Fa Hokwan Soronko Yi Di Dwuma!

NÁ PETER akɔ n’anim yiye wɔ n’aduruyɛ adesua mu bere a Bible nkwagyesɛm no nyaa ne so nkɛntɛnso no. Bere a owiei a ofii ase yɛɛ adwuma sɛ oduruyɛfo wɔ ayaresabea bi no, ne mpanyimfo kɔɔ so hyɛɛ no nkuran sɛ onsua amemene ne berɛmo nnompe ho aduruyɛ nkutoo. Ná eyi yɛ hokwan a aduruyɛfo foforo pii besom a wɔrentwentwɛn wɔn nan ase.

Nanso, Petera sii gyinae sɛ ɔbɛpow saa hokwan yi. Dɛn ntia? So na onni ho akɔnnɔ ne ɔpɛ a ehia no? Ɛnyɛ saa, na mmom Peter susuw hokwan no ho yiye. Bere a ɔbɛyɛɛ Yehowa Dansefo a wahyira ne ho so abɔ asu no, na ɔwɔ ɔpɛ sɛ ɔde bere pii bɛyɛ Kristofo som adwuma no afã horow no. Osusuwii sɛ, sɛ ɔbɛyɛ amemene ne berɛmo nnompe ho oduruyɛfo pɛ a, n’adwuma no begye ne bere ne n’ahoɔden pii. So na onnim nyansa sɛ ɔpow hokwan soronko yi, anaasɛ na ɔyɛ onyansafo?

Wɔ ebinom fam no, ɛte sɛ nea ebia Peter gyinaesi no yɛ nea nyansa nnim. Nanso osusuwii Bible kyerɛw nsɛm te sɛ Efesofo 5:15, 16, NW ho. Ɛhɔ na ɔsomafo Paulo tuu mfɛfo Kristofo fo sɛ: “Monhwɛ mo nantew yiye, ɛnyɛ sɛ wɔn a wonnim nyansa, na mmom sɛ anyansafo, na montɔ bere a ɛfata, efisɛ nna yi yɛ nna bɔne.”

Yɛsrɛ wo hyɛ asɛm “bere a ɛfata,” no nsow. Wɔkyerɛɛ ase fii Hela asɛmfua a wɔtaa de di dwuma wɔ Bible mu de ka bere bi a nneɛma horow bi hyɛ no agyirae anaa ɛfata ma dwumadi pɔtee bi mu. Ɛha yi, Paulo sii so dua sɛ ɛsɛ sɛ Kristofo nya bere ma nneɛma a mfaso wɔ so. Nokwarem no, ehia sɛ ‘wobu nneɛma a eye koraa no yiye.’ (Filipifo 1:10) Ɛho hia sɛ woyɛ nhyehyɛe pa.

Ɛnde, na dɛn ne Onyankopɔn atirimpɔw ma yɛn bere yi? Dɛn ne Onyankopɔn apɛde ma wɔn a wɔdɔ no no? Bible nkɔmhyɛ ahorow da no adi pefee sɛ yɛn bere yi ne “awiei bere” anaa “nna a edi akyiri” no. (Daniel 12:4; 2 Timoteo 3:1) Kristo Yesu maa nea ɛho behia titiriw ama yɛn bere yi no daa adi pefee. Ɔkaa no pefee sɛ ansa na nneɛma nhyehyɛe bɔne yi bɛba awiei no, “wɔbɛka ahenni no ho asɛmpa yi wiase nyinaa de adi amanaman nyinaa adanse.” Ɛno ansa na awiei no bɛba.—Mateo 24:3, 14.

Enti, ehia sɛ yɛde hokwan biara di dwuma de ka Ahenni ho asɛmpa no na yɛyɛ asuafo. (Mateo 28:19, 20) Esiane sɛ nnwuma yi yɛ nea wɔrensan nyɛ bio nti, eyi ne hokwan a etwa to a ɛsɛ sɛ yɛyɛ nea yebetumi nyinaa wɔ nkwagye adwuma yi mu. “Afei ne ɔdom bere.” Nokwarem no, “ɛnnɛ ne nkwagye da.”—2 Korintofo 6:2.

