Nsemmisa A Efi Akenkanfo Hɔ

● So ɛho hia sɛ wɔbɔ obi a onni ahoɔden koraa anaa wanyin dodo a asu a wɔbɛbɔ no betumi de ne nkwa ato asiane mu no asu anaa?

Bible kyerɛ sɛ asu a wɔbɔ obi de no hyɛ nsu ase koraa no hia. Enti bere a ɛho behia sɛ wɔyɛ nhyehyɛe soronko bi esiane onii no tebea nti mpo no, ɛsɛ sɛ wɔbɔ no asu, sɛ ɛbɛyɛ yiye a.

Yesu a na wɔanyan no no ka kyerɛɛ n’asuafo no sɛ: “Monkɔ nkɔyɛ amanaman nyinaa m’asuafo. Mommɔ wɔn asu na monkyerɛkyerɛ wɔn sɛ wonni nea mahyɛ mo nyinaa so.” (Mat. 28:19, 20) Yiw, ɛsɛ sɛ wɔbɔ wɔn a wosua Onyankopɔn apɛde na wohyira wɔn ho so sɛ wɔbɛsom no no nyinaa asu nsu mu, sɛnea wɔbɔɔ Yesu ankasa asu no. (Hela asɛmfua baptízein ase kyerɛ “sɛ wɔde obi hyɛ nsu mu, de no hyɛ ase.”) Yɛkenkan wɔ ɔsraani panyin Kornelio ne n’abusua no ho sɛ: “[Petro] hyɛe sɛ wɔmmɔ wɔn asu Awurade [Yesu Kristo] din mu.”​—Aso. 10:48.

Yehowa Adansefo yɛ asubɔ ho nhyehyɛe wɔ nhyiam horow ase nnɛ bere yi. Wɔtaa yɛ asubɔ no ankasa wɔ ɔtare anaa asubɔnten a ɛbɛn hɔ a nsu dɔɔso wɔ mu a wobetumi de obi ahyɛ mu ama akata no so mu. (Fa toto Asomafo no nnwuma 8:38 ho.) Nanso ebinom wɔ hɔ a wɔpɛ sɛ wɔbɔ wɔn asu a wontumi nkɔ nhyiam ase wɔ tebea a wɔwom no nti. Enti wɔatumi ayɛ asubɔ ahorow a ɛfata wɔ ofie guasɛn akɛse mu. Eyinom atumi aboa wɔn a wɔwɔ komayare, wɔn a wɔanyinyin dodo anaa wɔn a wonni ahoɔden titiriw. Wotumi ka nsu a ɛwɔ guasɛn no mu no hyew na enti ɛnhaw wɔn. Wɔma onii no so brɛoo de no si nsu no mu nkakrankakra. Na bere a ne ho agye nsu no mu no, wɔbɔ no asu ankasa.

Na wɔn a wɔn tebea yɛ soronko koraa no nso ɛ? Wɔatumi abɔ pii a wɔtete saa asu. Wɔabɔ nnipa a wɔatutu akuru akɛse a ɛnsã da asu. Wotumi de biribi kataa kuru no so bere tiaa bi sɛnea ɛbɛyɛ na nsu ankɔ mu. Wɔatumi abɔ nnipa a mfiri bi na ɛboa wɔn ma wotumi home mpo asu. Wɔyɛɛ nhyehyɛe na oduyɛfo anaa ayarefo hwɛfo a ne ho akokwaw aboa. Wɔde onii a wɔabubu koraa no hyɛɛ nsu no mu bere a na ɔhome fa biribi a wɔde ahyɛ n’anom mu. Afei bere a wɔde ne ti rehyɛ nsu no ase no wotuu dekode a ɛhyɛ n’anom no na wɔsan de hyɛe ntɛm ara bere a wɔmaa ne ti so no. Eyinom nyinaa kyerɛ sɛ, ɛwom sɛ nsɛm no bi wɔ hɔ a ebehia sɛ wɔhyɛ da yɛ ho nhyehyɛe yiye de, nanso ɛkame ayɛ sɛ wobetumi abɔ obiara asu.

Ɛyɛ ampa sɛ, wɔ tebea horow bi a emu yɛ den mmoroso mu no ebia asubɔ bɛyɛ te sɛ nea entumi nyɛ yiye mprempren. Na eyinom fam no, yɛwɔ anidaso sɛ yɛn soro Agya mmɔborohunufo no bɛte ase na wagye onii a ofi ne pɛ mu ahyira ne ho so ne komam no atom. (Dw. 103:13, 14; Kwa. 3:22) “Awurade [Yehowa] ankasa sɔ ɔtreneeni hwɛ . . . wɔn a wɔteɛ behu n’anim.” (Dw. 11:5, 7) Enti yebetumi anya awerɛhyem sɛ baabi a ɛrentumi nyɛ yiye sɛ wɔbɛbɔ obi a wahyira ne ho so foforo asu esiane nipadua mu ahoɔden a onni nti no, Yehowa besusuw tebea no ho mmɔborohunu mu.