Ti 23
Onyankopɔn Ahyehyɛde A Aniwa Hu
1. Dɛn na Bible ka wɔ Onyankopɔn ahyehyɛde a aniwa nhu no ho?
DƐN NTI na yebetumi agye adi sɛ Onyankopɔn wɔ ahyehyɛde a aniwa hu? Ade biako ne sɛ ɔwɔ ahyehyɛde a aniwa nhu. Yehowa bɔɔ kerubim, serafim ne abɔfo afoforo pii ma wɔayɛ n’apɛde wɔ ɔsoro. (Genesis 3:24; Yesaia 6:2, 3; Dwom 103:20) Yesu Kristo ne ɔbɔfo panyin a ɔkorɔn sen eyinom nyinaa. (1 Tesalonikafo 4:16; Yuda 9; Adiyisɛm 12:7) Bible no ka abɔfo no ho asɛm sɛ wɔahyehyɛ wɔn sɛ “nhengua anaasɛ wuradi anaasɛ mpanyinni anaasɛ tumidi.” (Kolosefo 1:16; Efesofo 1:21) Wɔn nyinaa som wɔ Onyankopɔn akwankyerɛ ase, na wɔbom yɛ adwuma a ɔwɔ ma wɔn no.—Daniel 7:9, 10; Hiob 1:6; 2:1.
2. Ɔkwan bɛn so na sɛnea Onyankopɔn bɔɔ yɛn amansan a aniwa hu yi no da no adi sɛ nhyehyɛe ho hia no?
2 Yenya hia a ahyehyɛde ho hia Onyankopɔn no ho adwene nso bere a yesusuw ne honam fam abɔde ahorow no ho no. Sɛ nhwɛso no, nsoromma ɔpepepem pii wɔ amansan yi mu a wɔahyehyɛ wɔn akuw akɛse. Saa akuw akɛse yi tu kwan fa wim wɔano wɔano, na saa ara na nsoromma ne okyinsoromma mmiako mmiako a wɔwɔ akuw akɛse yi mu no nso yɛ. Sɛ nhwɛso no, yɛn asase yi de nnafua 365, nnɔnhwerew 5, simma 48 ne anibu 45.51 twa owia a ɛyɛ nsoromma a ɛbɛn yɛn sen biara no ho hyia afe biara. Yiw, wɔahyehyɛ amansan a aniwa hu yi pɛpɛɛpɛ!
3. Dɛn na nhyehyɛe fɛfɛɛfɛ a ɛwɔ Onyankopɔn abɔde a aniwa nhu ne n’amansan a aniwa hu no mu no kyerɛ yɛn?
3 So saa nhyehyɛe a ɛyɛ nwonwa a ɛwɔ Onyankopɔn abɔde a aniwa nhu ne n’amansan a aniwa hu no mu no kyerɛ yɛn biribi? Yiw, ɛkyerɛ yɛn sɛ Yehowa yɛ Onyankopɔn a ɔpɛ nhyehyɛe. Enti, ɛda adi sɛ, Onyankopɔn a ɔte saa no rennyaw adesamma a wɔwɔ asase so a wɔdɔ no no a wonni akwankyerɛ ne ahyehyɛde
ONYANKOPƆN AHYEHYƐDE A ANIWA HU—NEA ATWAM NE MPREMPEN
4, 5. Yɛyɛ dɛn hu sɛ Onyankopɔn nam ahyehyɛde kwan so kyerɛɛ ne nkurɔfo kwan wɔ Abraham ne Israelfo nna no mu?
4 Bible da no adi sɛ Yehowa akyerɛ ne nkoa kwan bere nyinaa wɔ ahyehyɛde kwan so. Sɛ nhwɛso no, mmarima gyidifo te sɛ Abraham dii wɔn mmusua ne wɔn nkoa anim wɔ Yehowa som mu. Yehowa daa n’apɛde ma Abraham no adi denam kasa a ɔkasa kyerɛɛ no no so. (Genesis 12:1) Na Onyankopɔn ka kyerɛɛ no sɛ ɔnka saa asɛm yi nkyerɛ afoforo sɛ: “Mahu [Abraham] mayi no sɛ ɔnhyɛ ne mma ne ne fifo a ebedi n’akyi sɛ wonni [Yehowa] kwan so.” (Genesis 18:19) Na eyi yɛ nhyehyɛe pa ma nnipakuw na wɔatumi asom Yehowa ɔkwan pa so.