Gyinae a Nyansa Wom a Wubesi

Peter—aberante a yɛbɔɔ ne din mfiase no—susuw ne gyinaesi no ho yiye karii nea ɔbɛpaw no hwɛe. Ohui sɛ ɛrenyɛ mfomso sɛ obesua ade abɛyɛ amemene ne berɛmo nnompe ho oduruyɛfo. Nanso na dɛn na ɛho hia no titiriw? Ná ɛyɛ ne dwumadi wɔ Kristofo som adwuma no mu, esiane ntɛmpɛ a adwuma yi gye nti. Bere koro no ara, na ɔwɔ asɛyɛde horow a ɛsɛ sɛ odi ho dwuma. Ná waware, na na ɛsɛ sɛ ɔboa ne yere a na ɔde ne ho ahyɛ bere nyinaa asɛnka adwuma mu no. (1 Timoteo 5:8) Ná ɛsɛ sɛ Peter tua n’adesua ho ka a ɔde no nso. Ɛnde, dɛn na osii gyinae sɛ ɔbɛyɛ?

Peter sii gyinae sɛ obesua X-ray ho ade nkutoo na wayɛ nipadua mu nnyigyei mu nhwehwɛmu ahorow. Ná adwuma da nkutoo na ɔde bɛyɛ saa adwuma yi. Afei nso na obenya ɛho ntetee wɔ nnɔnhwerew a ɔde yɛ adwuma no mu. Nokwarem no, ebia ebinom bebu eyi sɛ adwuma a enni mu biara de, nanso na ɛbɛma wanya bere pii ama honhom fam nneɛma.

Peter susuw ade foforo nso ho wɔ ne gyinaesi no mu. Ɛwom sɛ na ɔnkasa ntia wɔn a anka ebia wobesi gyinae foforo no de, nanso ná onim sɛ Kristoni bi ho a ɔde bɛhyɛ wiase no nneɛma mu fee no, bɛyɛ asiane ama no. Ebetumi ama wabu n’ani agu honhom fam asɛyɛde ahorow so. Nhwɛso foforo bi a ɛfa adwumayɛ ho kyerɛkyerɛ eyi mu.

Ná bere nyinaa Ahenni sɛnkafo bi yɛ mfoniniyɛfo a wɔatete no. Ná sika a onya fi mfonini a ɔtɔn mu no tumi hwɛ no. Enti bere a na ɔde ne bere mu fã kɛse no ara yɛ Kristofo som adwuma a mfaso wɔ so kɛse no, ná onya n’asetram ahiade ma ne ho tɔ no. Nanso, ɔpɛ a onyae sɛ ɔbɛtrɛw ne mfoniniyɛ adwuma no mu no fii ase yɛɛ kɛse. Ɔde ne ho bɛhyɛɛ mfonini ne adwinni adwuma mu kɛse, gyaee bere nyinaa som adwuma no, na awiei koraa no, ɔbɛyɛɛ mmerɛw koraa wɔ Ahenni asɛnka dwumadi no mu. Bere bi akyi no, ɔde ne ho hyɛɛ nneyɛe a Kyerɛwnsɛm no kasa tia mu, na ɛmaa ofii Kristofo asafo no mu.—1 Korintofo 5:11-13.

Yɛn Bere Yi Yɛ Soronko

Sɛ nnipa a yɛresom Yehowa nnɛ no, akyinnye biara nni ho sɛ yɛpɛ sɛ yɛkɔ so di no nokware. Yenim sɛ yɛte bere a ɛyɛ soronko koraa mu wɔ adesamma abakɔsɛm mu. Nea ɛbɛyɛ na yɛakɔ so asom Onyankopɔn na yɛatumi agyina nnɛyi nsɛm tebea ano yiye no, ebia ebehia sɛ yɛyɛ nsakrae ahorow. Yebetumi de eyi atoto twabere ma okuafo bi ho. Ɛno yɛ dwumadi titiriw bere, bere a wɔhwɛ kwan sɛ apaafo bɛyere wɔn ho asen biara de nna pii ayɛ adwuma. Dɛn ntia? Efisɛ na ɛsɛ sɛ wowie otwa adwuma no wɔ bere tiaa bi mu.

