“Nkwaseasɛm” A Yehowa De Gye Wɔn A Wogye Di No Nkwa

“Na wiase no amfa nyansa so anhu Nyankopɔn wɔ Onyankopɔn nyansa mu nti, ɛsɔɔ Onyankopɔn ani sɛ ɔnam asɛnka no nkwaseasɛm so begye wɔn a wogye di no nkwa.”​—1 KORINTOFO 1:21.

 1. Ntease bɛn mu na Yehowa de “nkwaseasɛm” bedi dwuma, na yɛyɛ dɛn hu sɛ wiase no amfa ne nyansa so anhu Onyankopɔn?

WOSE DƐN? So Yehowa de nkwaseasɛm bedi dwuma? Ɛnte saa ankasa! Nanso obetumi de nea ɛte sɛ nkwaseasɛm ma wiase no adi dwuma, na ɔyɛ saa nso. Ɔyɛ saa na ama wagye nnipa a wonim no na wɔdɔ no no nkwa. Wiase no rentumi mfa ne nyansa so nhu Onyankopɔn. Yesu Kristo maa eyi daa adi pefee bere a ɔkaa eyi wɔ mpaebɔ mu no: “Agya trenee, wiase anhu wo.”​—Yohane 17:25.

 2. Ɔkwan bɛn so na ebetumi ayɛ te sɛ nea Yehowa akwan ne wiase no de sɛ, nanso dɛn na nokwasɛm ahorow no kyerɛ?

² Asɛm a Yesu kae no kyerɛ sɛ Yehowa akwan nte sɛ wiasefo akwan. Sɛ wohwɛ no aniani a, ebia ɛte sɛ nea Onyankopɔn atirimpɔw ne wiase no de sɛ. Ebia ɛte sɛ nea Onyankopɔn hyira wiase yi botae horow so. Sɛ nhwɛso no, Bible no ka sɛ Onyankopɔn bɛhyehye trenee nniso bi a ɛde asomdwoe asetra, anigye, ne yiyedi bɛbrɛ adesamma wɔ asase so. (Yesaia 9:6, 7; Mateo 6:10) Saa ara nso na wiase no bɔ n’atirimpɔw a ɛne sɛ ɛnam nea wose ɛyɛ wiase nhyehyɛe foforo bi so bɛma nnipa anya asomdwoe, yiyedi, ne nniso pa ho dawuru. Nanso Onyankopɔn atirimpɔw ahorow ne wiase no de nyɛ biako. Yehowa atirimpɔw ne sɛ obebu ne ho bem sɛ amansan Hene Pumpuni no. Ɔbɛyɛ saa denam ɔsoro ahenni bi a ɛbɛtɔre asase so nniso nyinaa ase no so. (Daniel 2:44; Adiyisɛm 4:11; 12:10) Enti Onyankopɔn ne wiase yi nyɛ biako wɔ hwee mu. (Yohane 18:36; 1 Yohane 2:15-17) Enti na Bible no ka nyansa abien bi ho asɛm​—“Onyankopɔn nyansa” ne “wi yi ase nyansa.”​—1 Korintofo 1:20, 21.

Wiase Nyansa Mu Sintɔ Titiriw

 3. Ɛwom sɛ wiase no nyansa betumi ayɛ te sɛ nea ɛsɔ ani de, nanso dɛn nti na wiase nhyehyɛe foforo a nnipa ahyɛ ho bɔ no remma yennya akomatɔyam da?

