Nnɛyi Kasa Horow A Wɔka​—Efi Onyankopɔn?

“KYERƐWNSƐM no kyerɛkyerɛ sɛ honhom asubɔ, a kasa horow a wɔka di ho adanse, wɔ hɔ ma nokware asɔre no nnɛ,” saa na Pentecostal ɔsɔfo Marvin A. Hicks kyerɛ.

“Kasa horow ho nkyerɛkyerɛ titiriw no yɛ nea ɛne kyerɛwsɛm nhyia na ɛnteɛ,” saa na Dr. W. A. Criswell a ɔwɔ Dallas First Baptist Church mu no ka. Ɔde ka ho sɛ: “Sɛ ɛno ne Kristofo gyidi a, ɛnde na menyɛ Kristoni.”

Esiane saa adwene ahorow a wokura wɔ kasa horow a wɔka ho no nti, ebia wubebisa sɛ: ‘Dɛn na Kyerɛwnsɛm no ka wɔ kasa horow akyɛde no ho? So ɛyɛ Kristosom fã nnɛ? Sɛ wubenya ɛho mmuae a, eye sɛ wobɛte nea enti a wɔde kasa horow akyɛde no maa tete Kristofo no ase.

NEA ENTI A WƆDE AKYƐDE NO MAE

Nea edi kan koraa no, ɔsomafo Paulo kyerɛkyerɛ mu wɔ Hebrifo 2:2-4 sɛ wɔde anwonwa kwan so akyɛde ahorow, a kasa horow akyɛde no ka ho no maa afeha a edi kan Kristofo no de sii so dua sɛ Onyankopɔn dom afi Yudafo nhyehyɛe dedaw a wɔde som no so kɔ Kristofo asafo foforo a wɔde asi hɔ no so. Ɔsoro dom a na afi wɔn so no daa adi yiye wɔ bɛyɛ afeha a edi kan no awiei mu hɔ, bere a ná Yesu Kristo asomafo no bi da so ara te ase no.

Sɛ́ kasa horow akyɛde no dii atirimpɔw foforo ho dwuma nso no yɛ nea yetumi hu fi Yesu asɛm a ɔka kyerɛɛ n’asuafo no bere tiaa bi ansa na ɔreforo akɔ soro wɔ 33 Y.B. mu no mu. Ɔkae sɛ: “Sɛ honhom kronkron no nya ba mo so a, mubenya ahoɔden, na moayɛ m’adansefo Yerusalem ne Yudea nyinaa ne Samaria de akɔpem asase ano nohɔ.” (Aso. 1:8) Ná nnipa a wɔka asase afã horow nyinaa so kasa ahorow bi nni asuafo kuw ketewa no mu. Nanso sɛnea Yesu hyɛɛ bɔ nokwarem no, bɛyɛ dadu akyi, wɔ Pentekoste afahyɛ da no, wohwiee honhom kronkron guu n’asuafo bɛyɛ 120 a na wɔahyiam wɔ abansoro dan bi mu wɔ Yerusalem no so. Nea efii mu bae? “Wofii ase kasaa kasa foforo” na enti ná wobetumi afi ase ayɛ adansedi adwuma a wɔde ahyɛ wɔn nsa no amonom hɔ ara.​—Aso. 2:1-4.

Bere a saa asuafo no dii adanse wɔ Yerusalem wɔ Pentekoste afahyɛ no ase no, wɔtee sɛ Yudafo ne wɔn a wɔabɛyɛ Yudafo a wofi akyirikyiri baa afahyɛ no ase no ka sɛ: “Ɛyɛɛ dɛn na yɛn nyinaa te yɛn ankasa kasa a wɔwoo yɛn mu yi? . . . yɛte sɛ wɔde yɛn kasa ka Onyankopɔn ade kɛse.” (Aso. 2:8-11) Ɛda adi sɛ kasa a wɔkaa ho asɛm wɔ ha no yɛ kasa horow a ná wonim, ɛnyɛ kasa a ná wɔnte ase. Na hyɛ no nsow sɛ wɔde akyɛde no dii dwuma ma ɛne atirimpɔw nti a Yesu kae sɛ wɔbɛma wɔn honhom no hyiae, a ɛne sɛ, wɔde bedi afoforo adanse. Edii saa atirimpɔw no ho dwuma yiye, efisɛ “da no ara wɔde akra bɛyɛ mpensa bɛkaa wɔn ho.”​—Aso. 2:41.

