Adwuma A Ebetumi Ama Wani Agye

ANTONIO a ɔwɔ Genoa, Italy, no se: “M’ani gyee m’adwuma sɛ nhoma tintimfo no ho kɛse ankasa, Na m’akatua ye, na eyi ma mede nnɔnhwerew pii yɛɛ adwuma bere a wɔapɔn no akyi. Mfe kakraa bi ntam no, ɛmfa ho sɛ na minnyinii biara no, meyɛe m’adwumawura no boafo a otumi de ne ho to no so sen biara.” Ɛte sɛ nea na wanya nea pii yɛ adwumaden de hwehwɛ no: ahonya, dibea, ne adwuma a ɛma onni adagyew a n’ani gye ho.

So na Antonio ‘rehu adepa ne brɛ nyinaa mu’? (Ɔsɛnkafo 3:13) Na so na adwuma a ɛte saa no ma n’ani gye? Ɔtoa so sɛ: “Esiane nhyɛso a yɛn asetra kwan a kitikitiyɛ wom no de bae nti, yefii ase hyiaa nsɛnnennen sɛ abusua. Eyi amma yɛn ani annye.” Antonio anaa ne yere mu biara ani annye a wɔn nnwuma a eye no mfa ho. Na wo nso ɛ? So ‘wurehu adepa wo brɛ nyinaa mu’? So w’adwuma rema woanya anigye ankasa?

So Ɛyɛ Botae Pa?

Ade titiriw a enti wɔyɛ adwumaden ne sɛ wobenya asetrade. Wɔ aman bi mu no, ɛsɛ sɛ nkurɔfo de nnɔnhwerew pii yɛ adwuma sɛnea ɛbɛyɛ a wobetumi atra ase kɛkɛ. Ebinom yɛ adwuma awia ne anadwo sɛnea ɛbɛyɛ a wɔn mma benya asetra pa. Afoforo nso wɔ hɔ a wokum wɔn ho yɛ adwuma de boaboa ahonyade ano.

Ná Leonida a ɔwɔ Phillipines no yɛ nnwuma abien. Ná ɔyɛ adwuma wɔ sikakorabea bi mu awia na na ɔkyerɛ ade wɔ kɔlege bi mu nnɔnhwerew abiɛsa anaa anan anwummere. So na sika a onya ka ho no fata? Ɔkyerɛkyerɛ mu sɛ: “Ná mehwɛ dɔn no bere nyinaa. M’ani hawee. Ná meyɛ a minnya akomatɔyam biara.”

Dabi, sika a wɔyɛ adwuma hwehwɛ no mfa akomatɔyam ne anigye mma. Ɔhene nyansafo Salomo tu fo sɛ: “Mmiri wo mogya ani mpɛ ahonyade, na ahonyade fuw ntaban tu sɛ ɔkɔre a otu kɔ soro.” (Mmebusɛm 23:4, 5) Wɔbɔ amanneɛ sɛ akɔre bi tumi tu akwansin 80 dɔnhwerew biara. Eyi kyerɛkyerɛ sɛnea sika a wɔayɛ adwumaden anya no betumi atu akɔ no mu yiye. Sɛ obi boaboa ahonyade ano mpo a, sɛ owu a ɔrentumi mfa hwee nkɔ.​—Ɔsɛnkafo 5:15; Luka 12:13-21.

Asetrade a wɔhwehwɛ mu a obi de ne ho bɛhyɛ kɛse no yɛ asiane kɛse. Ebetumi akowie sika ho dɔ mu. Wɔ afeha a edi kan no mu no, na nyamesomfo bi wɔ hɔ a na wɔfrɛ wɔn Farisifo a na wonim wɔn sɛ wɔdɔ sika yiye. (Luka 16:14) Sɛ́ obi a na anka ɔyɛ Farisini no, na Kristoni ɔsomafo Paulo nim wɔn asetra kwan no yiye. (Filipifo 3:5) Paulo bɔ kɔkɔ sɛ: “Wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma onipa na ɛtwe wɔn kogu ɔsɛe ne ɔyera mu mu. Na bɔne nyinaa ntini ne sika ho dɔ, na ɛdenam saa ɔdɔ yi a ebinom hwehwɛe so no, . . . wɔde yaw pii wowɔɔ wɔn ho.” (1 Timoteo 6:9, 10, New World Translation) Yiw, “sika ho dɔ,” sɛ wobɛyɛ biribiara de anya no, betumi asɛe obi asetra. Ɔkwan a ɛte saa no mfa anigye mma.

