Bible Nhoma a Ɛto So 46—1 Korintofo

Nea Ɔkyerɛwee: Paulo

Beae a Ɔkyerɛw No: Efeso

Bere a Ɔkyerɛw Wiei: Bɛyɛ 55 Y.B.

NA Korinto yɛ “kurow a agye din yiye a ɔbrabɔne a ɛkɔɔ twi kɔɔ brɛman nyinaa bi wɔ hɔ.”a Ɛda asase teaa bi so wɔ Peloponnesus ne Hela atifi fam ntam, enti Korinto na na wɔfa kɔ Hela atifi fam. Ɔsomafo Paulo bere so no, na kurow no mu nnipa dodow bɛyɛ 400,000, na Roma, Aleksandria ne Antiokia a ɛwɔ Siria nkutoo ne nkurow a na emu nnipa dɔɔso sen Korinto. Aegean Po no da Korinto apuei fam, na Korinto Faka no ne Ionia Po no nso da atɔe fam. Enti na Korinto da baabi a eye ma aguadifo, na na po so hyɛn gyinabea abien na ɛwɔ Korinto, Akaia mantam no ahenkurow no mu. Biako wɔ Kenkrea, na biako nso wɔ Lechaeum. Korinto nso na na Hela sukuu akɛse no wɔ. Nkurɔfo ka sɛ, “Sika abu so wɔ hɔ ma wɔde yɛ kasabebu, na saa na ɔbrabɔne ne ahohwibra nso ahyɛ hɔ ma.”b Abosom a na wɔsom wɔn no bi ne Aphrodite (ɔte sɛ Roma nyamebea Venus). Akɔnnɔ bɔne na na ahyɛ Korintofo som ma.

² Kurow a na ahonyade ne ɔbrasɛe ahyɛ no ma yi mu na ɔsomafo Paulo kɔe bɛyɛ afe 50 Y.B., na na ɛhyɛ Roma tumidi ase. Okodii afe ne fã wɔ hɔ, na saa bere no ɔtew Kristofo asafo wɔ hɔ. (Aso. 18:1-11) Paulo nyaa ɔdɔ kɛse maa gyidifo yi efisɛ ɔno na odii kan kaa Kristo ho asɛmpa kyerɛɛ wɔn. Ɔkyerɛw nhoma kɔmaa wɔn, na emu na ɔkaee wɔn sɛ nyamesom mu ayɔnkofa bi da ɔne wɔn ntam. Ɔkae sɛ: “Sɛ mowɔ akyerɛkyerɛfo mpem du wɔ Kristo mu mpo a, nokwarem no, munni agyanom bebree; na menam asɛmpa no so ayɛ mo agya wɔ Kristo Yesu mu.”—1 Kor. 4:15.

³ Korinto Kristofo no som a na ehia Paulo nti, ɔkyerɛw ne nhoma a edi kan no kɔmaa wɔn bere a ɔreyɛ n’asɛmpatrɛw a ɛto so abiɛsa no. Bere a ofii Korinto no na mmere kakra atwam. Paulo kyerɛw nhoma yi bɛyɛ afe 55 Y.B., na na ɔwɔ Efeso. Ɛbɛyɛ sɛ ne nsa kaa krataa bi fii Korinto asafo foforo no hɔ, na na ehia sɛ ɔkyerɛw bi kɔma wɔn. Afei nso Paulo tee sɛ nneɛma bi nkɔ yiye koraa wɔ hɔ. (7:1; 1:11; 5:1; 11:18) Ná asɛm no haw adwene ara ma enti ɔsomafo Paulo anka wɔn krataa no ho asɛm biara kosi ne nhoma no ti 7. Nsɛm a na watete no nti ohui sɛ ɛho hia paa sɛ ɔkyerɛw ne nuanom Kristofo a wɔwɔ Korinto no.

