Kristofo Nipasu A Yebedua Wɔ Yɛn Mma Mu

WANDA maame a ne kunu agyaw no no, abɔ mmɔden sɛ ɔde Kristofo su horow bedua ne babea no mu. Wanda dii 12 no, wɔsɔɔ ntetee a onyaa yi hwɛe. Saa bere no, na ɛsɛ sɛ Wanda ne ne nuabarima ne ne nuabea kumaa fi wɔn maame nkyɛn na wɔne wɔn papa kɔtra kakra. Na ne papa nye gyidini, enti na Wanda bɛyɛ n’ade dɛn bere a ne maame nni hɔnom a obehu no no?

Biribi a ɛto Kristofo awofo nyinaa ne bere a ɛbɛba sɛ wɔn mma nkutoo besi gyinae horow ama wɔn ho, de asɔ wɔn ankasa gyidi ahwɛ. Ebetumi aba sɛ mmofra no ne wɔn Kristofo awofo no ntam bɛtetew, sɛnea ɛtoo Wanda no. Ebia wobehyia atipɛnfo nhyɛso wɔ sukuu sɛ wɔnyɛ biribi a ɛnteɛ. Anaasɛ wobehyia sɔhwɛ ahorow a emu yɛ den. Ɛyɛ Kristofo awofo anidaso ne mpaebɔ sɛ sɛ edu saa bere no a, wɔn mma benya Kristofo nipasu a ɛyɛ den a ɛbɛma wɔatumi agyina sɔhwɛ no ano.

Ɔkwan bɛn so na awofo betumi adua Kristofo su horow a emu yɛ den wɔ wɔn mma mu? Ansa na yebehu nea ɛtoo Wanda no, momma yɛnhwɛ sɛnea Bible no boa yɛn ma yɛma saa asemmisa no ho mmuae. Yehu nea yebegyina so ama mmuae no wɔ nsɛm yi a ɔsomafo Paulo ka kyerɛɛ Kristofo a na wɔwɔ Korinto no mu: “Na nhyɛase foforo de, obiara rentumi nto nka nea ɛhyɛ hɔ dedaw a ɛne Yesu Kristo no ho. Nanso sɛ obi de sika, dwetɛ, abo pa, nnua, sare, buronan to nhyɛase yi so a, obiara adwuma bɛda adi, na ɛda no beyi no adi, efisɛ ogya mu na ɛbɛda adi, na sɛnea obiara adwuma te no, ogya no bɛsɔ ahwɛ.”​—1 Korintofo 3:11-13.

Nhyɛase No

Dɛn nti na Paulo kyerɛwee nsɛm yi? Na wafi Kristofo nipasu a wodua wɔ nnipa mu ho dwumadi bi ase wɔ Korinto, nanso ɔhaw ahorow sɔree wɔ dwumadi no mu. Nokwarem no, na Paulo ankasa honam fam mma nka wɔn a odii wɔn ho dwuma no ho. Na wɔn a wɔka ho ne wɔn a wɔnam n’asɛnka so bɛyɛɛ Kristofo no. Nanso osusuwii eyinom ho sɛ ne mma wɔ honhom fam, na awofo nso benya nea ɔkae no mu mfaso.​—1 Korintofo 4:15.

Na Paulo adi kan akɔ Korinto akɔhyehyɛ Kristofo asafo wɔ hɔ. Wɔn a wotiee n’asɛnka no yɛɛ nsakrae akɛse wɔ wɔn nipasu mu. Na anka wɔn mu binom yɛ wɔn a wobu ɔbra bɔne, awifo, abosonsomfo, ne asabofo. (1 Korintofo 6:9-11) Nanso wotumi yɛɛ nsakrae benyaa Kristofo nsusuwii efisɛ na Paulo ato nhyɛase pa, sɛ yɛbɛka no saa a. Na dɛn ne saa nhyɛase no? “Nhyɛase foforo de, obiara rentumi nto nka nea ɛhyɛ hɔ dedaw a ɛne Yesu Kristo no ho.”​—1 Korintofo 3:11.

