“Bedi M’akyi”—Dɛn Na Na Yesu Pɛ Sɛ Ɔkyerɛ?

1, 2. Dɛn ne ade a ɛho hia paa a wɔbetumi ato nsa afrɛ obi sɛ ɔmmɛyɛ, na asɛm bɛn na yebetumi abisa yɛn ho?

BERE bɛn na obi too nsa frɛɛ wo kɔɔ baabi a ɛmaa w’ani gyei paa? Ebia nea ɛbɛba w’adwene mu ne bere a obi too nsa frɛɛ wo kɔɔ dwumadi titiriw bi ase. Ebetumi aba sɛ nnipa mmienu a wɔda wo koma so paa na wɔtoo nsa frɛɛ wo kɔɔ wɔn ayeforohyia ase. Anaasɛ ebia wobɛkae da a wɔtoo nsa frɛɛ wo de adwuma titiriw bi hyɛɛ wo nsa. Sɛ obi ato nsa afrɛ wo saa da a, akyinnye biara nni ho sɛ ɛmaa w’ani gyei, na wotee nka mpo sɛ wadi wo ni. Nea ɛwom ne sɛ, wɔato nsa afrɛ yɛn nyinaa sɛ yɛmmɛyɛ biribi titiriw bi a ɛkyɛn nea yɛaka ho asɛm no koraa. To a wɔato nsa afrɛ yɛn yi, sɛ yegye tom oo, sɛ yɛannye antom oo, ɛbɛka yɛn asetena paa. Ɛno ne gyinae a ɛho hia paa a yebetumi asi wɔ yɛn asetena mu.

² Hena na wato nsa afrɛ yɛn sɛ yɛmmɛyɛ ade titiriw no? Ɛyɛ Yesu Kristo a ɔyɛ Yehowa, ade nyinaa so Tumfoɔ Nyankopɔn no Ba a ɔwoo no koro no, na wato nsa afrɛ yɛn. Nea ɔse yɛmmɛyɛ no, ɛwɔ Bible mu. Ɛwɔ Marko 10:21. Yesu kaa wɔ hɔ sɛ: “Bra bedi m’akyi.” Wei kyerɛ sɛ Yesu reto nsa afrɛ yɛn mu biara. Ehia paa sɛ yɛn mu biara bisa ne ho sɛ, ‘Mɛyɛ nea ɔreka no anaa merenyɛ?’ Anhwɛ a wobɛka sɛ, ‘Yesu paa ato nsa frɛ wo, hena na ɔbɛpopo ne ti?’ Nanso nea ɛyɛ nwanwa ne sɛ, nnipa dodow no ara atwii wɔn ani. Adɛn ntia?

3, 4. (a) Ɔbarima a ɔkɔɔ Yesu hɔ kobisaa no daa nkwa ho asɛm no, dɛn na na ɔwɔ a nkurɔfo nyae a anka wɔpɛ? (b) Ɛbɛyɛ sɛ suban pa bɛn na Yesu hui sɛ osikani aberante a na ɔyɛ otumfoɔ no wɔ?

³ Yɛmfa ɔbarima bi asɛm nyɛ nhwɛso. Saa barima no, Yesu ankasa too nsa frɛɛ no bɛyɛ mfe 2,000 a atwam ni. Ná wɔbu saa barima yi paa. Anyɛ yiye koraa no, na nneɛma mmiɛnsa bi wɔ ne ho a nnipa dodow no ara nyaa bi a anka wɔpɛ. Ná ɔyɛ ɔbabun, ɔwɔ ahode pii, na na ɔwɔ tumi. Bible ka ne ho asɛm sɛ, na ɔyɛ “aberante,” “ɔwɔ sika bebree,” na na ɔyɛ “atumfo no baako” nso. (Mateo 19:20; Luka 18:18, 23) Nanso, na biribi wɔ aberante yi ho a ɛyɛ fɛ paa. Ná wate Yesu, Ɔkyerɛkyerɛfo Kɛse no ho asɛm, na n’ani gyee nea ɔtee no ho.