⁴ Yɛyɛ dɛn hu sɛ Paulo kyerɛw Korintofo Nhoma a Edi Kan no wɔ Efeso? Nea ɛma yehu ne sɛ, bere a Paulo rewie ne nhoma no, ɔbɔɔ Akwila ne Priska (Priskila) din sɛ wɔn nso kyia Korintofo no. (16:19) Asomafo Nnwuma 18:18, 19 ma yehu sɛ na Akwila ne Priska afi Korinto kɔ Efeso. Esiane sɛ na Akwila ne Priskila wɔ Efeso na Paulo bɔɔ wɔn din sɛ wokyia Korintofo no nti, ɛbɛyɛ sɛ na ɔwɔ Efeso bere a ɔkyerɛw Korintofo Nhoma a Edi Kan no. Ade pɔtee a ɛma yehu sɛ na Paulo wɔ Efeso ne sɛ, ɔkae wɔ 1 Korintofo 16:8 sɛ: “Nanso mɛtra Efeso akosi sɛ Pentekoste afahyɛ no bedu.” Enti Paulo kyerɛw Korintofo Nhoma a Edi Kan no wɔ Efeso. Ɛda adi sɛ ɔkyerɛw wiei no, ankyɛ na ofii hɔ.

⁵ Nnipa dodow no ara gye tom sɛ Korintofo Nhoma a Edi Kan ne Korintofo Nhoma a Ɛto So Abien no yɛ nokware turodoo. Wɔka sɛ Paulo na ɔkyerɛwee. Tete Kristofo no gye toom sɛ ɛka Bible no ho, na wɔde kaa Bible nhoma a wɔboaboaa ano no ho. Nokwasɛm ni, nkurɔfo ka sɛ wɔfaa Korintofo Nhoma a Edi Kan no mu nsɛm kae bɛyɛ mpɛn asia wɔ krataa bi a wɔfrɛ no Clement Nhoma a Edi Kan mu. Wɔkyerɛw krataa no wɔ Roma kɔmaa nkurɔfo bi wɔ Korinto wɔ afe 95 Y.B. Ɔkyerɛwfo no ka kyerɛɛ wɔn a ɔkyerɛw wɔn no sɛ “wɔnkenkan ɔsomafo Paulo ɔhotefo no nhoma no.”c Ɛbɛyɛ sɛ Korintofo Nhoma a Edi Kan no na na ɔreka ho asɛm. Justin Martyr, Athenagoras, Irenaeus, ne Tertullian nso faa Korintofo Nhoma a Edi Kan no mu nsɛm kae tee. Adanse pii wɔ hɔ a ɛkyerɛ sɛ Paulo nhoma a wɔboaboaa ano no, na Korintofo Nhoma a Edi Kan ne Korintofo Nhoma a Ɛto So Abien no ka ho, na “ɛrekɔ afe 100 Y.B. no, na wɔaboaboa ebi ano awie.”d

⁶ Nhoma a edi kan a Paulo kyerɛw kɔmaa Korintofo no ma yehu nea na ɛrekɔ so wɔ Korinto asafo no mu. Ná Kristofo yi rehyia nsɛnnennen, na na nsɛm bi nso kyere wɔn adwene. Ná ebinom akodi nnipa akyi ma mpaapaemu aba asafo no mu. Ná aguamammɔ bi a ɛyɛ asefem rekɔ so. Ná ebinom ahokafo nyɛ gyidifo. Wɔbɛkɔ so ne wɔn ahokafo atra anaa wɔbɛtetew aware no mu? Nam a wɔakum ama abosom nso ɛ? So wobetumi adi? Ná Korintofo no hia afotu na ama wɔahu sɛnea wɔbɛyɛ asafo nhyiam ne Awurade Anwummeduan no. Gyinabea bɛn na mmea wɔ wɔ asafo no mu? Ná ebinom nso wɔ hɔ a wonnye owusɔre nni. Ná ɔhaw no dɔɔso, nanso ade a na ehia ɔsomafo no paa ne sɛ ɔbɛboa Korintofo no ma wɔasiesie wɔn som bio.

