Owura no Nneɛma a Yɛbɛhwɛ So

¹ Wɔ Bible mmere mu no, na wɔde nnwuma akɛse hyɛ ofiehwɛfo nsa. Abraham de hyɛɛ ne fiehwɛfo nsa sɛ ɔnhwehwɛ ɔyere mma ne babarima, Isak. (Gen. 24:1-4) Enti, na ɛyɛ ofiehwɛfo no asɛyɛde sɛ ɔhwɛ ma Abraham abusua santen no tra hɔ. Asɛyɛde bɛn ara ni! Ɛnyɛ nwonwa sɛ ɔsomafo Paulo kae sɛ: “Nea wɔhwehwɛ ofiehwɛfo ho ne sɛ wohu no ɔnokwafo”!—1 Kor. 4:2.

Kristofo Fiehwɛ Adwuma

² Wɔka Kristofo som adwuma no fã bi ho asɛm wɔ Bible mu sɛ ofiehwɛ adwuma. Sɛ nhwɛso no, ɔsomafo Paulo kaa ‘Onyankopɔn dom a mo nti wɔde adom me no ho ofiehwɛ adwuma no’ ho asɛm kyerɛɛ Efesofo no. (Efe. 3:2; Kol. 1:25) Obuu ahyɛde a ɛne sɛ ɔmfa asɛmpa no nkɔma amanaman no sɛ ofiehwɛ adwuma a na ɛsɛ sɛ odi ho dwuma nokwaredi mu. (Aso. 9:15; 22:21) Ɔsomafo Petro kyerɛw ne nuanom a wɔasra wɔn no sɛ: “Monyeyɛ mo ho hɔho a huhuhuhu nni mu. Sɛnea mo nyinaa nyinyaa ɔdom akyɛde no, momfa nsonsom mo ho mo ho sɛ Onyankopɔn dom ahorow no so afiehwɛfo pa.” (1 Pet. 4:9, 10; Heb. 13:16) Ná biribiara a afeha a edi kan mu Kristofo no wɔ wɔ honam fam no fi Yehowa dom mu. Enti, na wɔyɛ saa nneɛma no so ahwɛfo, na na ɛsɛ sɛ wɔde di dwuma wɔ Kristofo kwan so.

³ Yehowa Adansefo bu nsɛm nnɛ saa ara. Wɔahyira wɔn ho so ama Yehowa Nyankopɔn, na wobu nea wɔwɔ nyinaa—wɔn nkwa, wɔn honam fam ahoɔden, ne honam fam nneɛma—sɛ “Onyankopɔn dom ahorow” no aba. Sɛ́ afiehwɛfo pa no, wɔte nka sɛ wobebu akontaa akyerɛ Yehowa Nyankopɔn wɔ sɛnea wɔde saa nneɛma yi di dwuma no ho. Bio nso, wɔama wɔanya asɛmpa no ho nimdeɛ. Eyi nso yɛ biribi a wɔde ahyɛ wɔn nsa a wɔpɛ sɛ wɔde di dwuma wɔ ɔkwan a eye sen biara so: sɛ́ wɔbɛkamfo Yehowa din, na wɔaboa afoforo ma wɔabenya nokware no ho nimdeɛ.—Mat. 28:19, 20; 1 Tim. 2:3, 4; 2 Tim. 1:13, 14.

⁴ Ɔkwan bɛn so na Yehowa Adansefo redi wɔn asɛyɛde ho dwuma sɛ afiehwɛfo? Afe afe amanneɛbɔ kyerɛ sɛ afe a etwaam nkutoo no, wɔde bɛboro nnɔnhwerew ɔpepepem biako na ɛkaa “ahenni no ho asɛmpa” wɔ wiase nyinaa, na wɔne anigyefo 4,500,000 yɛɛ ofie Bible adesua. (Mat. 24:14) Wɔn nokwaredi sɛ Yehowa afiehwɛfo no nso daa adi denam ayamye mu a wofi yii ntoboa boaa wiase nyinaa adwuma ne asafo Ahenni Asa ahorow si, ahɔhoyɛ a wɔdaa no adi kyerɛɛ ahwɛfo akwantufo ne afoforo, ne ayamye soronko a wɔdaa no adi kyerɛɛ wɔn a na wɔwɔ ahohia mu—te sɛ wɔn a akodi ama wɔrehu amane—no so. Sɛ́ kuw no, nokware Kristofo rehwɛ Owura no nneɛma so yiye.

