Onyankopɔn Na Ɔma Enyin​—So Woyɛ Wo Fam De?

YƐ HO mfonini wɔ w’adwenem. Wowɔ turo fɛfɛ bi mu, a nnua akɛse, nnua a ɛso nhaban pii, ne nhwiren fɛfɛ pii atwa wo ho ahyia. Asase a ɛso ahabammono siansian kɔ asuwa bi a wɔasiesie ano yiye na emu nsu a ani kurenyenn reworo so ho. Biribiara nni hɔ a ɛsɛe ne fɛ. Ɛyɛ wo fɛ ma wubisa onii ko a ɔyɛɛ beae a ɛyɛ fɛ sɛɛ. Turoyɛfo no fi ahobrɛase mu bua sɛ Onyankopɔn na ɔma nneɛma nyinaa nyin.

Wunim ɛno dedaw. Na bere a wukodu fie na wuhu w’ankasa w’afikyiri a ɛhɔ basaa, faako a afifide a ɛyɛ fɛ biara nnyin, sumina sum hɔ, na nsu ataataa amoa a ɛyɛ tan a ɛwowɔ asase no so mu no, wokae turohwɛfo no nsɛm no. Wo kɔn dɔ yiye sɛ wubenya turo bi te sɛ nea woakɔsra mu no. Enti, turoyɛfo no nsɛm a ɔkae a woagye adi yiye no ma wubu nkotodwe bɔ Onyankopɔn mpae denneennen sɛ ɔmma nhwiren fɛfɛ mfifi wɔ wo fi adiwo hɔ. Dɛn na ɛba? Nokwarem no, biribiara remma.

Na honhom mu onyin nso ɛ? Ebia wowɔ ɔpɛ a emu yɛ den sɛ wubehu sɛ nneɛma renya nkɔso wɔ honhom fam wɔ sɛnea asuafo afoforofo regye Onyankopɔn Asɛm mu nokware atom anaa wɔ w’ankasa honhom fam nkɔso mu. Na ebia wobɛbɔ Yehowa mpae denneennen sɛ ɔmma nkɔso a ɛte saa mmra, a wugye di yiye sɛ ɔwɔ tumi a ɔde bɛyɛ saa. Nanso so ɔpɛ a emu yɛ den a wowɔ, mpaebɔ a emu yɛ den, ne Onyankopɔn tumi mu ahotoso a wowɔ nkutoo betumi de nkɔso aba?

Onyankopɔn na Ɔma Enyin

Ebia wote nka sɛ wo fam de a wobɛyɛ ma honhom fam nkɔso aba no sua, anaasɛ ɛnsɛ hwee mpo. So ɛnyɛ biribi saa na ɔsomafo Paulo kaa ho asɛm wɔ 1 Korintofo 3:5-7 no? Ɔkyerɛw sɛ: “Ɛno, Apolo ne hena? Paulo ne hena? Wɔyɛ asomfo a monam wɔn so agye adi, na wɔn mu biara wɔ nea Awurade de ama no. Me de, miduae, Apolo guguu so nsu, na Onyankopɔn na ɔma enyinii. Enti ɛnyɛ nea odua, na ɛnyɛ nea ogugu so nsu na ɔyɛ biribi, na mmom Onyankopɔn a ɔma enyin no.”

Paulo gye tom ɔkwan a ɛfata so sɛ, sɛ nneɛma nyin a, nkamfo nyinaa yɛ Onyankopɔn dea. Ebia turoyɛfo besiesie n’asase no so, agu n’aba, na wahwɛ afifide no yiye, nanso awiei no ɛyɛ Onyankopɔn adebɔ tumi a ɛyɛ nwonwa no na ɛma nneɛma nyin. (Genesis 1:11, 12, 29) Nanso, na dɛn na Paulo kyerɛ bere a ɔkae sɛ “ɛnyɛ nea odua, na ɛnyɛ nea ogugu so nsu na ɔyɛ biribi no”? (“Ɛnyɛ turoyɛfo a wodua na wogugu so nsu no na wɔn ho hia,” The New English Bible.) So na ɔrebrɛ hia a ɔsomfo bi kyɛfã wɔ afoforofo a wɔyɛ wɔn asuafo mu hia no ase, a ɔrekyerɛ sɛ awiei koraa no, sɛnea yɛyɛ yɛn som adwuma no ho nhia ahe biara?