Wɔ ebinom fam no, nea enti a wɔyere wɔn ho no ne sɛ wobenya adwumam panyin. Nanso, awiei koraa no wobehu nokwasɛm ankasa no. Fortune nsɛmma nhoma no se: “Wɔn a wɔde nneɛma ahorow bobɔɔ afɔre horow wɔ wɔn mfe 20 mu ne 30 mfiase hɔ sɛnea ɛbɛyɛ a wobenya mpanyin dibea horow no rehu nokwasɛm a enye nanso wontumi nkwati no sɛ wɔ adwumadenyɛ pii akyi no, ɛnyɛ obiara na obetumi anya mpanyin dibea. Bere a wɔn ho a wɔyeree no ama wohinhim so no, wɔreyɛ abisa nea ne nyinaa kyerɛ. Dɛn nti na ɛsɛ sɛ woko dennen saa? Hena na ɛfa ne ho?”

Ná obi a ɔte saa, Mizumori, asetra nyinaa gyina wiase mu nkɔso a obenya no so. Bere a odii mpanyin dibea adwuma akyi wɔ Japan sikakorabea akɛse no mu biako mu no, wannya bere amma n’abusua. Bere a wayɛ adwuma dennen bɛboro mfe 30 akyi no, n’akwahosan sɛee, na ɛda adi sɛ na onni anigye. Ose: “Mihui sɛ dibea ho akansi a ɛwɔ nnipa a wɔpɛ sɛ wɔyɛ atitiriw mu no yɛ ‘ahuhude ne ɔdadwen hunu.’​—Ɔsɛnkafo 4:4.

Nanso wɔn a wɔte sɛ Antonio, a wɔn ani gye wɔn adwuma ho no nso ɛ? Bere a Antonio adwuma no agye n’adwene nyinaa no, ɔde n’abusua asetra bɔɔ afɔre maa adwumayɛ. Afoforo de wɔn akwahosan ne wɔn nkwa mpo bɔ afɔre, sɛnea Japanfo adwuma mu mpanyimfo atitiriw a wɔyɛ adwumaden tra so no pii ɔpatuwu da no adi no. Wɔn a wɔawu agyaw wɔn no afotu dwumadibea bi nyaa telefon so ɔfrɛ 135 da koro pɛ a na ɛyɛ nwonwa.

Afoforo nso de wɔn asetra nyinaa boa afoforo. Yesu hyɛɛ saa honhom yi ho nkuran. (Mateo 7:12; Yohane 15:13) Adwuma pa a wobɛyɛ a wunni adagyew na woaboa afoforo no de anigye ba ampa.​—Mmebusɛm 11:25.

Nanso, adwumadenyɛ a efi adwempa mu saa no nyɛ nea asiane nni mu. Sɛ nhwɛso no, Yuda hene Usia de ne ho hyɛɛ ɔman adwuma kɛse a ɛne mmura a na obetutu wɔ sare so mu. Ɛbɛyɛ sɛ na Usia wɔ ɔman no yiyedi wɔ n’adwenem esiane sɛ “ɔhwehwɛɛ [Yehowa]” saa bere no na ɛda adi sɛ otiee ɔsoro ahyɛde a ɛne sɛ ahene no nnyɛ pɛsɛmenkominya no nti. (2 Beresosɛm 26:5, 10; Deuteronomium 17:14-20) Eyi maa n’asraafo nkonimdi yɛɛ kɛse, na “ne din hyetae kɔɔ akyirikyiri pa.” Nanso bere a ɔyɛɛ kɛse no, ɔhomanee, na ɛma ɔhwee ase. (2 Beresosɛm 26:15-20; Mmebusɛm 16:18) Obi a watu ne ho reboa afoforo nanso n’ankasa anuonyam a obenya na ɛkanyan no no nso betumi ahwe ase. Ɛnde, dɛn nti na ɛsɛ sɛ obi pɛ sɛ ɔyɛ adwumaden?

Wɔyɛɛ Onipa sɛ Ɔnyɛ Adwuma

Yebetumi asua adwuma ho nsɛm pii afi obi a ɔyɛɛ nnepa pii sen obiara a watra ase pɛn no nkyɛn. Ɔne Yesu Kristo. (Mateo 20:28; Yohane 21:25) Bere a na ɔrewu wɔ amanehunu dua so no, ɔteɛɛm sɛ: “Wɔawie!” (Yohane 19:30) Ná ne mfe 33 1/2 no yɛ nea akomatɔyam wom.