⁴ Atumfoɔ a wɔwɔ hɔ saa bere no, na wɔn mu dodow no ara mfa Yesu nyɛ hwee. (Yohane 7:48; 12:42) Nanso otumfoɔ yi de, wanyɛ saa koraa. Bible ka sɛ: “Bere a [Yesu sii] kwan so a ɔrekɔ no, ɔbarima bi tuu mmirika bebuu nkotodwe wɔ n’anim bisaa no sɛ: ‘Ɔkyerɛkyerɛfo Pa, dɛn na menyɛ na manya daa nkwa?’” (Marko 10:17) Ná ɔbarima yi ho pere no sɛ ɔne Yesu bɛkasa. Enti otuu mmirika kohyiaa Yesu wɔ abɔnten so, sɛnea ebia anka ahiafo anaa nnipa a wɔba fam bɛyɛ no. Bio nso, ofi obu mu buu nkotodwe wɔ Kristo anim. Enti ɛda adi sɛ na ɔbarima yi wɔ ahobrɛase, na na onim sɛ ohia Onyankopɔn akwankyerɛ. Suban pa a ɔbarima no daa no adi no, Yesu ani gyee ho. (Mateo 5:3; 18:4) Wei nyinaa nti na “Yesu hwɛɛ no, na ɔdɔɔ no” no. (Marko 10:21) Mmuae bɛn na Yesu de maa aberante no?

 5. Mmuae bɛn na Yesu de maa osikani aberante no, na yɛyɛ dɛn hu sɛ “ade baako” a Yesu kaa sɛ aka no no, na ɛnkyerɛ sɛ onkodi hia? (Hwɛ ase hɔ asɛm no nso.)

⁵ Asɛm a ɛho hia a aberante no bisa faa daa nkwa ho no, Yesu ma ohui sɛ na n’Agya ama ho mmuae dedaw. Yesu twee adwene sii Mmara a Yehowa de maa Mose no so, ɛnna ɔbarima no kaa sɛ, odi saa mmara no so pɛpɛɛpɛ. Nanso, esiane sɛ na Yesu tumi hu nea ɛwɔ obi koma mu nti, otumi huu nneɛma kɔɔ akyiri. (Yohane 2:25) Yesu hui sɛ na biribi wɔ otumfoɔ yi ho a ebetumi ama ayɛ den sɛ ɔbɛsom Onyankopɔn yiye. Enti ɔka kyerɛɛ no sɛ: “Aka wo ade baako.” Ná dɛn ne saa “ade baako” no? Yesu ka kyerɛɛ no sɛ: “Kɔ na kɔtɔn nea wowɔ, na fa ma ahiafo.” (Marko 10:21) Wohwɛ a, nea na Yesu rekyerɛ ne sɛ, sɛ obi betumi asom Onyankopɔn yiye a, gye sɛ odi hia buruburoo anaa? Daabi.a Mmom, na Kristo reka biribi a ɛho hia paa ho asɛm.

 6. Dɛn na Yesu too nsa frɛɛ osikani aberante a na ɔyɛ otumfoɔ no sɛ ɔmmɛyɛ, na sɛnea aberante no yɛɛ n’ade wɔ ho no, dɛn na ɛma yehu fa ne koma ho?