5 Akyiri yi, bere a Israelfo dodow kɔɔ anim na wɔbɛyɛɛ ɔpepem pii no, Yehowa amma obiara ansom wɔ n’ankasa ne kwan so, a na nhyehyɛe biara nni hɔ. Dabi, wɔhyehyɛɛ Israelfo no sɛ asɔrefo man. Wɔfrɛɛ Israel man no ‘Yehowa bagua anaa asafo.’ (Numeri 20:4; 1 Beresosɛm 28:8) Saa bere no sɛ na woyɛ Yehowa nokware somfo a, na ɛsɛ sɛ woyɛ asɔrefo asafo no fã, a wontew wo ho.—Dwom 147:19, 20.
6. (a) Ɔkwan bɛn na Onyankopɔn nam so kyerɛe sɛ na ne dom wɔ Kristo akyidifo no so? (b) Adanse bɛn na ɛwɔ hɔ sɛ wɔhyehyɛɛ Kristofo maa ɔsom?
6 Ná tebea no te dɛn wɔ afeha a edi kan no mu? Bible da no adi sɛ na Yehowa dom wɔ ne Ba Yesu Kristo akyidifo no so. Yehowa hwiee ne honhom kronkron guu wɔn so. Sɛnea ɛbɛyɛ na ada adi sɛ ɔde Kristofo ahyehyɛde no redi dwuma mmom sen Israel man no, ɔde tumi bi maa tete Kristofo no binom ma wɔsaa nyarewa, nyanee awufo na wɔyɛɛ nsɛnkyerɛnne afoforo. Wurentumi nkenkan Kristofo Hela Kyerɛwnsɛm no a wunhu nokwasɛm a ɛyɛ sɛ wɔhyehyɛɛ Kristofo maa ɔsom no pefee. Nokware mu no, wɔhyɛɛ wɔn sɛ wɔne wɔn ho wɔn ho nhyiam esiane saa atirimpɔw yi nti. (Hebrifo 10:24, 25) Enti sɛ na woyɛ Yehowa nokware somfo wɔ afeha a edi kan no mu a, anka ɛho behia sɛ woyɛ ne Kristofo ahyehyɛde no fã.
7. Yɛyɛ dɛn hu sɛ Yehowa amfa nea ɛboro ahyehyɛde biako anni dwuma wɔ bere biara mu?
7 So Yehowa de nea ɛboro ahyehyɛde biako adi dwuma pɛn wɔ bere bi mu? Noa bere so no, Noa ne wɔn a na wɔka ne ho wɔ adaka no mu no nko na wonyaa Yehowa ahobammɔ na wofii nsuyiri no mu kae. (1 Petro 3:20) Bio nso, wɔ afeha a edi kan no mu no na Kristofo ahyehyɛde ahorow abien anaa nea ɛboro saa nni hɔ. Biako pɛ na Onyankopɔn de dii dwuma. Ná “Awurade biako, gyidi biako, asubɔ biako” no ara na ɛwɔ hɔ. (Efesofo 4:5) Yɛn bere so nso, Yesu Kristo ka siei sɛ honhom mu akwankyerɛ fibea biako pɛ ma Onyankopɔn nkurɔfo na ɛbɛwɔ hɔ.
8. Ɔkwan bɛn so na Yesu daa no adi sɛ Onyankopɔn ahyehyɛde biako a aniwa hu pɛ na ɛbɛwɔ asase so wɔ yɛn bere so?
8 Bere a ɔreka n’Ahenni tumi mu a ɔbɛba ho asɛm no, Yesu kae sɛ: “Hena ara ne akoa nokwafo ne ɔbadwemma a ne wura de no asi n’asomfo so sɛ ɔmma wɔn aduan ɛbere a ɛsɛ mu? Nhyira ne akoa no a ne wura ba a, obehu no sɛ ɔreyɛ saa. Nokware mise mo sɛ, wɔbɛma wadi nea ɔwɔ nyinaa so.” (Mateo 24:45-47) Bere a ɔsan baa Ahenni tumi mu wɔ afe 1914 mu no, so Kristo huu “akoa nokwafo ne ɔbadwemma” kuw no sɛ wɔde honhom mu “aduan” anaasɛ nkyerɛkyerɛ rema? Yiw, ohuu “akoa” a ɔte saa a ne “nuanom” 144,000 no nkaefo a wɔwɔ asase so no na wɔbom yɛ no. (Adiyisɛm 12:10; 14:1, 3) Na efi 1914 no nnipa ɔpepem pii agye “aduan” a wɔde ma no, na wɔafi ase ne wɔn resom nokware som. Wonim Onyankopɔn nkoa ahyehyɛde yi sɛ Yehowa Adansefo.
