Nokware Kristofo Yɛ Ahenni Asɛnkafo

“Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”​—MATEO 24:14.

 1, 2. (a) Dɛn nti na ɛsɛ sɛ wɔka Ahenni ho asɛm no wɔ wiase nyinaa mprempren? (b) Nsɛm bɛn na Yehowa ɔdansefo biara betumi abisa?

ƐKA YEHOWA AHENNI KYERƐ. Ɛno na ayɛ nsɛmma nhoma yi botae titiriw wɔ mfe pii no mu. Nokwarem no, ɛyɛ nsɛmma nhoma no asɛmti no fã. Na ɛyɛ nea ɛho hia sɛ wɔbɛka Ahenni no ho asɛm wɔ wiase nyinaa mprempren. Dɛn ntia? Esiane nea Yesu Kristo, kae bere a wakyerɛ nneɛma afoforo a ɛka bom yɛ ne “ba” a aniwa nhu ne nhyehyɛe yi awiei ho “sɛnkyerɛnne” no akyi no nti. Yesu kae sɛ: “Wɔbɛbɔ ahenni no ho Asɛmpa yi dawuru akyerɛ wiase nyinaa de adi amanaman nyinaa adanse. Na ɛno ansa na awiei no bɛba.”​—Mateo 24:3, 14, The Jerusalem Bible.

² “Awiei” no abɛn nnɛ ampa. Enti, Yehowa ɔdansefo a wahyira ne ho so biara betumi abisa sɛ: Mete nka dɛn wɔ Ahenni asɛnka adwuma no ho? So mede me ho hyem daa? Na so mede ahokokwaw ne nnamyɛ na ɛyɛ me som adwuma no?

Ahyɛde A Wɔde Ama Sɛ Wɔnka Asɛm

 3. Yesu asɛm a wɔakyerɛw wɔ Mateo 5:14-16 no kyerɛ dɛn wɔ n’akyidifo ho?

³ Nokware Kristoni biara nni hɔ a obetumi apow adwuma a yɛanya ho kwan a ɛne “asɛmpa” no a yɛbɛka akyerɛ afoforo no ama afata. Yesu ka kyerɛɛ n’asuafo no sɛ: “Mone wiase hann. Kurow a ɛda bepɔw so ntumi nhintaw. Na wɔnsɔ kanea mfa nhyɛ ɔkorow ase, na mmom wɔde si kanea dua so, na ahyerɛn ama wɔn a wɔwɔ ɔdan no mu nyinaa. Saa ara na momma mo kanea nhyerɛn nnipa anim, na wɔahu mo nneyɛe pa, na wɔahyɛ mo agya a ɔwɔ soro no anuonyam.” (Mateo 5:14-16) Ná ɛno kyerɛ sɛ Yesu asuafo bɛyɛ Ahenni asɛnkafo.

 4. Dɛn na wɔaka afa Ahenni sɛnkafo a odi kan no ho?

⁴ Ɛdefa Ahenni sɛnkafo a odi kan no ho no, wɔka sɛ: “Bere a yɛn Awurade no kaa ahenni no ho asɛm no, Ɔkɔɔ so . . . yɛɛ ne Som Adwuma no ho nhyehyɛe. Ofii nkɔmhyɛ ɔsom adwuma no ase . . . na ɔmaa dumien ne aduɔson no nso yɛɛ saa ara. Bere a Ɔkaa ahenni a ɛreba no ho asɛm na ɔyɛɛ ‘sɛnkyerɛnne’ no, Ɔde asɛm ne tumi a ɛte saa ara somaa wɔn dii n’anim. Ɛdenam anwonwa kwan a ɔfaa so kyerɛkyerɛe so no, . . . Ɔtetee wɔn saa bere no maa adwuma kɛse a ɔde bɛhyɛ wɔn nsa akyiri yi.”​—A Church History a Milo Mahan kyerɛwee.