“Ofiepanyin Nokwafo ne Ɔbadwemma” No

⁵ Ɛnyɛ ankorankoro nko na wɔyɛ ofiehwɛ adwuma no, na mmom ahyehyɛde no nyinaa nso. Yesu frɛɛ Kristofo a wɔasra wɔn asafo a ɛwɔ asase so no “ofie panyin nokwafo ne ɔbadwemma.” (Luka 12:42) “Ofiepanyin nokwafo” yi asɛyɛde ne sɛ ɔde “aduan” bɛma, na wadi wiase nyinaa asɛmpaka adwuma no anim. (Adi. 12:17) Nea ɛka eyi ho no, Onyankopɔn de asɛyɛde ahyɛ ofiepanyin nokwafo kuw, a Sodikuw no gyina wɔn ananmu no, nsa sɛ wonni honam ne honhom fam “talente” no ho dwuma wɔ ɔkwan a ɛfata so. (Mat. 25:15) Nea ɛne “ofiepanyin nokwafo” no nhwɛso hyia no, baa dwumadibea ahorow no mu biara bɔ mmɔden sɛ wɔde sika fam ntoboa no bedi dwuma wɔ ɔkwan a ɛfata so de ama Ahenni nneɛma anya nkɔso. Wɔde saa ntoboa yi nyinaa sie, na “ofiepanyin nokwafo ne ɔbadwemma” no na ɛhwɛ ma wɔde di atirimpɔw nti a woyii no ho dwuma, na wɔde di dwuma nyansam.

⁶ Yehu ntoboa a wɔde di dwuma nyansam no ho nhwɛso wɔ nkɔso a Yehowa Adansefo nhomatintim adwuma no anya wɔ afeha a ɛto so 20 yi mu no mu. Bible ne Bible ho nhoma ahorow a wɔkyekyɛ—nsɛmma nhoma, nhoma, nhomawa, nkratawa, ne Ahenni Asɛm—no adi dwuma titiriw wɔ “asɛmpa” no a wɔka wɔ “nna a edi akyiri” yi mu no mu. (Marko 13:10; 2 Tim. 3:1) Na Ɔwɛn-Aban nsɛmma nhoma no ayɛ adwinnade titiriw a wɔnam so de “aduan” ma “Nyankopɔn fifo” ne wɔn ahokafo, “nguan foforo” no mu “nnipakuw kɛse” no “ɛbere a ɛsɛ mu.”—Mat. 24:45; Efe. 2:19; Adi. 7:9; Yoh. 10:16.

⁷ Mfiase no, na nhomatintimfo a wogye sika na wotintim Yehowa Adansefo nhoma ahorow no nyinaa. Nanso wɔ 1920 mfe no mu no, wosii gyinae sɛ sɛ Yehowa nkoa ankasa tintim wɔn nhoma a, ɛbɛyɛ nea ɛkɔ ntɛmntɛm na mfaso kɛse wɔ so wɔ honhom fam. Wofii ase wɔ ɔkwan ketewaa bi so wɔ 1920 mu, na nhomatintim adwuma no nyinii nkakrankakra wɔ Brooklyn, New York, kosii sɛ ɛbɛyɛɛ kɛse paa. Eduu 1967 no, na nhomatintim mfiri no wɔ adan akɛse anan mu. Ná wotintim nhoma no bi wɔ aman foforo so nso, nanso Wiase Ko II no twitwaree emu dodow no ara ananmu.

⁸ Nanso ɛmfa ho sɛ nhomatintim adwuma no yɛɛ kɛse wɔ United States no, na ɛnyɛ nea ebetumi atintim nhoma ama wiase nyinaa. Enti, wɔ mfe a edii ɔko no akyi mu no, wɔhyehyɛɛ nhomatintim mfiri wɔ aman foforo pii mu, a na ebi wɔ Canada, Denmark, England, Greece, South Africa, Switzerland, ne West Germany. Eduu 1970 mfe no mfiase no, na wɔahyehyɛ bi wɔ Australia, Brazil, Finland, Ghana, Japan, Nigeria, ne Philippines nso. Ná saa aman yi mu bi tintim nhoma akɛse nso. Afei nso, wɔ 1970 mfe no mfiase no, wɔtetee Gilead asɛmpatrɛwfo wɔ nhomatintim mu de wɔn kɔɔ saa aman yi so kɔboaa hɔnom anuanom no wɔ nhomatintim adwuma no mu.