³ Wɔn a ɛnyɛ Onyankopɔn nyansa na ɛkyerɛ wɔn kwan fam no, ɛte sɛ nea wiase nyansa sɔ wɔn ani. Wiase nyansapɛ ahorow a ekura abodin akɛseakɛse wɔ hɔ a ɛkanyan adwene no. Sukuupɔn mpempem pii de nsɛm a nnipa pii bu no sɛ efi adwene a ɛkɔ anim sen biara mu no ma. Wɔaboaboa adesamma osuahu ahorow a wɔde mfehaha pii anya mu nimdeɛ ano ahyɛ nhomakorabea akɛseakɛse mu ma. Nanso, eyi nyinaa akyi no, wiase nhyehyɛe foforo a wiase atumfo ayɛ ho nhyehyɛe no betumi ayɛ nnipa a wɔnyɛ pɛ, a wɔyɛ bɔne na wowuwu no ahenni kɛkɛ. Saa nhyehyɛe no renyɛ nea edi mu, na wɔbɛsan adi mfomso a wodii kan no ara no pii bio, na wɔrentumi nni adesamma nyinaa ahiade ahorow ho dwuma da.​—Romafo 3:10-12; 5:12.

 4. Dɛn na ebetumi anya wiase nhyehyɛe foforo a wɔayɛ ho nhyehyɛe no so nkɛntɛnso, na dɛn na ebefi mu aba?

⁴ Ɛnyɛ onipa mmerɛwyɛ nko na ɛbɛda adi wɔ wiase nhyehyɛe foforo a wɔayɛ ho nhyehyɛe no mu, na mmom ahonhommɔne nso benya so nkɛntɛnso​—yiw, Satan Ɔbonsam ne n’adaemone. Satan afura nnipa no adwene ani ma enti wonnye ‘Kristo anuonyam asɛmpa no’ nni. (2 Korintofo 4:3, 4; Efesofo 6:12) Enti, wiase hyia ɔhaw ahorow toatoa so. Wiase no apereperedi nti, ehu amane wɔ mmɔden a asiane wom a ɛbɔ sɛ ɛbɛkwati Onyankopɔn mmoa adi n’ankasa ho so na abu ɔsoro apɛde animtiaa no mu. (Yeremia 10:23; Yakobo 3:15, 16) Enti, sɛnea ɔsomafo Paulo kae no, “wiase no amfa [ne] nyansa so anhu Onyankopɔn.”​—1 Korintofo 1:21.

 5. Dɛn ne wiase yi nyansa mu sintɔ titiriw?

⁵ Ɛnde, sintɔ titiriw bɛn na ɛwɔ wiase yi nyansa a wiase nhyehyɛe foforo ho nhyehyɛe a ayɛ ka ho no mu? Ɛne sɛ wiase no bu ani gu nea ebu ani ngu so a ɛnyɛ yiye da no so​—Yehowa Nyankopɔn amansan tumidi a ɛkorɔn no. Ɛde ahantan pow sɛ ebegye ɔsoro tumidi atom. Wiase no hyɛ da yi Yehowa fi ne nhyehyɛe nyinaa mu, na ɛde ne ho to n’ankasa tumi ne ne nhyehyɛe so. (Fa toto Daniel 4:31-34; Yohane 18:37 ho.) Bible no da no adi pefee sɛ “nyansa mfiase ne [Yehowa] suro.” (Mmebusɛm 9:10; Dwom 111:10) Nanso, wiase no nhuu nyansa ho ahwehwɛde titiriw yi mpo da. Enti, esiane sɛ Onyankopɔn nnyina n’akyi nti, ɛbɛyɛ dɛn atumi adi nkonim?​—Dwom 127:1.

Ahenni Asɛnka​—Nkwaseasɛm Anaa Anyansasɛm?

 6, 7. (a) Dɛn na wɔn a Onyankopɔn nyansa kyerɛ wɔn kwan no reka akyerɛ, nanso wiase no bu wɔn dɛn? (b) Hena nyansa na Kristoman asɔfo de ka asɛm kyerɛ, na dɛn na afi mu aba?

