Wɔyɛɛ Yehowa Apɛde

Ɔbea Nyansafo Bi Sianka Asiane

ƆBEA nyansafo bi waree ɔbarima huhuni bi—saa na na Abigail ne Nabal tebea te. Na Abigail “wɔ adwempa, na ne ho nso yɛ fɛ.” Nea ɛne eyi bɔ abira no, na Nabal yɛ “den, na ne nneyɛe nye.” (1 Samuel 25:3) Nsɛm a esisii a ɛfa awarefo a wɔn suban nsɛ koraa ho no abɛyɛ Bible abakɔsɛm mu asɛm. Ma yɛnhwɛ sɛnea ɛte.

Ɔdom a Obuu no Adewa

Na ɛyɛ afeha a ɛto so 11 A.Y.B. Na wɔasra Dawid sɛ Israel daakye hene, nanso sɛ anka obedi hene mmom no ɔbɛyɛɛ oguanfo. Ɔhene Saul a na ɔredi ade no kae sɛ ɛyɛ dɛn ara a, obekum no. Ɛno nti, Dawid bɛyɛɛ oguanfo. Bere bi akyi no, ɔne n’ayɔnkofo bɛyɛ 600 nyaa guankɔbea wɔ Paran sare a ɛwɔ Yuda anafo fam wɔ ɛrekɔ Sinai sare so no so.—1 Samuel 23:13; 25:1.

Bere a wɔwɔ hɔ no, wohyiaa nguanhwɛfo a wɔyɛ ɔbarima bi a ne din de Nabal adwumayɛfo. Na Kaleb aseni a wanya ne ho yi wɔ nguan 3,000 ne mpapo 1,000, na na otwitwa ne nguan ho nhwi wɔ Karmel, kurow a na ɛwɔ Hebron anafo fam na ebia efi hɔ kɔ Paran yɛ bɛyɛ kilomita 40 pɛ no.a Dawid ne ne mmarima no boaa Nabal nguanhwɛfo no ma wɔbɔɔ nguankuw no ho ban fii akorɔmfo a na wokyinkyin sare no so hɔ no nsam.—1 Samuel 25:14-16.

Nanso, na nguan ho nhwi twitwa afi ase wɔ Karmel. Na eyi yɛ anigye bere sɛnea otwa bere te ma okuafo no. Afei nso na ɛyɛ bere a wɔyɛ ayamye, bere a nguan wuranom tua wɔn adwumayɛfo ka. Ɛno nti Dawid anyɛ aniammɔho sɛ ɔsomaa mmarima du sɛ wɔnkɔ Karmel, Nabal hɔ, nkogye aduan sɛ wɔn adwuma a wɔyɛe wɔ nguankuw no ho ho akatua.—1 Samuel 25:4-9.

Nabal amfi ayamye mu amma wɔn mmuae. Odii fɛw kae sɛ: “Hena ne Dawid?” Afei bere a ɔkyerɛe sɛ Dawid ne ne mmerante no yɛ nkoa a wɔaguan no, obisae sɛ: “Na memfa m’aduan ne me nsu ne me nam a makum de rema me nguan ho twitwafo no memma nnipa a minnim nea wofi anaa?” Bere a Dawid tee eyi no, ɔka kyerɛɛ ne mmarima no sɛ: “Mo nyinaa mmobɔ mo nkrante!” Na mmarima bɛyɛ 400 siesiee wɔn ho sɛ wɔrekɔko.—1 Samuel 25:10-13.

Abigail Nyansa

Abigail tee ne kunu Nabal ahohorabɔ asɛm no. Gyama na ɛnyɛ eyi ne bere a edi kan a ɔyɛɛ ɔpatafo maa Nabal. Sɛnea na ɛte biara no, Abigail yɛɛ ade ntɛm ara. Ɔboaboaa nneɛma ano a wanka ankyerɛ Nabal—nneɛma no bi ne nguanten anum ne nnuan bebree—na okohyiaa Dawid wɔ sare no so.—1 Samuel 25:18-20.

