So Wudi Wɔn Ni?

BERE a wɔboaboaa Afrikafo ano te sɛ mmoa de wɔn siee baabi a ɛhɔ yɛ fĩ na ɛhɔ bɔn paa no, wɔde wɔn faa po so kɔɔ Amerika te sɛ nnosoa bi. Ná wɔhwɛ kwan sɛ anyɛ yiye koraa no, wɔn mu fã bewuwu ansa na wɔadu nea wɔrekɔ mpo. Wɔtetew mmusua mu atirimmɔden so a na wɔrenhu wɔn ho wɔn ho bio. Aninyanne a nnipa de yɛɛ ne yɔnko nnipa a na enye koraa wɔ abakɔsɛm mu sen biara no biako ne nkoatɔn. Nsɛm a ɛte saa sisii bere a atumfo anuɔdenfo hyɛɛ ɔmamfo a wonni ahobammɔ so atirimɔden so no.

Obi anuonyam a wogye fi ne nsam no betumi ayɛ yaw asen sɛ wɔbɛbobɔ no akuturuku. Ekum nnipa honhom. Ɛwom sɛ wɔagu nkoatɔn wɔ aman dodow no ara mu de, nanso di a wonni nnipa ni no da so ara kɔ so, ebia wɔ anifere kwan so.

Nea ɛne eyi bɔ abira no, nokware Kristofo bɔ mmɔden sɛ wobedi Yesu Kristo ahyɛde a ese ‘wɔnnɔ wɔn yɔnko sɛ wɔn ho’ no so. Ne saa nti, wobisa wɔn ho sɛ, ‘So midi afoforo ni?’—Luka 10:27.

Nidi Ho Nhwɛso

Sɛnea nsɛm asekyerɛ nhoma bi kyerɛ no, nidi yɛ su anaa tebea a ɛma obi te nka sɛ ne ho hia, ɔwɔ anuonyam, anaa wobu no. Hwɛ sɛnea ɛfata Amansan Hene, Yehowa Nyankopɔn dibea! Nokwarem no, Kyerɛwnsɛm no taa de nidi bata Yehowa ne ne tumidi ho. Mose, Yesaia, Hesekiel, Daniel, ɔsomafo Yohane, ne afoforo nyaa hokwan huu Ɔsorosoroni no ne ne soro abangua wɔ anisoadehu mu, na nkyerɛkyerɛmu a wɔde mae no nyinaa da anuonyam ne nidi a ɛyɛ nwonwa adi. (Exodus 24:9-11; Yesaia 6:1; Hesekiel 1:26-28; Daniel 7:9; Adiyisɛm 4:1-3) Wɔ ayeyi mpaebɔ bi mu no, Ɔhene Dawid kae sɛ: “Wo [Yehowa, NW] na kɛseyɛ ne mmaninyɛ ne anuonyam ne nimdi ne aseda wɔ wo, na nea ɛwɔ ɔsoro ne asase so nyinaa wɔ wo.” (1 Beresosɛm 29:11) Ɛyɛ ampa sɛ, obiara nni hɔ a ɔfata anuonyam ne obu sen Yehowa Nyankopɔn ankasa.

Ɛdenam bɔ a Yehowa bɔɔ nipa wɔ ne suban so sɛ ne sɛso so no, ɔde fata a onipa fata, obu, ne nidi bɔɔ no. (Genesis 1:26) Enti wɔ yɛne afoforo nsɛnnii mu no, ɛho hia sɛ yɛde nidi ne obu a ɛsɛ ma obiara. Sɛ yɛyɛ saa a, na ɔkwan bi so no, yɛrekyerɛ sɛ yegye nnipa nidi Fibea, Yehowa Nyankopɔn tom.—Dwom 8:4-9.

Nidi Wɔ Abusua Nkitahodi Mu

Honhom kaa ɔsomafo Petro a na ɔyɛ ɔwarefo no ma otuu Kristofo okununom fo sɛ ‘wonnni wɔn yerenom ni sɛ ade a ne ho nyɛ den.’ (1 Petro 3:7; Mateo 8:14) Ɔsomafo Paulo tuu fo sɛ: “Na ɔyere de, ɔmfɛre ne kunu.” (Efesofo 5:33) Enti, wɔ aware mu no, nidi ne obu a obi bɛkyerɛ ama ne hokafo no yɛ Bible ahwehwɛde. Akwan bɛn so na wobetumi akyerɛ eyi?

