Yesu Asetra Ne Ne Som Adwuma

Nkradi Afotu

NKAE adidi no aba awiei, nanso Yesu ne n’asomafo no da so ara wɔ abansoro dan no mu. Ɛwom sɛ ɛrenkyɛ na Yesu akɔ de, nanso ɔda so ara wɔ nneɛma pii a ɔbɛka. Ɔkyekye wɔn werɛ sɛ “mommma mo koma nntutu! Munnye Onyankopɔn nni.” Nanso nea ɛkyɛn saa ho hia. Ɔde ka ho sɛ: “Me nso, munnye me nni.”

Yesu toa so sɛ: “Trabere pii wɔ m’agya ofi; . . . merekɔ makosiesie baabi mama mo . . . na nea mewɔ no, mo nso moaba hɔ. Na nea merekɔ no, munim hɔ kwan nso.” Asomafo no nte ase sɛ Yesu reka ne sorokɔ ho asɛm, enti Toma bisa sɛ: “Awurade, yennim nea worekɔ, na ɛbɛyɛ dɛn na yebetumi ahu kwan?”

Yesu bua sɛ: “Mene kwan ne nokware ne nkwa.” Yiw, ɛnam gye a obi begye no atom na wasuasua n’asetra kwan nkutoo so na ɔbɛkɔ Agya no ɔsoro fie, efisɛ sɛnea Yesu ka no: “Obi mma agya no nkyɛn, gye sɛ ɔnam me so.”

Filipo srɛ sɛ: “Awurade, kyerɛ yɛn agya no, na ɛno ara dɔɔso ma yɛn.” Ɛda adi sɛ Filipo hwehwɛ sɛ Yesu ma wonya Onyankopɔn ho adiyi bi a wɔde wɔn ani behu, te sɛ nea wɔnam anisoadehu so maa Mose, Elia, ne Yesaia nyae wɔ tete mmere mu no. Nanso, nokwarem no, asomafo no wɔ biribi a eye kyɛn anisoadehu ahorow a ɛte saa, sɛnea Yesu ka ho asɛm sɛ: “Me ne mo wɔ hɔ dabidabi yi, munhuu me anaa, Filipo? Nea wahu me no ahu agya no.”

Yesu da n’Agya nipasu adi ma edi mu araa ma tra a wɔne no bɛtra na wɔahwɛ no no te sɛ nea wohu Agya no ankasa. Nanso, Agya no korɔn kyɛn Ɔba no, sɛnea Yesu gye tom no, sɛ:

“Nsɛm a meka mekyerɛ mo no, emfi mankasa me tirim na meka.” Ɔkwan a ɛfata so no, Yesu ma ɛda adi sɛ ne nkyerɛkyerɛ no fi ne soro Agya no nkyɛn.

Hwɛ sɛnea ɛyɛ nkuranhyɛ ma asomafo no, sɛ afei wɔte sɛ Yesu ka kyerɛ wɔn sɛ: “Nea ogye me di no, nnwuma a meyɛ no, ɔno nso bɛyɛ, na ɔbɛyɛ akɛse asen eyinom”! Na Yesu nkyerɛ sɛ n’akyidifo no de anwonwadeyɛ tumi ahorow bedi dwuma asen sɛnea ɔyɛe no. Dabi, mmom na ɔkyerɛ sɛ wɔbɛyɛ ɔsom adwuma no bere tenten, akɔ akyirikyiri, na wɔakɔ nnipa pii nkyɛn asen ɔno.

Yesu rennyaw n’asuafo no wɔ ne kɔ akyi. Ɔhyɛ wɔn bɔ sɛ: “Biribiara a mobɛsrɛ me din mu no, ɛno na mɛyɛ.” Bio nso, ɔka sɛ: “Mebisa agya no, na wama mo okyigyinafo foforo, na ɔne mo abɛtra daa, nokware honhom no.” Akyiri yi, ne sorokɔ akyi no, Yesu hwie honhom kronkron, a ɛne saa okyigyinafo foforo no, gu n’asuafo no so.