⁹ Wɔ 1980 mfe no mu no, aman a na wotintim nsɛmma nhoma wom no duu 51.a Ɔkwampa a wɔde Owura no nneɛma dii dwuma bɛn ara ni! Ahenni adwuma no nkɔso ho adanse a emu yɛ den bɛn ara ni! Na ayamye mu a Yehowa Adansefo ɔpepem pii a ‘wɔde wɔn ahonyade hyɛɛ Yehowa anuonyam’ no fi taa akyi ho adanse a emu yɛ den bɛn ara ni! (Mmeb. 3:9) Enti, wɔdaa wɔn ho adi sɛ afiehwɛfo pa wɔ nea Yehowa de ahyira wɔn no ho wɔ akwan ahorow so.

Wɔyɛ Nsakrae

¹⁰ Wɔ 1970 ne 1980 mfe no mfiase no, wonyaa nkɔanim kɛse wɔ nhomatintim mfiri mu, na Yehowa Adansefo faa akwan foforo a wɔnam so tintim nhoma yi so. Kan no, na tete nkyerɛwee tintim afiri na wɔde tintim nhoma. Wɔsakraa eyi nkakrankakra bere a wofii ase de nnɛyi nhomatintim mfiri tintim ade no. Ne saa nti, wotintim nhoma ahorow a ɛyɛ fɛ a emu mfonini yɛ kɔla anan mmom sen sɛ anka wobetintim nhoma a emu mfonini yɛ kɔla abien, (tuntum ne kɔla foforo) a na wotumi de nkyerɛwee tintim mfiri dedaw no tumi yɛ no. Bio nso, kɔmputa ho nimdeɛ maa nnwuma a edi nhomatintim anim no nyinaa sakrae (nsiesiei a wɔyɛ de tintim nhoma no). Yehowa Adansefo yɛɛ Multilanguage Electronic Phototypesetting System (MEPS), kɔmputa so dwumadi a seesei ɛboa ma wotintim nhoma wɔ kasa ahorow bɛboro 370 mu no. Kɔmputa afiri biara nni hɔ a ɛbɛn MEPS no wɔ dwuma a etumi di wɔ kasa ahorow pii mu no mu.

¹¹ Esiane MEPS kɔmputa mfiri ho nimdeɛ ne nnwinade foforo te sɛ ɛlɛtrɔnik so nimdeɛ a wɔde di dwuma nti, wonyaa nkɔanim foforo kɛse wɔ aduan a wɔde ma wɔ bere a ɛfata mu no mu. Kan no, bere a na wɔde mfiri dedaw no di dwuma no, na sɛ wotintim Engiresi nsɛmma nhoma no wie a, edi asram dodow bi anaasɛ afe mpo ansa na emu nsɛm no aba kasa a ɛnyɛ Engiresi de no mu. Seesei, wotintim Ɔwɛn-Aban no wɔ kasa ahorow 115 mu wɔ bere koro mu, na Nyan! yɛ kasa ahorow 62. Eyi kyerɛ sɛ wɔ wiase nyinaa no, wɔn a wɔkɔ Yehowa Adansefo dapɛn dapɛn Ɔwɛn-Aban Adesua no bɛboro ɔha mu 95 na wosusuw asɛm koro ho bere koro mu. Nhyira bɛn ara ni! Akyinnye biara nni ho sɛ, Owura no nneɛma a wɔde di dwuma ɔkwampa so no na ɛma wɔtotɔɔ saa mfiri foforo yi nyinaa!

Ahyehyɛde no Ahiade Afoforo

¹² Saa nhyehyɛe foforo yi sakraa ahyehyɛde no ahiade ahorow wɔ Yehowa Adansefo wiase nyinaa nhomatintim adwuma no mu. Mfiri foforo no tintim nhoma ntɛmntɛm sen nkyerɛwde tintim mfiri dedaw no, nanso ne bo yɛ den. Kɔmputa mfiri a ɛboa nnwuma a ɛka ho, te sɛ akyerɛw, nsɛm asekyerɛ ne mfoniniyɛ, a ɛma wotintim nhoma bebree sen nhyehyɛe dedaw no nso bo yɛ den yiye. Ɛbɛdaa adi ntɛm ara sɛ ɛbɔ ka kɛse sɛ wobetintim nsɛmma nhoma no wɔ aman ahorow 51 mu. Enti, wɔ 1990 mfe no mu no, “ofiepanyin nokwafo” no yɛɛ nneɛma mu nhwehwɛmu bio. Dɛn na efi mu bae?