Sɛnea nsu ma dua a ɛrenyin ahoɔden no, saa ara na kasa a ɛyɛ dɛ a okunu ne ɔyere ka kyerɛ wɔn ho wɔn ho ne ayamye a woyi no adi kyerɛ wɔn ho wɔ baguam ne fie no betumi ama wɔn ntam abusuabɔ atu mpɔn. Nea ɛne no bɔ abira no, atɛnnidi anaa kasafĩ, ne nsɛm a ɛhyɛ aniwu a yɛtaa te wɔ TV so agodie ahorow mu no, sɛe ade. Etumi de atenka a ɛsɛe ade a ɛma obi susuw sɛ ne ho nhia ba, ɛma onya adwenemhaw, ne menasepɔw; ebetumi de nkate fam yaw a ne ko yɛ den aba.

Afoforo a yebedi wɔn ni no kyerɛ nso sɛ yebegye wɔn atom sɛnea wɔte, na yɛmmɔ mmɔden sɛ yɛbɛma wɔayɛ wɔn ade wɔ ɔkwan kyenkyenee bi a yɛpɛ so, anaa yɛde wɔn bɛtoto afoforo ho sɛnea ɛnsɛ. Eyi ho hia, titiriw wɔ okununom ne ɔyerenom ntam. Sɛ nkɔmmɔbɔ kɔ so na obiara tumi kyerɛ n’adwene a onsuro sɛ ɔfoforo bɛkasa atia anaa obebu no animtiaa a, wobenya ayɔnkofa a etu mpɔn. Sɛ obi ankasa tumi fi ne pɛ mu yɛ ade wɔ aware mu a, ɛno ansa na ofie tumi yɛ guankɔbea fi wiase a atirimmɔden ne kateeyɛ ahyɛ mu ma no ho.

Kyerɛwnsɛm no hyɛ mmofra sɛ wonni wɔn awofo ni na wontie wɔn. Saa ara nso na awofo a wonim nyansa na wɔwɔ ɔdɔ no bɛbɔ mmɔden sɛ wobedi wɔn mma ni. Suban pa ho nkamfo a efi ɔdɔ mu, ne nteɛso a wɔde ma wɔ boasetɔ mu bere a ɛsɛ no, boa ma wɔhyɛ ‘Yehowa nyansakyerɛ’ mu den. Kasa a wɔbɛkasa atia wɔn bere nyinaa, nkekawmu, ne nsɛm a ɛhyɛ aniwu a wɔka te sɛ “kwasea” anaa “ogyimfo,” bɛhyɛ wɔn abufuw kɛkɛ.—Efesofo 6:4.

Kristoni ɔpanyin bi a ɔyɛ agya a ɔretete mmabarima baasa ne mmabea baasa, ka sɛ: “Ɛyɛ a yɛde nteɛso a ehia ma wɔ Ahenni Asa so, a obiara nte. Ná prɛ a yɛbɛprɛ obi, anaa hwɛ a yɛbɛhwɛ n’anim anibere so no ara taa dɔɔso. Sɛ nteɛso a anibere wom ho hia a, yɛde ma wɔ yɛn fie a mmofra afoforo no nhu. Mprempren a mmofra no anyin no, yegyina Onyankopɔn Asɛm mu afotu a efi ɔdɔ mu na nyansa wom no so teɛ obiara so sɛnea ne tebea hwehwɛ. Yɛbɔ mmɔden sɛ yɛrenna kokoam nsɛm adi wɔ nsɛm a ɛtete sɛɛ mu, na yɛnam saayɛ so kyerɛ obu ma hokwan a abofra biara wɔ sɛ wɔkora ne nsɛm so na wodi no ni no.”

Nea ɛnsɛ sɛ yebu ani gu so ne hia a ehia sɛ wɔda suban pa adi wɔ kasa ne nneyɛe mu wɔ abusua no mu. Ɛnsɛ sɛ nim a yenim yɛn ho no ma yɛkwati sɛ yɛde nsɛm te sɛ “mepa wo kyɛw,” “meda wo ase,” ne “mesrɛ wo,” bedi dwuma. Suban pa yɛ ade titiriw wɔ di a obi bedi ne ho ni na wakyerɛ obu ama afoforo no ho.

Wɔ Kristofo Asafo no Mu

Yesu kae sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome.” (Mateo 11:28) Wɔn a wɔhyɛ wɔn so, wɔn a wɔahaw, ne mmofra nkumaa mpo ani gye ho paa sɛ wɔbɛbɛn Yesu. Asɔfo ne akannifo ahantanfo a na wobu wɔn ho atreenefo no a na wɔwɔ hɔ saa bere no buu wɔn animtiaa. Nanso wɔ Yesu fam no, wonyaa obi a ɔde nidi a ɛsɛ wɔn maa wɔn.