⁶ Nea ɛbɛyɛ na ɔbarima no ahu dekode a aka no, Yesu maa no akwannya bi a ɛso bi nni. Ɔka kyerɛɛ no sɛ: “Bra bedi m’akyi.” Wo de susuw ho hwɛ: Ɔsorosoro Nyankopɔn Ba no ankasa gyinaa ɔbarima no anim too nsa frɛɛ no sɛ ommedi n’akyi! Yesu san hyɛɛ no bɔ sɛ obenya akatua soronko bi. Ɔkaa sɛ: “Wubenya agyapade wɔ soro.” Osikani aberante a na ɔyɛ otumfoɔ no, akwannya nwanwaso a ne nsa kae yi, ogye toom ntɛm anaa? Kyerɛwtohɔ no ka sɛ: “Asɛm no haw no, na ɔde awerɛhow kɔe, efisɛ na ɔwɔ agyapade bebree.” (Marko 10:21, 22) Asɛm a Yesu ka kyerɛɛ ɔbarima no, na ɔbarima no nhwɛ kwan, nanso ɛmaa nea ɛwɔ ne koma mu daa adi. Ná ɔbarima no agyapade ho hia no dodo, na akyinnye biara nni ho sɛ, tumi ne anuonyam a n’agyapade no maa onyae no nso, na n’ani gye ho paa. Awerɛhosɛm ne sɛ, na ɔdɔ n’agyapade koraa sen Kristo. Enti, “ade baako” a na aka no ne sɛ obefi ne koma mu nyinaa adɔ Yesu ne Yehowa. Esiane sɛ na aberante no nni ɔdɔ a ɛte saa nti, akwannya a ɛso bi nni a ne nsa kae no, ɔpoe! Nanso yemmisa sɛ, asɛm yi fa wo ho sɛn?

 7. Asɛm a Yesu ka de too nsa frɛɛ aberante no, yɛyɛ dɛn hu sɛ yɛn nso ɛfa yɛn ho?

⁷ Ɛnyɛ saa aberante no nko ara na Yesu too nsa frɛɛ no; saa ara nso na na ɛnyɛ nnipa kakraa bi pɛ na Yesu reto nsa afrɛ wɔn. Mmom Yesu kaa sɛ: “Sɛ obi pɛ sɛ odi m’akyi a, . . . onni m’akyi daa.” (Luka 9:23) Hyɛ no nsow sɛ, ‘obiara’ a ‘ɔpɛ’ sɛ odi Kristo akyi no betumi ayɛ saa. Onyankopɔn twe nnipa komapafo a wɔte saa no ba ne Ba no nkyɛn. (Yohane 6:44) Ɛnyɛ asikafo, anaa ahiafo, anaa wɔn a wɔfi abusua bi mu, anaa ɔman bi mufo, anaa wɔn a wɔtenaa ase bere pɔtee bi mu nko ara na Yesu too nsa frɛɛ wɔn sɛ wɔmmedi n’akyi, na mmom obi biara. Enti bere a Yesu kaa sɛ, “Bra bedi m’akyi” no, na ɔreto nsa afrɛ wo nso sɛ bedi n’akyi. Adɛn nti na ɛsɛ sɛ wudi Kristo akyi? Dɛn na ehia sɛ woyɛ na woatumi adi n’akyi?

 8. Dɛn na nnipa nyinaa hia, na adɛn ntia?

⁸ Nokwasɛm bi wɔ hɔ a ɛsɛ sɛ yegye tom. Ɛne sɛ: Ade a nnipa nyinaa hia paa ne ɔkannifo papa. Ɛnyɛ nnipa nyinaa na wɔgye tom saa, nanso wɔgye tom oo, wɔannye antom oo, nea ɛwom ara ne sɛ, ade a nnipa hia paa ne ɔkannifo papa. Yehowa de ne honhom kaa ne diyifo Yeremia ma ɔkyerɛw nokwasɛm bi a ɛrentwam da. Ɛne sɛ: “O Yehowa, minim sɛ onipa kwan nni ne nsam. Sɛnea onipa nam a obetutu ne nan mpo, enni ne nsam.” (Yeremia 10:23) Wɔammɔ nnipa sɛ wɔnni wɔn ho so, na wɔnni tumi a wɔde bɛyɛ saa mpo. Nokwasɛm ne sɛ, sɛ yɛhwɛ nea nnipa aban ayɛ fi teteete besi nnɛ a, yehu sɛ nnipa di nnipa so a, enwie yiye. (Ɔsɛnkafo 8:9) Akannifo a na wɔwɔ Yesu bere so no hyɛɛ nkurɔfo so, wɔne wɔn anni no yiye, na wɔdaadaa wɔn. Yesu de n’ani too fam hui sɛ, na ɔmanfo no te “sɛ nguan a wonni hwɛfo.” (Marko 6:34) Ɛnnɛ nso, saa ara na amammu bɔne ama nnipa rebrɛ. Obi biara hia ɔkannifo a obetumi anya ne mu ahotoso na wanya obu ama no. Wohwɛ a, Yesu yɛ ɔkannifo a ɔte saa anaa? Momma yɛnhwɛ nea enti a yebetumi aka sɛ Yesu yɛ ɔkannifo a ɔfata paa.

