Wubetumi Adi Akwanside Ahorow Yi So!

WIMHYƐN kɛse bi betumi afa nnipa ɔhaha pii ne nneɛma a emu yɛ duru bebree. Ɛyɛ dɛn na wimhyɛn a emu yɛ duru saa no tumi ma ne ho so? Ɛnam wimkɔ tumi so.

Sɛ wimhyɛn no de mmirika nam ne kwan no so a, mframa bɔ fa ne ntaban a akoakoa no atifi ne ase. Eyi ma no ahoɔden bi a ɛde ma ne ho so a wɔfrɛ no wimkɔ tumi. Sɛ wimkɔ tumi no mu yɛ den sɛnea ɛsɛ a, wimhyɛn no betumi adi tumi a ɛtwe no ba fam no so na atu. Nokwarem no, wimhyɛn a n’adesoa dɔɔso dodo ntumi nnya wimkɔ tumi a ɛsɛ mfa ntu.

Yɛn nso yɛn adesoa betumi adɔɔso dodo. Mfehaha pii a atwam no, Ɔhene Dawid kae sɛ ‘ne mfomso te sɛ adesoa duruduru.’ (Dwom 38:4) Saa ara na Yesu Kristo nso bɔɔ kɔkɔ sɛ yɛmmma asetra mu dadwen nnhyɛ yɛn so. (Luka 21:34) Adwene ne atenka a ɛmfata betumi ahyɛ yɛn so araa ma ayɛ te sɛ nea ɛyɛ den sɛ yebetumi “atu.” Nneɛma hyɛ wo so saa? Anaa woahyia akwanside bi a ɛmma wunnya honhom mu nkɔso? Sɛ ɛte saa a, dɛn na ebetumi aboa?

W’ani Nka?

Obi ani a ɛnka—ade a ɛnnɛ nkurɔfo pii se ɛhaw wɔn—betumi abɛyɛ adwene mu akwanside, ama Yehowa nkurɔfo binom mpo. Mmofra paa na wotumi pow nnwuma bi ka sɛ ɛyɛ anihaw. Ɛtɔ da bi a wote nka saa wɔ Kristofo nhyiam horow ho? Sɛ ɛte saa a, wobɛyɛ dɛn atumi ama wo nhyiamkɔ ayɛ anigye kɛse?

Ano aduru ne sɛ wubenya mu kyɛfa. Paulo kyerɛw kɔmaa aberantewa Timoteo sɛ: “Bɔ onyamesom pa ho mmɔden; na ɔhonam mu mmɔdenbɔ so mfaso sua, na onyamesom pa ho wɔ mfaso ade nyinaa mu, na ɛwɔ nkwa a ɛwɔ hɔ yi ne nea ɛrebɛba no ho bɔhyɛ.” (1 Timoteo 4:7, 8) Nhoma a ɛfa apɔw-mu-ateɛteɛ ho akenkan bɛyɛ anihaw na ɛso remma mfaso, sɛ yɛanyɛ apɔw-mu-ateɛteɛ a ɛhyɛ ho nyansa no a. Kristofo nhyiam horow atirimpɔw ne sɛ ɛbɛkanyan yɛn adwene, na sɛ yesiesie yɛn ho nya mu kyɛfa a, ɛbɛba saa. Kyɛfa a yebenya wɔ nhyiam horow mu bɛma yɛanya so mfaso na ayɛ anigye kɛse.

Ɛdefa eyi ho no, Kristoni ababaa bi a wɔfrɛ no Mara kae sɛ: “Sɛ mansiesie me ho amma nhyiam horow a, minnya mu anigye. Nanso sɛ midi kan siesie me ho a, ɛkɔ m’adwene ne me koma mu yiye. Ɛma nhyiam horow ho behia me kɛse, na meyɛ krado sɛ mɛma mmuae.”

Sua a wubesua sɛnea wotie asɛm nso bɛboa. Nnwom tie yɛ mmerɛw na ɛde anigye ba ntɛm ara. Nanso ɛnyɛ anigye nyinaa na ɛba prɛko pɛ. Sɛ yetie nea wɔka no yiye nkutoo a na yenya nhyiam dwumadi no mu anigye. Kristoni bi a wɔfrɛ no Rachel kae sɛ: “Sɛ ɔkasa no mu nyɛ hyew a, ehia sɛ mewɛn m’aso yiye. Nea mede asi m’ani so ne sɛ, ‘Dodow a kasa no nkɔ me yiye no, dodow no ara na ɛsɛ sɛ mewɛn m’asõ yiye.’ . . . Mede m’adwene si kyerɛw nsɛm no so kɛse, bɔ mmɔden sɛ menya mu ntease sɛnea metumi biara.” Ɛho hia sɛ yɛhyɛ yɛn ho so te sɛ Rachel, na yɛatumi ayɛ aso. Mmebusɛm nhoma no ka sɛ: “Me ba, tie me nyansa, brɛ w’aso ase ma me ntease.”—Mmebusɛm 5:1.

