So Woyɛ Kristoni a ‘Wawie Nyin’?

“MEYƐ abofraa no, mekasae sɛ abofraa, medwenee sɛ abofraa, misusuwii sɛ abofraa.” Saa na ɔsomafo Paulo kyerɛwee. Nokwarem no, bere bi na yɛn nyinaa yɛ mmofra a yentumi nyɛ hwee. Nanso, yɛankɔ so anyɛ saa daa. Paulo kae sɛ: “Na meyɛɛ ɔpanyin yi, magu mmofraasɛm no.”—1 Korintofo 13:11.

Saa ara na Kristofo nyinaa fi ase sɛ honhom fam mmofra. Nanso, bere kɔ so no, yɛn nyinaa betumi ‘adu Nyankopɔn ba no ho gyidi ne ne hu biakoyɛ mu, ayɛ ɔbarima mu, adu mpanyin afe so a Kristo mayɛ bɛyɛ yɛn ma.’ (Efesofo 4:13) Wotu yɛn fo wɔ 1 Korintofo 14:20 sɛ: “Anuanom, monnyɛ asɛm ho dwen mu mmofraa . . . na asɛm ho dwen mu de, monyɛ pɛ.”

Kristofo a wɔanyin na wɔn ho akokwaw a wɔwɔ hɔ no yɛ nhyira ma Onyankopɔn nkurɔfo nnɛ, titiriw esiane sɛ wɔn a wɔyɛ foforo no dɔɔso pii nti. Kristofo a wɔanyin ma asafo bi yɛ den. Wonya asafo biara a wɔkɔ mu no mufo suban, anaa wɔn nneyɛe so nkɛntɛnso pa.

Bere a ɔkwan bi so no obi nyin honam fam a ɔmmɔ ho mmɔden biara no, egye bere ne mmɔdenbɔ na ama obi atumi anyin honhom fam. Ɛnyɛ nwonwa sɛ Paulo bere so no, Kristofo binom ‘ampere ankɔ onyin’ mu, ɛmfa ho sɛ na wɔayɛ Onyankopɔn asomfo mfe pii no. (Hebrifo 5:12; 6:1) Na wo nso ɛ? Sɛ́ ebia woasom Onyankopɔn mfe pii anaa bere tiaa bi no, ɛbɛyɛ nea ɛfata sɛ wubefi nokwaredi mu ahwehwɛ wo mu. (2 Korintofo 13:5) So woka wɔn a yebetumi afrɛ wɔn Kristofo a wɔanyin, anaa wɔn ho akokwaw no ho? Sɛ ɛnte saa a, wobɛyɛ dɛn atumi abɛyɛ saa?

‘Monyɛ Pɛ Wɔ Asɛm Ho Dwen Mu’

Ɛnyɛ den sɛ ‘ɔkyerɛ mframa biara bɛwosow honhom fam abotafowa biribiri atwe no adi akɔneaba nnipa kusumdi mu, denam anifere a ɛnam nnaadaa nnɛɛdɛe mu so.’ Enti, Paulo hyɛɛ nkuran sɛ: “Momma yenni nokware mfa ɔdɔ mu nnyin nneɛma nyinaa mu Kristo a ɔne eti no ho.” (Efesofo 4:14, 15) Ɔkwan bɛn so na obi yɛ saa? Hebrifo 5:14 ka sɛ: “Aduan a ɛyɛ den no fata wɔn a wɔanyin [honhom fam] a anem nti wɔn nkatede akokwaw papa ne bɔne mu yiyi ho.”