¹³ Nhwehwɛmu daa no adi sɛ sɛ wɔkeka nhomatintim adwuma no bom a, wobetumi de “nneɛma a ɛho hia” a Yehowa Adansefo ne wɔn nnamfo de aba no adi dwuma yiye ɔkwampa so. Enti awiei koraa no, wɔtew baa dwumadibea dodow a etintim nhoma no so. Germany tintim nsɛmma nhoma ne nhoma ahorow ma Europa Apuei ne Atɔe fam aman pii, a ebinom a kan no na wɔn ankasa tintim wɔn nhoma ka ho. Italy tintim Afrika afã bi ne Europa Kesee fam apuei nsɛmma nhoma, a emu bi ne Greece ne Albania. Wɔ Afrika no, Nigeria ne South Africa nkutoo na etintim nsɛmma nhoma. Nkabom a ɛte saa akɔ so wɔ wiase nyinaa.

Nneɛma a Ɛsɛ Sɛ Wosusuw Ho Yiye

¹⁴ Ebedu July 1998 no, na wɔagyae nsɛmma nhoma tintim wɔ Europa aman dodow bi mu, a emu bi ne Austria, Denmark, France, Greece, Netherlands, ne Switzerland. Britain, Finland, Germany, Italy, Spain, ne Sweden na ebetintim Europa nsɛmma nhoma nyinaa. Saa kwan yi so no, wɔbɛkwati ka a ɛho nhia, na wɔde ntoboa ahorow no adi dwuma ɔkwampa so ama wiase nyinaa adwuma no. Ɔkwan bɛn so na wohuu aman ko a ɛbɛkɔ so atintim nhoma ne aman ko a ebegyae nhoma tintim? Bere a “ofiepanyin nokwafo” no redi n’asɛyɛde a ɛne sɛ ɛbɛhwɛ Owura no nneɛma so yiye ho dwuma no, wosusuw ka ankasa a wɔbɔ wɔ nhomatintimbea biara ho no ho yiye.

¹⁵ Ade titiriw a ɛma wogyaee nhomatintim wɔ aman bi so, na wɔde hɔnom dwumadi no kaa afoforo de ho no yɛ nea mfaso wɔ so. Ɔman biako a ebetintim aman pii nhoma no yɛ nea mfaso wɔ so kɛse, na ɛyɛ ɔkwampa a wɔnam so de mfiri a ne bo yɛ den no di dwuma. Seesei, wotintim nhoma no wɔ baabi a ɛho ka wɔ fam, wobenya ho nneɛma, na wobetumi de akɔ aman foforo so a wɔmmrɛ. Enti, wɔde Owura no nneɛma redi dwuma wɔ ɔkwampa so. Nokwarem no, nhoma a wogyae tintim wɔ ɔman bi mu no nkyerɛ sɛ wobegyae asɛnka adwuma wɔ hɔ. Wɔbɛkɔ so anya nhoma pii, na Yehowa Adansefo ɔpehaha pii a wɔwɔ saa nsase no so no bɛkɔ so de nsi aka “asomdwoe ho asɛmpa” no akyerɛ wɔn afipamfo. (Efe. 2:17) Bio nso, saa nhyehyɛe foforo yi de mfaso foforo aba.

¹⁶ Sɛ yɛbɛka mfaso biako ho asɛm a, wɔde nhomatintim mfiri a aba nnansa yi no mu dodow no ara fi Denmark, Greece, Netherlands, ne Switzerland akɔ Nigeria ne Phillipines. Nhomatintimfo a wɔn ho akokwaw a wofi Europa aman mu gyee ɔfrɛ a ɛne sɛ wɔnka mfiri no ho nkɔ nkɔtete hɔnom nhomatintimfo no wɔ ɛho dwumadi mu no so. Enti, seesei saa aman no renya nsɛmma nhoma a ɛyɛ fɛ yiye a aman foforo wɔ no bi.

¹⁷ Susuw mfaso foforo ho hwɛ: Ka a wɔbɔ wɔ nsɛmma nhoma tintim ho no yɛ nea seesei wɔbɔ wɔ nsase kakraa bi a wɔkɔ so tintim nhoma wɔ so no mu. Ne saa nti, wɔ nsase a wɔagyae nhomatintim wɔ so so no, wɔde sika a wonya no redi atirimpɔw afoforo ho dwuma, te sɛ Ahenni Asa si ne yɛn nuanom a wɔwɔ nsase a wodi hia so ahiade a wodi ho dwuma. Enti, Owura no nneɛma a wɔhwɛ so yiye no kyerɛ sɛ yebetumi de Paulo nsɛm a ɔde kɔmaa Korintofo no adi dwuma yiye wɔ wiase nyinaa: “Ɛnyɛ sɛ ebinom ho ńtɔ wɔn, na mo de, mo ho ńhia mo, na mmom sɛ ɛnyɛ pɛpɛɛpɛ nti; na saa bere yi mu mo mmoroso akogu wɔn hia mu, na wɔn mmoroso nso abegu mo hia mu, na ayɛ pɛpɛɛpɛ.”—2 Kor. 8:13, 14.