Ɔkwan bi so no, ebia nsɛm a wɔde to gua wɔ nhyiam horow ase no bi bɛyɛ nsɛm dedaw no ara. Ɛho hia saa! Onyankopɔn asomfo nyinaa hia nkaesɛm. Ɔhonam a ɛtɔ sin no ne n’akɔnnɔ bɔne, ne n’awerɛfiri, no hia mmoa a ebetumi anya no nyinaa. Ɔsomafo Petro ‘amma n’ani ampa so sɛ ɔbɛkae mfɛfo gyidifo nneɛma bi, ɛmfa ho sɛ na wonim dedaw, na wɔatim nokware no mu no.’ (2 Petro 1:12) Yesu nso kyerɛkyerɛɛ mu sɛ “ɔkyerɛwfo biara . . . te sɛ ofiwura bi a ofi n’ademude mu yi nneɛma afoforo ne adedaw adi.” (Mateo 13:52) Enti, ɛmfa ho sɛ yɛn nhyiam horow no de Kyerɛwnsɛm mu nsɛm a yenim dedaw, anaa ‘ademude adedaw’ brɛ yɛn no, yenya ‘ademude afoforo’ bere nyinaa ma yɛn ani gye.

Yɛn bo a yebesi sɛ yebenya nhyiam horow no mu mfaso akosi ase no betumi ama yɛn honhom mu nkuranhyɛ. Yesu kae sɛ: “Anigye ne wɔn a wɔn ani kũ wɔn honhom fam ahiade ho [wɔn a wɔsrɛ honhom no].” (Mateo 5:3, NW ase hɔ asɛm) Esu a ɛte saa a yebenya wɔ honhom fam aduan pa a wɔde ma yɛn wɔ nhyiam horow ase ho no beyi anihaw afi hɔ.—Mateo 24:45-47.

Nhwɛso Bɔne Bi Abu W’abam?

Mo asafo muni bi suban ama woayɛ basaa? Ebia woasusuw ho sɛ, ‘Onua bi betumi ayɛ n’ade saa na wakɔ so anya gyinabea pa?’ Nsusuwii a ɛte saa betumi ayɛ sɛ adwene mu akwanside bi a ɛmma yenhu ɛbo a fekuw a ɛyɛ anigye a yebetumi ne Onyankopɔn nkurɔfo anya no som.—Dwom 133:1.

Gyama na asafo a ɛwɔ Kolose no mufo no bi wɔ ɔhaw a ɛte saa. Paulo tuu wɔn fo sɛ: “Sɛ obi ne obi nya asɛm bi a, munhuhu mma mo ho na momfa nkyekyɛ mo ho.” (Kolosefo 3:13) Paulo hui sɛ ebetumi aba sɛ Kolosefo Kristofo bi anna suban pa adi ma enti ɛmaa afoforo nyaa wɔn ho asɛmmɔne kae ankasa. Enti ɛtɔ da bi na sɛ yɛn nuanom mmarima anaa mmea no biako nna Kristofo su bi adi a, ɛnsɛ sɛ ɛyɛ yɛn nwonwa dodo. Yesu de sɛnea wosiesie nsɛm a emu yɛ den ho afotu a nyansa wom mae. (Mateo 5:23, 24; 18:15-17) Nanso mpɛn pii no, yebetumi anya yɛn mfɛfo gyidifo sintɔ ahorow ho koma de afiri wɔn. (1 Petro 4:8) Nokwarem no, ɔkwan a ɛte saa so a yɛbɛfa no bɛboa yɛn ankasa ne afoforo. Dɛn nti na eyi te saa?

Mmebusɛm 19:11 ka sɛ: “Onipa nimdeɛ twentwɛn n’abufuw ase, na mfomso ho twa yɛ no anuonyam.” Hwɛ mfaso kɛse a ɛwɔ so sɛ wode befiri sen sɛ wobɛma abufuw ne ɔtan mu ayɛ den! Salvador, ɔpanyin bi a wonim no sɛ ɔwɔ ɔdɔ, kae sɛ: “Sɛ onua bi ne me di no ɔkwammɔne so anaa ɔka asɛm yayaw bi kyerɛ me a, mibisa me ho sɛ: ‘Mɛyɛ dɛn atumi aboa me nua no? Mɛyɛ dɛn atumi akwati sɛ mɛhwere me ne ne ntam abusuabɔ a ɛsom bo no?’ M’ani wɔ me ho so bere nyinaa wɔ sɛnea ɛyɛ mmerɛw sɛ mɛka asɛm a ɛnsɛ sɛ meka no ho. Sɛ obi ka asɛm bi bere a onsusuw ho a, ne yiye mu paa ne sɛ anka ɔbɛpopa nea ɔkae no na wasan aka no bio. Nanso entumi nyɛ yiye saa, enti meyɛ nea eye sen biara a edi hɔ, bu m’ani gu asɛm no so. Mede hyɛ ɔhonam mmerɛwyɛ mmom sen sɛ mɛka sɛ saa na me nua no te ankasa.”

