Bible Nhoma a Ɛto So 45—Romafo

Nea Ɔkyerɛwee: Paulo

Beae a Ɔkyerɛw No: Korinto

Bere a Ɔkyerɛw Wiei: Bɛyɛ 56 Y.B.

YEHUI wɔ Asomafo Nnwuma no mu sɛ Paulo a na ɔtan Yudafo Kristofo no abɛyɛ Kristo somafo, na ɔde ahokeka ka asɛmpa no kyerɛ amanaman mufo. Farisini a wabɛyɛ Onyankopɔn somfo nokwafo yi nam honhom kronkron so kyerɛw Bible nhoma 14, na Romafo nhoma no na yedi kan hu. Bere a Paulo kyerɛw Romafo nhoma no, na wawie asɛmpatrɛw akwantu tenten abien, na na wahyɛ nea ɛto so abiɛsa no ase adu akyiri. Ná wakyerɛw nhoma anum a edidi so yi dedaw: Tesalonikafo Nhoma a Edi Kan ne nea Ɛto So Abien, Galatifo nhoma, ne Korintofo Nhoma a Edi Kan ne nea Ɛto So Abien. Nanso Bible a ɛwɔ hɔ nnɛ mu no, Romafo nhoma no ba ansa na ne nhoma a aka no aba. Ɛyɛ ne kwan so, efisɛ Paulo kaa asɛmpa no kyerɛɛ Yudafo ne amanaman mufo nyinaa, na Romafo nhoma no ma yehu no pefee sɛ afei de, akuw abien no nyinaa yɛ pɛ. Nhoma no kyerɛkyerɛ mu sɛ nsakrae baa sɛnea Onyankopɔn ne ne nkurɔfo di mu. Ɛma yehu sɛ na Hebri Kyerɛwnsɛm no aka ato hɔ dedadedaw sɛ wɔbɛka asɛmpa no akyerɛ amanaman mufo nso.

² Paulo nam Tertio so kyerɛw nsɛm a ɛtɔ asom ne Hebri Kyerɛwnsɛm no mu nsɛm pii wɔ Kristofo Hela Kyerɛwnsɛm no nhoma a tumi wom yi mu. Ɔde nsɛm a wanwene no yiye kyerɛkyerɛɛ mu sɛ ɔhaw bi sɔree wɔ tete Kristofo asafo no mu, bere a Yudafo ne Helafo nyinaa baa asafo no mu no. Esiane sɛ na Yudafo no yɛ Abraham asefo nti, yebetumi aka sɛ na wɔn ho hia sen Helafo anaa? Sɛ obi yɛ Kristoni a ne ho akokwaw na ɔmma Mose Mmara no nkyekyere no bio a, so na obetumi ato ne nuanom Yudafo a wɔyɛ mmerɛw na wɔda so kura tete amammerɛ mu no hintidua? Paulo kaa no pen wɔ nhoma yi mu sɛ Yudafo ne amanaman mufo nyinaa yɛ pɛ wɔ Onyankopɔn anim, na ɛnyɛ Mose Mmara no na ɛma obi yɛ ɔtreneeni; Yesu Kristo mu gyidi ne Onyankopɔn adom na ɛma obi yɛ ɔtreneeni. Ɔkae nso sɛ Onyankopɔn hwehwɛ sɛ Kristofo brɛ wɔn ho ase ma atumfoɔ a wodi wɔn so no sɛnea ɛfata.

³ Ɛyɛɛ dɛn na wɔtew Roma asafo no? Bere a Pompey ko faa Yerusalem wɔ 63 A.Y.B. no, na Yudafo pii wɔ Roma. Asomafo Nnwuma 2:10 si no pi sɛ na Yudafo yi bi wɔ Yerusalem, Pentekoste 33 Y.B., na wɔtee sɛ wɔreka asɛmpa no wɔ hɔ. Akwantufo a na wɔasakra yi traa Yerusalem maa asomafo no kyerɛkyerɛɛ wɔn. Akyiri yi wɔn a wofi Roma bae no san kɔe. Ɛbɛyɛ sɛ bere a wohyiaa ɔtaa wɔ Yerusalem no na ebinom san kɔe. (Aso. 2:41-47; 8:1, 4) Afei nso, saa bere no, na nkurɔfo pɛ akwantu paa. Gyama ɛno nti na na Paulo nim Roma asafo no mu nnipa bebree no. Ebetumi aba sɛ wɔn mu bi tee asɛmpa no wɔ Hela anaa Asia bere a Paulo kaa asɛm no wɔ hɔ no.

