13. (a) Dɛn ne afe 2010 afe asɛm? (b) Ɔkwan bɛn so na ɔdɔ to ntwa da?

¹³ Paulo kɔɔ so kyerɛɛ nea ɔdɔ kyerɛ ne nea ɛnkyerɛ mu maa yɛn. (Monkenkan 1 Korintofo 13:4-8.) Afei, gye bere susuw ho hwɛ sɛ ebia woyɛ nneɛma a ɛkyerɛ sɛ wowɔ ɔdɔ anaa. Fa w’adwene si nkyekyɛm 7 no fã a etwa to ne nkyekyɛm 8 no fã a edi kan no so titiriw. Ɛhɔ ka sɛ: ‘Ɔdɔ gyina biribiara ano. Ɔdɔ to ntwa da.’ Na ɛno na ɛyɛ afe 2010 afe asɛm. Hyɛ no nsow sɛ Paulo kae wɔ nkyekyɛm 8 no mu sɛ, wobeyi honhom akyɛde a ebi ne nkɔmhyɛ ne kasa ahorow a wɔka a mfiase no na ɛwɔ Kristofo asafo no mu no afi hɔ. Ná ɛto betwa. Nanso ɔdɔ de, ɛbɛtena hɔ daa. Yehowa ankasa ne dɔ, na ɔte hɔ daa. Enti ɔdɔ to ntwa da, anaasɛ ɛrensa da. Yɛn Nyankopɔn a ɔte hɔ daa no bɛkɔ so ada saa su yi adi afebɔɔ.—1 Yoh. 4:8.

Ɔdɔ To Ntwa Da

20, 21. (a) Dɛn nti na ɔdɔ kyɛn so? (b) Dɛn nti na woasi wo bo sɛ wobɛfa ɔdɔ kwan no so?

²⁰ Yehowa nkurɔfo a wɔwɔ hɔ nnɛ hu sɛ nyansa wom sɛ yebedi ɔdɔ kwan a ɛkyɛn so no akyi. Nokwarem no, ɔdɔ yɛ adwuma wɔ ade nyinaa mu. Hyɛ sɛnea ɔsomafo Paulo sii saa nokwasɛm no so dua no nsow. Nea edi kan no, ɔkae sɛ honhom akyɛde no befi hɔ, na Kristofo asafo no benyin abɛyɛ den. Afei, ɔde asɛm no baa awiei sɛ: “Na seesei nneɛma abiɛsa yi na ɛwɔ hɔ, gyidi, anidaso, ɔdɔ; na nea ɛyɛ kɛse wom ne ɔdɔ.”—1 Kor. 13:13.

²¹ Awiei koraa no, nneɛma a yɛwɔ mu gyidi no bɛbam ma enti ɛho renhia sɛ yɛkɔ so nya mu gyidi bio. Sɛ wɔyɛ nneɛma nyinaa foforo a, bɔhyɛ ahorow a yɛn ani da so no bɛbam ma enti ɛrenyɛ nneɛma a yɛn ani da so bio. Na ɔdɔ nso ɛ? Ɛto rentwa da anaa ɛrensa da. Ɛbɛtena hɔ daa. Esiane sɛ yɛhwɛ kwan sɛ yɛbɛtena ase daa nti, akyinnye biara nni ho sɛ yebehu Onyankopɔn dɔ wɔ akwan pii so na yɛate ase yiye. Sɛ wudi ɔdɔ kwan a ɛkyɛn so a ɛto ntwa da no akyi de yɛ Onyankopɔn apɛde a, wubetumi atena ase daa.—1 Yoh. 2:17.