Yesu asetra boa yɛn ma yebua asemmisa “Adwuma bɛn na ɛbɛma w’ani agye?” no. Ɛyɛ ne soro Agya no apɛde a ɔyɛe no na ɛma onyaa anigye a ebiara ne no nsɛ. Saa ara nso na yɛn Bɔfo no apɛde a yɛbɛyɛ no betumi ama yɛate nka sɛ yɛayɛ biribi na ama yɛn ani agye. Dɛn ntia? Efisɛ Onim yɛn su ne yɛn ahiade ahorow kɛse sen sɛnea yenim.

Bere a Onyankopɔn bɔɔ onipa a odi kan, Adam no, ɔmaa no adwuma a ɔde ne nsa ne n’adwene nyinaa bɛyɛ. (Genesis 2:15, 19) Esiane sɛ na Adam ‘bedi’ asase so abɔde afoforo nyinaa so nti, na ɔwɔ adwuma a ɛne nneɛma sohwɛ nso. (Genesis 1:28) Bere tenten a na Adam bedi saa nhyehyɛe yi so no, na n’adwuma no bɛyɛ nea edi mũ na ɛfata. Ná dwumadi ketewaa biara bɛkyerɛ hokwan foforo a ɔde bɛsɔ Ɔsorosoroni no ani.

Nanso, eyi ankɔ so anyɛ saa amma Adam. Osii gyinae sɛ ɔbɛtew ne ho afi Onyankopɔn nhyehyɛe ho. Adam ani annye ho sɛ ɔbɛyɛ Onyankopɔn apɛde bio na mmom ɔpɛe sɛ ɔyɛ nea ɔpɛ. Ɔyɛɛ bɔne tiaa Ɔbɔadeɛ no. Nea efii ne gyinaesi no mu bae ne sɛ Adam ne ne yere, ne wɔn asefo nyinaa ‘bɛhyɛɛ ade hunu ase.’ (Romafo 5:12; 8:20) Sɛ́ anka adwuma de anigye bɛba mmom no, ɛbɛyɛɛ ɔhaw. Ná saa nsɛm yi ka nea Onyankopɔn de buu Adam ntɛn no ho: “Wo nti wɔadome asase. Ɛyaw mu na wubedidi so, wo nkwa nna nyinaa, na nsɔe ne nnɛnkyɛnse na ebefifi ama wo, na woadi afuw so ahaban. W’anim fifiri mu na wubedidi de akosi sɛ wobɛsan akɔ dɔte mu.” (Genesis 3:17-19) Afei de, adwuma a na nidi wɔ ho, kyerɛ sɛ na ne botae ne sɛ ɛbɛsɔ onipa Bɔfo no ani no bɛyɛɛ ɔbrɛ a ɛyaw wom a ɔde benya n’ano aduan kɛkɛ. Dɛn na yebetumi agyina nokwasɛm ahorow yi so aka? Eyi: Sɛ yɛde yɛn asetra si ɔsoro apɛde a yɛbɛyɛ so nkutoo a na adwumadenyɛ de akomatɔyam ne anigye a ɛtra hɔ daa ba.

‘Adepa a Wubehu’ wɔ Onyankopɔn Apɛdeyɛ Mu

Ná ɔsoro apɛde no a Yesu bɛyɛ no te sɛ aduan ma no​—ade a ɛsɛ sɛ n’ani gye ho na ɛwowaw ne honhom fam asetra. (Yohane 4:34) Ɔkwan bɛn so na adwuma mu anigye a ɛte saa no betumi ayɛ wo de?

Ɛsɛ sɛ wuhu “nea [Yehowa] pɛ” a ɛwɔ hɔ ma wo no. (Efesofo 5:17) Ne pɛ ne sɛ wɔbɛsan de adesamma aba “Onyankopɔn mma anuonyam adehyedi mu.” (Romafo 8:21; 2 Petro 3:9) Wiase nyinaa anoboaboa adwuma a wɔde reyɛ eyi no rekɔ so mprempren. Wo nso wubetumi anya saa adwuma a ɛma akomatɔyam kɛse yi mu kyɛfa. Ɛda adi yiye sɛ saa adwuma no bɛma w’ani agye.

