Nea Enti a Ɛsɛ sɛ Wokwati Ahonhonsɛmdi

SƐ WOATE sɛ ahonhonsɛmdi bi yɛ ɔkwan a wɔfa so ne ahonhom pa di nkitaho a, ɛnde ɛbɛyɛ wo ahodwiriw sɛ wubehu nea Bible no ka fa ahonhonsɛmdi ho. Sɛ nhwɛso no, ɛka sɛ: “Monnnan mo ho nnkɔ ɔdebisafo nkyɛn, na monnhwehwɛ asumanfo akyi kwan mmfa nngu mo ho fĩ wɔ wɔn ho.”—Leviticus 19:31; 20:6, 27; yɛn na yɛasi ɔfã bi so dua no.

Nokwarem no, Bible no ka ahonhonsɛmdi ho asɛm sɛ “[Yehowa, NW] akyide.” (Deuteronomium 18:11, 12) Dɛn ntia? Nea Bible no ka fa ahonhonsɛmdi bi a agye din ho a yebesusuw ho yiye—awufo a wose wɔne wɔn di nkitaho—no, bɛma yɛahu mmuae no.

So Awufo Te Ase?

Nea ɛne nnipa pii nsusuwii bɔ abira no, Onyankopɔn Asɛm, Bible, kyerɛkyerɛ sɛ nnipa ntumi ne wɔn adɔfo a wɔawuwu no nni nkitaho biara. Dɛn ntia? Efisɛ sɛ obi tumi ne awufo di nkitaho ampa a, ɛnde na awufo te ase. Na wɔn fã bi te ase a enwui. Ebinom kyerɛ sɛ sɛ nipadua no wu a, ɔkra no kɔ so tra ase. So ɛyɛ ampa?

Bible kyerɛwtohɔ a ɛfa onipa bɔ ho no ka sɛ: “[Yehowa, NW] Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo.” (Genesis 2:7; yɛn na yɛasi ɔfã bi so dua no.) So eyi nkyerɛ sɛ onipa no ankasa yɛ ɔkra na onni ɔkra biara a ɛkɔ so tra ase bere a wawu no? Nokwarem no, Kyerɛwnsɛm no ka sɛ: “Ɔkra a ɔyɛ bɔne no, ɔno ara na obewu.” (Hesekiel 18:4) “Ateasefo nim sɛ wobewuwu, na awufo de, wonnim biribiara . . . Adwuma ne adwene ne nimdeɛ ne nyansa nni asaman,” adesamma adamoa mu hɔ.—Ɔsɛnkafo 9:5, 10.

Enti sɛnea Bible kyerɛ no, ɔkra no nyɛ biribi a ɛkɔ so tra ase bere a onipa no awu no, na ama ateasefo ne no adi nkitaho. Nhwɛso abien a Bible ho abenfo a wobu wɔn aka afa ɔkra a ewu ho no ni. Canadani nyamekyerɛfo Clark H. Pinnock kae sɛ: “Nyamekyerɛfo fi bere tenten agye nkyerɛkyerɛ yi [onipa kra a enwu da] adi, nanso ennyina Bible so. Bible nka sɛ wɔbɔɔ ɔkra bi hyɛɛ nipadua no mu a enwu da.” Saa ara na Britaniani nhomanimfo John R. W. Stott kae sɛ: “Ɔkra a enwu da—anaa wontumi nsɛe no—no, yɛ Helafo nkyerɛkyerɛ, ɛnyɛ Bible nkyerɛkyerɛ.”

Nanso, nkurɔfo te nsɛm anaa ɛnne ahorow a ɛte sɛ nea efi awufo hɔ. Ɛnde, na ɛnne yi fi henanom hɔ?

Wɔne Henanom na Edi Nkitaho?

Bible no ka sɛ honhom abɔde bi a aniwa ntumi nhu no kasa faa ɔwɔ so kyerɛɛ ɔbea a odi kan, Hawa, te sɛ nea obi tumi kasa fa abaduaba so no, maa ɔtew atua tiaa Onyankopɔn. (Genesis 3:1-5) Bible frɛ honhom abɔde, anaa ɔbɔfo yi “ɔwɔ dedaw no a wɔfrɛ no ɔbonsam ne Satan, nea ɔdaadaa amanaman nyinaa no.” (Adiyisɛm 12:9) Saa abɔde no, Satan, tumi daadaa abɔfo afoforo ma wɔtew atua. (Yuda 6) Wɔfrɛ abɔfo bɔne yi adaemone, na wɔyɛ Onyankopɔn atamfo.