⁶ Nea ɛne eyi bɔ abira no, wɔn a wonim Onyankopɔn no da Onyankopɔn nyansa adi, na wɔpaw sɛ wɔbɛma akyerɛ wɔn kwan. Wɔreka “ahenni no ho asɛmpa yi wiase nyinaa,” sɛnea Yesu ka siei no. (Mateo 24:14; 28:19, 20) So mfaso wɔ asɛnka a ɛte sɛɛ so nnɛ, bere a akodi, efi, ohia ne nnipa amanehunu ahyɛ yɛn asase yi so ma no? Wiase anyansafo fam no, ɛte sɛ nea Onyankopɔn Ahenni ho asɛnka no yɛ nkwaseasɛm a ɛsen biara, a mfaso biara nni so. Wobu Onyankopɔn Ahenni ho asɛnkafo sɛ nnipa a wɔbrɛ Ɔman nkɔso ne amammui nniso pa ase. Kristoman asɔfo a wɔde wiase yi nyansa na ɛka asɛm, a wɔnka nea nnipa no hia sɛ wohu wɔ Onyankopɔn wiase foforo no ne n’Ahenni nniso ho no nkyerɛ wɔn, ɛwom mpo sɛ na eyi ne Kristo nkyerɛkyerɛ titiriw no, gyina wɔn akyi wɔ eyi mu.​—Mateo 4:17; Marko 1:14, 15.

⁷ Abakɔsɛm kyerɛwfo H. G. Wells twe adwene si Kristoman asɔfo nkogudi yi so. Ɔkyerɛwee sɛ: “Sɛnea Yesu maa nea wɔfrɛ no Ɔsoro Ahenni ho nkyerɛkyerɛ hyetae yiye, ne sɛnea wɔde toto ho a, wɔnka ho asɛm ahe biara wɔ Kristosom nsɔre no mu fã kɛse no ara nhyehyɛe ne wɔn nkyerɛkyerɛ mu no yɛ nwonwa yiye.” Nanso, sɛ awo ntoatoaso yi mu nnipa benya nkwa a, ɛsɛ sɛ wodi kan te Onyankopɔn Ahenni a ɔde asi hɔ no ho asɛm, na ɛsɛ sɛ obi ka ho asɛmpa no kyerɛ ansa na wɔate.​—Romafo 10:14, 15.

 8. Dɛn nti na Onyankopɔn asɛmpa no ka ne ade a mfaso wɔ so sen biara nnɛ, nanso adeyɛ bɛn na ɛremfa mfaso a ɛtra hɔ daa mma?

⁸ Ɛnde, Onyankopɔn asɛmpaka no ne ade a mfaso wɔ so sen biara a ɛsɛ sɛ yɛyɛ nnɛ. Eyi te saa efisɛ Ahenni nkrasɛm no de nokware anidaso a ɛde ahurusidi hyɛ adesamma koma ma ma wɔ nna a edi akyiri a ‘mmere no mu ayɛ den’ yi mu. (2 Timoteo 3:1-5; Romafo 12:12; Tito 2:13) Bere a wontumi nhu nea ebefi wiase yi mu asetra mu aba, na ɛntra hɔ nkyɛ no, Onyankopɔn nhyehyɛe foforo no mu asetra bɛtra hɔ daa, a anigye, nneɛma pii ne asomdwoe wom wɔ asase so ha. (Dwom 37:3, 4, 11) Sɛnea Yesu Kristo kae no, “sɛ onipa nya wiase nyinaa na ɔhwere ne kra a, mfaso bɛn na obenya? Anaasɛ dɛn na onipa bɛma de asesa ne kra?” Sɛ hokwan a obi wɔ sɛ ɔtra Onyankopɔn wiase foforo no mu fi ne nsa a, mfaso bɛn na ɛwɔ wiase a ɛretwam akɔ yi so ma no? Honam fam nneɛma a onipa a ɔte sɛɛ nya mu anigye mprempren no yɛ ahuhude, ɛntra hɔ nkyɛ.​—Mateo 16:26; Ɔsɛnkafo 1:14; Marko 10:29, 30.

 9. (a) Bere a ɔbarima bi a wɔfrɛɛ no sɛ ɔmmɛyɛ Yesu kyidi no kae sɛ wontu saa nhyɛ da no, dɛn na Yesu tuu no fo sɛ ɔnyɛ? (b) Ɛsɛ sɛ Yesu mmuae no ka yɛn dɛn?