 5. Ɛdefa Ahenni asɛnka ho no, dɛn na Yesu yɛe?

⁵ Yesu de akwankyerɛ a eye maa n’asomafo ne asuafo 70 a ɔsomaa wɔn no. (Luka 6:12-16; 10:1-22) Bio nso, yɛn Nhwɛsofo no ankasa ‘kɔfaa nkurow ne nkuraa nyinaa mu kaa Onyankopɔn ahenni ho asɛmpa kyerɛe.’ Wɔn a na wɔka ne ho ne asomafo no ne mmea bi a “wɔde wɔn ahode bi som no.” (Luka 8:1-3) Yiw, na Yesu yɛ asɛmpa no ho dawurubɔfo a ɔyɛ nnam na ofii Ahenni asɛnka ahyehyɛde bi ase.

 6. Ansa na Yesu reforo akɔ soro no, ahyɛde bɛn na ɔde maa n’akyidifo?

⁶ Wɔ mfirihyia abiɛsa ne fã som adwuma akyi no, Yesu wiee n’asase so adwuma. Nanso ansa na ɔreforo akɔ soro no, ɔde ahyɛde yi maa n’akyidifo: “Monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Oba ne honhom kronkron din mu, na monkyerɛkyerɛ wɔn sɛ wonni nea mahyɛ mo nyinaa so. Na hwɛ, me ne mo wɔ hɔ nna nyinaa de bɛkɔ akosi wiase awiei.” (Mateo 28:19, 20) Ampa, na wɔbɛyɛ Ahenni asɛnkafo.

 7. Ɛwom sɛ Yesu asuafo no annya Ahenni no ho nimdeɛ a edi mũ mfiase no de, nanso dɛn nti na na wobetumi akɔ so ayɛ n’adansefo?

⁷ Bere a aka kakraa na Yesu afi asase so no, n’asuafo no bisae sɛ: “Awurade, bere yi mu na wobɛsan de ahenni no ama Israel anaa?” Obuaa wɔn sɛ: “Ɛnyɛ mo asɛm sɛ mubehu bere anaa nna a Agya no ahyɛ ato hɔ n’ankasa ne tumi mu.” Ɛwom sɛ na asuafo no nni Ahenni no ho nimdeɛ a edi mũ saa bere no de, nanso Yesu de hyɛɛ wɔn nsa sɛ wɔnyɛ ɛho adawurubɔfo, efisɛ na wobenya mmoa a ehia a wɔde bɛyɛ wɔn adwuma no. Yesu de kaa ho sɛ: “Na mmom sɛ honhom kronkron no nya ba mo so a, mubenya ahoɔden, na moayɛ m’adansefo Yerusalem ne Yudea nyinaa ne Samaria de akɔpem asase ano nohɔ.” (Asomafo no Nnwuma 1:6-8) Wɔ honhom kronkron akwankyerɛ ase no, na Yesu akyidifo no behu akyiri yi sɛ Ahenni no yɛ ɔsoro nniso. (Yohane 16:12, 13) Na wɔ bere a ɛsɛ mu no, wɔbɛbɔ nokwasɛm ahorow a ɛfa Ahenni no ho no dawuru “de akɔpem asase ano nohɔ.”

 8. Afeha a edi kan asɛnka adwuma no kɔɔ so yiye dɛn?

⁸ Saa adansefo no yɛɛ wɔn adwuma no yiye. Ɛwom, na Yehowa ka wɔn ho, na na Yesu Kristo a wɔahyɛ no anuonyam no nso gyina wɔn akyi. (Asomafo no Nnwuma 8:1-8; 11:19-21) Ɛnyɛ nwonwa sɛ wɔ 60 kosi 61 Y.B. mu mpo no, ɔsomafo Paulo tumi kae sɛ “asɛmpa” no yɛ nea ‘wɔaka no wiase abɔde nyinaa mu’ dedaw!​—Kolosefo 1:23.