‘Ɛnyɛ Nea Odua Na Ɔyɛ Biribi’

Ma ɛntra w’adwenem sɛ wɔ ne krataa no fã yi mu no, ɛnyɛ nea Paulo reka Kristofo som adwuma ho asɛm na mmom sɛnea ɛyɛ nkwaseasɛm sɛ wobedi nnipa akyi sen Yesu Kristo. Ná Korintofo binom de obu a ɛmfata rema Yehowa asomfo binom a wonim wɔn yiye te sɛ Paulo ne Apolo. Ná afoforo nso rehyɛ mpaapaemu ho nkuran na wɔma nnipa binom a na wosusuw sɛ wokorɔn sen wɔn nuanom Kristofo no so.​—1 Korintofo 4:6-8; 2 Korintofo 11:4, 5, 13.

Anuonyam a wɔhyɛ nnipa wɔ saa kwan yi so no mfata. Ɛyɛ honam fam adwene, na ɛde ahoɔyaw ne kunsunkunsun na ɛba. (1 Korintofo 3:3, 4) Paulo kyerɛ nea ebetumi afi nsusuwii a ɛte saa mu aba. Ɔka sɛ: “Kunsunkunsun wɔ mo mu. Na mede eyi, sɛ mo mu biara ka sɛ: Me de meyɛ Paulo de; me de meyɛ Apolo de; me de meyɛ Kefa de; me de, meyɛ Kristo de.”​—1 Korintofo 1:11, 12.

Enti bere a ɔkyerɛw sɛ, “nea odua ne nea ogugu so nsu nsɛ hwee” (Philips) no, na ɔsomafo no reko atia honam fam adwene a ɛte sɛɛ, na osii hia ehia sɛ yɛhwɛ Kristo sɛ Ɔkannifo na yegye tom sɛ asafo no mu nkɔso biara ho anuonyam yɛ Onyankopɔn dea. Asomafo no ne mpanyimfo afoforo no yɛ asafo no asomfo ara kwa. Ɛnsɛ sɛ wɔma wɔn mu biara so na saara na ɛnsɛ sɛ wɔn ankasa hwehwɛ sɛ wobenya dibea anaasɛ wɔayɛ atitiriw. (1 Korintofo 3:18-23) Enti Paulo ka sɛ nea odua ne nea ogugu so nsu no nsɛ hwee, “sɛ wɔde wɔn toto nea ɔma no nkwa no ho a.”​—1 Korintofo 3:7, Philips.

Onyankopɔn Mfɛfo Adwumayɛfo

Enti, na ɛnyɛ nea ɔsomafo Paulo nam asɛm a ɔkae yi so rebrɛ sɛnea yɛn fam de a yɛyɛ wɔ dua a wodua ne gu a wogu so nsu ho hia no ase. Ná ɛnyɛ nea ɔrekyerɛ ne sɛ yemfi ase nsusuw sɛ, “Onyankopɔn bɛma nneɛma anyin wɔ n’ankasa bere a ɔpɛ mu,” na afei yɛatra hɔ atwɛn no sɛ ɔnyɛ saa. Ná onim sɛ nea yɛyɛ ne sɛnea yɛyɛ no no ka sɛnea nneɛma nyin no.

Ɛno nti na Paulo hyɛɛ Kristofo nkuran bere nyinaa sɛ wɔnyere wɔn ho nyɛ wɔn som adwuma no na wonnya nkɔso wɔ wɔn mmɔdenbɔ mu sɛ akyerɛkyerɛfo. Susuw afotu a ɔde ma aberante Timoteo yi ho: “Ma w’ani mmra wo ho ne kyerɛ no so na tra mu, efisɛ woyɛ saa a, wubegye wo ho ne w’atiefo nkwa.” (1 Timoteo 4:16) “Midi wo adanse . . . ,pae mu ka asɛm no,na gyina mu. . ., abodwokyɛre ne ɔkyerɛkyerɛ nyinaa mu . . ., Wie wo som no koraa.” (2 Timoteo 4:1, 2, 5) Sɛ na aba a Timoteo bedua ne gu a obegugu so nsu no rennya nyin a ebenyin no so tumi biara a, anka ɛbɛyɛ nea nyansa nnim sɛ ɔbɛyere ne ho na ama wanya nkɔanim wɔ ne mmɔdenbɔ ahorow mu.