Bible no kyerɛ sɛ saa adaemone no wɔ tumi wɔ nnipa so. (Luka 8:26-34) Enti, edi sɛ Onyankopɔn Mmara ka sɛ: “Mma wonnhu wo mu . . . samanfrɛfo ne osumanni ne nea obisa afunu, efisɛ [Yehowa, NW] akyide ne wɔn a wɔyɛ eyinom nyinaa.” (Deuteronomium 18:10-12) Asiane bɛn na ɛwɔ mu sɛ obi bebu n’ani agu mmara yi so?

Asɛm bi a esii tete Israel hene Saul asetra mu no ma eyi ho mmuae. Ɔhene Saul kɔɔ samanfrɛfo bi hɔ esiane sɛ na osuro n’atamfo nti. Ɔka kyerɛɛ no sɛ ɔmfrɛ odiyifo Samuel a wawu no. Bere a samanfrɛfo no kaa akwakoraa bi a ohuu no ho asɛm kyerɛɛ Saul no, ɔfaa no sɛ honhom yi yɛ Samuel. Asɛm bɛn na honhom no ka kyerɛɛ Saul? Wɔde Israelfo bɛhyɛ wɔn atamfo nsa, na Saul ne ne mma bɛkɔ akɔka “Samuel” ho, a ɛkyerɛ sɛ wobewuwu. (1 Samuel 28:4-19) Dɛn na Onyankopɔn yɛe bere a Saul kohuu samanfrɛfo no? Kyerɛwnsɛm no ka kyerɛ yɛn sɛ: “Saul wui ne fom a ɔfom . . . ne sɛ nso okobisaa ɔsamanfrɛfo hɔ ade hwehwɛɛ n’akyi kwan.” (1 Beresosɛm 10:13) Asotwe a ɛsõ bɛn ara ni!

Saa pɛpɛɛpɛ na ɛnnɛ, wɔn a wɔde wɔn ho hyɛ ahonhonsɛmdi mu no de wɔn ho to asiane kɛse mu. Bible no ka sɛ ‘wɔn a wɔde wɔn ho hyɛ ahonhonsɛmdi’ mu benya wɔn kyɛfa wɔ “owuprenu [anaa daa owu] no mu.” (Adiyisɛm 21:8; 22:15) Enti, ɛda adi pefee sɛ ade a ɛfata sɛ yɛyɛ na ama yɛanya yɛn ti adidi mu ne sɛ yɛbɛkwati ahonhonsɛmdi biara.

Sɛnea Wobɛko Atia Ahonhommɔne

Na sɛ wode wo ho ahyɛ ahonhonsɛmdi mu dedaw nso ɛ? Ɛnde ɛsɛ sɛ woyɛ no ntɛm bɔ wo ne w’abusua ho ban fi ahonhommɔne ho. Dɛn na ɛsɛ sɛ woyɛ? Mfatoho bi ni: Ɛbɛyɛ dɛn na obi atumi abɔ ɔne n’abusua ho ban na sonkronsuo amma wɔn fie? Sɛ ɔtɔre sonkronsuo no ase fi ne fie a, ɛsɛ sɛ oyiyi nneɛma a ɛde wɔn ba fie hɔ no nyinaa fi hɔ. Otuatua ntokuro a ɛwɔ ɔfasu no ho yiye sɛnea ɛbɛyɛ a sonkronsuo no ntumi mma bio, na sɛ wɔkɔ so ba fie hɔ a, obetumi ama wɔn a wɔwɔ ho nimdeɛ a wɔwɔ kurom hɔ abɛboa no.

Ɔkwan a ɛte saa ara betumi aboa wo ma woatumi asiw ahonhommɔne kwan ade wo ho afi wɔn ho. Susuw afeha a edi kan Kristofo a na wɔwɔ Efeso a wɔde wɔn ho hyɛɛ ahonhonsɛmdi mu ansa na wɔrebɛyɛ Kristofo no ho hwɛ. Bere a wɔyɛɛ wɔn adwene sɛ wɔbɛde wɔn ho afi ahonhonsɛmdi ho no, wɔfaa akwan abiɛsa bi so de bɔɔ wɔn ho ban fii ahonhommɔne ntua a ɛte sɛ bere a sonkronsuo ba obi fie no ho. Dɛn na wɔyɛe?