9. (a) Dɛn nti na wɔfrɛ Onyankopɔn asomfo Yehowa Adansefo? (b) Dɛn nti na wɔfrɛ mmeae a wohyiam som no Ahenni Asa?
9 Yehowa Adansefo hwehwɛ akwankyerɛ fi Onyankopɔn nkyɛn ne n’Asɛm mu wɔ biribiara a wɔyɛ mu. Wɔn din Yehowa Adansefo no ankasa kyerɛ sɛ wɔn adwuma titiriw ne sɛ wobedi Yehowa Nyankopɔn din ne n’ahenni no ho adanse, sɛnea Yesu yɛe no. (Yohane 17:6; Adiyisɛm 1:5) Afei nso, wɔfrɛ faako a wohyiam som no Ahenni Asa efisɛ Onyankopɔn ahenni a ɛnam Mesia, anaa Kristo, so no ne Bible no nyinaa asɛmti. Esiane sɛ ɛda adi sɛ afeha a edi kan no mu Kristosom nyaa Onyankopɔn dom nti, Yehowa Adansefo hyehyɛ wɔn asafo no saa kwan no so pɛpɛɛpɛ. Ma yɛnhwehwɛ saa tete Kristofo ahyehyɛde no mu tiaa na yɛnhyɛ nsɛdi a ɛne nnɛyi Nyankopɔn ahyehyɛde a aniwa hu no wɔ no nsow.
AFEHA A EDI KAN NHWƐSO NO
10. Ná afeha a edi kan no mu Kristofo ahyehyɛde no te dɛn?
10 Baabiara a na Kristofo wɔ wɔ afeha a edi kan no mu no, wohyiaam akuwakuw maa ɔsom. Asafo horow yi hyiaam daa maa fekubɔ ne adesua. (Hebrifo 10:24, 25) Na wɔn adwuma titiriw ne sɛ wɔbɛka Onyankopɔn ahenni no ho asɛm na wɔakyerɛkyerɛ, sɛnea Kristo yɛe no. (Mateo 4:17; 28:19, 20) Sɛ asafo no muni bi fa ɔkwammɔne so a, woyi no fi asafo no mu.—1 Korintofo 5:9-13; 2 Yohane 10, 11.
11, 12. (a) Dɛn na edi adanse sɛ Kristofo asafo horow a edi kan no nyaa akwankyerɛ fii asomafo no ne “mpanyimfo” a na wɔwɔ Yerusalem no nkyɛn? (b) “Teokrase” akwankyerɛ kyerɛ dɛn? (d) Akwankyerɛ a ɛte saa a asafo horow no gye toom no kowiee dɛn mu?
11 So na wɔn a wɔwɔ Kristofo asafo no mu wɔ afeha a edi kan no mu no biara de ne ho, ma na obiara sisi ne gyinae wɔ nsɛm ho anaa? Dabi, Bible da no adi sɛ na wɔyɛ biako wɔ Kristofo gyidi biako no mu. Asafo horow no nyinaa nyaa akwankyerɛ fii faako. Enti, bere a akasakasa baa twetiatwa asɛm no ho no, asafo horow anaa nnipa nkorɛnkorɛ ansisi nea ɛsɛ sɛ wɔyɛ ho gyinae amma wɔn ho, mmom no, wɔkyerɛe sɛ, asɛm no nti asomafo Paulo, Barnaba ne afoforo bi “nkɔ asomafo ne mpanyimfo no nkyɛn wɔ Yerusalem.” Bere a mmarima a wɔn ho akokwaw yi nam Onyankopɔn Asɛm ne ne “honhom kronkron” so sii gyinae no, wɔsomaa mmarima gyidifo ma wɔkɔbɔɔ asafo horow no amanneɛ.—Asomafo no Nnwuma 15:2, 27-29.