Te sɛ Paulo ne Apolo no, wo nso wubetumi anya hokwan kɛse a ɛne som a wobɛsom sɛ Onyankopɔn mfɛfo adwumayɛfo mu biako no. (1 Korintofo 3:9; 2 Korintofo 4:1; 1 Timoteo 1:12) Enti, w’adwuma no ho hia. Turoyɛfo nhwɛ kwan sɛ Onyankopɔn nam anwonwa kwan so bɛma wanya turo fɛfɛ wɔ bere a ɔno turoyɛfo no mmɔ ho mmɔden biara. So ɛsɛ sɛ honhom mu onyin yɛ soronko? Dabida. Te sɛ okuafo a ɔtɔ ne bo ase ‘twɛn asase aba a ne bo yɛ den no,’ ɛsɛ sɛ yedi kan yere yɛn ho dua na yegugu so nsu, na yɛtwɛn sɛ Onyankopɔn bɛma anyin.​—Yakobo 1:22; 2:26; 5:7.

Yɛ Wo Fam De

Sɛnea ɔsomafo Paulo ka no, esiane sɛ ‘obiara benya n’akatua sɛnea n’ankasa n’adwuma te’ nti, ɛsɛ sɛ yebisa yɛn ho sɛnea yɛreyɛ adwuma no.​—1 Korintofo 3:8.

Turoyɛ ho ɔbenfo Geoffrey Smith se: “Enhia ahwehwɛde tititiw biara na ama obi atumi ayɛ turoyɛfo, nea ehia ara ne afifide ho anigye ara kwa.” (Shrubs & Small Trees) Saa ara na yenhia ahwehwɛde tititiw biara wɔ yɛn mu ansa na yɛatumi ayɛ Onyankopɔn mfɛfo adwumayɛfo; nea ehia ara ne nnipa ho anigye ankasa a yɛwɔ ne ɔpɛ a yɛwɔ sɛ Onyankopɔn de yɛn bedi dwuma.​—2 Korintofo 2:16, 17; 3:4-6; Filipifo 2:13.

Susuw afotu pa ahorow a turoyɛfo a wɔn ho akokwaw de ma no binom ho. Sɛnea nhoma biako kyerɛ no, sɛ turoyɛ mu abɛɛfo bi wɔ ɔpɛ sɛ obetie wɔn a wɔwɔ osuahu sen no a, “osuani no betumi abɛyɛ nea waben wɔ bere tiaa bi mu.” Na, nhoma koro no ara ka sɛ, “ɔbenfo hwehwɛ biribi foforo asua bere nyinaa.” (The Encyclopedia of Gardening) So wowɔ ɔpɛ sɛ wubegye mmoa ne ntetee a Yehowa de ma sɛnea ɛbɛyɛ a wubetumi adua na woagugu so nsu yiye no? Sɛ woyɛ saa a, sɛ́ woyɛ ɔfoforofo wɔ adwuma no mu anaasɛ wo ho akokwaw wɔ mu no, wubetumi anya ahokokwaw pii sɛ Onyankopɔn mfɛfo adwumayɛfo ma enti ‘woafata yiye sɛ wobɛkyerɛkyerɛ ebinom.’​—2 Timoteo 2:2.

Geoffrey Smith ka sɛ, sɛ ɔwɔ ɔpɛ sɛ obetie na wasua ade a, “abɛɛfo no bɛkwati asiane ahorow a ennye koraa no.” Sɛ yetie akwankyerɛ a Yehowa nam n’asɛm ne n’ahyehyɛde no so de ma yɛn no a, yɛbɛyɛ nneɛma sɛnea ɔpɛ. Afei, yɛbɛkwati, sɛ nhwɛso no, asiane ahorow te sɛ nkwasea akyinnye a yɛne wɔn a nea wɔpɛ ara ne sɛ wɔbɛham anaasɛ wɔbɛko nsɛm ho begye no.​—Mmebusɛm 17:14; Kolosefo 4:6; 2 Timoteo 2:23-26.

Turoyɛ ho afotu pa foforo nso ne sɛ ɛsɛ sɛ wususuw nneɛma ho yiye ansa na wode ahopere akotu fam. The Encyclopedia of Gardening, se: “Ansa na wubefi ase atu fam no, gye bere susuw [w’akwanhwɛ ahorow] ho komm.” So wotɔ afiri a ɛne Kristofo som adwuma no a wode ahopere fi ase bere a wunnii kan mfaa mpaebɔ nsusuw nea wopɛ sɛ woyɛ ne ɔkwan a ɛsen biara a wobɛfa so ayɛ ho no mu? Hu wo botae horow yiye ansa na woafi ase no mu. Sɛ nhwɛso no, susuw nnipa ko a ebia wubehyia wɔn ne nsɛnnennen a wubetumi ahyia ho, na siesie wo ho sɛ wubedi eyinom ho dwuma. Eyi bɛma ‘woanya nnipa pii bere a woyɛ ade nyinaa ma nnipa nyinaa no.’​—1 Korintofo 9:19-23.