⁷ Nea na ɛrekɔ so wɔ asafo no mu ne Korinto kurow no mu no, ɛno ara bi na ɛrekɔ so nnɛ. Ná nnipa di yiye wɔ kurow no mu, na na ɔbrasɛe nso abu so. Enti Paulo afotu a tumi wom a ɔde honhom kyerɛwee no, ɛsɛ sɛ yesusuw ho. Nhoma a edi kan a Paulo kyerɛw kɔmaa anuanom mmarima ne mmea a ɔdɔ wɔn a na wɔwɔ Korinto asafo no mu no, yebetumi asua pii afi mu nnɛ. Kae nea na ɛrekɔ so wɔ hɔ saa bere no. Onyankopɔn honhom na Paulo de kyerɛw nsɛm a ntease ne tumi wom no kɔmaa ne nuanom Kristofo a na wɔwɔ tete Korinto no. Enti bere a yesusuw nhoma yi ho no, hwehwɛ wo mu hwɛ, sɛnea ɛbɛyɛ sɛ Korinto anuanom no yɛe no.

NEA ENTI A MFASO WƆ SO

²³ Paulo nhoma yi ma yɛte Hebri Kyerɛwnsɛm no ase yiye, efisɛ ɔfaa emu nsɛm pii kae. Paulo kae wɔ ti du no mu sɛ Israelfo no nom honhom fam ɔbotan bi mu nsu wɔ Mose bere so, na saa botan no ne Kristo. (1 Kor. 10:4; Num. 20:11) Afei ɔkae sɛ, sɛ yɛn kɔn dɔ bɔne a, ebetumi de ɔhaw kɛse aba, sɛnea ɛtoo Israelfo wɔ Mose bere so no. Ɔde kaa ho sɛ: “Eyinom too wɔn sɛ sɛnnahɔ, na wɔakyerɛw de rebɔ yɛn a wiase nhyehyɛe no awiei ato yɛn no kɔkɔ.” Mommma yennnye yɛn ho nnni dodo sɛ yɛrentumi nhwe ase! (1 Kor. 10:11, 12; Num. 14:2; 21:5; 25:9) Ɔsan faa asɛm bi fii Mmara no mu de yɛɛ mfatoho. Ɔkaa asomdwoe afɔre a na Israelfo bɔ no ho asɛm de kyerɛe sɛ ɛsɛ sɛ wɔn a wodi Awurade Anwummeduan no de ahwɛyiye didi Yehowa pon so. Ɔkyerɛkyerɛɛ mu sɛ ɛnyɛ bɔne sɛ wobedi biribiara a wɔtɔn wɔ namgua so, na ɔfaa Dwom 24:1 de foaa n’asɛm no so sɛ, “Asase ne n’ade dodow yɛ [Yehowa, NW] dea.”—1 Kor. 10:18, 21, 26; Ex. 32:6; Lev. 7:11-15.

²⁴ Paulo faa Hebri Kyerɛwnsɛm no mu nsɛm kae bio de kyerɛe sɛ “nneɛma a Nyankopɔn asiesie ama wɔn a wɔdɔ no no” ye koraa sen wiase “anyansafo nsusuwii” hunu no. (1 Kor. 2:9; 3:20; Yes. 64:4; Dw. 94:11) Yehowa mmara bi kae sɛ ‘wonyi bɔne biara mfi wɔn mfinimfini.’ (Deut. 17:7) Paulo gyinaa eyi so de akwankyerɛ mae wɔ nhoma no ti 5 sɛ ɛsɛ sɛ wotu ɔbɔnefo no fi asafo no mu. Paulo san gyinaa Mose Mmara no so kyerɛe sɛ ɔno nso wɔ hokwan sɛ odidi ne som adwuma ho. Ná Mmara no aka sɛ ɛnsɛ sɛ wɔkyekyere mmoa a wɔreyɛ adwuma ano sɛnea ɛbɛyɛ a wobetumi adidi. Afei nso na aka sɛ Lewifo a wɔsom wɔ asɔrefie hɔ no benya wɔn kyɛfa afi afɔremuka no so.—1 Kor. 9:8-14; Deut. 25:4; 18:1.