12 Dɛn na efii teokrase akwankyerɛ anaa akwankyerɛ a Onyankopɔn de ma a asafo horow no nsa kae yi mu bae? Bible no se: “Wɔnam nkurow no so no [ɔsomafo Paulo ne n’ahokafo no], wɔde mmara a asomafo ne mpanyimfo a wɔwɔ Yerusalem no hyɛe sɛ wonni so no maa wɔn. Ɛnna asafo horow no yɛɛ den gyidi mu, na wɔkɔɔ so dɔe daa.” (Asomafo no Nnwuma 16:4, 5) Yiw, asafo horow no nyinaa gyee gyinae a na mpanyimfo a wɔwɔ Yerusalem no asi no toom, na wɔyɛɛ den gyidi mu.
NNƐYI TEOKRASE AKWANKYERƐ
13. (a) Asase so hefa ne ɛdenam mmarima kuw bɛn so na Onyankopɔn ahyehyɛde a aniwa hu nnɛ no nya akwankyerɛ? (b) Abusuabɔ bɛn na sodikuw no ne “akoa nokwafo ne ɔbadwemma” no wɔ?
13 Nnɛyi Onyankopɔn ahyehyɛde a aniwa hu no nso nya teokrase akwankyerɛ. Wɔ Yehowa Adansefo dwumadibea ti a ɛwɔ Brooklyn, New York no, Kristofo mpanyimfo a wofi asase so mmeae horow sodikuw bi wɔ hɔ a wɔde Onyankopɔn nkurɔfo dwumadi wɔ wiase nyinaa ho akwankyerɛ a ɛho hia ma. “Akoa nokwafo ne ɔbadwemma” kuw no mufo na wɔbom yɛ sodikuw yi. Edi dwuma sɛ saa “akoa” nokwafo no kasamafo.
14. Dɛn so na Onyankopɔn nkurɔfo sodikuw no de ne ho to wɔ ne gyinaesi ahorow mu?
14 Te sɛ asomafo ne mpanyimfo a na wɔwɔ Yerusalem no saa mmarima a wɔyɛ sodikuw no mufo no wɔ osuahu kɛse pii wɔ Onyankopɔn som mu. Nanso wɔmfa wɔn ho nto onipa nyansa so wɔ gyinaesi mu. Dabi, esiane sɛ wodi wɔn so teokrase kwan so nti, wodi tete sodikuw a na ɛwɔ Yerusalem a na wɔn gyinaesi ahorow gyina Onyankopɔn Asɛm so wɔ honhom kronkron akwankyerɛ ase no nhwɛso akyi.—Asomafo no Nnwuma 15:13-17, 28, 29.
WIASE NYINAA AHYEHYƐDE A WƆKYERƐ NO KWAN
15. Dɛn nti na Yesu asɛm a ɛwɔ Mateo 24:14 no da no adi sɛ Onyankopɔn benya ahyehyɛde kɛse wɔ asase so wɔ awiei bere no mu?
15 Yesu Kristo daa sɛnea ahyehyɛde a Onyankopɔn benya no asase so wɔ awiei bere yi mu no kɛse bɛyɛ no adi bere a ɔkae sɛ: “Wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba” no. (Mateo 24:14) Susuw dwumadi kɛse ara a na ɛho behia ansa na wɔatumi aka Onyankopɔn ahenni a wɔde asi hɔ no ho asɛm akyerɛ nnipa ɔpepepem pii a wɔte asase so no ho hwɛ. So nnɛyi Kristofo ahyehyɛde a ɛhwɛ akwankyerɛ kwan fi ne sodikuw no nkyɛn no wɔ nneɛma a ɛde bɛyɛ adwuma kɛse yi?
16. (a) Dɛn nti na Yehowa Adansefo asisi nhoma tintim adan akɛse pii? (b) Nhoma bɛn na wotintim wɔ saa mmeae yi?
16 Yehowa Adansefo reka Ahenni asɛm no nnɛ wɔ nsase ne nsupɔw bɛboro 200 so wɔ asase so nyinaa. Sɛnea ɛbɛyɛ na aboa ahenni adawurubɔfo bɛboro 2,300,000 (wɔ 1981 mu) ma wɔayɛ saa adwuma yi no, wɔasisi adan akɛse a wotintim nhoma wɔ mu wɔ aman pii so. Wotintim Bible ne Bible nhoma horow pii wɔ ha. Sɛ wɔkyekyem pɛpɛɛpɛ a, da biara wotintim Ɔwɛn-Aban ne Nyan! nsɛmma nhoma bɛboro ɔpepem biako wɔ saa mmeae a wotintim nhoma yi de mana.