⁴ Paulo nhoma yi mu na yehu asafo yi ho nokwasɛm a edi kan. Ɛma emu da hɔ sɛ na Yudafo ne amanaman mufo nyinaa wɔ Kristofo asafo yi mu, na na wɔbɔ mmɔden paa. Ɔka kyerɛɛ wɔn sɛ: “Wɔka mo gyidi ho asɛm wɔ wiase mmaa nyinaa,” na “Obiara ahu mo asoɔmmerɛw no.” (Rom. 1:8; 16:19) Suetonius kyerɛwee bɛyɛ mfe 1,800 ni sɛ, bere a Klaudio di ade (41-54 Y.B.) no, wɔpam Yudafo no fii Roma. Nanso wɔsan kɔɔ hɔ akyiri yi efisɛ wɔka sɛ na Akwila ne Priskila wɔ Roma. Akwila ne Priskila yɛ Yudafo a Paulo hyiaa wɔn wɔ Korinto. Mmara a Klaudio hyɛe no nti, wofii Roma nanso bere a Paulo kyerɛw ne nhoma no kɔmaa asafo a ɛwɔ Roma no, na wɔwɔ hɔ.—Aso. 18:2; Rom. 16:3.

⁵ Biribiara di adanse sɛ nhoma no mu nsɛm yɛ nokware. Nhoma no mu nsɛm a edi kan kenkan sɛ, “Paulo, Yesu Kristo akoa a wɔfrɛɛ no sɛ ɔmmɛyɛ ɔsomafo . . . de kɔma wɔn a wɔwɔ Roma sɛ Nyankopɔn adɔfo a wɔafrɛ wɔn abɛyɛ akronkronfo nyinaa.” (Rom. 1:1, 7) Kristofo Hela Kyerɛwnsɛm mu nhoma a animdefo gye tom no, Romafo nhoma no ka nea edi kan paa no ho. Romafo nhoma no dii bɛyɛ mfe asia anaa awotwe ansa na Petro rekyerɛw ne nhoma a edi kan no. Petro nsɛm no pii te sɛ Romafo nhoma no mu nsɛm, ma enti nhomanimfo bebree adwene yɛ wɔn sɛ Petro hwɛɛ mu ansa na ɔrekyerɛw ne de no. Nkurɔfo gye toom pefee sɛ Romafo nhoma no ka nhoma a Paulo kyerɛwee no ho. Clement a ofi Roma, Polycarp a ofi Smirna, ne Ignatius a ofi Antiokia a wɔtraa ase bɛboro mfe 1,800 ni no nyinaa kae sɛ Paulo na ɔkyerɛw nhoma no.

⁶ Yehu Romafo nhoma no ne nhoma foforo awotwe a Paulo kyerɛwee wɔ nsaano nkyerɛwee bi a wɔfrɛ no Chester Beatty Papyrus No. 2 (P⁴⁶) mu. Sir Frederic Kenyon kaa tete nsaano nkyerɛwee yi ho asɛm sɛ: “Afei de, aka kakraa bi na yɛanya Paulo nhoma no nyinaa ho nsaano nkyerɛwee a wɔkyerɛwee bɛyɛ mfe 1,700 ni no.”a Chester Beatty Hela Bible nsaano nkyerɛwee ahorow no akyɛ sen Sinaitic Manuscript ne Vatican Manuscript No. 1209 a wɔkyerɛw ne nyinaa bɛboro mfe 1,600 ni no. Romafo nhoma no wɔ eyinom nso mu.