Ɔkwan bɛn so na bere a Paulo rekyerɛkyerɛ Korintofo gyidifo afoforofo yi, ɔtoo saa nhyɛase yi? Ɔka kyerɛ yɛn sɛ: “Na me nso, anuanom, mebaa mo nkyɛn no, mamfa nsɛm anaa nyansa a ɛtra so mammɛka mo Onyankopɔn adansesɛm no. Na mebɔɔ me tirim sɛ merenhwehwɛ biribiara wɔ mo hɔ, sɛ Yesu Kristo, ne sɛ wɔbɔɔ no asɛndua mu no.” (1 Korintofo 2:1, 2; Asomafo no Nnwuma 18:5) Wantwe adwene ansi ɔno ankasa so anaasɛ wangugu nokware no mu sɛnea ɛbɛma ayɛ sɛ nhomanimfo nkyerɛkyerɛ. Mmom no, ɔdan adwene kɔɔ Yesu Kristo ne sɛnea Onyankopɔn de no dii dwuma no so.

Nokwarem no, Yesu yɛ Kristofo nipasu a wodua wɔ nnipa mu te sɛ ɔdansi nhyɛase a ɛyɛ den yiye. Ɔde agyede afɔre no mae. Mprempren ɔyɛ Ɔhene wɔ soro ma enti ɛrenkyɛ na wasɛe Onyankopɔn atamfo wɔ Harmagedon. Afei ɔde Onyankopɔn trenee bebu atɛn wɔ mfirihyia 1,000 nniso ase, na sɛ Onyankopɔn Ɔsɔfo Panyin no, ɔde adesamma abusua no bɛkɔ pɛyɛ mu nkakrankakra. Nhyɛase foforo bɛn na ɛsɛ sɛ obi hwehwɛ bio?

Enti, sɛ yɛredua Kristofo nipasu wɔ yɛn mma mu a, ɛbɛyɛ papa sɛ yesuasua Paulo, na yɛhwɛ hu sɛ wɔte nokwasɛm ahorow a ɛho hia yi ase. Ɛsɛ sɛ yefi ase kyerɛkyerɛ yɛn mma ma wɔdɔ Yesu esiane nea ɔyɛe na ɔreyɛ ama yɛn ho nti fi wɔn mmofraase.​—1 Petro 1:8.

Ɔdan no Si

Nanso, ɛwom sɛ na Paulo ato nhyɛase pa sɛɛ de, nanso ofii hɔ no, ɔhaw ahorow bi sɔree wɔ ɔdansi dwumadi no mu. (1 Korintofo 3:10) Na ɔhaw no te sɛ nea awofo pii hyia nnɛ no. Wɔde Kristofo gyidi no tete wɔn mma, na wɔhwɛ hu yiye sɛ mmofra no te nea nokware no yɛ ase. Nanso sɛ wonyin a, mmofra no fi gyidi no ho anaasɛ wɔpow koraa. Dɛn nti na ɛba saa? Mpɛn pii no efi nneɛma a wɔde sii ɔdan no.

Paulo kae sɛ wobetumi de nneɛma a ɛsom bo ato nipasu ahorow: sika, dwetɛ, ne abo pa. Anaa wobetumi de nneɛma a ɛnsom bo ayɛ: nnua, sare, ne buronan. (1 Korintofo 3:12) Afei, sɛ ɔdansifo de sika, dwetɛ, ne abo pa di dwuma a, na ɔresi dan pa bi a ne bo yɛ den yiye. Nanso ɔdansifo a ɔde nnua, sare, ne buronan di dwuma no resi ɔdan bi a enni ahoɔden, ɛrenkyɛ, na ne bo nyɛ den.

Ɛte sɛ nea na wɔde honhom fam nneɛma a ɛnsom bo redi dwuma wɔ Korinto. Na nnipa bi a wɔkɔtoo nhyɛase a Paulo toe no so no resi adan a ne bo nyɛ den, na wonsi adan a ɛwɔ ahoɔden na ɛbɛkyɛ. Na Korintofo no afi ase de wɔn ho to nnipa so, na mpaapaemu, ahoɔyaw, ne kunsunkunsum wɔ wɔn mu. (1 Korintofo 1:10-12; 3:1-4) Ɔkwan bɛn so na anka wobetumi akwati eyi? Ɛdenam ɔdansi nneɛma a eye, na etumi kyɛ a wɔde bedi dwuma so.

Eyinom gyina hɔ ma su horow a ɛsom bo a ɛyɛ Kristoni nipasu fã a ɛho hia no. Su horow bɛn? Ɔsomafo Petro bɔɔ biako din: “Mo gyidi a wɔasɔ ahwɛ, a ne bo yɛ den pii sen sika.” (1 Petro 1:6, 7, New World Translation) Ɔhene Salomo bɔɔ abien nso din: nyansa ne ntease, a sɛ obi wɔ a “emu adenya ye sen dwetɛ de” no. (Mmebusɛm 3:13-15) Na Ɔhene Dawid kaee yɛn sɛ Yehowa suro ne anisɔ ma n’ahyɛde ahorow no yɛ “akɔnnɔ sen sika ne amapa pii.”​—Dwom 19:9, 10.

