Nsemmisa a Efi Akenkanfo Hɔ

◼ Yohane 18:15 ka osuani bi a ɔsɔfo panyin no nim no ho asɛm. So ɔno ara ne osuani a ɔde “adagyaw” guanee, sɛnea wɔaka ho asɛm wɔ Marko 14:51, 52 no?

Dabi, ɛte sɛ nea onii a na ɔsɔfo no nim no no ne ɔsomafo Yohane, na Marko ne osuani a ɔde “adagyaw” guanee no.

Sɛ yɛfa bere a nsɛm yi sisii no nnidiso nnidiso a, yefi ase wɔ Getsemane turom. Ehu kaa asomafo no bere a wɔkyeree Yesu Kristo no. “Wɔn nyinaa gyaw no guanee.” Marko kyerɛwtohɔ no mu no, nkyekyem a edi hɔ no da nea ɛne eyi bɔ abira adi: “Na aberante bi a ofura nwera de akata n’adagyaw so dii wɔn akyi; na wɔkyeree no; na ogyaw nwera no fii wɔn nsa de adagyaw guanee.”​—Marko 14:50-52.

Ɔkwan yi so no, wɔde sɛnea asomafo 11 no yɛɛ wɔn ade no toto sɛnea Osuani a wɔammɔ ne din yi yɛɛ n’ade ho, enti ntease wom sɛ yebesusuw sɛ na ɔnyɛ asomafo no mu biako. Asɛmpa a Yohane a wɔfrɛ no Marko, a ɔyɛ Barnaba nua no kyerɛw no nkutoo na ɛbɔ asɛm a esii yi ho amanneɛ. Enti, yɛwɔ nea yebetumi agyina so aka sɛ na Marko ne “aberante bi” a ofii ase dii Yesu a wɔkyeree no no akyi, nanso oguan gyaw ne ntama a ɛkata ne ho bere a nnipakuw no bɔɔ mmɔden sɛ wɔbɛkyere ɔno nso no​—Asomafo no Nnwuma 4:36; 12:12, 25; Kolosefo 4:10.

Bere bi mu wɔ saa anadwo no ara mu no, ɔsomafo Petro nso dii Yesu akyi wɔ akyirikyiri. Ɔkwan yi so no, nsɛdi kakraa bi wɔ eyi mu; osuani kumaa (Marko) fii ase dii Yesu akyi, nanso ɔsanee, na akyiri no, asomafo a woguanee no baanu fii ase dii wɔn Wura a wɔakyere no no akyi. Yɛkenkan wɔ ɔsomafo Yohane Asɛmpa no mu sɛ: “Na Simon Petro ne osuani biako bi dii Yesu akyi; nso ɔsɔfo panyin no nim osuani no, na ɔne Yesu hyɛn ɔsɔfo panyin aban mu hɔ.”​—Yohane 18:15.

Ɔsomafo Yohane de edin “Yohane” di dwuma ma Yohane Suboni no nanso ɔmfa ɔno ankasa din nka ne ho asɛm da. Sɛ nhwɛso no, ɔkyerɛw “osuani a odi eyinom ho adanse na ɔkyerɛw eyinom no” ho asɛm. Ɔkyerɛw nso sɛ: “Na nea ohui no adi adanse, na n’adanse no yɛ nokware, na ɔno de, onim sɛ ɔka nokware.” (Yohane 19:35; 21:24) Hyɛ Yohane 13:23 nso nsow: “Na asuafo no mu biako a Yesu dɔ no tweri Yesu kokom.” Na ɛno yɛ bere tiaa bi ansa na wɔrekyere Yesu. Akyiri yi, ɛda no ara mu no, Yesu a na wɔabɔ no asɛndua mu no pawee osuani biako, a Yohane ka no ho asɛm ɔkwan koro no ara so sɛ: “Na Yesu huu ne na ne osuani a ɔdɔ no no sɛ ɔne no gyina hɔ no, [Yesu] see ne na sɛ: Ɔbea, hwɛ wo ba ni!”​—Yohane 19:26, 27; fa toto Yohane 21:7, 20 ho.

Su koro yi ara a ɛne n’ankasa din a ɔmmɔ no da adi wɔ Yohane 18:15. Bio nso, wɔka Yohane ne Petro ho asɛm bom wɔ Yesu wusɔre akyi ho kyerɛwtohɔ a ɛwɔ Yohane 20:2-8 no mu. Eyinom ma yehu sɛ na ɔsomafo Yohane ne ‘osuani a ɔsɔfo panyin no nim no no.’ Bible no nkyerɛkyerɛ nea ɛyɛe a ɔsomafo a ofi Galilea (Yohane) bɛyɛɛ nea onim ɔsɔfo panyin no na ɔsɔfo panyin no nso nim no. Nanso nim a ɔsɔfo panyin no fifo nim no no maa Yohane tumi twaa ɔpon ano hwɛfo no ho kɔɔ aban no mu, na ɔmaa Petro nso nyaa kwan hyɛn mu.