Nea Enti a Wɔwo Ebinom Foforo

“WƆANWO obi foforo a, ɔrentumi nhu Nyankopɔn ahenni no.” (Yohane 3:3) Saa nsɛm a Yesu Kristo kaa bɛboro mfe 1,900 a atwam ni no ama nnipa pii anya anigye na wɔn ho adwiriw wɔn.

Sɛ yɛbɛte Yesu asɛm a ɔka faa obi a wɔwo no foforo ho no ase yiye a, ɛsɛ sɛ yedi kan bua nsemmisa yi: Dɛn ne Onyankopɔn atirimpɔw ma adesamma? Dɛn na ɛba ɔkra no so wɔ owu mu? Dɛn na Onyankopɔn Ahenni no bɛyɛ?

Onyankopɔn Atirimpɔw ma Adesamma

Wɔbɔɔ onipa a odi kan, Adam, sɛ Onyankopɔn ba a ɔyɛ onipa a ɔyɛ pɛ. (Luka 3:38) Ná ɛnyɛ Onyankopɔn pɛ da sɛ ɛsɛ sɛ Adam wu. Ná Adam ne ne yere Hawa wɔ anidaso a ɛne sɛ wɔbɛwo adesamma abusua a wonni bɔne a wobɛtra ase daa na wɔahyɛ paradise asase so ma. (Genesis 1:28) Ná owu nka Onyankopɔn mfitiase atirimpɔw ma ɔbarima ne ɔbea no ho. Atuatew a etiaa ɔsoro mmara nkutoo nti na ɛbaa onipa asetra mu.​—Genesis 2:15-17; 3:17-19.

Atuatew yi maa abrabɔ fam nsɛmpɔw akɛse, te sɛ teɛ a Onyankopɔn tumidi teɛ ne tumi a adesamma betumi akɔ so adi ne mmara ahorow so no sɔree. Ná wobehia bere na wɔadi nsɛmpɔw yi ho dwuma. Nanso Yehowa Nyankopɔn atirimpɔw ma adesamma ansakra, na ontumi nni nkogu wɔ nea waka sɛ ɔbɛyɛ mu. Nea ɔpɛ nyinaa ne sɛ ɔde adesamma abusua a wɔyɛ pɛ a wobenya daa nkwa wɔ Paradise bɛhyɛ asase no so ma. (Dwom 37:29; 104:5; Yesaia 45:18; Luka 23:43) Ɛsɛ sɛ yɛma nokware titiriw yi tra yɛn adwenem bere a yesusuw nsɛm a Yesu ka faa obi a wɔwo no foforo ho ho no.

Dɛn na Ɛba Ɔkra no so wɔ Owu Mu?

Esiane sɛ na Helafo nyansapɛfo nnim nea na Onyankopɔn honhom kronkron ada no adi akyerɛ Bible akyerɛwfo nti, wɔbɔɔ mmɔden sɛ wobehu nea asetra kyerɛ. Wɔannye anni sɛ wɔbɔɔ onipa sɛ ɔntra ase mfe kakraa bi, mpɛn pii no wɔ awerɛhow tebea horow mu, na afei wawu afi asetra mu kɛkɛ. Eyi fam no, na nea wogye di no yɛ nokware. Nanso na adwene a wokura wɔ anidaso a onipa wɔ wɔ owu akyi ho no nteɛ. Wɔde baa awiei sɛ onipa kɔɔ so traa ase sɛ biribi foforo wɔ ne wu akyi, na ɔkra a enwu da bi hyɛ obiara mu.

Saa adwenhorow no nyaa Yudafo ne wɔn a wose wɔyɛ Kristofo no so nkɛntɛnso. Nhoma Heaven​—A History ka sɛ: “Baabiara a Yudafo a wɔtete nkurɔfo aman so hyiaa Helafo nhomanimfo no, ɔkra a enwu da ho adwene sɔree.” Nhoma no de ka ho sɛ: “Helafo nkyerɛkyerɛ a ɛfa ɔkra no ho nyaa Yudafo, ne awiei koraa no, Kristofo gyidi horow so tumi bere nyinaa. . . . Philo [afeha a edi kan no mu Yudani nyansapɛfo a ofi Alexandria] no nam Plato nyansapɛ ne Bible mu atetesɛm a ɔde frae wɔ ɔkwan soronko so no so bɔɔ kwan maa Kristofo nyansapɛfo a wɔbaa akyiri yi no.”

Ná dɛn na Philo gye di? Nhoma koro no ara toa so sɛ: “Wɔ ne fam no, owu ma ɔkra no san kɔ ne kan tebea a na ɔwom ansa na wɔrewo no no mu. Esiane sɛ ɔkra no fi ahonhom wiase no mu nti, nipadua no mu asetra dan bere tiaa mu asetra a ɛtaa yɛ awerɛhow.” Nanso na Adam nni ‘kan tebea biara mu ansa na wɔrewo no.’ Sɛnea Bible kyerɛwtohɔ no kyerɛ no, Onyankopɔn anyɛ trabea foforo bi a wɔkɔ hɔ mpofirim wɔ owu mu, te sɛ nea asase no yɛ baabi a wosiesie wɔn ho ma asetra a ɛkorɔn anaa nea ɛba fam ho nhyehyɛe da.