“Nyi Wo Nsa Mfi Ho”

Sɛ yɛn ani sɔ hokwan a yɛwɔ sɛ yɛresom sɛ Onyankopɔn mfɛfo adwumayɛfo no a, yɛremfa yɛn fam de a ɛsɛ sɛ yɛyɛ no nkame. “Gu w’aba anɔpa, na anwummere nso nyi wo nsa mfi ho, na wunnim nea ɛbɛyɛ yiye, eyi anaa eyi, anaasɛ n’abien nyinaa bebom ayɛ yiye.” (Ɔsɛnkafo 11:6) Nea ebefi mu aba awiei koraa no wɔ Yehowa nsam, nanso sɛ yedi kan de nsi dua nkutoo a na yebetwa aba.​—Ɔsɛnkafo 11:4.

Turo biara nni hɔ a wɔnam fam a wotutu ne aba a wɔpete no biara biara so ma ɛyɛ fɛ. Saa ara na wɔhwehwɛ pii wɔ Kristofo som adwuma no mu sen Bible nhoma kyekyɛ mu kyɛfa ara kwa a wonya. Sɛ́ Onyankopɔn mfɛfo adwumayɛfo no, ehia sɛ yɛde nsi ka Onyankopɔn Ahenni no ho asɛmpa fefeefe, na yɛhwehwɛ wɔn a wɔyɛ komapafo. (Asomafo no Nnwuma 13:48) Kae ɔsomafo Paulo nsɛm a ɛwɔ 2 Korintofo 9:6 mu nnyinasosɛm no: ‘Nea ogu nkyekye so no betwa nkyekye so, na nea ogu pii no betwa pii.’

Te sɛ turoyɛfo pa biara no, yɛbɔ mmɔden sɛ yebegu yɛn aba wɔ asase pa mu. Nanso, sɛ wonya dua biribi wɔ asase a eye sen biara mpo mu a, ɛnyɛ nea ɛso hɔ ara. Geoffrey Smith se: “Eyi nkyerɛ sɛ, sɛ nea ɔhwɛ hɔ no dua nneɛma no wie a, ɛho nhia sɛ ɔyɛ biribiara sen sɛ obenya nneɛma a ɔde begye n’ahome wɔ hɔ.” Dabi, sɛ nneɛma no benyin a, ehia mmɔdenbɔ a wɔde begugu so nsu na wɔabɔ afifide no ho ban.​—Fa toto Mmebusɛm 6:10, 11 ho.

Nokwarem no, Kristofo som adwuma no betumi ahwehwɛ sɛ wɔde bere tenten yɛ adwumaden a ɛte sɛ nea biribi pa biara mfi mu mma. Nanso, mpofirim ne ɛtɔ mmere bi a, bere a wɔnhwɛ kwan no, biribi a ɛyɛ nwonwa tumi fi mu ba. Geoffrey Smith se: “Nea ɛwɔ turoyɛ mu ne mmere tenten a wɔde yɛ adwumaden a ɛne mmere a wohu nneɛma a ɛyɛ fɛ yiye a ɛma werɛ fi fam tutu, adɔw, ne adwennwene no nyinaa, a adi afra.” Wo nso wubetumi anya abotɔyam kɛse bere a komapafo bi gye nokware nkrasɛm no tom​—sɛ wowɔ ɔpɛ sɛ wubedi kan atu fam, agu aba, adɔw ho, na wagugu so nsu nkutoo a.​—Fa toto Mmebusɛm 20:4 ho.

Ná Paulo ne Apolo nim sɛ wɔn adwuma a ɛne Ahenni asɛmpaka ne asuafoyɛ adwuma no amma wɔannya dibea titiriw bi wɔ Kristofo asafo no mu. Wɔtee ase sɛ ɛyɛ Onyankopɔn na ɔma nneɛma nyin. Nanso, woduae na woguguu so nsu​—nsiyɛ mu. Ɛmmra sɛ yebedi wɔn nhwɛso akyi na yɛde yɛn ho ama Onyankopɔn sɛ “asomfo a [afoforo nam] wɔn so agye adi.”​—1 Korintofo 3:5, 6.

[Mfonini wɔ kratafa 23]

Onyankopɔn na ɔma nneɛma nyinaa nyin​—nanso turoyɛfo no nso yɛ ne fam de