Yebetumi de eyinom ne nneɛma afoforo a ne bo yɛ den adua Kristofo nipasu mu na aboa yɛn mma ma wɔagyina sɔhwɛ ano. Nanso, yɛbɛyɛ dɛn ahu no yiye sɛ yɛde nneɛma a ɛte sɛɛ redi dwuma? Ɛdenam yɛn ani a yɛbɛma aku koma ho, yɛn mma ne yɛn ankasa de nyinaa.

Ɔdansi Adwuma a Edi Yiye

Wohu dwuma a ɔwofo koma di wɔ ɔdansi adwuma yi mu no wɔ ahyɛde bi a Yehowa de maa awofo wɔ tete Israel man mu no mu: “Na nsɛm yi a merehyɛ wo nnɛ yi nna mo koma so.” Afei ɔkɔɔ so kae sɛ: “Na fa kyerɛkyerɛ wo mma.” (Deuteronomium 6:6, 7) Enti, ansa na yebetumi de nneɛma pa adua afoforo mu no, ɛsɛ sɛ yɛde nneɛma pa dua yɛn mu. Ɛsɛ sɛ yɛn mma tumi hu wɔ yɛn kasa ne nneyɛe mu sɛ wɔde nneɛma a ɛfata na ayɛ yɛn nipasu.​—Kolosefo 3:9, 10.

Afei, ɛsɛ sɛ yɛn kyerɛkyerɛ du wɔn koma mu. Yesu a otumi de Kristofo nipasu duaa nnipa mu sen obiara no, duu nkurɔfo koma mu denam mfatoho ne nsemmisa a ɔde dii dwuma so. (Mateo 17:24-27; Marko 13:34) Awofo hu sɛ akwan yi ara so a wɔbɛfa akyerɛkyerɛ no tu mpɔn. Wɔde mfatoho di dwuma de ma wɔn mma nkumaa koma ani gye Kristofo nokware ahorow ho, na wɔde nsemmisa a wɔasusuw ho yiye di dwuma de hu nea ɛwɔ wɔn mma a wɔn mfe akɔ anim kakraa no adwenem ankasa, sɛnea wosusuw nsɛm ho wɔ wɔn koma mu.​—Mmebusɛm 20:5.

Bere a na Mose rebɔ mmɔden sɛ ɔbɛma Israelfo no anya ɔpɛ sɛ wɔbɛkɔ so adi nokware no, ɔka kyerɛɛ wɔn sɛ: “Di Yehowa mmara nsɛm ne ahyɛde . . . so, na asi wo yiye.” (Deuteronomium 10:13, NW) Saara nso na ɛnyɛ sɛ ɛsɛ sɛ awofo kyerɛkyerɛ wɔn mma nea ɛyɛ Onyankopɔn gyinapɛn ahorow mu pefee nko, na mmom ɛyɛ papa sɛ wɔkyerɛkyerɛ wɔn ma wɔte nea enti a nneɛma te sɛ nokwaredi, abrabɔ a ɛho tew, ne fekubɔ pa ye ma wɔn no ase yiye.

Awiei koraa no, Yesu kae sɛ: “Eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Sɛ mmofra tumi hu Yehowa ankasa bere a wosua, sua sɛnea wɔbɛka wɔn haw ahorow ho asɛm akyerɛ no, na wonya wɔn mpaebɔ a ɔma wonya ho mmuae mu osuahu a, wonya Kristoni nipasu fã a ɛho hia sen biara no: wɔne wɔn Bɔfo no ntam abusuabɔ a emu yɛ den.

Ogya No

Paulo hui sɛ esiane sɛ wɔanyɛ Korinto ɔdansi dwumadi no yiye nti, wiase su horow, te sɛ mpaapaemu ne akasakasa gyee ntini. Na asiane wɔ eyi mu, efisɛ sɛnea ɔkyerɛkyerɛɛ mu no, “sɛnea obiara adwuma te no, ogya no bɛsɔ ahwɛ.”​—1 Korintofo 3:13.