⁷ Bere bɛn na wɔkyerɛw Romafo nhoma no, na ɛhe na wɔkyerɛw no? Bible ho animdefo nyinaa yɛ adwene sɛ Paulo kyerɛw ne nhoma no wɔ Helafo kurow Korinto mu. Wɔkyerɛ sɛ bere a okodii asram kakra wɔ Korinto, ɛrekɔ n’asɛmpatrɛw akwantu a ɛto so abiɛsa no awiei na ɔkyerɛwee. Nhoma no mu nsɛm di adanse sɛ ɔkyerɛw no wɔ Korinto. Ná Gaio wɔ Korinto asafo no mu, na ne fie na Paulo kyerɛw nhoma no. Paulo kamfoo Foibe a na ɔwɔ Kenkrea asafo mu no, na na ɛhɔ yɛ Korinto hyɛn gyinabea. Ɛbɛyɛ sɛ Foibe na ɔde nhoma no kɔɔ Roma. (Rom. 16:1, 23; 1 Kor. 1:14) Paulo kyerɛwee wɔ Romafo 15:23 sɛ: ‘Seesei minni asasesin bi bio a menyɛɛ mu adwuma.’ Ɔkae wɔ nkyekyɛm a edi hɔ no mu sɛ ɔpɛ sɛ ɔkɔyɛ asɛmpatrɛw adwuma no bi nso wɔ Spania wɔ atɔe fam. Ná obetumi aka saa wɔ 56 Y.B. mfiase bere a ɔreyɛ awie n’asɛmpatrɛw akwantu a ɛto so abiɛsa no.

NEA ENTI A MFASO WƆ SO

²⁰ Romafo nhoma no ma yehu nea enti a ɛsɛ sɛ yegye Onyankopɔn di. Ɛka sɛ: “Ne su horow a wonhu no ada adi pefee fi wiase bɔ so, efisɛ wɔnam nneɛma a wayɛ so na ehu, ɛno ne ne daa tumi ne ne Nyamesu.” Nea ɛsen saa no, ɛma yehu Onyankopɔn trenee ne ne mmɔborohunu kɛse ne n’adom. Ɔde ngodua yɛɛ mfatoho de kyerɛkyerɛɛ mu kamakama. Ɔkyerɛe sɛ wobubuu nnubaa no bi fii so de wuram ngodua bɛtɛw mu. Paulo dwennwenee Onyankopɔn atemmu ne n’adom yi ho, na ɔkae sɛ: “O hwɛ sɛnea Onyankopɔn ahonya ne nyansa ne nimdeɛ mu dɔ fa! Hwɛ sɛnea wontumi mpɛɛpɛɛ n’atemmu mu, na wɔrentumi nhwehwɛ n’akwan mu nwie da!”—1:20; 11:33.

²¹ Saa asɛm yi nti, Romafo nhoma no kyerɛkyerɛ sɛnea Onyankopɔn ahintasɛm kronkron no da adi mu. Afei de nsonsonoe biara nna Yudani ne amanaman muni ntam wɔ Kristofo asafo no mu. Ɔman biara mu nnipa betumi afa Yesu Kristo so anya Yehowa adɔe no bi. “Onyankopɔn nhwɛ nnipa anim.” “Yudani ne nea ɔte saa wɔ ne mu, na ne twetiatwa nso yɛ komam de denam honhom so, na ɛnyɛ mmara a wɔakyerɛw so.” “Nsonsonoe biara nni Yudani ne Helani ntam, efisɛ Awurade koro no ara na odi obiara so, nea ɔyɛ ɔdɛɛfo ma wɔn a wɔfrɛ no nyinaa no.” Gyidi na ɛma Yudafo ne Helafo nyinaa bɛyɛ atreneefo, na ɛnyɛ nnwuma.—2:11, 29; 10:12; 3:28.

²² Afotu pa a ɛwɔ nhoma a wɔkyerɛw kɔmaa Kristofo a wɔwɔ Roma no mu no, mfaso wɔ so ma Kristofo nnɛ efisɛ wɔte wiase yi mu sɛ ahɔho na wɔn nso hyia ɔhaw te sɛ tete Kristofo no. Otuu Kristofo fo sɛ wɔne “nnipa nyinaa ntra asomdwoe mu,” na wɔn a wonni asafo no mu nso ka ho. Ɔkra biara “mmrɛ ne ho ase nhyɛ atumfoɔ a wɔkorɔn no ase,” efisɛ ɛyɛ Onyankopɔn nhyehyɛe. Atumfoɔ no ho nyɛ hu mma wɔn a wodi mmara so, na mmom, wɔn ho yɛ hu ma wɔn a wɔyɛ bɔne. Ɛsɛ sɛ Kristofo di mmara so, ɛnyɛ sɛ wosuro asotwe, na mmom wɔn ahonim nti. Enti wotua tow, wɔde nea ɛsɛ obiara ma no, na wɔyɛ wɔn asɛde nyinaa. Wɔnne obiara ka gye ‘ɔdɔ a wɔde dodɔ wɔn ho.’ Ɔdɔ ne Mmara no awiei.—12:17-21; 13:1-10.