 9. Dɛn na ɛma Yesu da nsow wɔ akannifo afoforo nyinaa ho?

⁹ Nea edi kan no, Yehowa Nyankopɔn na ɔpaw Yesu. Nnipa akannifo tɔ sin, na mpɛn pii no, wɔdaadaa wɔn yɔnko nnipa a wɔn nso tɔ sin a wɔnhu nea wɔnnye no nni no ma wɔpaw wɔn sɛ akannifo. Nanso Yesu de, ɔnte saa; ɔyɛ ɔkannifo a ɔda nsow koraa. N’abodin “Kristo” no koraa kyerɛ saa. Asɛmfua “Kristo” anaa “Mesia” no kyerɛ “Nea Wɔasra No.” Nokwasɛm ne sɛ, Amansan Hene no ankasa na ɔsraa Yesu, anaa ɔmaa no dibea a ɛkorɔn yi. Yehowa Nyankopɔn kaa ne Ba no ho asɛm sɛ: “Hwɛ! M’akoa a mayi no, nea medɔ no a magye no atom! Mehwie me honhom agu no so.” (Mateo 12:18) Yɛn Bɔfo no nko ara na onim ɔkannifo ko a yehia. Yehowa nyansa nni ano, enti yɛwɔ awerɛhyem paa sɛ, Yesu a wayi no ama yɛn sɛ ɔkannifo no, ɔno paa na ɔfata.—Mmebusɛm 3:5, 6.

10. Dɛn nti na Yesu nhwɛso na ɛfata paa sɛ nnipa di akyi?

¹⁰ Nea ɛtɔ so mmienu, Yesu yɛɛ nhwɛso a ɛyɛ pɛ maa yɛn. Ɔkannifo pa biara wɔ suban ahorow a ne manfo ani gye ho a wɔbetumi asuasua. Ɔyɛ nhwɛso ma afoforo di akyi, na ɔboa wɔn ma wɔnya suban pa. Suban bɛn na wuhu no ɔkannifo ho a, ɛyɛ wo fɛ paa? Ɛyɛ akokoduru, nyansa, ayamhyehye, anaa animia a wɔde gyina nsɛnnennen ano? Nea Yesu kae ne nea ɔyɛe bere a ɔwɔ asaase so no, sɛ wusua ho ade a, wubehu sɛ na ɔwɔ saa suban ahorow yi nyinaa bi, ɛne suban pa afoforo pii. Yesu suasua ne soro Agya no pɛpɛɛpɛ wɔ biribiara mu, enti bere a ɔwɔ asaase so no, suban pa a n’Agya wɔ no, na ɔno nso wɔ bi. Akyinnye biara nni ho sɛ na Yesu yɛ onipa a ɔyɛ pɛ a sintɔ biara nni ne ho. Enti biribiara a ɔyɛe, asɛm biara a ɔkae, ne sɛnea na ɔte nka wɔ nneɛma ho no, yebetumi asua biribi afi mu. Bible ka sɛ ogyaw “mo nhwɛso sɛ munni n’anammɔn akyi pɛɛ.”—1 Petro 2:21.