Ade foforo nti a bere a wohwiee honhom kronkron no gui no wɔde kasa horow akyɛde no kaa ho no yɛ nea wɔabɔ ho amanneɛ wɔ Asomafo No Nnwuma 10:44-46. Sɛ wokan amanneɛbɔ no a wubehu sɛ bere a Onyankopɔn honhom baa Amanaman muni Kornelio ne ne fifo so no, wɔn nso fii ase sɛ “wɔde tɛkrɛma foforo kasa.” Ɔreka nea ná wahu saa bere no ho asɛm no, ɔsomafo Petro kae sɛ: “Na merefi ase makasa no, honhom kronkron beguu wɔn so sɛnea mfiase no, beguu wɔn so no ara.” Enti, sɛnea Petro kyerɛ no, na kasa horow akyɛde a wɔde maa wɔn saa bere no yɛ akyɛde koro no ara a wonyae mfe pii a atwam wɔ Pentekoste no​—anwonwa kwan so tumi a wɔde ka aman afoforo so kasa ahorow. Bible no kyerɛ sɛ kasa horow akyɛde a wɔde maa Kornelio ne ne fifo no maa Petro ne wɔn a wɔka ne ho no gye dii sɛ afei de ná Onyankopɔn regye Amanaman mufo a wɔyɛ momonotofo aba asafo no mu. Afei ná Onyankopɔn de Kristofo asafo no redi dwuma.​—Aso. 11:15-18.

Ebinom bisa sɛ, ‘Nanso ɔkwan bɛn so na mokyerɛkyerɛ Paulo asɛm a ɛwɔ 1 Korintofo 14:2 no mu? So Paulo anka sɛ, “Nea ɔkasa kasa bi no, ɔnkasa nkyerɛ nnipa, na mmom ɔkasa kyerɛ Onyankopɔn”?’

Nea edi kan koraa no, ɛsɛ sɛ yɛhyɛ no nsow sɛ ɛha no na Paulo renka kokoam mpaebɔ ho asɛm, na mmom, kasa horow a wɔde di dwuma wɔ asafo nhyiam ase. (Hwɛ 1 Korintofo 14:23.) Bio nso, Paulo asɛm no ne atirimpɔw nti a wɔde kasa horow akyɛde no mae ne nkyerɛkyerɛmu a wɔde ama wɔ akyɛde no ho wɔ Asomafo No Nnwuma nhoma no mu no hyia pɛpɛɛpɛ. Sɛ wokan 1 Korintofo ti 14 no nyinaa a, wubehu sɛ (1) kasa horow a wɔkaa ho asɛm no yɛ kasa ahorow a na wonim, ne (2) na ɛsɛ sɛ wɔde akyɛde no di dwuma, a ɛnyɛ kokoam, na ɛho aba wɔn a wonnye nni no mfaso.

Ma yɛnkenkan nkyekyem 2 no nyinaa. Ɛka sɛ: “Nea ɔkasa kasa bi no, ɔnkasa nkyerɛ nnipa, na mmom ɔkasa kyerɛ Onyankopɔn; na obi nte, na honhom mu na ɔka ahintasɛm.” Hela asɛmfua a wɔkyerɛɛ ase “kasa,” glõssa, no ne asɛmfua a wɔde dii dwuma wɔ Asomafo No Nnwuma 2:4, 11, baabi a ɛda adi sɛ na ɛreka kasa ahorow a wonim ho asɛm no. Hela asɛmfua a wɔkyerɛɛ ase “nte” no betumi akyerɛ biribi a wɔte nanso wɔnte nea wɔka no ase. Yebetumi ate eyi ase yiye wɔ nea ɛda adi wɔ 1 Korintofo ti 14 nkyekyem 13, 16 ne 17 no mu, baabi a yɛkenkan sɛ: “Enti nea ɔkasa kasa bi no, ɔmmɔ mpae sɛ obetumi akyerɛ ase. Na sɛ wode honhom hyira a, ɛbɛyɛ dɛn na nea ɔnte ase [anaasɛ, nea onnye nni; hwɛ nkyekyem 22-25] no begye w’aseda no so sɛ Amen, ná onnim nea woka? Wo de woda ase yiye de, nanso ɔno de onnya nkɔso.”

Yɛbɛka no tiawa a, nea ɔka kasa horow no kasa kyerɛ Onyankopɔn mmom kyɛn nnipa, sɛ nnipa a wɔretie no nte nea ɔreka no ase a. Na ɛnyɛ nea ɛwɔ Paulo adwenem ne kasa a wɔnte ase na mmom aman afoforo so kasa ahorow a na wɔhwɛ kwan sɛ afoforo betumi ate ase. Nanso, nokwarem, sɛ wɔn a wɔwɔ hɔ no mu biara nni hɔ a obetumi ate kasa no ase, na sɛ wɔn a wɔbɛkyerɛ ase nni hɔ a, ɛnde na ɛsɛ sɛ nea ɔkaa kasa foforo no bɔ mpae sɛ ebia ɔbɛkyerɛ ase na ama afoforo, titiriw wɔn a wonnye nni no, anya nkɔso. Sɛ na obiara nni hɔ a ɔbɛkyerɛ ase a, ɛnde, sɛnea kyerɛwsɛm no ka no, ɛbɛyɛ papa sɛ omua n’ano.​—1 Kor. 14:28.