Nea Edi Kan

Bible kyerɛkyerɛ mu sɛ: “Wɔn a wɔyɛ asumanne no mu bebree de wɔn nhoma bae bɛhyewee wɔ nnipa nyinaa anim.” (Asomafo no Nnwuma 19:19) Wɔn a na wɔabɛyɛ Kristofo foforo no nam wɔn nhoma a ɛka asumansɛm a wɔhyewee no so yɛɛ nhwɛso maa obiara a ɔpɛ sɛ ɔtwe ne ho fi ahonhonsɛm ho nnɛ no. Sɛe nneɛma a ɛne ahonhonsɛm wɔ abusuabɔ no nyinaa. Ebi ne nhoma biara, nsɛmma nhoma, nhoma a ɛka aseresɛm, video, dawurubɔ nkratasin, kasɛt biara a wɔakyere nsɛm agu so, ne nnwom a wɔka ahonhonsɛm wom, ne suman anaa biribiara a wɔde “bɔ ho ban.”—Deuteronomium 7:25, 26; 1 Korintofo 10:21.

Ɔbarima bi a ɔwɔ South America a ahonhonsɛmdi dii ne ti mfe pii no de Kyerɛwnsɛm mu afotu yi dii dwuma. Ɔka sɛ: “Da koro bi, meboaboaa nneɛma a mewɔ a ɛfa ahonhonsɛmdi ho no nyinaa ano guu me fie anim, na mede akuma twitwaa mu nketenkete.” Ɔhyew ne nyinaa dwerɛbee. Afei, onyaa honhom fam nkɔso pii na ankyɛ koraa na ɔbɛyɛɛ obi a ɔde mmɔdenbɔ som wɔ Yehowa Adansefo asafo biako mu.

Nanso, nea edi kan no ara nnɔɔso. Dɛn ntia? Wɔ mfe pii a Kristofo a wɔwɔ Efeso no hyew wɔn asumanne nhoma no akyi no, ɔsomafo Paulo kyerɛw sɛ: ‘Yɛne ahonhommɔne na ɛredi asi.’ (Efesofo 6:12) Na adaemone no abam mmui. Wɔkɔɔ so ara haw wɔn. Dɛn bio na na ɛsɛ sɛ saa Kristofo no yɛ?

Nea Ɛtɔ so Abien

Paulo tuu afeha a edi kan Efesofo no fo sɛ: “Monhyɛ Onyankopɔn akode nyinaa, na moatumi agyina ne ɔbonsam nnɛɛdɛe adi asi.” (Efesofo 6:11) Saa afotu no da so ara fata nnɛ. Te sɛ onipa a ɔrebɔ mmɔden sɛ ɔbɛtɔre sonkronsuo ase afi ne fie no, na ɛsɛ sɛ Kristoni biara yɛ den te sɛ ɔfasu na ahonhommɔne antwiw amfa ne so. Dɛn na adeyɛ a ɛtɔ so abien yi hwehwɛ?

Paulo si so dua sɛ: “Ne nyinaa akyi no, munkura gyidi kyɛm a mode betumi adum ɔbɔne no bɛmma a ɛredɛw no nyinaa.” (Efesofo 6:16; yɛn na yɛasi ɔfã bi so dua no.) Gyidi kyɛm a ɛte saa no hia paa. Sɛ wo gyidi yɛ den a na ɛbɛma woatumi ako atia ahonhommɔne.—Mateo 17:20.

Ɛnde, ɛbɛyɛ dɛn na woatumi ahyɛ nneɛma a wode bɛbɔ wo ho ban no mu den? Denam Bible no a wobɛkɔ so asua no so. Ɔkwan bɛn so na Bible a wubesua no fa gyidi ho? Sɛnea den a ɔfasu bi bɛyɛ gyina fapem pa a ebenya so no, saa ara na obi gyidi a ɛbɛyɛ den no gyina sɛnea fapem a ɔto si so no yɛ den fa so kɛse. Dɛn ne saa fapem no?

Onyankopɔn Asɛm mu nimdeɛ a edi mu. Ɔsomafo Paulo kyerɛkyerɛɛ mu sɛ: ‘Gyidi gyina nea wɔte so. Na nea wɔte no nam Kristo ho asɛm no so.’ (Romafo 10:17) Yɛto nsa frɛ wo sɛ wo ne Yehowa Adansefo no mu biako nyɛ Bible adesua a wontua hwee ho nhyehyɛe wɔ bere ne beae a w’ankasa wopɛ mu. Adesua a ɛte saa betumi ama wo gyidi ayɛ den. (Romafo 1:11, 12; Kolosefo 2:6, 7) Dɛn na ebefi mu aba? Ɛnkyɛ koraa na wo gyidi ayɛ sɛ aban dennen a ebetumi ama woako atia ahonhommɔne.—Dwom 91:4; 1 Yohane 5:5.