17. (a) Dɛn nti na wɔyɛ saa Bible nhoma horow yi? (b) Dɛn na wɔto nsa frɛ wo ma woayɛ?
17 Wɔyɛ Bible nhoma horow yi nyinaa na wɔde aboa nkurɔfo ma wɔanya Yehowa atirimpɔw ahorow a ɛyɛ nwonwa no ho nimdeɛ. Nokwarem no, asɛm “Ɛka Yehowa Ahenni Kyerɛ” yɛ Ɔwɛn-Aban nsɛmma nhoma no din no fã. Yɛto nsa frɛ wo ma woabenya Bible nhoma horow yi kyekyɛ mu kyɛfa na woakyerɛkyerɛ Bible mu nokware a ɛwɔ mu no mu akyerɛ afoforo. Sɛ nhwɛso no, so obi wɔ hɔ a wubetumi ne no abɔ nneɛma a ɛho hia a woasua afi nhoma Wubetumi Atra Ase Daa wɔ Paradise wɔ Asase So yi mu no ho nkɔmmɔ?
18. (a) Onyankopɔn ahyehyɛde a ɛwɔ hɔ nnɛ no yɛ ahyehyɛde bɛn? (b) Dɛn nti na Onyankopɔn nkurɔfo hia nkuranhyɛ kɛse?
18 Te sɛ afeha a edi kan no mu no, Onyankopɔn ahyehyɛde a ɛwɔ hɔ nnɛ no yɛ Ahenni adawurubɔfo a wɔahyira wɔn ho so agye asubɔ ahyehyɛde. Na wɔde asi hɔ na aboa emufo nyinaa ma wɔanya asɛnka adwuma yi mu kyɛfa. Saa nnipa yi hia nkuranhyɛ ne honhom mu denhyɛ kɛse, esiane sɛ Satan ne wɔn a otumi kɛntɛn wɔn so no sɔre tia Ahenni asɛm no nti. Asɔretiafo a wɔte saa ma wokum Yesu esiane sɛ ɔkaa ho asɛm nti, na Bible no bɔ kɔkɔ sɛ wɔbɛtaa n’akyidifo nso.—Yohane 15:19, 20; 2 Timoteo 3:12.
19. (a) Henanom na wɔde wɔn ama nnɛ na wɔaboa Onyankopɔn nkurɔfo ahyɛ wɔn den? (b) Ɔkwan bɛn so na wɔbɔ asafo no ho ban fi nkɛntɛnso bɔne a ebetumi asɛe no ho?
19 Te sɛ afeha a edi kan no mu no, saa ara na nnɛ wɔpaw “mpanyimfo” sɛ wɔmmoa asafo biara na wɔnhyɛ no den. Wobetumi de Bible mu afotu aboa wo nso ma woatumi adi nsɛm ahorow a emu yɛ den ho dwuma. Saa mpanyimfo yi bɔ “Onyankopɔn nguankuw” no ho ban nso. Enti, sɛ asafo no muni bi fa ɔkwammɔne so na ɔpow sɛ ɔbɛsakra a, mpanyimfo no hwɛ ma woyi onii no, anaasɛ wotu no, fi asafo no mu. Eyi ma wɔkɔ so nya asafo a ɛwɔ ahoɔden na ɛho tew.—Tito 1:5; 1 Petro 5:1-3; Yesaia 32:1, 2; 1 Korintofo 5:13.
20. (a) Wɔ afeha a edi kan no mu no, henanom na sodikuw a na ɛwɔ Yerusalem no somaa wɔn, na dɛn ntia? (b) Henanom na sodikuw no soma wɔn nnɛ?
20 Na, sɛnea sodikuw a na ɛwɔ Yerusalem no somaa ananmusifo atitiriw, te sɛ Paulo ne Sila, ma wɔde akwankyerɛ ne nkuranhyɛ kɔmaa Onyankopɔn nkurɔfo no, saa ara na nnɛyi sodikuw no yɛ wɔ awiei bere yi mu. (Asomafo no Nnwuma 15:24-27, 30-32) Bɛyɛ mprenu afe biara no, wɔma ɔsomfo a ne ho akokwaw a wɔfrɛ no ɔmansin sohwɛfo, kodi dapɛn wɔ asafo biara a ɛwɔ ne mansin mu no mu.