Wɔnkyerɛkyerɛ gyidi a ese onipa kra no nwu da no wɔ Onyankopɔn Asɛm Bible a wɔnam honhom so kyerɛwee no mu. Ɛmfa asɛm “ɔkra a enwu da” no nni dwuma pɛnkoro mpo. Ɛka sɛ wɔbɔɔ Adam sɛ ɔkra, na ɛnyɛ sɛ wɔbɔɔ ɔkra kaa ne ho. Genesis 2:7 se: “Na [Yehowa] Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo.” Wɔamfa daa nkwa wɔ ɔsoro anaa hell-gya mu daa ayayade ho anidaso amma adesamma da. Bible no kyerɛ sɛ ɔkra, anaa onipa a owu no nnim hwee. (Dwom 146:3, 4; Ɔsɛnkafo 9:5, 10; Hesekiel 18:4) Enti, nyansapɛfo akura ɔkra no ho adwenhorow a enni Kyerɛwnsɛm mu no mu. Ehia sɛ yɛhwɛ yiye wɔ nnaadaa nsusuwii a ebetumi asɛe ntease a yɛwɔ wɔ nsɛm a Yesu ka faa obi a wɔwo no foforo ho no mu.

Wɔwo Wɔn Foforo ma Wɔadi Tumi sɛ Ahene

Yesu ka kyerɛɛ Nikodemo sɛ wɔn a ‘wɔwo wɔn foforo no hyɛn Onyankopɔn Ahenni mu.’ (Yohane 3:3-5) Saa Ahenni no yɛ dɛn? Wɔ sɛnkyerɛnne kwan so kasa mu wɔ adesamma abakɔsɛm mfiase no, Yehowa Nyankopɔn kaa ne tirim a na wabɔ sɛ ɔde ‘aseni’ titiriw bi​—sodifo bi a ɔreba​—bɛpɛtɛw Ɔwɔ dedaw no, Satan Ɔbonsam ti ho asɛm. (Genesis 3:15; Adiyisɛm 12:9) Sɛnea wɔakɔ so ada no adi nkakrankakra wɔ Kyerɛwnsɛm no mu no, wɔahu ‘aseni’ yi sɛ ɔne Yesu Kristo a ɔne ne yɔnko sodifo di tumi de da Onyankopɔn tumidi, Mesia Ahenni, no adi wɔ ɔkwan a ɛda nsow so no. (Dwom 2:8, 9; Yesaia 9:6, 7; Daniel 2:44; 7:13, 14) Eyi ne ɔsoro Ahenni no, nniso a ɛwɔ soro a ebebu Yehowa tumidi bem na agye adesamma afi bɔne ne owu nkoasom mu no.​—Mateo 6:9, 10.

Wɔn a wɔka Yesu ho sɛ yɔnko sodifo no ne 144,000 a wɔatɔ wɔn afi adesamma mu no. (Adiyisɛm 5:9, 10; 14:1-4) Onyankopɔn apaw ebinom afi Adam adesamma abusua a wɔnyɛ pɛ no mu sɛ wɔmmɛyɛ “Ɔsorosoroni no akronkronfo” a wɔne Kristo di ahene wɔ Mesia Ahenni no mu. (Daniel 7:27; 1 Korintofo 6:2; Adiyisɛm 3:21; 20:6) Saa mmarima ne mmea yi nya Yesu Kristo a ɔkae sɛ ‘wɔbɛwo wɔn foforo’ no mu gyidi. (Yohane 3:5-7) Ɔkwan bɛn so na dɛn nti na wɔwo wɔn foforo?

Wɔabɔ nnipa yi asu wɔ nsu mu sɛ Kristo akyidifo. Onyankopɔn agyina Yesu agyede afɔrebɔ no so de wɔn bɔne afiri wɔn, abu wɔn atreneefo, na wɔagye wɔn atom sɛ honhom mu mma. (Romafo 3:23-26; 5:12-21; Kolosefo 1:13, 14) Ɔsomafo Paulo ka kyerɛ saafo no sɛ: “Moanya abagye honhom a ɛno mu na yɛteɛm ka sɛ: Abba, Agya! Honhom no ara ne yɛn honhom di adanse sɛ yɛyɛ Onyankopɔn mma. Na yɛyɛ mma a, yɛyɛ adedifo nso, Onyankopɔn adedifo ne Kristo yɔnko difo, nanso gye sɛ yɛne no hu amane ansa na wɔahyɛ yɛn ne no anuonyam bi.”​—Romafo 8:15-17.

