Wo Honhom​—Wobɛyɛ Dɛn Atumi Adi So?

YƐN nyinaa wɔ mfiase bi a yenya fii yɛn awofo a wɔnyɛ pɛ ho, na wɔ ɔkwan bi so no eyi ma yehu honhom ko a yɛwɔ. Afei nso, nea atwa yɛn ho ahyia ne faako a yefi nya yɛn nipasu so nkɛntɛnso kɛse. Ɛnde, so, ɛsɛ sɛ yɛbɔ asɛm no to nkyɛn denam ka a yɛbɛka sɛ, “Mintumi nyɛ sɛnea mete no ho hwee” no so anaa? Ɛda adi sɛ ɛnyɛ saa na Bible no kyerɛ yɛn kwan koraa. Mmom no, wɔhyɛ nkuran sɛ ‘yɛnyɛ yɛn adwene foforo’ na ‘yɛnhyɛ onipa foforo.’ Eyi kyerɛ sɛ yɛbɛko atia “onipa dedaw” no na yɛakwati ne nsusuwii bɔne ahorow no.​—Efe. 4:20-24; Rom. 12:2.

Ɛtɔ da bi a yɛfom, efisɛ onipa biara nni hɔ a obetumi afi pɛyɛ mu adi ne honhom so. Nanso, ɛdenam Onyankopɔn Asɛm ho a yebesusuw na yɛabɔ mpae asrɛ ne honhom no ma akyerɛ yɛn kwan so no, pii wo ho a yebetumi ayɛ de ayi “honhom” biara a enye a ebia yɛwɔ no afi hɔ, na yɛadi so. (Luka 11:13; Gal. 5:22, 23, 25) Dɛn na ebetumi aboa yɛn ma yɛayɛ eyi?

MMOA HOROW A ƐBƐMA YƐADI SO

Sɛ dɛn koraa na ɛmaa yɛn bo fuwii a, nneɛma pii wɔ hɔ a yebetumi asusuw ho a ɛbɛboa yɛn ma yɛayɛ komm bere a yɛwɔ nhyɛso ase no. Momma yɛnhwɛ nyansahyɛ abiɛsa bi a aboa ebinom.

Pɛɛpɛɛ Wo Ho Mu. Sɛ yɛhwehwɛ yɛn nkate ahorow mu hwɛ a etumi boa ankasa. Yebetumi ahwehwɛ nea enti a asɛm no aba, na yɛabisa yɛn ho sɛ dɛn nti na yɛahaw saa? Mpɛn pii na sɛ yɛyɛ eyi a yehu sɛ “nea enti” no yɛ ketewaa. Anaasɛ ebia yebetumi ahu afi yɛn mu sɛ nkate bi a, na yennim sɛ ɛwɔ yɛn mu no wɔ hɔ.

Mfaso a ɛwɔ yɛn ho mu a yɛpɛɛpɛɛ so ne sɛ ɛma yedwen afa a yɛn ankasa wɔ wo asɛm no mu, a yebetumi ayɛ ho biribi no ho mmom sen sɛ yɛbɛma yɛn bo afuw denam dwen a yebedwen onipa foforo no mfomso nkutoo ho so, ade a yentumi nyɛ ho hwee. Nsɛm bi a yebetumi abisa yɛn ho ne sɛ: So mema afoforo suban anaasɛ wɔn mfomso ahorow hyɛ me abufuw? Sɛ saa a, so esiane sɛ wɔn suban no ne kyerɛwnsɛm nhyia nti anaa? Anaasɛ esiane sɛ baabi a mifi ne me ntetee ne wɔn de nhyia nti? (Wɔ asɛm a etwa to yi ho de, ebetumi aba sɛ na asɛm no fi yɛn mmom sen onipa foforo no.) So mema me bo fuw ntɛm bere a woaka asɛm a enye bi afa me ho, ɔman a mifi mu anaasɛ m’abusua ho no? Anaasɛ me bo fuw bere a wɔatu me fo? Sɛ saa a, ebetumi aba sɛ mibu me ho dodo na nneɛma haw me ntɛm dodo? So onipa bi taa hyɛ me abufuw? So me (sɛ ɔhwɛfo anaasɛ ɔwofo) ma me bo haw me bere a wɔanni afotu akyi no?