 9. Sɛnea wɔaka wɔ ha no, Kristofo asafo no adwuma titiriw ne dɛn?

⁹ Ɛdefa adansedi adwuma no ho no, wɔakyerɛw se: “Asɛmpa no ho dawurubɔ no . . . nyɛ nnwuma ahorow pii a Apam Foforo Asɔre no yɛe no biako ara kwa, na mmom ɛyɛ n’adwuma titiriw a ɛho hia. . . . Hyɛ no nsow yiye, Yesu anka [wɔ Asomafo no Nnwuma 1:8] sɛ, Mubedi adanse akyerɛ me, anaasɛ, Mubedi adanse ama me, na mmom, Mobɛyɛ m’adansefo. Adeyɛ asɛm, ‘mobɛyɛ’ a wɔde di dwuma wɔ ha no mu yɛ duru na ɛsɛ sɛ yɛfa no aniberesɛm sɛnea ɛte no ara. Asɛm no [wɔ Hela kasa mu] nka adwuma a Asɔre no yɛ ara kwa, na mmom sɛnea Asɔre no bɛyɛ. . . . Yesu Kristo Asɔre no yɛ kuw a edi adanse.” (Pentecost and the Missionary Witness of the Church a Harry R. Boer kyerɛwee no nkratafa 110-14) Yiw, adansedi ne nokware Kristofo asafo no adwuma titiriw.

Denam Ɔsoro Akwankyerɛ So

10, 11. (a) Ɔkwan bɛn so na wɔyɛɛ nhyehyɛe maa afeha a edi kan Ahenni adawurubɔfo no? (b) Sɛ asɛm foforo bi sɔre a, dɛn na wɔyɛ?

¹⁰ Afeha a edi kan Ahenni adawurubɔfo no nyaa akwankyerɛ fii sodikuw bi hɔ. Ahwɛfo akwantufo somee wɔ ahyehyɛde no mu, na mpanyimfo ne asafo mu asomfo dii asafo mu asɛyɛde ahorow ho dwuma. (Asomafo no Nnwuma 15:1, 2, 22-36; Filipifo 1:1) Nanso dɛn na ɛbae bere a nsɛm tebea ahorow foforo sɔree no?

¹¹ Wiɛ, susuw nea esii wɔ Pentekoste 33 Y.B. akyi bere tiaa bi no ho. Yudafo a wɔka Hela kasa no fii ase nwiinwii hyɛɛ Yudafo a wɔka Hebri kasa no “sɛ wobu wɔn ani gu wɔn akunafo daa ɔhwɛ no so.” Sɛnea ɛbɛyɛ a wobedi ɔhaw yi ho dwuma no, asomafo no paw “mmarima baason a wɔwɔ din pa” sɛ wɔnhwɛ aduan kyekyɛ yi so. (Asomafo no Nnwuma 6:1-8) Ɛdefa eyi ho no, yɛkenkan sɛ: “Mfiase no na hwɛ a wɔbɛhwɛ ma wɔakyekyɛ aduan pɛpɛɛpɛ da biara no yɛ wɔn nyinaa adwuma, sɛnea wɔaka akyerɛ yɛn no, a ɛno nti na wɔpaw ‘baason’ no, nanso na ɛyɛ nea wɔde asɛyɛde ahorow bɛka ho bere a ɛba no, efisɛ bere a gyidi foforo no nnyinasosɛm yɛ nea ɛnsakra no, ɔkwan a wɔbɛfa so ne tebea a wɔde bɛma wom a ɛbɛma wɔde eyi asi hɔ na wɔatrɛw mu wɔ ɔkwan a etu mpɔn kɛse so no yɛ nea wogyaw maa awo ntoatoaso a ebedi akyi aba no nyansa ne osuahu pa . . . Nneɛma a ɛho nhia titiriw mu a wɔdannan na wɔma ɛyɛ ne bere mu de ho hia wɔ ahyehyɛde kɛse biara mu.”​—Hours With the Bible, New Testament Series, po II a Cunningham Geike yɛe.