Akyiri yi, Antonio a yɛbɔɔ ne din mfiase no nyaa akomatɔyam ne anigye. Bere a ɔne ne yere de wɔn honam fam nnwuma “hunu” no dii kan wɔn asetra mu na wɔde wɔn ho hyɛɛ mu kɛse no, ɛsɛee wɔn honhom fam asetra. Saa bere no na wofii ase hyiaa ofie nsɛnnennen no. Bere a ne yere no huu tebea no, osii gyinae sɛ obegyae n’adwuma no na ofii ase ‘yeree ne ho dennen’ de ne bere nyinaa yɛɛ Onyankopɔn Ahenni ho asɛnka adwuma no.​—Luka 13:24, New World Translation.

Antonio se: “Yehuu nsakrae kɛse ntɛm ara. Yɛnkasakasa daa bio. Asomdwoe asan aba yɛn abusua no mu.” Ne yere nyaa afoforo a ɔbɛboa wɔn ma wɔanya nimdeɛ a ɛma “daa nkwa” no mu anigye. (Yohane 17:3) N’anigye no kaa Antonio ma ɔsan hwehwɛɛ nea ɛfata ankasa no mu bio. Ɔpɛ a ɔwɔ sɛ ofi ne kra nyinaa mu bɛsɔ Onyankopɔn ani no dii nkonim. Ɔpow adwuma mu nkɔanim a wɔde rema no na ogyaee ne honam fam adwuma no. Ɛwom sɛ na nsakrae no kyerɛ sɛ ɔbɛyɛ adwuma a ɛba fam kɛse de, nanso Antonio ne ne yere nyinaa ani gye sɛ wɔbɛyɛ bere nyinaa som adwuma no, na wɔayɛ Onyankopɔn apɛde.

Nokwarem no, ɛnyɛ obiara na obetumi ayɛ nsakrae akɛse a ɛtete saa. Mizuromi a ɔyɛ Japanni sikakorabea odwumayɛni a yɛbɔɔ ne din mfiase no ani gye ne som sɛ Kristofo asafo mu ɔpanyin no mu na ɔda so ara de ne honam fam adwuma hwɛ n’abusua, faako a okura mpanyin dibea no. Nanso, n’asetra nyɛ nea esi ne honam fam adwuma no so bio na mmom esi Onyankopɔn apɛde a ɔbɛyɛ so. Ne honam fam adwuma no na ɔde hwɛ ne ho na ɛboa no ma odu saa botae no ho. Afei honam fam adwuma a ɔyɛ no nso yɛ nea ɛfata.

Sɛ wunya w’adwuma ho adwene a ɛte sɛɛ a, akyinnye biara nni ho sɛ wobɛyere wo ho, “ɛnyɛ ani so som mu, sɛ wɔn a wɔsɔ nnipa ani, na mmom koma kronn mu, sɛ wɔn a wosuro [Yehowa].” (Kolosefo 3:22) Ebia ɛbɛyɛ te sɛ nea nokwaredi a ɛte saa no nnu baabiara wɔ akansi wiase yi mu de, nanso, sɛnea Mizuromi gye tom no, ɛdenam nnyinasosɛm ahorow a ɛte sɛɛ a wode bedi dwuma so no, wobenya wo mu ahotoso na wobebu wo. Ɛwom sɛ ogyaee adwumam nkɔanim a obenya no ho adwumayɛ de, nanso ɛbɛtoo no.​—Mmebusɛm 22:29.

Yiw, w’asetra a wode besi Onyankopɔn apɛde a wobɛyɛ so no ne nea ɛbɛma woanya anigye wɔ adwumadenyɛ mu. Enti na Ɔhene nyansafo Salomo de asɛm no baa awiei sɛ: “Adepa nni hɔ mma nnipa, gye sɛ wɔma wɔn ani gye na wɔyɛ yiye wɔn nkwa mu; nanso sɛ onipa biara didi nom hu adepa ne brɛ nyinaa mu a, Onyankopɔn akyɛde ne no.”​—Ɔsɛnkafo 3:12, 13.

[Mfonini wɔ kratafa 7]

W’abusua asetra a wode besi Bible sua ne Onyankopɔn apɛdeyɛ so no na ɛbɛma woanya nea efi adwumadenyɛ mu ba no mu anigye