

18. Kwasafodwuma a ɛmfa sraadi ne nyamesom ho bɛn na Yehowa Adansefo taa yɛ?

¹⁸ Ɔkwan a ɛte saa ara so no, ɛnnɛ wɔ aman bi mu no, Ɔman anaa kurow mu atumfoɔ hwehwɛ sɛ ɔmamfo de wɔn ho bɛhyɛ kwasafodwuma a egu ahorow mu. Ɛtɔ mmere bi a eyi yɛ adwuma pɔtee bi te sɛ abura a wotu anaa akwan a woyi; ɛtɔ mmere bi a ɛkɔ so daa, te sɛ kar akwan, sukuu ahorow, anaa ayaresabea ahorow a wosiesie dapɛn biara. Baabi a ɔmamfo yiyedi nti na wɔyɛ adwuma a ɛmfa sraadi ho saa, na ɛmmata atoro som ho anaasɛ ɛnyɛ nea Yehowa Adansefo ahonim mma ho kwan wɔ ɔkwan foforo so no, mpɛn pii no wɔyɛ. (1 Petro 2:13-15) Eyi taa kowie adanse a etu mpɔn a wodi mu, na ɛtɔ da bi a ɛma wɔn a wɔde atoro sobo bɔ Adansefo no sɛ wɔsɔre tia nniso no ani wu.—Fa toto Mateo 10:18 ho.

19. Sɛ Kaesare ka sɛ Kristoni bi mfa bere tenten bi nyɛ ɔman adwuma a ɛmfa sraadi ho a, dɛn na ɛsɛ sɛ ɔyɛ wɔ asɛm no ho?

¹⁹ Na sɛ Ɔman hwehwɛ sɛ Kristoni bi de bere tenten bi bɛyɛ adwuma a ɛmfa sraadi ho a ɛyɛ ɔman adwuma no fã wɔ atumfoɔ a wɔnyɛ asraafo nniso ase nso ɛ? Ɛha nso, ɛsɛ sɛ Kristofo gyina wɔn ahonim a wɔatete no yiye so si wɔn ankasa gyinae. “Wɔde yɛn nyinaa begyina Onyankopɔn asɛnni agua no anim.” (Romafo 14:10) Ɛsɛ sɛ Kristofo a Kaesare hwehwɛ biribi fi wɔn hɔ no de mpaebɔ hwehwɛ asɛm no mu na wodwennwen ho.a Ebia ɛbɛyɛ nea nyansa wom nso sɛ wɔne Kristofo a wɔn ho akokwaw wɔ asafo no mu bɛbɔ asɛm no ho nkɔmmɔ. Eyi akyi no, ɛsɛ sɛ wosi wɔn ankasa gyinae.—Mmebusɛm 2:1-5; Filipifo 4:5.

20. Nsɛmmisa ne Kyerɛwnsɛm mu nnyinasosɛm bɛn na ɛboa Kristoni ma osusuw ɔman adwuma a ɛmfa sraadi ho no ho?

²⁰ Bere a Kristofo reyɛ saa nhwehwɛmu no, wobesusuw Bible mu nnyinasosɛm ahorow bi ho. Paulo kae sɛ ɛsɛ sɛ ‘yɛbrɛ yɛn ho ase ma mpanyinni ne tumi horow no, na yesiesie yɛn ho ma adwuma pa na yedwo bɛtɛɛ, na yeyi odwo nyinaa adi kyerɛ nnipa nyinaa.’ (Tito 3:1, 2) Bere koro no ara, Kristofo bɛbɔ mmɔden ahwehwɛ adwuma a ɛmfa sraadi ho a wɔrebɛyɛ no mu. Sɛ wogye tom a, wobetumi akura afã biara a Kristofo nni no mu? (Mika 4:3, 5; Yohane 17:16) Ɛbɛma wɔde wɔn ho ahyɛ atoro som mu? (Adiyisɛm 18:4, 20, 21) Sɛ wɔyɛ a, ebesiw wɔn Kristofo asɛyɛde ahorow ho dwuma a wobedi kwan anaasɛ ɛbɛbrɛ no ase dodo anaa? (Mateo 24:14; Hebrifo 10:24, 25) Ɔkwan foforo so no, so wobetumi akɔ so anya honhom mu nkɔso, ma ebi mpo a wɔanya bere nyinaa som adwuma no mu kyɛfa bere a wɔreyɛ adwuma a wɔde ama wɔn no?—Hebrifo 6:11, 12.