⁹ Ɔbarima bi a Yesu frɛɛ no sɛ ɔmmɛyɛ n’akyidini no kae sɛ: “Ma me kwan na minkosie m’agya ansa.” Dɛn na Yesu tuu no fo sɛ ɔnyɛ? Esiane sɛ na Yesu nim sɛ ɔbarima no betu adwuma a ɛho hia sen biara no ahyɛ da, na ama watwɛn kɛkɛ akosi sɛ n’awofo bewu ansa nti, obuae sɛ: “Ma awufo nsie wɔn awufo, na wo de, kɔ na kɔka Onyankopɔn ahenni ho asɛm!” (Luka 9:59, 60) Wɔn a wɔda nyansa adi denam Yesu Kristo a wotie no so no rentumi mpow ahyɛde a wɔde ama wɔn sɛ wɔnka Ahenni nkrasɛm no a wobedi ho dwuma no so. Ɔsoro nyansa ma wohu sɛ wɔbɛsɛe wiase yi ne n’atamfo. (1 Korintofo 2:6; 1 Yohane 2:17) Wɔn a wogyina Onyankopɔn tumidi akyi nim sɛ Onyankopɔn ho a ɔde begye nsɛm mu ne ne nniso ne adesamma nokware anidaso koro pɛ. (Sakaria 9:10) Enti ɛwom sɛ nnipa a wɔwɔ wiase yi nyansa nnye Onyankopɔn Ahenni nni, na wɔmpɛ saa ɔsoro nniso no de, nnipa a ɔsoro nyansa kyerɛ wɔn kwan no yɛ ade a ɛde mfaso ankasa brɛ wɔn mfɛfo nnipa, na esiesie wɔn ma daa nkwa wɔ Yehowa wiase foforo a wahyɛ ho bɔ no mu.​—Yohane 3:16; 2 Petro 3:13.

“Nkwaseasɛm ma Wɔn a Wɔbɛyera”

10. (a) Bere a wɔsakraa Paulo a ofi Tarso no, adwuma bɛn na ɔyɛe, na obuu no dɛn? (b) Na tete Helafo agye din wɔ dɛn ho, nanso Onyankopɔn buu wɔn nyansa no dɛn?

¹⁰ Saulo a ofi Tarso a ɔbɛyɛɛ Yesu Kristo somafo no yɛɛ nkwagye adwuma yi. So ntease wom sɛ yebesusuw sɛ bere a Yesu Kristo sakraa Saulo no, na Ɔrepaw no ma wayɛ nkwasea dwuma bi? Paulo ansusuw saa. (Filipifo 2:16) Saa bere no, na wobu Helafo sɛ wiase no mu anyansafo a wɔsen biara. Wɔde wɔn nyansapɛfo ne anyansafo akɛse hoahoaa wɔn ho. Ɛwom sɛ na Paulo te Hela kasa de, nanso wɔanni Helafo nyansapɛ ne wɔn nhomasua akyi. Dɛn ntia? Efisɛ saa wiase nyansa no yɛ nkwaseasɛm ma Onyankopɔn.a Paulo hwehwɛɛ ɔsoro nyansa, na ɛkanyan no ma ɔkaa asɛmpa no wɔ afie afie. Na Ɔsɛnkafo a ɔsen obiara a watra ase pɛn, Yesu Kristo, ayɛ nhwɛso no na na wahyɛ no sɛ ɔnyɛ saa adwuma no ara bi.​—Luka 4:43; Asomafo no Nnwuma 20:20, 21; 26:15-20; 1 Korintofo 9:16.

