“Wonim Ne Nne”

‘YEHOWA ne me hwɛfo.’ Eyi ne Dwom 23 nsɛm a edi kan. Kyerɛwnsɛm no de Yehowa Nyankopɔn toto oguanhwɛfo ho bio wɔ Yesaia nkɔmhyɛ no mu, na ɛka sɛ: “Ɔbɛyɛn ne nguankuw sɛ oguanhwɛfo, obeturu nguammaa ne basa so, na wasoa wɔn ne kokom; nguan mmaatan no, ɔbɛka wɔn brɛoo.”—Yesaia 40:11.

Saa ara na wɔde Yesu Kristo toto oguanhwɛfo ho. Ɔkae sɛ: “Mene guanhwɛfo pa no. Oguanhwɛfo pa de ne kra to hɔ ma nguan.” (Yohane 10:11) Yesu kae sɛ “nguan te [oguanhwɛfo no] nne, na ɔbɔ n’ankasa nguan din frɛ wɔn de wɔn fi adi.” Ɔde kaa ho sɛ “nguan no di [oguanhwɛfo no] akyi, efisɛ wonim ne nne. Na ɔnana de, wɔrenni n’akyi, efisɛ wonnim ananafo nne.”—Yohane 10:2-5.

Yehowa Nyankopɔn ne ne Ba Yesu Kristo nyinaa su ne kyerɛw nsɛm a yɛaka ho asɛm yi hyia. Wɔne wɔn sɛnkyerɛnne kwan so nguan no di no brɛbrɛ na wofi ɔdɔ mu susuw wɔn ho. Ne saa nti, nnipa a wɔte sɛ nguan no te nka sɛ wɔdɔ wɔn, wɔwɔ dwoodwoo asetra, ne ahobammɔ.

Wɔde saa abusuabɔ yi toto nea ɛda nguan ankasa ne wɔn hwɛfo ntam ho ma ɛfata. Wɔ 1831 mu tɔnn na John Hartley kyerɛw nea ohui wɔ abusuabɔ yi ho. Ɔkae sɛ wɔ Greece no, ná nguanhwɛfo toto wɔn nguan din. Sɛ oguanhwɛfo de oguan no din frɛ no a, ná ogye so. Wɔ 1882, bɛyɛ mfe 51 akyi no, J. L. Porter kaa asɛnkoro no ara. Ɔno ankasa huu nguanhwɛfo a “wɔde nne soronko bi a ano yɛ den . . . frɛ” a nguan no gye so denam di a wodi wɔn ahwɛfo no akyi komm so. Saa afe no ara William M. Thomson kyerɛw nhwehwɛmu a wɔakɔ so ayɛ a ɛkyerɛ sɛ wobetumi akyerɛkyerɛ nguan ma wɔadi wɔn hwɛfo akyi na wɔate ne nne no ho asɛm.

So wɔahu abusuabɔ soronko yi a ɛda nguanhwɛfo ne wɔn nguan ntam no ho biribi nnansa yi ara? Yiw. Wɔ National Geographic a ɛbae wɔ September 1993 mu no, Australiani Robyn Davidson a oduedue nneɛma mu kyerɛw nea edi so yi faa Rabarifo a wɔyɛ mmoayɛnfo a wɔte India kusuu fam atɔe no ho sɛ: “Nguanhwɛfo no mu biara wɔ nne a ɛda nsow kakra fi ɔfoforo de ho a ɔde frɛ, na nsonsonoe no gyina sɛnea ɔfrɛ no so. Ɛnne a wɔde frɛ wɔn anɔpa fi adi wɔ hɔ, nea wɔde frɛ wɔn kɔ nsu ho wɔ hɔ, ne nea ɛkeka ho. Ɔbarima biara nim ne nguan na nguan no nso nim wɔn wura, na ne nguan ankasa no bepue afi nguankuw kɛse no mu akodi n’akyi anɔpa.”

Akyinnye biara nni ho sɛ Yesu huu nea akwantufo baanan yi a yɛaka wɔn ho asɛm akyerɛkyerɛ mu no. Nea ɔno ankasa hui no maa ne mfatoho a ɛfa ne nguan a wonim ne nne ho no yɛ nokware kɛse. So woyɛ Yesu nguan no biako? So wunim ne nne na wutie? Sɛ wuhu ne nkyerɛkyerɛ na wugye tom sɛ ɛne nokware no, na sɛ wutie n’ahyɛde na wudi n’akyi som Yehowa a, ɛnde wubetumi atra Yehowa Nyankopɔn ne ne Ba Yesu Kristo ɔhwɛ a ɛyɛ brɛbrɛ na ɔdɔ wom no mu.—Yohane 15:10.