Bere a Abigail huu Dawid no, ntɛm ara obutuw fam wɔ n’anim. Ɔsrɛe sɛ: “Mma me wura mmfa ne koma nnto onipa huhuni Nabal yi so. . . .Na afei, akyɛde a w’afenaa de abrɛ me wura yi ma wɔmfa mma mmerante a wodi me wura akyi no.” Na ɔde kaa ho sɛ: ‘Mma [Nabal asɛm yi mmma] me wura werɛ nnhow na ne koma mmmɔ no paa.’ Hebri asɛmfua a wɔakyerɛ ase wɔ ha sɛ ‘awerɛhow’ no kyerɛ obi ahonim a ɛhaw no. Ɛno nti Abigail bɔɔ Dawid kɔkɔ wɔ ade a ɔde ahopere bɛyɛ na akyiri yi wanu ne ho wɔ ho ho.—1 Samuel 25:23-31.

Dawid tiee Abigail. Ɔka kyerɛɛ no sɛ: “Nhyira nka w’adwempa, na nhyira nka wo sɛ woasianka me nnɛ da yi na mankodi mogya ho sõ. . . Sɛ woanyɛ ntɛm ammehyia me a, anka ebedu ɔkyena anɔpa, obiara a ɔyɛ onini [obiara a ɔdwensɔ gu ɔfasu ho, NW] renka mma Nabal.”b—1 Samuel 25:32-34.

Asuade a Ɛwom Ma Yɛn

Bible kyerɛwtohɔ yi da no adi sɛ mfomso nni ho sɛ ɔbea a osuro Onyankopɔn di anim yɛ biribi, sɛ ɛho hia a. Abigail anyɛ nea ne kunu Nabal pɛ, nanso Bible no nka n’anim wɔ eyi ho. Mmom no, ɛkamfo no sɛ ɔbea a onim nyansa na ɔwɔ adwempa. Esiane sɛ Abigail dii anim yɛɛ ade wɔ saa ɔhaw yi mu nti, ogyee nnipa bebree nkwa.

Ɛwom sɛ ɛsɛ sɛ ɔbea biara da ahobrɛase pa adi de, nanso obetumi akyerɛ wɔ ɔkwan a ɛfata so sɛ ɔne ne kunu adwene nhyia bere a nnyinasosɛm a ɛteɛ ho asɛm wom no. Nokwarem no, ɛsɛ sɛ ɔbɔ mmɔden da “honhom a edwo na ɛyɛ komm” adi na ɛnsɛ sɛ ɔtew ne ho yɛ ade esiane nitan, ahantan, anaa atuatew nti. (1 Petro 3:4) Nanso, ɛnsɛ sɛ ɔyere pa ma wɔhyɛ no ma ɔyɛ biribi a onim sɛ nyansa nnim koraa anaasɛ ɛne Bible nnyinasosɛm nhyia. Nokwarem no, kyerɛwtohɔ a ɛfa Abigail ho no de adwene a edi mu ma de bɔ wɔn a wɔka sɛ Bible no ka mmea ho asɛm sɛ wɔyɛ mfenaa no gu.

Kyerɛwtohɔ yi san kyerɛ yɛn ahosodi. Ɛtɔ da bi a na Dawid da su yi adi kosi ase. Sɛ nhwɛso no, Dawid ampene sɛ obekum Ɔhene Saul weredifo no, ɛwom sɛ onyaa hokwan kɛse sɛ ɔbɛyɛ saa na na anka Saul wu no bɛma wanya ahotɔ de. (1 Samuel 24:2-7) Nea ɛne eyi bɔ abira no, bere a Nabal yeyaw Dawid wɔ animtiaabu mu no, ɔkaa ntam mpofirim sɛ obedi were. Eyi yɛ kɔkɔbɔ a emu da hɔ ma Kristofo a wɔbɔ mmɔden sɛ ‘wɔmfa bɔne ntua obiara bɔne so ka no.’ Wɔ tebea biara mu no, ɛsɛ sɛ wɔde Paulo afotu no di dwuma: “Sɛ ebetumi a, mo fam de, mo ne nnipa nyinaa ntra asomdwoe mu. Adɔfo, munnnidi mo ho were, na mmom munnyaw mma [Onyankopɔn] abufuw.”—Romafo 12:17-19.

[Ase hɔ nsɛm]

[Kratafa 15 mfonini ahorow]

Abigail de akyɛde brɛ Dawid