Dɛn ne ade a ɛtɔ so abiɛsa a na ɛsɛ sɛ Efesofo Kristofo no yɛ?

Nea Ɛtɔ so Abiɛsa

Tete Kristofo a na wɔwɔ Efeso no bɔɔ mmɔden ko tiaa ahonhommɔne, nanso, na wɔda so ara te kurow a ahonhommɔne wom mu. Na wohia ahobammɔ foforo. Enti bere a ɔsomafo Paulo kyerɛwee ne mfɛfo agyidifo no, ɔkyerɛɛ wɔn nea wɔnyɛ: “Momfa mpaebɔ ne ɔsrɛ nyinaa mmɔ mpae daa honhom mu, na ɛno ara nti monwɛn, na montoa so ara nsrɛ mma ahotefo nyinaa.”—Efesofo 6:18.

Nokwarem no, saa bere no, na mpae a emu yɛ den a obi bɛbɔ daa de ahwehwɛ Yehowa ahobammɔ no yɛ ade a ebetumi ama no ako atia ahonhommɔne, na saa ara na ɛte nnɛ. Na ɛyɛ awerɛkyekye sɛ wubehu sɛ Yehowa betie wo mpaebɔ a efi koma mu no denam bɔ a ɔbɛbɔ wo ho ban na wama n’abɔfo aboa wo no so. (Dwom 34:7; 91:2, 3, 11, 14; 145:19) Enti, eye sɛ wobɛkɔ so abɔ Onyankopɔn mpae sɛ, ‘Yi yɛn fi ɔbɔnefo no nsam.’—Mateo 6:13; 1 Yohane 5:18, 19.

Antônio, a bere bi na ɔyɛ ɔdebisafo wɔ Brazil no, behuu hia a mpaebɔ ho hia no. Bere a ofii ase suaa Bible no na ohuu Onyankopɔn din Yehowa no, ofii ase bɔɔ Yehowa Onyankopɔn mpae denneennen sɛ ɔmmoa no mma ɔntwe ne ho mfi ahonhonsɛmdi ho. Sɛ ɔkae nea abɛsen kɔ no a, ɔka sɛ: “Yehowa a wɔbɔ no mpae no ayɛ aban dennen ama me ne nnipa foforo pii a na ahonhommɔne de wɔn ayɛ nkoa no.”—Mmebusɛm 18:10.

Wubetumi Adi Nkonim

Ɛho hia sɛ bere a woahu Yehowa no, wode wo ho bɛto no so koraa, abrɛ wo ho ase ahyɛ ne tumidi ase, na woatie ne mmara. Sɛ woyɛ saa na wobɔ ne din bɔ mpae de hwehwɛ mmoa a, ɔbɛbɔ wo ho ban. Antônio nyaa ahobammɔ a ɛte saa. Ɛnnɛ, ɔsom sɛ Kristoni panyin wɔ Yehowa Adansefo asafo ahorow no biako mu wɔ São Paulo, na n’ani agye sɛ wahu nokware a ama wade ne ho no.—Yohane 8:32.

Te sɛ Antônio ne nnipa mpempem pii a wɔde wɔn ho hyɛɛ ahonhonsɛmdi mu bere bi nanso wɔresom Yehowa Nyankopɔn nnɛ no, wubetumi ade wo ho afi ahonhonsɛmdi ho. Enti, sɛe biribiara a ɛne ahonhonsɛmdi wɔ abusuabɔ a wowɔ, sua Bible no na ama wo gyidi ayɛ den, na hwehwɛ Yehowa ahobammɔ denam mpaebɔ so. Fa saa akwan abiɛsa yi di dwuma—wo nkwa gyina so!

[Asɛm a wɔafa aka wɔ kratafa 5]

Sɛnea Bible kyerɛ no, ateasefo ntumi ne awufo, nni nkitaho

[Mfonini wɔ kratafa 6]

1. Sɛe nneɛma a ɛne ahonhonsɛm wɔ abusuabɔ no nyinaa

[Mfonini wɔ kratafa 7]

2. Sua Bible no daa

[Mfonini wɔ kratafa 8]

3.Bɔ mpae denneennen daa