Ebia wote nka sɛ eyi ka nyɛ den sɛ ne yɛ. Nanso egyina nneɛma a yɛde yɛn adwene si so so kɛse. Paulo tuu fo sɛ: “Nea ɛwɔ ɔdɔ, . . . saa nneɛma yi ho na munnwen.” (Filipifo 4:8) Ntease a “nea ɛwɔ ɔdɔ” kura ankasa ne sɛ “nea ɛkanyan ɔdɔ.” Yehowa pɛ sɛ yesusuw su pa a afoforo wɔ ho, na yɛde yɛn ani si nneɛma a ɛkanyan ɔdɔ mmom so sen nea ɛkanyan abufuw. N’ankasa na ɔma yɛn eyi ho nhwɛso a ɛkyɛn so no. Odwontofo no kaee yɛn saa asɛm yi, kae sɛ: “Yah, sɛ wudi amumɔyɛde akyi a, [Yehowa], hena na anka obegyina?”—Dwom 103:12; 130:3.

Ampa, ɛtɔ da bi a onua bi suban renhyɛ nkuran, nanso yɛn mfɛfo asomfo dodow no ara yɛ Kristofo asetra ho nhwɛso fɛfɛ. Sɛ yɛkae eyi a, te sɛ Dawid no, yɛn ani begye sɛ ‘yɛbɛkamfo Yehowa pii, na yɛayi no ayɛ wɔ nnipa bebree mu.’—Dwom 109:30.

Sɛ́ Obi Bɛyɛ Ɔdansefo no Yɛ Den Dodo?

Awerɛhosɛm ne sɛ, esiane adwene mu akwanside foforo bi nti, ebinom nnya mfii ase nyii Yehowa ayɛ. Mmarima pii a wɔnyɛ Yehowa Adansefo hwɛ wɔn mmusua yiye, boa wɔn yerenom mpo ma wɔyɛ Kristofo som adwuma no. Wɔpɛ nnipa, na ebia wɔbɛkyerɛ asafo no ho anigye, nanso wɔmpɛ sɛ wɔbɛyɛ Onyankopɔn asomfo a wɔahyira wɔn ho so. Dɛn na ɛtwe wɔn san?

Ebia ɔhaw biako ne sɛ saa mmarima yi hu teokrase dwumadi a wɔn yerenom yɛ a adagyew nnim no, na wɔte nka sɛ sɛ́ obi bɛyɛ Ɔdansefo no hwehwɛ pii dodo. Anaasɛ ebia wɔwɔ osuro sɛ wontumi nyɛ afie afie asɛnka adwuma no bi da. Wɔn fam no, ɛkame ayɛ sɛ asɛyɛde ahorow no bunkam nhyira a efi mu ba no so. Dɛn nti na wɔwɔ adwene mu akwanside? Bible asuafo dodow no ara sua nokware no de di dwuma nkakrankakra. Nanso mpɛn pii no, bere a biribiara nnya nkanyan okununom a wonnye nni a ɛbɛma wɔagye Kristofo asɛyɛde ahorow atom no, wohu ne nyinaa yiye.

Manuel a na ɔwɔ saa tebea yi mu kyerɛkyerɛ mu sɛ: “Me ne me yere kɔɔ ɔmansin nhyiam ne asafo nhyiam horow bɛyɛ mfe du. Sɛ mɛka nokware a, na m’ani gye Adansefo fekubɔ ho mmom sen wiasefo de, na sɛ metumi ayɛ wɔn mmoa a, na mede anigye yɛ. M’ani gyee ɔdɔ a ɛdaa adi wɔ wɔn mu no ho kɛse. Nanso na afie afie a mɛkɔ no yɛ akwanside kɛse ma me, na na misuro sɛ me mfɛfo adwumayɛfo bedi me ho fɛw.

“Me yere nyaa me ho abotare paa, na wammɔ mmɔden sɛ ɔbɛhyɛ me ma masua Bible da. Ɔne mmofra no de nhwɛso pa titiriw na ‘ɛkaa asɛm no.’ José, asafo no mu ɔpanyin bi, kyerɛɛ me ho anigye soronko. Misusuw sɛ ne nkuranhyɛ na ɛmaa awiei koraa no mifii ase suaa ade anibere so. Wɔbɔɔ me asu akyi no, mibehui sɛ na akwanside ahorow no wɔ m’ankasa m’adwene mu, na na emfi biribi foforo biara. Minya sii gyinae sɛ mɛsom Yehowa no, minyaa ne mmoa de dii me suro no so.”