Yesu kɔ abɛn, sɛnea ɔka sɛ: “Aka kakraa na wiase nhu me bio.” Yesu bɛyɛ honhom abɔde a onipa biara rentumi nhu no. Nanso, Yesu hyɛ n’asomafo anokwafo no bɔ bio sɛ: ‘Mubehu me, efisɛ mete ase, na mo nso mobɛtra ase.’ Yiw, ɛnyɛ sɛ Yesu beyi ne ho adi akyerɛ wɔn sɛ onipa, ne sɔre akyi nko, na mmom wɔ bere a ɛfata mu no, obenyan wɔn aba nkwa mu ma wɔne no akɔtra soro sɛ honhom abɔde.

Afei, Yesu ka mmara tiawa yi ho asɛm sɛ: “Nea ɔwɔ m’ahyɛde na odi so no, ɔno ne nea ɔdɔ me; na nea ɔdɔ me no, m’agya bɛdɔ no, na me nso mɛdɔ no, na mayi me ho makyerɛ no.”

Ɛno na ɔsomafo Yuda, nea wɔfrɛ no Tadeo nso no bisa no sɛ: “Awurade, ɛyɛɛ dɛn na worebeyi wo ho akyerɛ yɛn, na ɛnyɛ wiase?”

Yesu bua sɛ: “Sɛ obi dɔ me a, obedi m’asɛm so, na m’agya bɛdɔ no, . . . Nea ɔnnɔ me no nni me nsɛm so.” Wiasefo nte sɛ Yesu akyidifo a wɔyɛ osetie no, na wobu wɔn ani gu Kristo nkyerɛkyerɛ so. Enti, onnyi ne ho adi nnkyerɛ wɔn.

Yesu akyerɛ n’asomafo no nneɛma pii wɔ n’asase so ɔsom adwuma mu. Wɔbɛyɛ dɛn akae ne nyinaa, ne titiriw no, esiane sɛ besi saa bere yi mpo no, na wɔnte nneɛma pii ase nti? Nea ɛyɛ anigye no, Yesu hyɛ bɔ sɛ: “Na okyigyinafo a ɔne honhom kronkron a m’agya bɛsoma no me din mu no, ɔno na ɔbɛkyerɛ mo nneɛma nyinaa, na ɔbɛkae mo nea maka mo nyinaa.”

Yesu kyekye wɔn werɛ bio, na ɔka sɛ: “Asomdwoe na mede migyaw mo, m’asomdwoe na mede mema mo; . . . Mommma mo koma nntutu, nanso mommma ɛmmpere mo!” Ɛwom, Yesu rekɔ, nanso ɔkyerɛkyerɛ mu sɛ: “Sɛ modɔ me a, anka mo ani begye sɛ merekɔ agya no nkyɛn, efisɛ m’agya no yɛ kɛse sen me.”

Yesu bere a aka a ɔne wɔn bɛtra ase no yɛ tiaa. Ɔka sɛ: “Me ne mo renkasa pii bio; na wi yi ase sodifo no reba, nanso ɔrennya me hɔ hwee.” Satan Ɔbonsam, nea otumi hyɛn Yuda mu, nyaa ne so tumi no, ne wiase no sodifo. Nanso, bɔne mmerɛwyɛ biara nni Yesu mu a Satan betumi de adi dwuma ma wadan no afi Onyankopɔn som ho. Yohane 14:1-31; 13:27; Luka 22:3, 4; Exodus 24:10; 1 Ahene 19:1-13; Yesaia 6:1-5.

▪ Ɛhe na Yesu rekɔ, na mmuae bɛn na ɔma Toma wɔ ɔkwan a wɔfa so kɔ hɔ no ho?

▪ Ɛda adi sɛ dɛn na Filipo nam n’asemmisa no so pɛ sɛ Yesu de ma?

▪ Dɛn nti nea wahu Yesu no ahu Agya no nso?

▪ Ɔkwan bɛn so na Yesu akyidifo yɛ nnwuma akɛse sen nea ɔyɛe no?

▪ Ntease bɛn mu na Satan nni Yesu so tumi biara?