Hyɛ no nsow sɛ nnipa a wɔn ho akokwaw no nam wɔn nkatede, anaa Bible mu nnyinasosɛm ahorow a wɔde di dwuma so na atete wɔn ho. Ɛnde, ɛda adi sɛ, obi ho nkokwaw da koro; egye bere na ama obi anyin honhom fam. Ne saa mpo, wubetumi ayɛ pii de aboa ma woanyin honhom fam denam kokoam adesua a wobɛyɛ so—titiriw Onyankopɔn Asɛm mu nneɛma a emu dɔ ho. Ɔwɛn-Aban no asusuw nneɛma a emu dɔ pii ho nnansa yi. Wɔn a wɔn ho akokwaw nkwati nsɛm a ɛte saa esiane sɛ ‘nsɛm a ase yɛ ohuna wom’ nti. (2 Petro 3:16) Mmom no, wɔde anigye di aduan a ɛyɛ den saa no!

Asɛmpakafo ne Akyerɛkyerɛfo a Wɔyɛ Nsi

Yesu ka kyerɛɛ n’asuafo sɛ: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne Honhom Kronkron din mu, na monkyerɛkyerɛ wɔn sɛ wonni nea mahyɛ mo nyinaa so.” (Mateo 28:19, 20) Nsi a wode bɛyɛ asɛnka adwuma no nso betumi aboa ma woanyin honhom fam. Dɛn nti na wommɔ mmɔden sɛ wubenya mu kyɛfa pii sɛnea wo nsɛm tebea bɛma wo kwan?—Mateo 13:23.

Ɛtɔ mmere bi a, asetram nhyɛso betumi ama bere a wubenya de aka asɛm no ho ayɛ den. Nanso, sɛ ‘woyere wo ho denneennen’ sɛ ɔsɛmpakafo a, woda sɛnea “asɛmpa” no ho hia wo no adi. (Luka 13:24; Romafo 1:16) Enti wobetumi abu wo sɛ “gyidifo nhwɛso.”—1 Timoteo 4:12.

Mudi Mu Kurafo

Mmɔden a wobɛbɔ akura wo mudi mu no nso ka ho bi na ɛma wo ho kokwaw. Sɛnea kyerɛwtohɔ a ɛwɔ Dwom 26:1 kyerɛ no, Dawid kae sɛ: “[Yehowa, NW], bu me atɛn, na me pɛyɛ mu na mebɔɔ me bra.” Mudi mu kura yɛ abrabɔ pa a edi mũ. Nanso, ɛnkyerɛ pɛyɛ. Dawid ankasa yɛɛ bɔne ahorow a anibere wom pii. Nanso, esiane sɛ ogyee animka toom, na ɔsesaa ne kwan nti, ɔkyerɛe sɛ Yehowa Nyankopɔn ho nokware dɔ da so wɔ ne koma mu. (Dwom 26:2, 3, 6, 8, 11) Mudi mu kura yɛ ahofama a efi koma nyinaa mu. Dawid ka kyerɛɛ ne ba Salomo sɛ: “Hu w’agya Onyankopɔn no, na fa wo koma mũ . . . som no.”—1 Beresosɛm 28:9.

‘Wiase no fã a yɛrenyɛ,’ na yɛatwe yɛn ho afi amanaman no amammuisɛm ne wɔn akodi mu no ka yɛn mudi mu kura no ho. (Yohane 17:16) Ɛsɛ sɛ wokwati nneyɛe bɔne te sɛ, aguamammɔ, awaresɛe, ne nnubɔnenom. (Galatifo 5:19-21) Nanso, yɛn mudi mu kura kyerɛ pii sen saa nneɛma no a yɛbɛkwati. Salomo bɔɔ kɔkɔ sɛ: ‘Nwansena funu ma odufrafo aduru bɔn na ɛporɔw. Saa na nkwaseasɛm kakra yɛ nea nyansa ne anuonyam som bo ma no no.’ (Ɔsɛnkafo 10:1) Yiw, “nkwaseasɛm kakra,” te sɛ asereseresɛm a ɛmfata anaa mmarima anaa mmea akyidi a ɛnsɛ mpo betumi asɛe obi din sɛ ‘onyansafo.’ (Hiob 31:1) Enti, da w’ahokokwaw adi denam mmɔden a wobɛbɔ ayɛ nhwɛso pa wɔ wo nneyɛe nyinaa mu so, na kwati “bɔne su.”—1 Tesalonikafo 5:22.