12. (a) Dɛn na ɛboa maa tete Kristosom nyaa nkɔso no? (b) Ɛhefa ne ɔkwan bɛn so na wɔbɛfrɛɛ Yesu akyidifo no Kristofo?

¹² Mpaebɔ mu a wofi de wɔn ho too Onyankopɔn so a sodikuw no “nyansa ne osuahu pa” ka ho boa maa tete Kristosom nyaa nkɔso. Ná nneɛma rekɔ so denam ɔsoro akwankyerɛ so. Sɛ nhwɛso no wɔkaa Yesu akyidifo a wodi kan no ho asɛm sɛ wɔnam “Ɔkwan No” so. (Asomafo no Nnwuma 9:1, 2) Nanso wɔ bɛyɛ 44 Y.B. mu wɔ Antiokia, Siria no, “wɔnam ɔsoro akwankyerɛ so too asuafo no din Kristofo.” (Asomafo no Nnwuma 11:26, NW) Eyi yɛ din a Onyankopɔn de maa wɔn, na wogye toom ntɛm ara.​—1 Petro 4:16.a

13. Sɛnea Yehowa Adansefo de nnɛyi akwan a wɔfa so tintim nhoma no di dwuma mprempren no, dɛn na tete Kristofo no de dii dwuma wɔ wɔn Ahenni asɛnka adwuma no mu?

¹³ Nneɛma afoforo nso kɔɔ so wɔ tete Kristofo no mu a na ɛnam ɔsoro akwankyerɛ so. Sɛ nhwɛso no, sɛnea Yehowa Adansefo de nnɛyi akwan horow a wɔfa so tintim nhoma no di dwuma mprempren no, saa ara na tete Kristofo no na wodii kan de nsaano nkyerɛwee dii dwuma​—biribi a ɛmaa wɔn Ahenni asɛnka adwuma a wɔyɛɛ no nnam so no nyaa nkɔso ankasa. Ɛdefa eyi ho no, C. C. McCown kyerɛwee sɛ: “Kristofo nyamesom nhoma ahorow, Apam Dedaw ne nkyerɛwee foforo no nyinaa. . . nyɛ biribi a na adefo kenkan de gye wɔn ani. Adwumayɛfo a wɔyɛ adwumaden pɛe sɛ wɔde wɔn ho hyɛ nhoma ho asɛm no mu kɛse. Wɔne Kristofo asɛmpatrɛwfo mmɔdenbɔfo pɛe sɛ wɔbɛyɛ nea ɛbɛma wɔatumi adan akɔ adansesɛm biako anaa foforo so ntɛm ara a ɛho nhia sɛ wɔsan nhoma mmobɔwee tenten biara mu.”​—The Biblical Archaeologist Reader, kratafa 261.