11. Ne titiriw no, dɛn na Paulo kae wɔ n’asɛnka ahyɛde ne wiase nyansa ho?

¹¹ Paulo ka ahyɛde a wɔde maa no sɛ ɔnka asɛm no ho asɛm sɛ: ‘Kristo somaa me sɛ memmɛka asɛmpa no, ɛnyɛ nyansasɛnka mu, na Kristo asɛndua no anyɛ ɔkwa. Na asɛndua [Kristo agyede afɔrebɔ] no ho asɛm yɛ nkwaseasɛm ma wɔn a wɔbɛyera, na ɛyɛ Onyankopɔn tumi ma yɛn a wobegye yɛn nkwa no. Efisɛ wɔakyerɛw sɛ: Mɛsɛe anyansafo nyansa, na mɛma animdefo nimdeɛ ayɛ ɔkwa. Onyansafo [te sɛ nyansapɛfo no] wɔ he? Kyerɛwfo wɔ he? Wi yi ase kyinnyegyefo wɔ he? Onyankopɔn nnan wi yi ase nyansa nkwaseasɛm anaa? Na wiase amfa nyansa so anhu Nyankopɔn wɔ Onyankopɔn nyansa mu nti, ɛsɔɔ Onyankopɔn ani sɛ ɔnam asɛnka no nkwaseasɛm so begye wɔn a wogye di no nkwa.”​—1 Korintofo 1:17-21.

12. Dɛn na Yehowa nam ‘asɛnka no nkwaseasɛm’ so reyɛ, na wɔn a wɔpɛ sɛ wonya “nyansa a efi soro no” bɛyɛ wɔn ade dɛn?

¹² Nea ɛyɛ nwonwa ne sɛ wɔn a wiase no frɛ wɔn nkwasea no ara na Yehowa de wɔn di dwuma sɛ n’asɛnkafo. Yiw, Onyankopɔn nam saa asɛnkafo yi som adwuma so gye wɔn a wogye di no nkwa. Yehowa yɛ nneɛma ho nhyehyɛe sɛnea ɛbɛyɛ na wɔn a wɔka “nkwaseasɛm” yi rentumi nhyɛ wɔn ankasa ho anuonyam, na nnipa afoforo rentumi nhyɛ wɔn a wɔnam wɔn so ate asɛmpa no anuonyam wɔ ɔkwan a ɛteɛ so. Eyi te saa, sɛnea ɛbɛyɛ na “ɔhonam biara anhoahoa ne ho [Onyankopɔn] anim.” (1 Korintfo 1:28-31; 3:6, 7) Ɛwom, ɔsɛnkafo no yɛ adwuma titiriw bi, nanso nkrasɛm a wɔahyɛ no sɛ ɔnka no na sɛ obi gye di a, edi boa no ma onya nkwagye. Wɔn a wɔpɛ “nyansa a efi soro no” remmu ɔsɛnkafo no nkrasɛm no animtiaa, esiane sɛ ɛte sɛ nea ɔyɛ ɔkwasea na ɔba fam, wɔtaa no na ɔkɔ afie afie nti. Mmom no, ahobrɛasefo bɛkyerɛ obu ama Ahenni ɔdawurubɔfo sɛ ɔsɛnkafo a Yehowa apaw no, na ɔba wɔ Onyankopɔn din mu. Wobebu nkrasɛm no a ɔsɛnkafo no de ba wɔn nkyɛn denam n’anom asɛm ne nhoma so no sɛ ɛho hia yiye.​—Yakobo 3:17; 1 Tesalonikafo 2:13.

13. (a) Yudafo ne Helafo buu Kristo a wɔsɛn no ho asɛm a na wɔka no dɛn? (b) Nnipa akuw bɛn na Yesu amfrɛ emu nnipa pii sɛ wɔmmɛyɛ n’akyidifo, na dɛn ntia?

¹³ Bere a Paulo retoa Onyankopɔn akwan ho asɛm a ɔreka no so no, ose: “Efisɛ Yudafo bisa nsɛnkyerɛnne, na Helafo nso hwehwɛ nyansa; na yɛn de, yɛka Kristo a wɔsɛn no no ho asɛm; ɔyɛ hintidua ma Yudafo, na ɔyɛ nkwaseasɛm ma amanaman mufo. Na wɔn a wɔafrɛ wɔn no de, Yudafo oo, Helafo oo, yɛka wɔn Kristo, Onyankopɔn tumi ne Nyankopɔn nyansa ho asɛm. Efisɛ Onyankopɔn nkwaseasɛm wɔ nyansa kyɛn nnipa, na Onyankopɔn mmerɛw yɛ den kyɛn nnipa. Na, anuanom, monhwɛ mo frɛ no, sɛ ɛnyɛ ɔhonam fam anyansafo pii, ɛnyɛ atumfo pii, ɛnyɛ adehye pii, na mmom wiase nkwaseade na Onyankopɔn apaw sɛ ɔde bɛhyɛ anyansafo aniwu. Na wiase ade a ɛyɛ mmerɛw na Onyankopɔn apaw sɛ ɔde bɛhyɛ nea ɛyɛ den no aniwu.”​—1 Korintofo 1:22-27; fa toto Yesaia 55:8, 9 ho.