²⁵ Hwɛ mfaso kɛse a yenya fi Paulo nhoma a edi kan a ɔde honhom kyerɛw kɔmaa Korinto anuanom no so! Ɔkasa tiaa asafo mu mpaapaemu ne nnipa akyidi, na ɛsɛ sɛ yesusuw n’afotu no ho. (Ti 1-4) Kae aguamammɔ a na ɛrekɔ so wɔ asafo no mu no, na hu sɛ Paulo sii so dua sɛ ɛsɛ sɛ asafo no mufo bɔ ɔbrapa na wɔn ho tew. (Ti 5, 6) Kae afotu a ofi honhom mu de mae wɔ sigyadi, aware ne aware ntetewmu ho no. (Ti 7) Paulo de anibere kaa aduan a wɔde ma abosom ne afoforo a ɛnsɛ sɛ yɛto wɔn hintidua ne abosonsom ho asɛm, na ɛsɛ sɛ yesusuw eyinom nyinaa ho. (Ti 8-10) Otuu yɛn fo sɛ yɛmmrɛ yɛn ho ase mma atumfoɔ sɛnea ɛfata, na ɔkaa honhom akyɛde ho asɛm. Afei nso ɔkaa ɔdɔ ho asɛm a mfaso wɔ so sɛ ɛto ntwa da na etumi gyina biribiara ano. Ɔsomafo no san sii so dua sɛ yɛmma biribiara nkɔ so fɛfɛɛfɛ wɔ Kristofo nhyiam ase. (Ti 11-14) Hwɛ sɛnea honhom kaa no ma osii so dua sɛ owusɔre no bɛba! (Ti 15) Eyinom ne nneɛma foforo pii ho nsɛm wɔ nhoma no mu, na ɛso wɔ mfaso kɛse ma Kristofo nnɛ!

²⁶ Nhoma yi ma yɛte Bible no asɛmti a ɛyɛ anigye no ase yiye—Onyankopɔn Ahenni. Ɛde kɔkɔbɔ a emu yɛ hyew ma sɛ wɔn a wɔnteɛ rennya Ahenni no, na ɛbobɔ nneɛma a ɛnteɛ a ɛremma obi nnya Ahenni no bebree din. (1 Kor. 6:9, 10) Nanso nea ehia paa no, ɛma yehu sɛ owusɔre no ne Onyankopɔn Ahenni no wɔ biribi yɛ. Ɛka sɛ Kristo ne owusɔre mu “aba a edi kan,” na obedi “hene kosi sɛ Onyankopɔn de atamfo nyinaa begu ne nan ase.” Afei sɛ onya de atamfo nyinaa a owu ka ho gu ne nan ase a, ‘ɔde ahenni no bɛhyɛ ne Nyankopɔn ne n’Agya nsa, . . . na Onyankopɔn bɛyɛ ade nyinaa ama obiara.’ Enti Kristo ne ne honhom mu nuanom a wɔanyan wɔn no bɛbɔ Ɔwɔ no ti asɛe no koraa ama Ahenni no ho bɔ a wɔhyɛe wɔ Eden no abam. Wɔn a wɔne Kristo Yesu bɛtra ɔsoro Ahenni mu no wɔ anidaso sɛ wobenya owusɔre soronko. Wɔne Kristo Yesu nyinaa bɛtra ase a wɔrenwu da. Paulo gyinaa owusɔre anidaso yi so tuu yɛn fo sɛ: “Enti me nuanom adɔfo, muntintim, munnhinhim, monyɛ pii wɔ Awurade adwuma no mu daa, a munim sɛ mo brɛ renyɛ kwa Awurade mu.”—1 Kor. 15:20-28, 58; Gen. 3:15; Rom. 16:20.

[Ase hɔ nsɛm]