¹³ Ɔkwan a ‘efi Yerusalem sian kɔ Yeriko’ no, Yesu kaa nneɛma bi faa ho a na n’atiefo nim no yiye. Sɛnea mfatoho no kyerɛ no, ɔsɔfo bi dii kan betwaa mu wɔ saa kwan no so, ɛnna afei Lewini bi nso bɛfaa hɔ, nanso wɔn mu biara annyina anhwɛ nea wapira no. (Luka 10:31, 32) Ná asɔfo no som wɔ Yerusalem asɔrefie hɔ, na na Lewifo no boa wɔn. Sɛ asɔfo ne Lewifo no nyɛ adwuma wɔ asɔrefie hɔ a, na wɔn mu pii tena Yeriko, na na efi Yerusalem rekɔ Yeriko yɛ kilomita 23 pɛ. Enti, na wɔtaa fa saa kwan no so. Afei hyɛ no nsow sɛ, Yesu kaa ɔkwantufo no ho asɛm sɛ na ‘ɔresian fi Yerusalem’ na ɛnyɛ sɛ na ɔreforo fi hɔ kɔ. Ná n’atiefo no bɛte wei ase. Efisɛ na baabi a Yerusalem da no wɔ soro sen Yeriko. Enti sɛ obi “fi Yerusalem” retu kwan a, sɛnea ɛte biara no, na ‘obesian.’b Wei ma yehu sɛ, na Yesu de nneɛma a n’atiefo no nim na na edi dwuma wɔ ne nkyerɛkyerɛ mu.