14. Na Yesu asomafo no ho pere wɔn sɛ wɔbɛka asɛm wɔ tebea horow bɛn mu?

¹⁴ Sɛ́ ‘wobetumi adan akɔ adansesɛm biako anaa foforo so ntɛm ara’ yɛ nea na ɛho hia kɛse esiane ɔkwan a tete Kristofo no faa so kaa Ahenni no ho asɛm no nti. Ɛwom, na ɛtɔ bere bi a wodi nkurɔfo adanse bɔnnɔ so te sɛ nea Yehowa Adansefo taa yɛ nnɛ no. Wɔaka wɔ eyi ho sɛ: “Ade biako a ɛda nsow wɔ asomafo asɛnka no ho ne bɔnnɔ so de no. Ɔsomafo biara antwɛn sɛ obenya hokwan kɛse bi ansa. Bere koro pɛ a wɔka ho asɛm ne bere a, te sɛ Paulo wɔ Felike anim no, wɔde no kɔɔ sodifo a ɔfura ɔtan kɔkɔɔ anim sɛ ɔnka n’ankasa ho asɛm na onyi ne ho ano wɔ anototo a ɛfa mmara so bu ho no. Ɛnyɛ nea ne werɛ fii hokwan ahorow no, mmom no ɔde dii dwuma wɔ afiase, kwankyɛn, ne wɔ ahiafo fie a ebia ɔkɔsoɛe anadwo no mu. . . . Ɔtee nka sɛ n’asɛm no yɛ nea ɛsɛ sɛ nnipa nkorɛnkorɛ te, ɛwom sɛ na wasiesie ne ho sɛ ɔbɛda no adi akyerɛ nnipakuw de. Onim nea ɛsɛ sɛ ɔka kyerɛ atiefo biara. Ne werɛ amfi Kristo nhwɛso no, . . . a na beae a ɔwɔ ne atempɔn so, anaa borɔn a adagyew nni so so, anaa Yudafo Galilea mpoano . . . [Asomafo no] werɛ amfi sɛ wɔ wɔne no fekubɔ a edi kan mu no ɔmaa wɔn akwankyerɛ atitiriw a ɛfa ɔkwan a eye sen biara a wɔbɛfa so aka ne nkyerɛkyerɛ no ho asɛm ho, na ɔde adesua foforo hyɛɛ nea edi kan no mu den, na ansa na ɔreforo akɔ soro no, ɔde wiase no kyerɛɛ wɔn sɛ wɔn afuw, ne abɔde biara sɛ nea ɛsɛ sɛ wɔyɛ ne ho adwuma.”​—History of the Christian Church a John F Hurst kyerɛwee no po I, kratafa 96.

‘Wɔ Afie Afie Mu’

15. Ɔkwan bɛn so na asomafo no yɛɛ asɛnka adwuma no wɔ nna a edii Pentekoste 33 Y.B. akyi no mu?

¹⁵ Wɔ nna a edi Pentekoste 33 Y.B. akyi no mu no, na Yesu asuafo no nam ɔkwan a eye sen biara so reka “asɛmpa” no dedaw. Bere a wɔagu asomafo a wɔretaa wɔn no anim ase esiane Yesu Kristo din nti akyi no, dɛn na wɔyɛe? Ɛdɛn, “wɔannyae Yesu Kristo ho asɛmpa no ka ne kyerɛkyerɛ asɔrefi ne afie mu da biara.” (Asomafo no Nnwuma 5:41, 42) Yiw, asomafo no dii adanse wɔ afie afie.

16. Asɛnka adwuma bɛn na Paulo de ho ntetee maa mpanyimfo a wɔwɔ Efeso no?

¹⁶ Akyiri yi, ɔsomafo Paulo tumi kaee mpanyimfo a wɔapaw wɔn wɔ Efeso no sɛ: “Mansiw nea ɛyɛ mfaso mu biara no, sɛ ebia merenka menkyerɛ mo, na mekyerɛkyerɛ mo gua so ne afi mu, na midii Onyankopɔn fam adwensakra ne Awurade Yesu Kristo mu gyidi ho adanse mekyerɛɛ Yudafo ne Helafo.” (Asomafo no Nnwuma 20:20, 21) Na Paulo nkyerɛ sɛ ɔkyerɛkyerɛ mpanyimfo a wɔapaw wɔn no wɔ wɔn afi mu. Mmom no, na odi Yehowa Nyankopɔn fam adwensakra ne Yesu Kristo mu gyidi ho adanse kyerɛ Yudafo ne Helafo a wonnye nni no. Akyinnye biara nni ho sɛ Paulo kyerɛkyerɛɛ saa mpanyimfo yi nso sɛnea wodi adanse wɔ afi mu.