Ɔkwan bɛn so na ɔyerenom ne Kristofo mpanyimfo betumi aboa okununom a wɔte sɛ Manuel ma wɔadi wɔn adwenem akwanside no so? Bible adesua betumi akanyan anisɔ wɔ wɔn mu ma wɔanya ɔpɛ sɛ wɔbɛyɛ Onyankopɔn apɛde. Nokwarem no, Kyerɛwnsɛm mu nimdeɛ a edi mũ na obi gyina so nya gyidi ne anidaso a ɛda n’anim no mu ahotoso.—Romafo 15:13.

Dɛn na ɛbɛhyɛ okununom a wɔtete saa nkuran ma wɔapene Bible adesua so? Mpɛn pii no, onua barima bi a ɔwɔ asafo no mu na ɔwɔ ntease a ɔbɛba abɛyɛ n’adamfo no betumi de nsakrae aba. Ebia ɔpanyin anaa onua barima foforo a ne ho akokwaw betumi abɛn okunu no. Wonya nya abusuabɔ pa a, nea ebia obehia ara ne sɛ obi bɛka sɛ ɔne no besua ade. (1 Korintofo 9:19-23) Bere koro no ara, ɔyere Kristoni a ɔyɛ ɔbadwemma betumi ama ne kunu a onnye nni no honhom fam nnuan nkakrankakra, bere a ohu sɛ sɛ ɔhyɛ no a, ɛnyɛ ade a obetie no.—Mmebusɛm 19:14.

Sɛnea Manuel nyaa ho osuahu no, sɛ obi nya honhom mu ahoɔden a, akwanside a ɛte sɛ mmepɔw bɛyɛ te sɛ siw ma no. Yehowa hyɛ wɔn a wɔpɛ sɛ wɔsom no no den. (Yesaia 40:29-31) Ɛdenam Onyankopɔn ahoɔden ne Adansefo a wɔn ho akokwaw mmoa so no, wobetumi ayi akwanside ahorow afi hɔ. Ɛmma afie afie adwuma no nyɛ den dodo, na mfɛfo adwumayɛfo ho hu nka wɔn kɛse, na ɛma ɔsom a wofi kra nyinaa mu de ma yɛ anigye kɛse.—Yesaia 51:12; Romafo 10:10.

Nkɔanim a Wobɛkɔ so Anya

Wubetumi adi akwanside ahorow te sɛ abiɛsa a yɛasusuw ho yi so. Mpɛn pii no, sɛ wimhyɛn tu a, ehia sɛ engine no yɛ adwuma sen biara na saa ara na ɛnsɛ sɛ emu adwumayɛfo ma biribiara twetwe wɔn adwene. Sɛ ɛretu a, engine ahorow no nom fango sen bere foforo biara wɔ akwantu no mu. Saa ara na adwene ne atenka a ɛmfata a obi beyi afi hɔ no gye mmɔdenbɔ a ɛsen biara ne n’adwene nyinaa a ɔde besi so. Ebia asefi na ɛyɛ den kɛse, na sɛ wunya fi ase a, nkɔanim no bɛyɛ nea ɛnyɛ den pii.—Fa toto 2 Petro 1:10 ho.

Kyerɛwnsɛm mu nkuranhyɛ a obi betie no ntɛm na ɛbɛma wakɔ so anya nkɔanim. (Dwom 119:60) Yebetumi anya awerɛhyem sɛ asafo no bɛpɛ sɛ wɔboa. (Galatifo 6:2) Nanso, nea ɛho hia sen biara ne Yehowa Nyankopɔn mmoa. Sɛnea Dawid kae no, “nhyira ne [Yehowa] a ɔsoa yɛn adesoa ma yɛn daa daa.” (Dwom 68:19) Sɛ yɛda yɛn dadwen adi wɔ mpaebɔ mu a, ɛma yɛn adesoa mu yɛ hare.

Ɛtɔ da bi a, wimhyɛn bi tu bere a nsu retɔ wɔ asase so na wim ayɛ kusuu, kowura omununkum a aboaboa ano mu, na ɛkɔ wim baabi a owia rehyerɛn hɔ yiye. Yɛn nso yebetumi agyaw adwemmɔne hɔ. Ɛdenam Onyankopɔn mmoa so no, yebetumi awura omununkum a aboaboa ano no mu sɛnea yɛbɛka no no, na yɛakɔ Yehowa asomfo abusua a ɛwɔ wiase nyinaa a anigye wom no mu ma ahyerɛn yɛn so.

[Kratafa 23 mfonini ahorow]

Ɛdenam Yehowa mmoa so no, yebetumi adi adwene mu akwanside ahorow so