Sɛ́ Kristo akyidifo no, eyinom anya awo foforo, anaa nhyɛase foforo wɔ asetra mu. Ama wɔagye adi sɛ wɔne Yesu bɛkyɛ ne soro apɛgyade. (Luka 12:32; 22:28-30; 1 Petro 1:23) Ɔsomafo Petro kaa awo foforo no ho asɛm sɛɛ se: “[Onyankopɔn] mmɔborohunu a ɛdɔɔso nti ɔnam Yesu Kristo sɔre a ofi awufo mu sɔree no so awo yɛn foforo akɔ anidaso a emu wɔ nkwa mu, ɛne apɛgyade a ɛmporɔw, na ɛho nni dɛm, na ɛmpo mu a wɔde asie ɔsoro ama mo.” (1 Petro 1:3, 4) Saafo yi tumi nya asetra foforo yi wɔ soro efisɛ Onyankopɔn nyan wɔn fi owu mu sɛnea onyanee Yesu no.​—1 Korintofo 15:42-49.

Asase no Nso Ɛ?

Eyi nkyerɛ sɛ awiei koraa no wɔbɛwo adesamma asoɔmmerɛfo nyinaa foforo ma wɔafi asase so akɔ soro. Saa adwene a ɛnteɛ no te sɛ nea na nyansapɛfo te sɛ Philo a osusuwii sɛ “nipadua no mu asetra [yɛ] bere tiaa mu asetra a ɛtaa yɛ awerehow” kura no. Nanso na mfomso biara nni Yehowa Nyankopɔn asase so mfitiase abɔde no ho.​—Genesis 1:31; Deuteronomium 32:4.

Wɔankyerɛ sɛ onipa asetra nyɛ tiawa a ɛyaw wom da. Yesu Kristo ne wɔn a wɔawo wɔn foforo sɛ wɔne no nsom sɛ ahene ne asɔfo wɔ soro no beyi nneɛma a epira adesamma a Satan atuatew no de bae no nyinaa afi hɔ. (Efesofo 1:8-10) Wɔnam wɔn sɛ “Abraham asefo” a wɔahyɛ wɔn ho bɔ no so ‘behyira asase so aman nyinaa.’ (Galatifo 3:29; Genesis 22:18) Eyi bɛkyerɛ asetra wɔ paradise asase so a ɛnte sɛ nnɛ asetra tiaa a ɛyaw wom no koraa ama adesamma asoɔmmerɛfo.​—Dwom 37:11, 29; Adiyisɛm 21:1-4.

Henanom na Wobenya mu Mfaso?

Wɔn a wobenya Onyankopɔn nsiesiei a ɔnam so hyira adesamma no mu mfaso no mu binom ne awufo a wonyan wɔn a wɔkyerɛ Yesu agyede afɔrebɔ mu gyidi no. (Yohane 5:28, 29; Asomafo no Nnwuma 24:15) Wɔn mu fã kɛse no ara nsuaa Onyankopɔn ne Kristo ho ade da, ma enti wɔantumi ankyerɛ Yesu mu gyidi. Wɔn a wobenyan wɔn no mu bi nso ne nnipa anokwafo te sɛ Osuboni Yohane a owui ansa na Yesu wu rebue kwan ama ɔsoro asetra no. (Mateo 11:11) Wɔ eyinom akyi no, ‘nnipakuw kɛse a wofi aman nyinaa mu ahoro wɔn ntade ama ahoa Oguammaa no,’ Yesu Kristo, ‘mogya mu.’ Wogye Ahenni asɛnka adwuma a Yesu “nuanom” a wɔawo wɔn foforo di anim mprempren no tom, na wobenya nkwa wɔ Onyankopɔn Harmagedon ko no mu akɔtra asase a wɔatew so so. (Adiyisɛm 7:9-14; 16:14-16; Mateo 24:14; 25:31-46) Enti, wɔ Onyankopɔn nhyehyɛe mu no, wobegye ɔpepem pii nkwa, ɛwom sɛ wɔnwoo wɔn foforo sɛ wɔne Kristo nni ahene wɔ soro de.​—1 Yohane 2:1, 2.

So wobɛka wɔn a wonya nkwa wɔ paradise asase so no ho? Wubetumi ayɛ wɔn mu biako sɛ wokyerɛ Yesu Kristo afɔrebɔ no mu gyidi na wode wo ho bɔ nokware Kristofo asafo no nnam so a. Nyansapɛ ahorow nsɛee no, na mmom akɔ so ayɛ “nokware dum ne nnyinaso.” (1 Timoteo 3:15; fa toto Yohane 4:24; 8:31, 32 ho.) Afei wubetumi ahwɛ daakye a eye anigye bi kwan bere a Onyankopɔn mma a wɔawo wɔn foforo redi hene wɔ soro na wɔasan ama Onyankopɔn asase so mma nyinaa ayɛ pɛ wɔ paradise asase a anigye wɔ so so no. Enti so hokwan a woanya a ɛbɛma woanya nkwa wɔ saa wiase foforo a daa nhyira horow wom no mu.​—Romafo 8:19-21; 2 Petro 3:13.

[Mfonini wɔ kratafa 6]

Wɔanka ankyerɛ Adam da sɛ ɔbɛkɔ soro anaa wɔbɛyɛ no ayayade daa wɔ hell-gya mu