Ɛdenam yɛn ho mu a yɛbɛpɛɛpɛɛ yi so no, ebia yebehu nea yɛyɛ mmerɛw wom ankasa. Afei na yɛwɔ nnyinaso pa a ‘yɛde bɛhyɛ yɛn nipadua ahometew’ na yɛako atia denneennen adi so.​—1 Kor. 9:27.

Fa Adwempa Hwɛ Onipa Foforo No. Sɛ obi hyɛ yɛn ahometew a, yɛhwɛ ne mmerɛwyɛ no nkutoo. Enti sɛ yebetumi abu no sɛnea Onyankopɔn bu no no a, ɛbɛboa. So onii ko no ahyira ne ho so ama Onyankopɔn na ɔdɔ no? Nea ɛsen biara no, so onipa no reda “honhom” pa adi, a ebia ade biako anaa abien bi na ɔto mu sin? Sɛ saa a, so ɛrenyɛ mmoa sɛ yɛde yɛn adwene besi ne ‘trenee,’ ‘n’ahotew’ ne ‘ne dɔ’ su ahorow no so na yɛasusuw ho?​—Fil. 4:8.

Nokwarem no, so ɛbɛyɛ papa sɛ yebegyina biribi a ɛyɛ “abufuw” biako anaa abien so abu obi atɛn, te sɛ nea yɛboapa yɛ sɛnea yenhu papa biara wɔ ne ho? Esiane sɛ daa yɛn atemmu nso betumi akɛntɛn sɛnea yɛte nka saa bere no so nti, dɛn nti na ɛsɛ sɛ yɛhwehwɛ sɛ yebu afoforo ntɛn? Yakobo ka asɛm ma emu da hɔ pefee, na obisa sɛ: “Na ɛhena ne wo ‘a wubu obi ntɛn?”​—Yak. 4:12.

Bɔ Mmɔden Hwɛ Onipa Foforo No Adwene. Eyi nyɛ mmerɛw sɛ yɛbɛyɛ, titiriw bere a n’adwene ne yɛn de nhyia koraa no. Nanso mmɔden a yɛbɔ mpɛn pii sɛ yɛbɛhwɛ nneɛma sɛnea ɔpɛ no bɛma yɛakari pɛ wɔ yɛn nkate mu na asomdwoe afi mu aba. Anyɛ yiye koraa no yebenya nea enti a ɛsɛ sɛ otumi te nka anaasɛ ɔyɛ ade sɛnea ɔyɛ no ho ntease akodu baabi. Nokwasɛm ni, sɛ yɛyɛ eyi a, na yɛde afotu a nyansa wom a ɔsomafo Paulo de maa Filipifo no redi dwuma, sɛ “mummu mo yɔnkonom nkyɛn mo ankasa mo ho, mommma obiara nnhwɛ ne nko ade, na mmom ɔnhwɛ ne mfɛfo de bi.”​—Fil. 2:3, 4.

Eyi boa yɛn ma yekwati ntɛn a yebedi kan abu bere a yɛnhwɛɛ afã abien no. (Mmeb. 18:13) Mfiase no ebia ɛbɛyɛ yɛn sɛ yedi bem koraa na yɛn nua no na wafom. Nanso bere a yɛhwɛ nneɛma mu yiye no, yehu sɛ bere nyinaa no ɛnte saa. Mmebusɛm hyɛ no nsow nyansam: “Nea odi n’asɛm mu kan yɛ sɛ ɔtreneeni; na ne yɔnko ba bɛpɛɛ ne mu.”​—Mmeb. 18:17.