¹⁸ Esiane nhomatintim yi a wɔakeka abom yi nti, Yehowa Adansefo ayɛ biako wɔ wiase nyinaa sen bere biara. Ɛnhaw Adansefo a wɔwɔ Denmark no sɛ wobetintim wɔn nsɛmma nhoma wɔ Germany, ɛwom sɛ na wɔn ankasa na etintim wɔn ade de. Wɔn ani sɔ adwuma a wɔn nuanom a wɔwɔ Germany reyɛ no. So Yehowa Adansefo a wɔwɔ Germany no bo fuw sɛ wɔde wɔn ntoboa retintim Bible ho nhoma ama Denmark—anaa Russia, Ukraine, ne nsase foforo? Dabida! Wɔn ani gye sɛ wohu sɛ wɔn nuanom a wɔwɔ saa nsase no so betumi de ntoboa a woyi no adi atirimpɔw afoforo a ɛho hia ho dwuma seesei.

Nneɛma no a Wɔhwɛ So

¹⁹ Wɔ Yehowa Adansefo Ahenni Asa biara so wɔ wiase nyinaa no, ntoboa adaka bi si hɔ a wɔakyerɛw ho “Ntoboa ma Asafo ti no Wiase Nyinaa Adwuma no—Mateo 24:14.” Wɔde ntoboa a wofi wɔn pɛ mu yi gu saa nnaka yi mu no di dwuma wɔ baabiara a ahiade bi wɔ no. “Ofiepanyin nokwafo” no ne baa dwumadibea ahorow no na wɔkyerɛ nea wɔde ntoboa ahorow no bɛyɛ. Enti, baabi a mmara ma kwan no, sika a wɔde gu ntoboa adaka mu wɔ ɔman bi mu no betumi aboa Yehowa Adansefo dwumadi wɔ ɔman foforo a ɛwɔ kilomita mpempem pii no. Wɔ aman bi mu no, wɔde ntoboa aboa mfɛfo agyidifo a nneɛma te sɛ ahum a ano yɛ den, asasewosow, ne ɔmanko ma wohu amane no ma wɔanya wɔn ahiade a egye ntɛmpɛ. Na saa ntoboa no na wɔde boa asɛmpatrɛwfo a wɔwɔ aman bɛboro 200 mu no.

²⁰ Wɔ Yehowa Adansefo asafo ahorow mu no, sɛnea wɔyɛ no baabiara no, wɔka sika ho asɛm pɛnkoro pɛ wɔ ɔsram biako mu—na wɔyɛ eyi wɔ simma kakraa bi mu. Wɔmfa prɛte mfa nkurɔfo anim nnyigye sika wɔ Ahenni Asa so anaa nhyiam ahorow ase. Wɔnkɔ nkurɔfo nkyɛn nkɔsrɛsrɛ sika. Wɔmmɔ nkurɔfo paa mma wɔnkɔsrɛsrɛ sika. Mpɛn pii no, asɛm biako pɛ na ɛba Ɔwɛn-Aban mu afe biara a ɛkyerɛkyerɛ sɛnea wɔn a wɔwɔ ɔpɛ no betumi ayi ntoboa ama Watch Tower Bible and Tract Society de aboa wiase nyinaa adwuma no mu. Wɔntaa nka Asafo ti no sikasɛm ho asɛm wɔ Nyan! mu. Ɛnde, ɔkwan bɛn so na wɔadi wiase nyinaa adwuma kɛse a ɛne asɛmpa no ka, Ahenni Asa a ɛho hia a wosi, wɔn a wɔwɔ bere nyinaa som adwuma titiriw mu a wɔhwɛ wɔn, ne Kristofo a wohia mmoa a wɔboa wɔn no ho dwuma? Yehowa ama ne nkurɔfo anya ayamye su wɔ ɔkwan a ɛyɛ nwonwa so. (2 Kor. 8:2) Yɛde saa hokwan yi da wɔn a wɔaboa ‘de wɔn ahode ahyɛ Yehowa anuonyam’ no nyinaa ase. Wobetumi anya awerɛhyem sɛ “ofiepanyin nokwafo” no bɛkɔ so ahwɛ Owura no nneɛma so. Na yɛbɔ mpae sɛ Yehowa bɛkɔ so ahyira nhyehyɛe a wɔyɛ ma wiase nyinaa adwuma no anya nkɔso no so.

[Ase hɔ nsɛm]