21. Ɔkwan bɛn so na ɔmansin sohwɛfo no boa Onyankopɔn nkurɔfo asafo horow no?
21 Yehowa Adansefo asafo horow bɛboro 43,000 wɔ wiase nyinaa, na wɔakyekyɛ eyinom mu ayɛ wɔn amansin ahorow, a asafo horow bɛyɛ 20 na ɛwɔ ebiara mu. Bere a ɔsrasra asafo horow a ɛwɔ ne mansin mu no, ɔmansin sohwɛfo no hyɛ Ahenni adansefo no den denam wɔn asɛnka ne ɔkyerɛkyerɛ adwuma no a ɔne wɔn bom yɛ no so. Nkuranhyɛ a ɔde ma wɔn wɔ saa kwan yi so akyi no, ɔde nyansahyɛ ahorow ma wɔn na wɔanya nkɔso wɔ wɔn som adwuma no mu.—Asomafo no Nnwuma 20:20, 21.
22. (a) Nhyehyɛe foforo bɛn na wɔyɛ no mprenu afe biara ma ahyɛ Onyankopɔn nkurɔfo den? (b) Wɔto nsa frɛ wo sɛ yɛ dɛn?
22 Wɔde nkuranhyɛ ne denhyɛ foforo nso ma bere a, bɛyɛ mprenu afe biara no, asafo horow a wɔwɔ ɔmansin biara mu no hyiam yɛ nnaanu ɔmansin nhyiam no. Mmere a ɛtete sɛɛ no, efi nnipa 200 anaa 300 kosi 2,000 anaa nea ɛboro saa hyiam. Yɛto nsa frɛ wo na woakɔ nea edi hɔ a wɔbɛyɛ wɔ mo mpɔtam hɔ no. Yɛte nka sɛ wubehu sɛ nhyiam no boa honhom mu na ɛho bɛba wo ankasa mfaso.
23. (a) Nhyiam afoforo bɛn na wɔyɛ no pɛnkoro afe biara? (b) Nhyiam ahorow a wɔyɛe yi biako kɛse yɛɛ dɛn?
23 Afei, pɛnkoro wɔ afe mu no, wɔyɛ nhyiam kɛse a wɔfrɛ no ɔmantam nhyiam nna dodow bi. Dɛn nti na wommɔ mmɔden ankasa sɛ wobɛkɔ na woahu sɛnea nhyiam a ɛte saa yɛ anigye na ɛho wɔ mfaso honhom mu? Mfe bi mu no, sɛ́ anka wɔbɛyɛ ɔmantam nhyiam horow no, wɔyɛ aman anaa amanaman ntam nhyiam akɛse. Nea ɛsõ sen biara a wɔayɛ wɔ faako yɛ nea wɔyɛɛ no New York Kurom Yankee Stadium ne Polo Grounds nnawɔtwe wɔ 1958 mu. Saa bere no nnipa 253,922 hyiaam tiee baguam asɛnka “Onyankopɔn Ahenni Di So—So Wiase Awiei Abɛn Anaa?” Efi saa bere no baabiara nni hɔ a ɛsõ sɛnea ɛsɛ a ebetumi afa nnipadɔm a ɛte saa. Enti wɔayɛ mmeae horow ho nhyehyɛe wɔ nkurow akɛse pii mu ma wɔde ayɛ nhyiam akɛse.
NHYIAM HOROW WO ASAFO HOROW NO MU
24. Dapɛn biara nhyiam horow anum bɛn na Onyankopɔn nkurɔfo asafo horow yɛ?
24 Yehowa Adansefo sodikuw no nso yɛ Bible nkyerɛkyerɛ biako a wɔde ma wɔ Yehowa nkurɔfo asafo biara mu ho nhyehyɛe. Asafo biara wɔ nhyiam horow anum dapɛn biara. Eyinom ne Teokrase Ɔsom Sukuu, Ɔsom Nhyiam, Baguam Nhyiam, Ɔwɛn-Aban adesua ne asafo nhoma mu adesua. Esiane sɛ ebia wunnya nhuu nhyiam horow yi nti, yɛbɛka ho asɛm tiaa.