²³ Paulo sii so dua sɛ yɛmpae mu nka asɛm no. Koma na wɔde gye di kɔ trenee mu, na ano na wɔde pae mu ka kɔ nkwagye mu. “Obiara a ɔbɔ Yehowa din no, wobegye no nkwa.” Nanso ansa na eyi bɛyɛ yiye no, ɛsɛ sɛ asɛmpakafo kɔka “nneɛma pa ho asɛmpa.” Sɛ yɛka asɛmpakafo a wɔn nne du “asase ano” yi ho a, yɛn ani begye! (10:13, 15, 18) Na sɛ yebetumi aka asɛmpa no yiye a, ɛsɛ sɛ yesua Kyerɛwnsɛm a wɔde honhom kyerɛwee no yiye te sɛ Paulo, efisɛ ti biako pɛ yi mu no (10:11-21), ɔfaa Hebri Kyerɛwnsɛm no mu nsɛm pii kae. (Yes. 28:16; Yoel 2:32; Yes. 52:7; 53:1; Dw. 19:4; Deut. 32:21; Yes. 65:1, 2) Enti na obetumi aka sɛ: “Biribiara a wɔakyerɛw ato hɔ no, wɔakyerɛw ama yɛn nkyerɛkyerɛ, na yɛnam yɛn boasetɔ ne Kyerɛwnsɛm no mu awerɛkyekye so anya anidaso.”—Rom. 15:4.

²⁴ Ɔmaa yɛn afotu a ɛbɛboa yɛn ma yɛahu sɛnea yɛne afoforo bɛtra Kristofo asafo no mu. Ɛmfa ho ɔman a obi fi so, abusua a ɔbɔ anaa dibea a ɔwɔ no, ɛsɛ sɛ obiara sakra n’adwene na ɔde ɔsom kronn ma Onyankopɔn sɛnea ne “pɛ a eye na ɛsɔ ani na edi mu” no te. (11:17-22; 12:1, 2) Hwɛ sɛnea ntease kɛse wɔ Paulo afotu a ɛwɔ Romafo 12:3-16 no mu! Eyi yɛ afotu pa a ebetumi aboa obiara ma wayɛ hyew, abrɛ ne ho ase na wada ɔdɔ adi wɔ Kristofo asafo no mu. Nhoma no rekɔ awiei no, Paulo de afotu a emu yɛ hyew ma yɛn sɛ yɛnhwɛ yɛn ho yiye na yɛntwe yɛn ho mfi wɔn a wɔde mpaapaemu ba ho. Ɔsan kaa anigye ne biakoyɛ a ɛba bere a yenya fekubɔ pa wɔ asafo no mu no ho asɛm.—16:17-19; 15:7, 32.

²⁵ Esiane sɛ yɛyɛ Kristofo nti, ɛsɛ sɛ yɛhwɛ yɛne yɛn nuanom fekubɔ yiye, efisɛ “Onyankopɔn ahenni nyɛ adidi ne ɔnom, na mmom ɛyɛ trenee ne asomdwoe ne anigye denam honhom kronkron so.” (14:17) “Kristo mfɛfo adedifo” no na saa trenee ne asomdwoe ne anigye yi yɛ wɔn dea titiriw. Wɔahyɛ ‘wɔne no anuonyam’ wɔ ɔsoro Ahenni mu. Afei nso, Romafo nhoma no ma yehu sɛ Onyankopɔn bɛyɛ ade foforo bi de ama Ahenni no ho bɔ a ɔhyɛe wɔ Eden no aba mu. Ɔkae sɛ: “Onyankopɔn a ɔma asomdwoe no bɛpɛkyɛ Satan mo nan ase ntɛm.” (Rom. 8:17; 16:20; Gen. 3:15) Esiane sɛ yegye nokwasɛm atitiriw yi di nti, momma yɛnkɔ so mma anigye ne asomdwoe nyinaa nhyɛ yɛn ma, na yennya anidaso bebree. Momma yɛnyɛ yɛn adwene sɛ yɛne Ahenni no Aseni no bedi nkonim, efisɛ yegye di yiye sɛ nea ɛwɔ ɔsoro anaa asase yi so anaa “abɔde foforo biara rentumi ntew yɛn mfi Nyankopɔn dɔ a ɛwɔ yɛn Awurade Kristo Yesu mu no ho.”—Rom. 8:39; 15:13.

[Ase hɔ asɛm]