KƆ SO DI HO DWUMA

Sɛ yedi saa nyansahyɛ ahorow yi akyi a na yɛrebɔ mmɔden asiesie yɛn nsɛnnennen ampa. Na yɛrennya abasamtu adwene biara nnka sɛ “ Mintumi nyɛ ho hwee.” Asɛm no ho biribi ankasa a yɛbɛyɛ bɛma yɛn ho so a anka ebetumi aba sɛ yenni no ano abrɛ ase. Ɛma yɛn ani da hɔ wɔ hia a ɛho hia sɛ yɛyɛ nsakrae wɔ yɛn nsusuwii mu, titiriw no sɛ yɛma afoforo mfomso hyɛ yɛn abufuw daa a.

Bere a yedi yɛn nkate ahorow ho dwuma no, ɛho hia sɛ yɛhwehwɛ yɛn Nyankopɔn, Yehowa, hɔ mmoa bere nyinaa. Ababaa bi a ɔwɔ New Jersey (Amerika) hyiaa asɛm a emu yɛ den wɔ eyi ho. Na ne bo fuw da biara na ɛnkyɛ na nneɛma haw no. Bere a na ɔrebɔ mmɔden ako atia saa suban ahorow no, ɔka kyerɛ yɛn nso sɛ: “Mebɔɔ Yehowa mpae dennennen sɛ onyi nneɛma a ɛhaw me no mfi hɔ. Mesrɛe sɛ ɔnhwehwɛ me koma mu, mpo wɔ me nipadua mu tɔnn, na onyi nsusuwii bɔne biara mfi me mu.” Ɛda adi sɛ Yehowa tiee ne mpaebɔ no, efisɛ ɔde ka ho sɛ: “Mprempren bɛyɛ asram bi ni no menkaa asɛmmɔne biara ɛ; m’abufuw ano adwo pii.”

Nanso ɛdɛn, sɛ bere a yɛde nyansahyɛ yi adi dwuma na yɛrenya nkɔso akyi no, yehu sɛ ɛtɔ da bi a yɛn bo huru anibere so ɛ? Nea edi kan no, ɛnsɛ sɛ yɛma kwan ma eyi haw yɛn dodo na enti yɛpa abaw. Mmom no, ehia sɛ yɛsrɛ Yehowa hɔ fafiri ne ne mmoa na yɛakɔ so ako atia. Nea ɛto so abien no, wɔ bere a biribi ahaw yɛn ankasa no, mfaso wɔ so sɛ yɛkae afotu a ɛwɔ Dwom 4:5 no: “Mo bo huru a, monnyɛ bɔne! Monkasa mo komam wɔ mo dabere, na monyɛ komm.”

ƐYƐ ƆKWAN PA?

Nanso ebia ebinom bebisa sɛ, ‘So ɛnyɛ papa sɛ “wubeyi no adi” bere a wote nka sɛ wo bo afuw?’ Saa na bebree te nka. Nanso, ɔyere bi a ɔsɔɔ eyi hwɛe da koro bi a na wɔredi anɔpaduan sɛ obenya ne kunu ma ɔde ne kyɛw asɛn baabi a ɛsɛ sɛ wɔde sɛn no gye toom bere a ne bo fuwii no: “ Nokwarem no, me bo ntaa mfuw, na sɛ me bo fuw a, ɛbɔ me yare nnanu anaa nnansa. Sɛ mɛka nokware a, meyɛɛ basaa wɔ adidi no akyi, na ebia worennye nni sɛ me kunu da so gyaw ne kyɛw no wɔ pon so mpɛn pii sen sɛ obeyi afi hɔ.”

Afoforo a wɔmaa wɔn bo fuwii kaa nea efi mu bae a edidi so yi ho asɛm: “Yafunyare.” “Me ho nyinaa wosow, na m’ani so yɛ me basaa.” “M’ani só gya ankasa.” So nea efi mu ha yi ho wɔ mfaso?