17. Dɛn na nhomanimfo ahorow aka wɔ Paulo afie afie som adwuma wɔ Efeso no ho?

¹⁷ Ɛdefa ɔsomafo no som adwuma wɔ Efeso ho no, wɔaka sɛ: “Nea na Paulo taa yɛ ne sɛ ɔbɛyɛ ne nsaano adwuma no fi anɔpa kosi 11 a.m. (Asomafo no Nnwuma 20:34-35) a ebedu saa bere no na Tirano awie ne nkyerɛkyerɛ no; afei efi 11 a.m. kosi 4 p.m. no, ɔkyerɛkyerɛ wɔ asa no so hɔ, ɔne aboafo yɛ nhyiam ahorow na ɔne afoforo kasa wɔ kokoam, ɔyɛ du a obedu akyiri no ho nhyehyɛe; afei awiei koraa no, ɔyɛ afie afie asɛnka adwuma a efi 4 p.m. kosi anadwo (Asomafo no Nnwuma 20:20-21, 31) .” (A. E. Bailey) Nhomanimfo afoforo kae sɛ: “Ná ɛnyɛ nea ɔpɛ ara ne sɛ ɔbɛkasa akyerɛ nnipa a wɔahyiam wɔ gua so, mmom no ɔde nnamyɛ yɛɛ n’adwuma kɛse no wɔ kokoam ne afie afie mu, na ɔde ɔsoro nokware no maa Efesofo no wɔ ɔkwan a wɔbɛte ase na adu wɔn komam so.” (A. A. Livermore) “Ɔkaa asɛmpa no wɔ gua so ne afi mu wɔ kurow ne wɔ amantam no nyinaa mu.” (E. M. Blaiklock) “Ɛyɛ nea wotumi hyɛ no nsow sɛ asɛnkafo mu ɔkɛse yi kaa asɛm wɔ afi mu na wamma ne nsrahwɛ ahorow no anyɛ fekubɔ ara kwa.”​—A. T. Robertson.

18. (a) Dɛn nti na wobɛka sɛ Yehowa Adansefo afie afie som adwuma no wɔ Kyerɛwnsɛm mu nnyinaso a ɛyɛ den? (b) Te sɛ Yesu ne n’asuafo a wodi kan no, ɛhefa ne ɔkwan bɛn so na Yehowa Adansefo ka Ahenni ho asɛm no?

¹⁸ Yesu asomafo no yɛɛ afie afie adansedi adwuma wɔ 33 Y.B. mu. Ná ɛyɛ Paulo som adwuma wɔ Efeso ne wɔ mmeae afoforo no fã. Enti Yehowa Adansefo afie afie som adwuma no wɔ Kyerɛwnsɛm mu nnyinaso a ɛyɛ den. Na eyi te saa ara wɔ akwan afoforo a wɔfaa so trɛw Ahenni ho asɛm no mu no ho. Nea ɛyɛ anigye no, McClintock ne Strong Cyclopedia no ka sɛ: “Yɛn Awurade no ne n’asomafo no hui sɛ wobetumi aka asɛm no wɔ baabiara a nnipa ahyiam. Wɔ bepɔw so, wɔ po ne nsubɔnten ahorow ano, borɔn so, nkurɔfo afi mu, Asɔrefi no abrannaa so, Yudafo hyiadan mu, ne mmeae afoforo pii a wohui sɛ wobetumi abɔ asɛmpa no dawuru wɔ hɔ.” (Po VIII, kratafa 483) Te sɛ Yesu ne n’asuafo a wodi kan no, Yehowa Adansefo ka Ahenni ho asɛm no wɔ “mmorɔn so, nkurɔfo afie mu, . . . ne mmeae afoforo pii.” Sɛ nhwɛso no, (wɔde nsɛmma nhoma yi ne ne hokafo, Nyan! no) yɛ nsɛmma nhoma adwuma wɔ borɔn so na wonim wɔn titiriw wɔ afie afie adansedi adwuma no ho.

19. Ɔkwan bɛn so na wosisi gyinae ahorow a ɛfa akwan a Yehowa Adansefo fa so yɛ asɛnka adwuma no nnɛ no ho?