Na nnɛ nso ɛ? So akyɛde ahorow te sɛ kasa horow ho renhia ma ‘akyerɛ wɔ a honhom kronkron no wɔ’ obi mu?

NNƐYI KRISTOSOM FÃ

Kyerɛwnsɛm no kyerɛ sɛ na anwonwa kwan so akyɛde ahorow a wɔde maa afeha a edi kan Kristofo no yɛ nea ɛbɛtra hɔ bere tiaa bi. “Ɔdɔ to ntwa da. Nkɔmhyɛ de, wobegu; ɔkasa horow de, ɛbɛsa.” (1 Kor. 13:8) So Bible no kyerɛ biribi wɔ bere a akyɛde ahorow no begyae ho? Yiw, ɛkyerɛ.

Wo ankasa kenkan nsɛm horow a wɔabɔ ho amanneɛ bere a na kasa horow akyɛde no ka honhom kronkron a wohwie gui no ho no: Asomafo No Nnwuma 2:1-4, 14; 10:44-48; 19:6. Wubehu sɛ wɔ emu biara mu no na Yesu Kristo asomafo no mu biako anaa nea ɛboro saa wɔ hɔ. Sɛnea Asomafo No Nnwuma 8:18 kyerɛ no, “ɛnam asomafo no nsa a wɔde gu obi so no so na wɔde honhom no ma.” Ɛnde, nyansa mu no, bere a asomafo no wuwui no, honhom akyɛde ahorow a kasa horow akyɛde no ka ho a wɔde ma no gyaee. Ná kasa horow akyɛde no adi n’atirimpɔw ho dwuma. Ná ada adi yiye sɛ Kristofo asafo no wɔ Onyankopɔn dom ne ne mmoa. Bio nso, na Kristofo adɔɔso na na wɔapete wɔ nsase pii so, na wɔde “asɛmpa” no kɔ.​—Fa toto Kolosefo 1:23 ho.

Ebia ebinom bebisa sɛ, ‘Nanso sɛ akyɛde ahorow no agyae a, ɛnde nnɛyi de a ɛda adi no fi he?’

“Yenim nso sɛ biribi a ɛte saa ara betumi aba wɔ adaemone nkɛntɛnso ase,” saa na Fountain Trust ne Church of England Evangelical Council no asɛm bi gye toom. (Yɛn na yɛde nkyerɛwde soronko akyerɛw afã bi.)

So ebetumi aba sɛ nnɛyi kasa horow akyɛde no mfi Onyankopɔn? Ampa, ebia eyi a wobegye atom no ‘bɛyɛ den ama wɔn a wɔkyerɛ sɛ wɔwɔ akyɛde no. Amerikafo a wɔanyinyin 5,000,000 a wɔkyerɛ sɛ wɔka kasa foforo no mu ɔha biara mu 33 nnye nni sɛ Ɔbonsam yɛ onipa ankasa a obetumi anya afoforo so nkɛntɛnso. Wiɛ, ɛnde, wobɛyɛ dɛn atumi ahu beae a nnɛyi de a ɛda adi no fi ankasa?

‘ƐDENAM WƆN ABA SO’

Yesu kyerɛɛ ɔkwan a wɔbɛfa so ahu nokware Kristofo, bere a ɔkae sɛ “Dua pa biara sow aba pa” no. (Mat. 7:17) Yiw, ɛsɛ sɛ wɔsow aba, anaasɛ wonya adanse bi sɛ ná Onyankopɔn honhom kronkron no gyina wɔn akyi. Ɛyɛ ahodwiriw sɛ wubesusuw Kyerɛwsɛm mu adanse horow wɔ eyi ho no mu sɛnea Christianity Today da no adi no.​—Nhwehwɛmu a wɔyɛe, na wotintim no February 22, 1980, Christianity Today mu.

Kyerɛwnsɛm no kyerɛwtohɔ nka pɛn koro mpo sɛ wɔmaa obi a ɔpɛ bɔne anaasɛ ɔpene bɔneyɛ so no anwonwa kwan so akyɛde. Na nnipa a wɔwɔ afeha a edi kan Kristofo asafo a ɛwɔ Korinto no mu bi yɛ nnipa a na wobu bra bɔne a wɔasakra abɛyɛ Kristofo. Wɔamfa wɔn ho anhyɛ ɔbarima ne ɔbea ntam abrabɔ bɔne mu bio. (1 Kor. 6:9-11) Nanso sɛnea nhwehwɛmu no kyerɛ no, wɔn a wɔka kasa horow nnɛ no ɔha biara mu 19 pene ɔbarima ne ɔbea ntam ayɔnkofa a wonya ansa na wɔaware no so.