11. Dɛn na Yesu yɛe a ɛkyerɛ sɛ ɔno ne “oguanhwɛfo pa no”?

¹¹ Nea ɛtɔ so mmiɛnsa, Kristo bɔɔ ne bra ma ɛne asɛm a ɔkae yi hyiae: “Mene oguanhwɛfo pa no.” (Yohane 10:14) Kasakoa a Yesu de dii dwuma yi, na nnipa a wɔte ase saa bere no te ase yiye. Ná nguanhwɛfo yɛ adwumaden de hwɛ wɔn nguan. Ná obi a ɔyɛ “oguanhwɛfo pa” de ne nkwa bɛto asiane mu ama ne nguankuw. Sɛ́ nhwɛso no, bere a Yesu nana Dawid yɛ aberantewaa no, na ɔyɛ oguanhwɛfo, na na ɔtaa de ne nkwa to asiane mu pam nkekaboa a na wɔrepɛ ne nguan akyere wɔn no. (1 Samuel 17:34-36) Yesu yɛɛ nea ɛboro saa mpo maa nnipa a wɔyɛ n’akyidifo no. Ɔde ne nkwa too hɔ maa wɔn. (Yohane 10:15) Akannifo dodow sɛn na wɔayɛ krado sɛ wɔbewu ama wɔn manfo?

12, 13. (a) Dɛn na oguanhwɛfo yɛ de kyerɛ sɛ onim ne nguan, na dɛn na nguan no nso yɛ de kyerɛ sɛ wɔnim no? (b) Dɛn nti na wopɛ sɛ Oguanhwɛfo Pa no kyerɛ wo kwan?

¹² Ná Yesu yɛ “oguanhwɛfo pa” wɔ ɔkwan foforo so nso. Ɔkaa sɛ: “Minim me nguan, na me nguan nso nim me.” (Yohane 10:14) Susuw nea na Yesu reka no ho hwɛ. Sɛ obi a onnim nguanhwɛ ho hwee hu nguankuw a, ohu wɔn sɛ mmoa bi a wɔn ho wɔ nwi a wɔabɔ kyenku kɛkɛ. Nanso oguanhwɛfo de, onim ne nguan no mu biara. Onim nguammere a ɛrenkyɛ wɔbɛwo, ne nea ɛsɛ sɛ ɔyɛ de boa wɔn. Onim nguammaa a wɔn ho nyɛ den a wɔrentumi nnantew nkɔ akyiri ma enti ehia sɛ ɔma wɔn so, ne nguan no mu nea ɔyare anaa nea opirae nkyɛe. Nguan no nso nim wɔn wura no yiye. Wɔnim ne nne, enti obi foforo frɛ wɔn a, wɔrenkodi n’akyi. Sɛ biribi nti oguanhwɛfo no teɛm a, ntɛm ara wɔtie ne nne. Baabiara a ɔkɔ no, wɔdi n’akyi. Na onim baabi a ɛfata sɛ ɔde wɔn kɔ. Onim baabi a nwura no yɛ frɔmfrɔm, baabi a nsu pa wɔ, ne baabi a nkekaboa nni. Sɛ ɔne nguan no nam a, wɔte nka sɛ wɔwɔ ahobammɔ.—Dwom 23.

¹³ Akyinnye biara nni ho sɛ, sɛ wunya ɔkannifo a ɔte saa a, anka wopɛ! Saa pɛpɛɛpɛ na Oguanhwɛfo Pa no yɛ ma n’akyidifo bere nyinaa. Ɔhyɛ bɔ sɛ ɔbɛkyerɛ wo kwan ama woanya asetena a anigye ne abotɔyam wom nnɛ, de akosi daa! (Yohane 10:10, 11; Adiyisɛm 7:16, 17) Ɛnde, ɛsɛ sɛ yehu nea ehia sɛ yɛyɛ na ama yɛatumi adi Kristo akyi.