Bere tiaa bi na aka ama nneɛma nhyehyɛe bɔne yi. Seesei ne bere a ɛsen biara a ehia sɛ nokware Kristoni yere ne ho di Yesu nhwɛso akyi, na odi n’anammɔn akyi. N’asetra wɔ asase so no daa nea na ehia no titiriw adi pefee. Ɔkae sɛ: “Ɛsɛ yɛn sɛ adekyee wɔ hɔ yi, yɛyɛ nea ɔsomaa me no nnwuma; anadwo reba a obiara ntumi nyɛ adwuma.” (Yohane 9:4) Bere a na Yesu reka sɛ anadwo bi reba no, na ɔreka ne sɔhwɛ, n’asɛndua mu bɔ, ne ne wu ho asɛm, bere a na n’asase so som adwuma bɛba awiei na ontumi nyɛ ne soro Agya no adwuma bio no.

Ɛyɛ nokware sɛ wɔ ne mfe abiɛsa ne fã som adwuma mu no, Yesu de ne bere no mu bi yɛɛ anwonwade de saa ayarefo yare. Nanso, ɔde ne bere mu fã kɛse no ara kaa Ahenni asɛm no, na ‘ɔkaa ɔgye kyerɛɛ’ wɔn a atoro som afa wɔn ‘nnommum.’ (Luka 4:18; Mateo 4:17) Yesu yɛɛ nsi wɔ ne som adwuma mu na onyaa bere nso de tetee n’asuafo no sɛnea ɛbɛyɛ a wobetumi atoa nhyɛase a ɔtowee no so, na wɔatoa asɛnka adwuma no so yiye. Yesu de hokwan biara dii dwuma maa Ahenni nneɛma nyaa nkɔso, na ɔhwɛɛ kwan sɛ n’asuafo no nso bɛyɛ saa ara.—Mateo 5:14-16; Yohane 8:12.

Te sɛ Yesu no, ɛsɛ sɛ yɛn a yɛyɛ n’asuafo nnɛ no hu adesamma tebea sɛnea Yehowa Nyankopɔn hu no no. Nneɛma nhyehyɛe yi awiei abɛn, na Onyankopɔn fi mmɔborohunu mu pɛ sɛ obiara nya nkwa. (2 Petro 3:9) Ɛnde, so ɛrenyɛ nea nyansa wom sɛ yɛde Yehowa apɛde bedi nneɛma nyinaa kan? (Mateo 6:25-33) Saa bere yi mu titiriw na, sɛ́ Kristofo no, ɛsɛ sɛ yɛma nneɛma a anka yebu no sɛ ɛho hia no yɛ nea ɛho nhia wɔ yɛn asetram.

So yɛn mu biara benu ne ho da bi sɛ ɔde Onyankopɔn apɛde dii kan wɔ n’asetram? Dabi, efisɛ mfaso pii wɔ Kristofo asetra kwan a ɛma wɔde wɔn ho bɔ afɔre no mu. Sɛ́ nhwɛso no, Yesu ka kyerɛɛ n’asuafo no sɛ: “Nokware mise mo sɛ, obi nni hɔ a wagyaw ofi, anaa nuabeanom, anaa ɛna, anaa agya, anaa mma, anaa asase, me ne asɛmpa no nti, na ɔrennya afi ne nuabarimanom ne nuabeanom ne ɛnanom, ne mma ne nsase mmɔho ɔha, a ɔtaa ka ho, seesei wɔ bere yi mu, ɛne daa nkwa wɔ wiase a ɛreba no mu.”—Marko 10:29, 30.

Obiara ntumi mfa sika ntɔ akatua a wɔn a wɔde wɔn bere yi Yehowa ayɛ, na wɔbɔ Ahenni asɛm no dawuru no nya no. Wonya nhyira pii! Ebi ne nnamfo pa, abotɔyam a wonya sɛ wɔyɛ Onyankopɔn apɛde, Onyankopɔn anim dom, ne daa nkwa ho anidaso. (Adiyisɛm 21:3, 4) Na hwɛ nhyira ara a ɛyɛ sɛ wɔboa nkurɔfo wɔ honhom fam, na wɔhyɛ Yehowa din anuonyam sɛ N’adansefo! Akyinnye biara nni ho sɛ, ‘bere a ɛfata a wobɛtɔ’ no, yɛ nea nyansa ne mfaso wɔ so ampa. Seesei ne bere a ɛfata sen biara a ɛsɛ sɛ wode wo ho hyɛ Onyankopɔn Ahenni ho asɛmpaka adwuma no mu. So wode hokwan soronko yi bedi dwuma na woakura mu?

[Ase hɔ asɛm]