14. (a) Sɛ wobisa Yehowa Adansefo nea edi wɔn ho adanse a, wɔtwe adwene si dɛn so? (b) Dɛn nti na Paulo amfa wiase nyansa anhoahoa ne ho na wasɔ Helafo no ani?

¹⁴ Bere a na Yesu wɔ asase so no, Yudafo no bisaa ɔsoro sɛnkyerɛnne (Mateo 12:38, 39; 16:1) Nanso Yesu amma wɔn sɛnkyerɛnne biara. Saa ara na nnɛ nso Yehowa Adansefo mfa adansedi a ɛte sɛ sɛnkyerɛnne biara mma. Mmom no, wɔtwe adwene si ahyɛde a wɔde ama wɔn sɛ wɔnka asɛmpa no so, sɛnea wɔakyerɛw wɔ Bible mu nkyekyem ahorow te sɛ Yesaia 61:1, 2; Marko 13:10; ne Adiyisɛm 22:17 mu no. Tete Helafo no hwehwɛɛ nyansa, nhomasua a ɛkorɔn wɔ wiase yi nneɛma mu. Ɛwom sɛ wɔde wiase yi nyansa kyerɛkyerɛɛ Paulo de, nanso wamfa anhoahoa ne ho na wasɔ Helafo ani. (Asomafo no Nnwuma 22:3) Ɔkae na ɔkyerɛw Helafo a wɔba fam no kasa, sen sɛ anka ɔde Helafo nhomanimfo kasa bɛyɛ saa. Paulo ka kyerɛɛ Korintofo no sɛ: “Anuanom, mebaa mo nkyɛn no, mamfa asɛm anaa nyansa a ɛtra so mammɛka mo Onyankopɔn adansesɛm. . . . Na me kasa ne m’asɛnka amfa nnipa nyansa adɛfɛdɛfɛ kwan so, na mmom ɛnam honhom ne tumi yikyerɛ mu, na mo gyidi annyina nnipa nyansa so, na mmom agyina Onyankopɔn tumi so.”​—1 Korintofo 2:1-5.

15. Dɛn na Petro maa asɛmpa no ho fɛwdifo kaee, na ɔkwan bɛn so na tebea a ɛwɔ hɔ mprempren no te sɛ Noa nna no mu de no?

¹⁵ Wɔ nna a edi akyiri yi mu no, ɔsomafo Petro rekae Onyankopɔn wiase foforo a ɛreba no ho asɛmpa ne wiase yi awiei a ɛrebɛn no ho fɛwdifo sɛ ‘wɔde nsuyiri sɛee’ Noa bere so wiase no. (2 Petro 3:3-7) Bere a na wɔrebɛn saa awiei a ɛsɛee nneɛma no, dɛn na Noa yɛe? Nnipa pii bu no sɛ ɔyɛ obi a ɔpam adaka nkutoo. Nanso Petro ka sɛ bere a Onyankopɔn de Nsuyiri baa tete wiase no so no, ‘Ɔkoraa Noa a ɔyɛ treneekafo ne afoforo baason nkwa so.’ (2 Petro 2:5) Akyinnye biara nni ho sɛ saa nnipa a wɔtraa ase ansa na Nsuyiri no reba no wiase nyansa nti, wodii nea Noa kae no ho fɛw, frɛɛ no ɔkwasea, ne obi a ɔyɛ adehunu. Nokware Kristofo hyia tebea a ɛte saa ara nnɛ, efisɛ Yesu de yɛn awo ntoatoaso no totoo Noa nna no mu de ho. Nanso, fɛwdifo nyinaa akyi no, Ahenni ho asɛmpaka no nyɛ nsɛm bi a wɔka kɛkɛ. Te sɛ asɛm a Noa kae no, ɛyɛ nkwagye ma ɔsɛnkafo no ne n’atiefo!​—Mateo 24:37-39; 1 Timoteo 4:16.