14, 15. Sɛ obi betumi adi Kristo akyi a, adɛn nti na ka a ɔbɛka sɛ ɔyɛ Kristoni anaa ɔpɛ Yesu asɛm kɛkɛ no nnɔɔso?

¹⁴ Ɛnnɛ, nnipa ɔpepem pii te nka sɛ, nsa a Yesu ato afrɛ wɔn no, wɔagye so, na wɔfrɛ wɔn ho Kristofo mpo. Ebia asɔre a wɔn awofo ma wɔbɔɔ wɔn asu wom bere a wɔyɛ mmofra no, ɛno ara na wɔda so kɔ. Anaa wɔka sɛ wɔdɔ Yesu, na wɔafa no sɛ wɔn kra Agyenkwa. Nanso, ɛno ara kɛkɛ ma wɔbɛyɛ Kristo akyidifo anaa? Bere a Yesu kaa sɛ yemmedi n’akyi no, saa na na ɔrepɛ akyerɛ anaa? Daabi. Kristo akyi a obi bedi no hwehwɛ sɛ ɔyɛ pii sen saa.

¹⁵ Wo de yɛmfa Kristoman, anaa aman a emufo dodow no ara ka sɛ wɔdi Kristo akyi no nyɛ nhwɛso. Wohwɛ a, Kristoman mufo de Yesu Kristo nkyerɛkyerɛ bɔ wɔn bra anaa? Nitan, nhyɛso, nsɛmmɔnedi, ne ntɛnkyea pii a yehu wɔ aman a wɔn mu dodow no ara nsom Onyankopɔn mu no, ɛnyɛ ɛno ara bi na ahyɛ Kristoman mufo mã?

16, 17. Wɔn a wɔkyerɛ sɛ wɔyɛ Kristofo no, mpɛn pii no ade baako bɛn na aka wɔn, na dɛn na ɛma nokware Kristofo da nsow?

¹⁶ Yesu kaa sɛ nea n’akyidifo anokwafo bɛyɛ no na wɔde behu wɔn, na ɛnyɛ nsɛm a wɔbɛka anaa edin a wɔbɛfa ato wɔn ho so kɛkɛ. Sɛ́ nhwɛso no, ɔkaa sɛ: “Ɛnyɛ obiara a ose me sɛ, ‘Awurade, Awurade’ no na ɔbɛkɔ ɔsoro Ahenni no mu; mmom nea ɔyɛ m’Agya a ɔwɔ soro no apɛde no, ɔno na ɔbɛkɔ mu.” (Mateo 7:21) Ɛnde adɛn nti na nnipa pii a wɔka sɛ wɔn Wura ne Yesu no nyɛ n’Agya apɛde? Wokae osikani aberante a na ɔyɛ otumfoɔ no? Wɔn a wɔka sɛ wɔyɛ Kristofo no, mpɛn pii no ɛyɛ a na wɔn nso ‘aka wɔn ade baako.’ Ɛne sɛ wɔbefi wɔn kra nyinaa mu adɔ Yesu, ne n’Agya a ɔsomaa no no.

¹⁷ Adɛn nti na aka wɔn saa ade baako no? Nnipa ɔpepem pii a wɔkyerɛ sɛ wɔyɛ Kristofo no, wɔnka sɛ wɔdɔ Kristo anaa? Wɔka saa. Nanso, ɔdɔ a obi benya ama Yesu ne Yehowa no hwehwɛ pii sen saa koraa. Yesu kaa sɛ: “Sɛ obi dɔ me a, obedi m’asɛm so.” (Yohane 14:23) Afei nso, bere a na Yesu rekasa sɛ oguanhwɛfo no, ɔkaa sɛ: “Me nguan tie me nne, na minim wɔn, na wodi m’akyi.” (Yohane 10:27) Nokwarem no, yɛn nneyɛe na yɛde kyerɛ sɛ yɛdɔ Kristo, na ɛnyɛ nsɛm a yɛde yɛn ano ka kɛkɛ anaa sɛnea yɛte nka wɔ ne ho.