Nokware Kristofo bɛkyerɛ obu ama Bible no sɛ ɛyɛ Onyankopɔn Asɛm. Yesu Kristo kaa nsɛm fii Kyerɛwnsɛm no mu na obuu no sɛ ɛyɛ Onyankopɔn asɛm. (Yoh. 17:17) Nanso, sɛnea nhwehwɛmu no kyerɛ no, wɔn a wɔka kasa horow wɔ yɛn bere so no ɔha biara mu 44 mmu Bible no sɛ ɛne nyamesom nhoma titiriw a ɛwɔ tumi.

Yesu hyɛe sɛ, “Enti monkɔ nkɔyɛ amanaman nyinaa m’asuafo.” (Mat. 28:19, 20) Na ɔka too hɔ sɛ wɔbɛka Onyankopɔn ahenni ho “asɛmpa yi wiase nyinaa de adi amanaman nyinaa adanse.” (Mat. 24:14) Ɛsɛ sɛ nokware Kristofo yere wɔn ho wɔ eyi yɛ mu. Nanso, sɛnea nhwehwɛmu no kyerɛ no, wɔn a mprempren wɔka kasa horow no ɔha biara mu 51 nnka wɔn gyidi ho asɛm nkyerɛ, anyɛ yiye koraa no dapɛn biara, na ɔha mu nkyem 58 mma ɛnyɛ wɔn ahiade sɛ wɔbɛboa ma wɔatwe afoforo ama Kristo.

Yesu ka faa n’akyidifo ho sɛ, “Womfi wiase.” (Yoh. 17:16) Sɛ́ wɔbɛyɛ wɔn a “womfi wiase” mmom no, Christianity Today bɔ amanneɛ sɛ kasa horow kafo “bata amammui ho, di nea amanfo nyinaa yɛ akyi.”

Yesu kae sɛ, “Sɛ mododɔ mo ho a, nnipa nyinaa behu sɛ moyɛ m’asuafo.” (Yoh. 13:35) Ɔsomafo Yohane de kaa ho sɛ: “Yɛnnodɔ yɛn ho . . . ɛnyɛ sɛ Kain a ofi ɔbɔne no mu na okum ne nua no.” (1 Yoh. 3:11, 12) Nokware Kristofo wɔ ɔdɔ ankasa ma wɔn ho wɔn ho. Abusua, ɔman anaa obi dibea a ɔwɔ ho adwemmɔne ahorow mpaapaee wɔn mu. Wɔ ɔko bere mu mpo no, wɔpow sɛ wobekum wɔn mfɛfo gyidifo a wɔwɔ nsase afoforo so. So ɛno yɛ nokware wɔ amanfo nyinaa ho? Wɔ wɔn a wɔkyerɛ sɛ wɔwɔ kasa horow akyɛde no ho?

Enti, afei, dɛn na adanse no kyerɛ? Wiɛ, esiane sɛ wɔn a wɔka kasa horow, sɛ́ kuw no, nsow “aba” a ɛda nokware Kristofo adi no nti, ɛda adi sɛ ná wɔn a wɔkyerɛ sɛ wɔwɔ kasa horow akyɛde no rentumi nnya mfi beae koro no ara a tete Kristofo nya fii no.

Kyerɛwnsɛm no kura kɔkɔbɔ ahorow a emu yɛ den a ɛkyerɛ sɛ efi beae foforo. Yesu ka too hɔ sɛ: “Ɛda no, nnipa pii bɛka akyerɛ me sɛ: Awurade, Awurade, yɛmfaa wo din nhyɛɛ nkɔm, na yɛmfaa wo din ntuu ahonhommɔne, na yɛmfaa wɔ din nyɛɛ ahoɔdenne pii anaa? Ɛno na mɛpaem maka makyerɛ wɔn sɛ: Minhuu mo da!” (Mat. 7:22, 23) Ɔsomafo Paulo bɔɔ kɔkɔ sɛ bere bi bɛba a “atoro tumi ne sɛnkyerɛnne” besisi sɛ “Satan adwumayɛ.”​—2 Tes. 2:9, 10.

Ɛnde, ɔkwan bɛn so na wubetumi ahu Kristo nokware akyidifo no, sɛ ɛnyɛ anwonwa kwan so kasa horow akyɛde a obi wɔ so na wɔnam hu wɔn a? Ɛdenam “aba,” Kyerɛwsɛm mu adanse horow a yɛasusuw ho no so.

Yɛto nsa frɛ wo sɛ hwehwɛ Bible no mu na fa toto Yehowa Adansefo nkyerɛkyerɛ ne wɔn nneyɛe horow ho. Wo ankasa hwɛ sɛ nea wuhu no bɛka wo ma woaka wɔ wɔn ho sɛ, “Onyankopɔn wɔ mo mu ampa.”​—1 Kor. 14:25.