Dɛn ne ogya no? Ebetumi ayɛ sɔhwɛ biara a Satan de ba Kristoni so. Ebetumi ayɛ atipɛnfo nhyɛso, ɔhonam mu sɔhwɛ, honam fam adedodowpɛ, ɔtaa, ne adwene mu naayɛ a etumi sɛe ade mpo. Sɔhwɛ ahorow yi bɛba ɔkwan biara so. “Obiara adwuma bɛda adi, na ɛda no beyi no adi, efisɛ ogya mu na ɛbɛda adi.” Awofo anyansafo siesie wɔn mma nipasu a wɔhwɛ kwan sɛ wɔbɛsɔ mmofra no ahwɛ. Nanso wɔwɔ ahotoso sɛ ɛnam Yehowa mmoa so no, wɔn mma no betumi agyina sɔhwɛ no ano. Sɛ awofo nya saa su yi a, wobenya nhyira pii.

Akatua No

Paulo kae sɛ: “Sɛ obi adwuma a wato asi so gyina a, obenya akatua.” (1 Korintofo 3:14) Ɔsomafo Paulo nyaa akatua. Ɔkyerɛw Kristofo a wɔwɔ Tesalonika kuropɔn, a ɔyɛɛ adansi adwuma wɔ hɔ nso no mu no sɛ: “Na hena ne yɛn anidaso anaa anigye anaa ahoahoa abotiri, yɛn Awurade Yesu Kristo anim wɔ ne ba mu? So ɛnyɛ mo anaa? Mone yɛn anuonyam ne yɛn anigye.”​—1 Tesalonikafo 2:19, 20.

Wanda maame nyaa akatua yi. Bere a Wanda a wadi mfe 12 no hui sɛ ɔne ne maame ntam atetew no, mfiase no na osu araa kosi sɛ ɔbɛda. Afei ɔkaee afotu a ne maame de maa no sɛ ɔnka ne haw ahorow ho asɛm nkyerɛ Yehowa wɔ mpaebɔ mu no. Ɔbɔɔ mpae na ankyɛ na ɛbaa n’adwene mu sɛ ɔnhwehwɛ nhoma a telefon nɔma wom no mu nhwɛ sɛ Yehowa Adansefo bi te bɛn hɔ anaa. Ne nsa kaa wɔn, na wɔkyerɛɛ no sɛ abusua bi te borɔn a ne papa fie wɔ so no ara so. Wanda se: “M’ani gyei kɛse!”

Ɛnam abusua yi nkuranhyɛ so no, Wanda yɛɛ nhyehyɛe ma ɔne ne nuabarima ne ne nuabea nkumaa no fii Kristofo dwumadi ase bio. Ɔkyerɛkyerɛ mu sɛ: “Na me na mehwɛ sɛ yebesiesie yɛn ho ama nhyiam horow no. Na ɛsɛ sɛ mehoro yɛn ntade, srɛn yɛn ti nhwi, na mehwɛ hu sɛ yɛn ho tew sɛnea ɛfata.” Na ɛno yɛ adwumaden ma abeawa kumaa sɛɛ, nanso ɔyɛe. Bere bi wɔn papa bɔɔ mmɔden sɛ obesiw wɔn adesuakɔ kwan, nanso mmofra no srɛɛ no, na ɔma wɔkɔe.

Akyiri yi no, mmofra no ne wɔn maame san kɔtrae. Wanda bɛyɛɛ Kristoni a wɔabɔ no asu bere a odii mfe 15 no, na afei botae a ose ɔde asi n’ani so ne sɛ ɔbɛyɛ ɔsɛmpatrɛwfo. Yiw, Wanda maame adwuma no dii sɔhwɛ no mu nkonim. Onyaa akatua a ɛne sɛ ohuu sɛnea ne babea no ankasa gyinaa nokware no afã pintinn no. Ɛmmra sɛ Kristofo awofo nyinaa bedi nkonim saa ara, bere a wɔyɛ adwuma de dua Kristofo nipasu wɔ wɔn mma mu no.

[Adaka wɔ kratafa 27]

Sɛnea asɛm yi kyerɛ no, bere a awofo yere wɔn ho sɛ wobedua Kristofo nipasu wɔ wɔn mma mu no, mmofra no ankasa nso wɔ asɛyɛde. Te sɛ Kristofo nyinaa no, ɛsɛ sɛ wɔn ankasa nso yɛ ɔdansi adwuma bi wɔ wɔn mu. (Efesofo 4:22-24) Ɛwom sɛ awofo wɔ hokwan a ɛyɛ anigye sɛ wɔbɛboa wɔ eyi yɛ mu de, nanso awiei koraa no, ɛsɛ sɛ ankorankoro biara ankasa si gyinae sɛ ɔbɛsom Yehowa.