18, 19. (a) Ɛsɛ sɛ Yesu ho ade a yesua no ka yɛn sɛn? (b) Adɛn nti na yɛyɛɛ nhoma yi, na wɔn a wɔbu wɔn ho sɛ wɔfi bere tenten adi Kristo akyi no, ɔkwan bɛn so na ebetumi aboa wɔn?

¹⁸ Yɛn nneyɛe na ɛma wɔhu onipa ko a yɛyɛ. Ɛma nkurɔfo hu nea ɛwɔ yɛn koma mu ankasa. Enti sɛnea yɛte wɔ yɛn mu ankasa no na ɛsɛ sɛ yɛyɛ ho adwuma. Yesu kaa sɛ: “Sɛ obi benya daa nkwa a, ɛsɛ sɛ ohu wo a woyɛ nokware Nyankopɔn koro pɛ no, na ohu Yesu Kristo a wosomaa no no nso.” (Yohane 17:3) Sɛ yesua Yesu ho ade yiye na yedwinnwen ho a, ɛbɛka yɛn koma. Ɛbɛma yɛadɔ no kɛse, na yɛn kɔn adɔ sɛ yebedi n’akyi daa.

¹⁹ Wei nti na yɛyɛɛ nhoma yi. Ɛnyɛ nhoma yi atirimpɔw ne sɛ ɛbɛbɔ Yesu asetena ne ne som adwuma nyinaa mua, na mmom ɛbɛboa yɛn ama yɛahu sɛnea yebedi n’akyi yiye.b Yɛyɛɛ nhoma yi sɛ ɛmmoa yɛn mma yɛmfa Kyerɛwnsɛm no nyɛ adwuma sɛ ahwehwɛ, na ɛmma yemmisa yɛn ho sɛ, ‘Ɛyɛ ampa sɛ meredi Yesu akyi anaa?’ (Yakobo 1:23-25) Ebia wufi bere tenten abu wo ho sɛ woyɛ oguan a woma Oguanhwɛfo Pa no kyerɛ wo kwan. Nanso wunnye ntom sɛ ehia sɛ yɛn nyinaa kɔ so yere yɛn ho sɛ yebedi n’akyi yiye? Bible ka kyerɛ yɛn sɛ: “Monkɔ so nsɔ nhwɛ sɛ mowɔ gyidi no mu anaa; monkɔ so nhwehwɛ mo mu nhwɛ sɛnea mote ankasa.” (2 Korintofo 13:5) Enti Yesu a ɔyɛ Oguanhwɛfo Pa a ɔwɔ ɔdɔ, na Yehowa ankasa apaw no sɛ yɛn Kannifo no, ehia paa sɛ yɛhwɛ hu sɛ ampa, yɛrema no akyerɛ yɛn kwan.

20. Dɛn na yebesusuw ho wɔ ti a edi hɔ no mu?

²⁰ Ɛmmra sɛ nhoma yi a wubesua no bɛma ɔdɔ a wowɔ ma Yesu ne Yehowa no ayɛ kɛse. Sɛ woma ɔdɔ a wowɔ ma Yehowa ne Yesu no kyerɛ wo kwan wɔ w’asetena mu a, ɛbɛma woanya asomdwoe ne akomatɔyam wɔ wiase dedaw yi mu, na daakye nso wubeyi Yehowa ayɛ daa sɛ wama yɛn Oguanhwɛfo Pa no. Yɛreka no saa yi, sɛ yebehu Kristo yiye a, ɛsɛ sɛ yedi kan hu nipa ko a ɔyɛ ankasa. Enti dwuma a Yesu di sɛnea ɛbɛyɛ a Yehowa atirimpɔw ma amansan yi bɛba mu no, ɛfata sɛ yɛhwehwɛ mu wɔ nhoma yi Ti 2 no mu.