Nokwaredifo

Kristoni a wanyin yɛ nokwaredifo nso. Sɛnea yɛkenkan wɔ Efesofo 4:24 no, ɔsomafo Paulo tu Kristofo fo sɛ: “Monhyɛ onipa foforo a wɔbɔɔ no Nyankopɔn so, nokware trenee ne ahotew mu.” Wɔ Hela Kyerɛwnsɛm no mu no, mfitiase kasa mu asɛmfua a egyina hɔ ma “nokwaredi” kyerɛ kronkronyɛ, trenee, ne nidi. Nokwaredifo pɛ nyamesom, ne ho tew; ɔde ahwɛyiye yɛ Onyankopɔn nnwuma nyinaa.

Dɛn ne akwan bi a wubetumi afa so ayɛ nokwaredifo saa? Biako ne sɛ wo ne w’asafo mu mpanyimfo bɛyɛ biako. (Hebrifo 13:17) Bere a Kristofo a wɔn ho akokwaw gye tom sɛ Kristo ne Kristofo asafo no Ti a wɔapaw no no, wodi wɔn a wɔapaw wɔn sɛ ‘wɔnyɛn Onyankopɔn asafo no’ nokware. (Asomafo no Nnwuma 20:28) Hwɛ sɛnea ɛmfata sɛ yɛbɛkasa atia mpanyimfo a wɔapaw wɔn no tumidi! Ɛsɛ sɛ wudi “akoa nokwafo ne ɔbadwemma” ne wɔn a wɔde wɔn di dwuma ma wɔde honhom fam ‘aduan ma wɔ bere a ɛsɛ mu’ no nso nokware. (Mateo 24:45) Ntwentwɛn wo nan ase sɛ wobɛkenkan Ɔwɛn-Aban ne nhoma ahorow a ɛka ho no mu nsɛm na wode adi dwuma.

Ɔdɔ a Wonam Wo Nneyɛe so Bɛda no Adi

Paulo kyerɛw Kristofo a wɔwɔ Tesalonika no sɛ: “Mo nyinaa mmiako mmiako dɔ a mode dodɔ mo ho mo ho no mu adɔ.” (2 Tesalonikafo 1:3) Ɔdɔ a emu dɔ yɛ honhom fam onyin fã a ɛho hia titiriw. Sɛnea wɔayɛ ho kyerɛwtohɔ wɔ Yohane 13:35 no, Yesu kae sɛ: “Sɛ mododɔ mo ho a, nnipa nyinaa behu sɛ moyɛ m’asuafo.” Onuadɔ a ɛte saa mfi nkate mu ara kwa. Vine’s Expository Dictionary of Old and New Testament Words ka sɛ: “Nneyɛe nkutoo na wotumi gyina so hu ɔdɔ.” Yiw, wonam ɔdɔ a wode bedi dwuma wɔ eyi mu so na ɛpere kɔ onyin mu!

Sɛ nhwɛso no, yɛkenkan wɔ Romafo 15:7 sɛ: “Munnyigye mo ho.” Ɔkwan biako a wubetumi afa so ada ɔdɔ adi ne sɛ wubekyia wo mfɛfo gyidifo ne wɔn a wɔyɛ foforo no wɔ asafo nhyiam horow ase—ɔdɔ ne anigye so! Bɔ mmɔden hu wɔn yiye. Ma afoforo ho ‘nhia wo.’ (Filipifo 2:4) Wubetumi ayi ahɔhoyɛ mpo adi akyerɛ afoforo na woato nsa afrɛ wɔn aba wo fie. (Asomafo no Nnwuma 16:14, 15) Afoforo sintɔ ahorow betumi asɔ sɛnea wo dɔ yɛ den no ahwɛ, nanso sɛ wusua sɛ ‘wo ne wɔn bɛtra ɔdɔ mu’ a, woda no adi sɛ worenyin.—Efesofo 4:2.