‘Nkwasea a Wɔyɛ na Ama Wɔadan Anyansafo’

16. Dɛn na ɛbɛba wiase yi nyansa so wɔ Harmagedon, na henanom na wobenya nkwa akɔ Onyankopɔn wiase foforo no mu?

¹⁶ Ɛrenkyɛ, Yehowa Nyankopɔn bɛma “anyansafo nyansa” asɛe wɔ Harmagedon. Obepia “anyansafo” a wɔkaa sɛnea wɔn wiase nhyehyɛe foforo no de tebea pa bɛbrɛ adesamma ho asɛm siei no “nyansa” ato nkyɛn. “Onyankopɔn, Ade Nyinaa so Tumfoɔ no, da kɛse no mu ko no” bɛsɛe wiase yi adɛfɛdɛfɛsɛm, nyansapɛ, ne nyansa no pasaa. (1 Korintofo 1:19; Adiyisɛm 16:14-16) Wɔn a wobefi saa ɔko no mu aka, na wɔanya nkwa wɔ Onyankopɔn wiase foforo no mu ne wɔn a wotie nea wiase yi frɛ no nkwaseasɛm no​—yiw, Yehowa anuonyam Ahenni ho asɛmpa no nkutoo.

17. Ɔkwan bɛn so na Yehowa Adansefo adan ‘nkwasea,’ na dɛn na wɔn a wɔka Onyankopɔn asɛmpa no asi wɔn bo sɛ wɔbɛyɛ?

¹⁷ Ɛnyɛ Yehowa Adansefo a ne honhom kyerɛ wɔn kwan no aniwu sɛ wɔbɛka nea wiase no frɛ no nkwaseasɛm no akyerɛ. Sɛ anka wɔbɛbɔ mmɔden ayɛ wiase anyansafo no, wɔabɛyɛ ‘nkwasea.’ Ɔkwan bɛn so? Sɛnea Paulo kyerɛwee no, denam Ahenni asɛnka adwuma a wɔyɛ na wɔatumi ayɛ anyansafo no so: “Sɛ obi susuw sɛ ɔyɛ onyansafo mo mu ewi yi ase a, ma ɔnyɛ ɔkwasea, na wayɛ onyansafo.” (1 Korintofo 3:18-20) Yehowa asɛnkafo a wɔka asɛmpa no nim sɛnea wɔn nkrasɛm no gye nkwa no, na wɔbɛkɔ so aka a wonnyae kosi sɛ wiase yi ne ne nyansa bɛba awiei wɔ Harmagedon ko no mu. Ɛrenkyɛ Yehowa bebu n’amansan tumidi bem, na wama wɔn a mprempren wogye di na wɔyɛ ‘asɛnka no nkwaseasɛm’ ho ade no daa nkwa.

[Ase hɔ asɛm]

Wubebua Dɛn?

◻ Nyansa abien bɛn na ɛwɔ hɔ?

◻ Dɛn ne wiase no nyansa no mu sintɔ titiriw?

◻ Dɛn nti na asɛmpaka no ne ade a mfaso wɔ so sen biara sɛ wɔyɛ?

◻ Dɛn na ɛrenkyɛ ɛbɛba wiase no nyansa nyinaa so

◻ Dɛn nti na ɛnyɛ Yehowa Adansefo aniwu sɛ wɔbɛka nea wiase no frɛ no nkwaseasɛm no akyerɛ?

[Mfonini wɔ kratafa 23]

Helafo hwehwɛɛ wiase nyansa, na wobuu Paulo asɛnka no sɛ nkwaseasɛm mpɛn pii