Nanso ɛnyɛ no nyinaa ni. Nea ɛka honam fam opira ho no, ɛsɛe wo ne afoforo ntam abusuabɔ. Nneɛma bebree a wɔka bere a abufuw aba no sɛe ade kɛse na ɛyɛ nea wontumi nsiesie. Awiei koraa no, wote afobu nka esiane sɛ wuhu sɛ wo ho so a woantumi anni no nsɔ Yehowa ani nti.

Onipa ntumi nnye nokware a Bible nsɛm yɛ no ho kyim: “Nea ne bo nkyɛ fuw di agyimisɛm.” “Nea n’abufuw yɛ nyaa no wɔ ntease pii.”​—Mmeb. 14:17, 29.

Afei nso, hwɛ sɛnea abebu no yɛ nokware fa: “Obufufafo hwanyan atutuw mu; na abodwokyɛrefo pata akayɔ”! (Mmeb. 15:18) Akyinnye biara nni ho sɛ onipa a ontumi nni ne honhom so no ‘hwie ngo gu ogya mu,’ na ɔma asɛm no yɛ den, nanso nea ɔda odwo honhom adi no ma nneɛma ano brɛ ase. “Mmuae brɛoo sianka anibere; na asɛnnennen hwanyan abufuw mu.”​—Mmeb.15:1.

Yiw, yɛn honhom a yebedi so betumi ayɛ nea mfaso wɔ so ampa. Ɛnyɛ sɛ yɛkwati nneɛma a enye a efi mu ba no nko, na mmom yesua sɛnea yɛne afoforo bɛtra ase. Yesua sɛnea yɛde yɛn ho bɛto yɛn honhom fam anuanom so, na yenya wɔn mu awerɛhyem. So eyi nyɛ papa nsen sɛ yɛbɛka wɔn mmerɛwyɛ ahorow ho asɛm da biara da? Bere a yɛhwehwɛ wɔn suban papa ahorow na yesuasua no yenya anigye. Akyiri yi no, ɛda adi sɛ yebehu sɛ afoforo bɛn yɛn na yɛbɛn wɔn. Eyi de asetra a ɔdɔ wom ba.

Ampa, sɛ nnipa bi boa wɔn ho ano wo atirimpɔw bi nti a, woyi “honhom” anaasɛ su titiriw bi adi. (Filem. 25) Sɛ́ ebia eyi ma nkɔso na ɛhyɛ nkuran anaasɛ ɛnhyɛ nkuran no gyina ankorankoro a wɔbom yɛ kuw no so titiriw. Yehowa Adansefo, a wɔwo asafo ahorow ɔpedudu mu wɔ wiase nyinaa, yi honhom a ɛtwetwe afoforo adi kyerɛ.

Sɛ woyɛ Yehowa Adansefo mu biako a, dɛn nti na womfa nyɛ ‘wo botae sɛ wobɛyɛ wo fam de ama honhom a edi mu akɔ so wɔ asafo a wo wom no mu? Wubetumi ayɛ eyi denam wo ankasa wo honhom a wubedi so na woayɛ nea ɔwɔ ɔdɔ, adamfofa su na woma sɛnea wo ne afoforo di nsɛm fa hyɛ nkuran no so. Wɔ saa kwan yi so no wobɛboa ama abusuabɔ a anigye wom a ɛwɔ wo honhom fam anuanom mmarima ne mmea ntam no mu atrɛw. Bere a woyɛ eyinom saa kwan yi so no wubenya mmoa ama wo ankasa wo ho na woadi wo honhom so. Nea enti a ɛte saa ne sɛ honhom pa yɛ man, na ayamye de ayamye ba. Sɛnea onyansafo no kae no: “Nhyira ɔkra bɛdɔ srade.” Mmeb. 11:25.

[Kratafa 5 mfoni]

So mema afoforo suban anaasɛ wɔn mfomso ahorow hyɛ me abufuw?