Yɛn Agyapade a Yɛde Bɛboa Ɔsom Kronn

Tete no, ɛnyɛ Onyankopɔn asomfo nyinaa na wodii asɛyɛde a wɔwɔ sɛ wɔboa Yehowa asɔrefie no so. Enti, Onyankopɔn somaa adiyifo te sɛ Hagai ne Malaki sɛ wɔnkanyan ne nkurɔfo wɔ eyi ho. (Hagai 1:2-6; Malaki 3:10) Kristofo a wɔn ho akokwaw nnɛ fi anigye mu de wɔn agyapade boa Yehowa som. Suasua saafo no denam nnyinasosɛm a ɛwɔ 1 Korintofo 16:1, 2 no akyi a wubedi ‘de biribi asie’ daa de ayi ntoboa de aboa wɔ asafo no mu ne Yehowa Adansefo wiase nyinaa adwuma no so. Onyankopɔn Asɛm hyɛ bɔ sɛ: “Nea ogu nhyira so no betwa nhyira so.”—2 Korintofo 9:6.

Mmu w’ani ngu agyapade foforo a wowɔ te sɛ wo bere ne w’ahoɔden no so. Bɔ mmɔden ‘tɔ bere’ fi nnwuma a ɛho nhia pii no mu. (Efesofo 5:15, 16; Filipifo 1:10) Sua sɛ wode bere bedi dwuma yiye paa. Saa a wobɛyɛ no betumi ama wode wo ho ahyɛ Ahenni Asa so asiesie ne nnwuma foforo a ɛtete saa a ɛma Yehowa som nya nkɔso no mu. W’agyapade a wode bedi dwuma saa kwan yi so no yɛ adanse foforo a ɛkyerɛ sɛ worenyin sɛ Kristoni ara ne sa.

Pere Kɔ Onyin Mu!

Mmarima ne mmea a wosua ade na wɔwɔ nimdeɛ, na wɔyɛ asɛmpakafo a wɔyɛ nsi, na wokura wɔn mudi mu pɛpɛɛpɛ, na wɔyɛ nokwaredifo na wɔwɔ dɔ, na wɔwɔ ɔpɛ sɛ wɔde wɔn ahoɔden ne honam fam nneɛma bɛboa Ahenni adwuma no yɛ nhyira kɛse ampa. Enti, ɛnyɛ nwonwa sɛ ɔsomafo Paulo tuu fo sɛ: “Momma yennyaw Kristo mfiase asɛm no, na yɛmpere nkɔ [onyin, NW] mu”!—Hebrifo 6:1.

So woyɛ Kristoni a wawie nyin a ne ho akokwaw? Anaasɛ woda so yɛ honhom fam akokoaa wɔ ɔkwan bi so? (Hebrifo 5:13) Sɛnea ɛte biara no, si wo bo sɛ wobɛyɛ kokoam adesua, aka asɛm no, na woadɔ wo nuanom. Gye afotu ne nteɛso biara a wɔn a wɔn ho akokwaw no de bɛma wo no tom. (Mmebusɛm 8:33) Di wo Kristofo asɛyɛde nyinaa ho dwuma. Bere rekɔ so na worebɔ wo ho mmɔden no, wo nso wubetumi ‘adu yɛn Nyankopɔn ba no ho gyidi ne ne hu biakoyɛ mu, ayɛ ɔbarima mu, adu mpanyin afe so a Kristo mayɛ bɛyɛ wo ma.’—Efesofo 4:13.

[Asɛm a wɔafa aka wɔ kratafa 27]

Kristofo a wɔanyin ma asafo bi yɛ den. Wonya asafo biara a wɔkɔ mu no mufo suban, anaa wɔn nneyɛe so nkɛntɛnso pa

[Mfonini ahorow wɔ kratafa 29]

Wɔn a wɔn ho akokwaw kyerɛ afoforo ho anigye ma asafo no honhom yɛ den