21. Ɛmfa ho gyinae a onua bi si wɔ ɔman adwuma a ɛmfa sraadi ho mu no, ɛsɛ sɛ asafo no bu no dɛn?

²¹ Sɛ ɛba sɛ nsɛmmisa a ɛtete saa ho mmuae a efi nokwaredi mu ma Kristoni no si gyinae sɛ ɔman adwuma a ɛmfa sraadi ho no yɛ “adwuma pa” a obetumi ayɛ de akyerɛ obu ama atumfoɔ no nso ɛ? Ɛno yɛ ne gyinae a osi wɔ Yehowa anim. Ɛsɛ sɛ mpanyimfo a wɔapaw wɔn ne afoforo kyerɛ obu kɛse ma onua no ahonim na wɔkɔ so bu no sɛ Kristoni a okura gyinabea pa. Nanso sɛ Kristoni bi te nka sɛ ontumi nyɛ saa adwuma a ɛmfa sraadi ho yi a, ɛsɛ sɛ wɔkyerɛ obu ma ɔno nso ne gyinabea no. Ɔno nso da so wɔ gyinabea pa, na ɛsɛ sɛ wofi ɔdɔ mu boa no.—1 Korintofo 10:29; 2 Korintofo 1:24; 1 Petro 3:16.

22. Ɛmfa ho tebea biara a yehyia no, dɛn na yɛbɛkɔ so ayɛ?

²² Sɛ Kristofo no, yɛrennyae da sɛ yebedi “nea nidi sɛ no ni.” (Romafo 13:7) Yɛbɛkyerɛ obu ama nhyehyɛe pa, na yɛabɔ mmɔden ayɛ ɔmamfo a wɔpɛ asomdwoe na wodi mmara so. (Dwom 34:14) Yebetumi mpo abɔ mpae ama “ahene ne wɔn a wodi tumi nyinaa” bere a ɛho abehia sɛ saa nnipa yi sisi gyinae a ɛka yɛn Kristofo asetra ne dwumadi no. Esiane sɛ yɛde Kaesare de ma Kaesare nti, yɛwɔ anidaso sɛ ɛbɛma “yɛatra ase komm, na yɛn ho adwo yɛn, onyamesom pa ne abrabɔ a ɛho yɛ nyam nyinaa mu.” (1 Timoteo 2:1, 2) Nea ɛsen biara no, yɛbɛkɔ so aka Ahenni ho asɛmpa no sɛ adesamma anidaso koro pɛ a ɛwɔ hɔ, na yɛafi ahonim pa mu de Onyankopɔn de ama Onyankopɔn.

[Ase hɔ asɛm]

Wubetumi Akyerɛkyerɛ Mu?

◻ Dɛn ne Kristoni ahiade a edi kan bere a ɔrema ɔne Kaesare ne ɔne Yehowa ntam abusuabɔ akari pɛ no?

◻ Dɛn na ɛsɛ sɛ yɛde ma Yehowa a yentumi mfa mma Kaesare da?

◻ Dɛn nneɛma na yɛde ma Kaesare a ɛfata?

◻ Kyerɛw nsɛm bɛn na ɛboa yɛn ma yesi gyinae a ɛfata wɔ sraadi a wɔhyɛ nkurɔfo ma wɔkɔ no ho?

◻ Dɛn nneɛma na ɛsɛ sɛ ɛtra yɛn adwene mu bere a wɔhwehwɛ sɛ yɛyɛ ɔman adwuma a ɛmfa sraadi ho no?

◻ Ɛdefa Yehowa ne Kaesare ho no, dɛn na yɛkɔ so yɛ?

[Mfonini wɔ kratafa 16, 17]

Asomafo no ka kyerɛɛ Sanhedrin no sɛ: “Ɛsɛ sɛ yetie Onyankopɔn mmom sen nnipa”