¹⁹ Akwan atitiriw a Yehowa Adansefo fa so yɛ ɔsom adwuma no nnɛ no yɛ nea wɔde sii hɔ pintinn wɔ afeha a edi kan no mu, na wɔ eyi akyi no, ɛyɛ nea eye sɛ nnɛyi sodikuw a wɔyɛ Kristofo a wɔasra wɔn no besi gyinae wɔ ɔkwan a eye ma asɛnka adwuma no wɔ bere yi mu ho. Gyinaesi ahorow a ɛte sɛɛ fã bi betumi ayɛ nea egyina mmarima yi “nyansa ne osuahu pa” so. Nanso sɛnea ɛho hia titiriw no, wosisi gyinae ahorow te sɛ nea afeha a edi kan Kristofo sodikuw yɛe no. Wɔhwehwɛ Onyankopɔn akwankyerɛ ne ne honhom kronkron no mmoa wɔ mpaebɔ mu na wodi Kyerɛwnsɛm mu nhwɛso ahorow akyi bere a wosi gyinae wɔ ɔkwan a eye sen biara a wɔbɛfa so ayɛ asɛnka adwuma no wɔ “nna a edi akyiri” yi mu ho no.​—2 Timoteo 3:1; Asomafo no Nnwuma 15:23, 28.

20. (a) Dɛn nti na yebetumi agye atom sɛ Onyankopɔn pene ɔkwan a Yehowa adansefo fa so ka asɛm no so?(b) Su bɛn na ɛsɛ sɛ Yehowa asomfo nyinaa nya wɔ Ahenni asɛnka adwuma no ho?

²⁰ Ɛda adi sɛ ɔkwan a Yehowa Adansefo fa so yɛ asɛnka adwuma no yɛ nea ɛnam ɔsoro akwankyerɛ so, efisɛ Onyankopɔn ama mmɔdenbɔ yi ayɛ yiye kɛse na wɔanya nhyira pii. (Mmebusɛm 10:22) Nnipadɔm pii regye nokware som atom na wɔde wɔn ho rebɔ Yesu akyidifo a wɔasra wɔn nkaefo no ho sɛ ahyehyɛde koro pɛ a ɛhyɛ Yehowa din kronkron no anuonyam na ɛde akokoduru ka Ahenni a wɔde asi hɔ wɔ soro no ho asɛmpa kyerɛ no fã. Enti ɛmmra sɛ Yehowa asomfo nyinaa bɛkɔ so ayere wɔn ho wɔ asuafoyɛ adwuma no mu bere a nhyehyɛe yi bɛn n’awiei no. Ɛsɛ sɛ yɛyɛ eyi wɔ nokwaredi mu, efisɛ akyinnye biara nni ho sɛ nokware Kristofo yɛ Ahenni asɛnkafo.

[Ase hɔ asɛm]

Wo Ntease Ne Dɛn?

◻ Dɛn nti na ɛsɛ sɛ wɔka Ahenni ho asɛm no wɔ asase so nyinaa mprempren?

◻ Nokware Kristofo nyinaa adwuma titiriw ne dɛn?

◻ Dɛn nti na wobetumi aka sɛ wɔ Yehowa asomfo mu no, nneɛma kɔ so wɔ ɔsoro akwankyerɛ ase?

◻ Yehowa Adansefo afie afie asɛnka adwuma no wɔ nnyinaso a ɛyɛ den bɛn?

[Kratafa 9 mfoni]

Yesu ka kyerɛɛ n’akyidifo sɛ: ‘Monkɔ nkɔyɛ asuafo.’ So wode nnamyɛ reyɛ nokware Kristofo nyinaa adwuma titiriw yi?

[Kratafa 11 mfoni]

So wudi adanse wɔ afie afie daa? Yesu asomafo a wodi kan no yɛɛ saa. Na saa ara na Ahenni dawurubɔfo Paulo a ɔyɛ nnam no yɛe