Sɛ́ nnipa a yesuasua Yesu no, ɛsɛ sɛ yɛn nso yenya ɔpɛ sɛ yɛbɛma yɛn mfɛfo gyidifo anya ɔhome. Eyi kyerɛ sɛ yɛbɛhwehwɛ akwan bi de yɛn kasa ne nneyɛe ahyɛ wɔn den. Ɛfata sɛ bere nyinaa yefi ayamye mu ka nsɛm a eye na ɛda adwempa adi wɔ yɛn nkɔmmɔbɔ mu. (Romafo 1:11, 12; 1 Tesalonikafo 5:11) Bere a yɛhwɛ nea yɛka ne sɛnea yɛka yɛn nsɛm yiye no, yɛkyerɛ sɛ yesusuw afoforo nkate ho. (Kolosefo 4:6) Ntade ne ahosiesie a afata wɔ Kristofo nhyiam horow ase nso da nidi a ɛkɔ akyiri a yɛwɔ ma yɛn Nyankopɔn, ne som, ne yɛn mfɛfo asomfo adi.

Yesu dii afoforo ni, bere a na ɔresom wɔn no mpo. Wanhoahoa ne ho ankyerɛ afoforo anaa wangu wɔn anim ase da. Bere a kwatani bi baa Yesu nkyɛn bɛpɛɛ ayaresa no, wampam no sɛ ne ho ntew na ɔmfata, saa ara nso na wantwe adwene ansi ne ho so amma afoforo anhu. Mmom no, bere a ɔkwatani no srɛɛ Yesu sɛ, “Owura, sɛ wopɛ a, wubetumi ama me ho afi” no, Odii kwatani no ni bere a ɔkae sɛ, “Mepɛ” no. (Luka 5:12, 13) Hwɛ anigye ara a ɛyɛ sɛ, ɛnyɛ sɛ yɛbɛboa wɔn a ade ahia wɔn nko, na mmom yɛbɛma wɔn awerɛhyem nso sɛ wɔnyɛ nnosoa, na mmom yɛn ani gye wɔn ho na yɛdɔ wɔn! Wɔtaa bu ani gu wɔn a wɔfɛre ade, wɔahaw, na wɔadi dɛm no so, na wɔpow wɔn anaa wogu wɔn anim ase wɔ wiase. Nanso ɛsɛ sɛ wonya fekubɔ a edi mũ na wogye wɔn tom bere a wɔne wɔn nuanom mmarima ne mmea Kristofo bɔ no. Ɛsɛ sɛ yɛyɛ yɛn fam de de boa ma saa honhom no tra hɔ.

Yesu dɔɔ n’asuafo no sɛ “n’ankasa ne de,” na “ɔdɔɔ wɔn kosii ase” ɛmfa ho wɔn sintɔ ahorow ne wɔn nipasu a egu ahorow no. (Yohane 13:1) Ohui sɛ wɔn koma di mũ na wofi wɔn kra nyinaa mu na wɔsom N’agya. Saa ara nso na ɛnsɛ sɛ yenya yɛn mfɛfo asomfo ho adwemmɔne da esiane sɛ ebia wɔrenyɛ nneɛma sɛnea yɛhwɛ kwan, anaasɛ esiane sɛ ebia wɔn suban anaa wɔn nipasu ne yɛn de nhyia nti. Di a yebedi yɛn nuanom ni no bɛka yɛn ma yɛadɔ wɔn na yɛagye wɔn atom sɛnea wɔte biara, na yɛanya wɔn mu ahotoso sɛ wɔn nso wɔdɔ Yehowa na wɔde adwempa na ɛsom no.—1 Petro 4:8-10.

Mpanyimfo titiriw na ɛsɛ sɛ wɔhwɛ yiye na wɔanhaw wɔn a wɔde wɔn ahyɛ wɔn nsa sɛ wɔnhwɛ wɔn so no ɔkwan a ɛnsɛ so. (1 Petro 5:2, 3) Sɛ mpanyimfo ne asafo no muni bi a wayɛ bɔne rehyia a, ɛbɛyɛ papa sɛ wɔde ayamye ne tema bɛka wɔn nsɛm na amma wɔammisa nsɛm a ɛhyɛ aniwu sɛnea ɛnsɛ. (Galatifo 6:1) Sɛ mpo wɔde nkaanim anaa nteɛso a anibere wom rema a, ɛsɛ sɛ wɔkɔ so de nidi a ɛsɛ ɔdebɔneyɛfo no ma no na wɔkyerɛ obu ma no.—1 Timoteo 5:1, 2.

Di a Yɛbɛkɔ so Adi Yɛn Ho Ni

Esiane sɛ wɔbɔɔ yɛn wɔ Onyankopɔn suban so ne ne sɛso nti, ɛsɛ sɛ yɛbɔ mmɔden sɛ yɛbɛda Onyankopɔn su ahorow a ɛkorɔn—a n’anuonyam ka ho—no adi wɔ yɛn da biara da asetra mu. (Genesis 1:26) Saa ara na ntease a ɛwɔ ahyɛde “dɔ wo yɔnko sɛ wo ho” no akyi ne hia a ɛho hia sɛ yenya nidi ne obu kakra no. (Mateo 22:39) Nokwasɛm no ne sɛ sɛ yɛpɛ sɛ afoforo di yɛn ni na wobu yɛn a, ɛsɛ sɛ yɛkyerɛ sɛ ɛfata yɛn.

Ade biako a ehia na ama afoforo akɔ so ada obu ne nidi adi akyerɛ yɛn ne sɛ yebekura ahonim pa mu. Ɛyɛ mmerɛw koraa sɛ ahonim a asɛe ne afobu nka a obi te no bɛma wate nka sɛ ɔnsɛ hwee, apa abaw, na wanya adwenemhaw. Ne saa nti sɛ obi ayɛ bɔne a anibere wom a, ɛsɛ sɛ ɔyɛ ntɛm sakra na ɔhwehwɛ honhom mu mmoa fi asafo mu mpanyimfo hɔ sɛnea ɛbɛyɛ a obenya “ahodwo nna afi [Yehowa, NW] anim.” Nea ɛka ahodwo no ho ne nya a onii no bɛsan anya nidi ne obu no.—Asomafo no Nnwuma 3:20.

Enti, ɛyɛ papa sɛ yɛkɔ so bɔ mmɔden sɛ yɛbɛkora yɛn ahonim a wɔde Bible atete no no so, bere a yɛmma biribiara nkeka mu anaa ɛmmrɛ no ase no. Ahosodi a yɛbɛda no adi wɔ yɛn da biara da asetra mu biribiara mu—adidi, ɔnom, adwumayɛ, anigyede, yɛne wɔn a ɛsono wɔn bɔbeasu nkitahodi mu—no bɛboa yɛn ma yɛakura ahonim pa mu na ɛbɛma yɛatumi ada Onyankopɔn anuonyam ne nidi adi wɔ yɛn asetra mu.—1 Korintofo 10:31.

Na sɛ yɛn mfomso ho afobu ntumi mmrɛ ase nso ɛ? Anaasɛ sɛ ɛba sɛ yɛkɔ so di basabasa bi a wɔyɛɛ yɛn a yɛkae ho yaw nso ɛ? Eyinom betumi asɛe obu a yɛwɔ wɔ yɛn mu na ama yɛanya adwenemhaw. Hwɛ sɛnea Ɔhene Dawid nsɛm a ɛwɔ Dwom 34:18 no yɛ awerɛkyekye fa: “[Yehowa, NW] bɛn wɔn a wɔn koma abubu, na ogye wɔn a wɔn honhom apɛtɛw”! Yehowa ayɛ krado na ofi ne pɛ mu pɛ sɛ ɔwowaw n’asomfo, bere a ehia sɛ wogyina adwenemhaw ne te a wɔte nka sɛ wɔnsɛ hwee ano no. Abisade a wɔde bɛto n’anim ne mmoa a wɔbɛhwehwɛ afi wɔn a honhom fam no, wɔfata, te sɛ Kristofo awofo, asafo mu mpanyimfo, ne afoforo a wɔn ho akokwaw a wɔwɔ asafo no mu hɔ no ne ɔkwan pa a wobetumi afa so ahwehwɛ obu ne nidi a kan na wɔwɔ no.—Yakobo 5:13-15.

Nea ɛne no bɔ abira no, ehia sɛ yɛhwɛ yiye sɛ yebehu nsonsonoe a ɛda obu a obi hwehwɛ ne ahantan ntam. Kyerɛwnsɛm tu fo sɛ ‘ɛnsɛ sɛ yedwen tra nea ɛsɛ sɛ yedwen, na mmom yɛnnwen anidahɔ adwene, sɛnea Onyankopɔn asusuw gyidi akyekyɛ de ama obiara no.’ (Romafo 12:3) Bere a ɛyɛ papa sɛ yebebu yɛn ho no, ɛnsɛ sɛ yɛyɛ anuonyampɛ anaa yɛde obu a ɛsɛ sɛ obiara nya no kɔyɛ pɛsɛmenkominya anaa mmɔden a ɛtra so a ebinom bɔ de hwehwɛ nnipa anim dom no.

Yiw, afoforo a yebedi wɔn ni no yɛ Kristofo ahwehwɛde. Yɛn abusuafo ne yɛn mfɛfo Kristofo nyinaa fata na wɔsɛ sɛ yebu wɔn, na yedi wɔn ni. Yehowa ama yɛn mu biara nidi ne anuonyam a ɛsɛ sɛ yekura mu. Nanso nea ɛsen ne nyinaa no, ɛsɛ sɛ yɛkyerɛ obu a emu dɔ ma nidi ne tumi a ɛsen biara a yɛn soro Agya, Yehowa Nyankopɔn wɔ no.

[Kratafa 31 mfonini]

Mmofra betumi ada obu adi akyerɛ wɔn a wɔadi dɛm no