25, 26. Dwuma bɛn na Teokrase Ɔsom Sukuu ne Ɔsom Nhyiam no di?
25 Wɔayɛ Teokrase Ɔsom Sukuu no ho nhyehyɛe na aboa asuafo ma wɔn ho akokwaw wɔ Onyankopɔn ahenni no ho asɛm a wɔbɛka akyerɛ afoforo no mu. Bere ne bere mu no wɔn a wɔde wɔn din ahyɛ mu no ma ɔkasa ntiantia a egyina Bible nsɛmti ahorow so kyerɛ kuw no nyinaa. Afei ɔpanyin a ne ho akokwaw de mpɔntu ho nyansahyɛ ahorow ma.
26 Wɔtaa yɛ Ɔsom Nhyiam saa anwummere no ara. Wɔda saa nhyiam yi ho nhyehyɛe adi wɔ Yɛn Ahenni Som mu, kratawa bi a ekura nkratafa abien anaa nea ɛboro saa a sodikuw no hwɛ ma wotintim no ɔsram biara. Saa nhyiam yi ase no wɔde akwan horow a etu mpɔn a wɔnam so ka Ahenni asɛm no ho nyansahyɛ ahorow a ɛho wɔ mfaso ma na wɔyɛ ɛho ɔyɛkyerɛ ahorow. Ɔkwan a ɛte saa so no, Kristo hyɛɛ n’akyidifo no nkuran na ɔkyerɛɛ wɔn sɛnea ɛsɛ sɛ wɔyɛ wɔn som adwuma no.—Yohane 21:15-17; Mateo 10:5-14.
27, 28. Baguam Nhyiam, Ɔwɛn-Aban adesua ne asafo nhoma mu adesua no yɛ nhyiam horow bɛn?
27 Wɔtaa yɛ Baguam Nhyiam ne Ɔwɛn-Aban adesua no Kwasida. Wɔbɔ mmɔden sɛ wɔbɛto nsa afrɛ nnipa afoforo a wɔwɔ asɛm no ho anigye ma wɔaba Baguam Nhyiam a ɔsomfo a ne ho akokwaw ma Bible mu ɔkasa bi no ase. Ɔwɛn-Aban adesua no yɛ nsemmisa ne mmuae nkɔmmɔbɔ a egyina Bible mu asɛm bi a wɔada no adi wɔ Ɔwɛn-Aban nsɛmma nhoma a aba nnansa yi mu no so.
28 Bere a ebia asafo mu nyinaa behyia Ahenni Asa so ayɛ nhyiam horow a yɛaka ho asɛm wɔ atifi ha no, akuw nketewa hyiam wɔ afi mu yɛ dapɛn biara asafo nhoma adesua no. Wɔde nhoma a wɔde sua Bible, te sɛ nhoma a worekenkan yi, di dwuma sɛ nea wogyina so yɛ saa Bible adesua a ɛkɔ so bɛyɛ dɔnhwerew biako no.
29. (a) Nkae bɛn na nokware Kristofo di no afe biara? (b) Henanom na ɛfata sɛ wodi abodoo no bi na wɔnom bobesa no bi?
29 Nhyiam horow a wɔyɛ no daa yi akyi no, Yehowa Adansefo yɛ nhyiam titiriw afe biara wɔ Yesu wu afirihyiada no. Bere a ɔreyɛ ne wu nkae yi ho nhyehyɛe a edi kan no, Yesu kae sɛ: “Monyɛ eyi mfa nyɛ me nkae.” (Luka 22:19, 20) Wɔ adeyɛ tiaa bi mu no, Yesu de bobesa ne abodoo a mmɔkaw nni mu dii dwuma sɛ ne nkwa a na ɔde rebɛbɔ afɔre ama adesamma no ho sɛnkyerɛnne. Enti wɔ saa afe biara Nkae adidi yi ase no, Kristo akyidifo 144,000 a wɔasra wɔn no nkaefo a wɔda so wɔ asase so no da wɔn soro anidaso no adi denam abodoo no bi a wodi ne bobesa no bi a wɔnom so.
30. (a) Henanom nso na wɔkɔ Nkaedi no ase, na dɛn ne wɔn anidaso? (b) Yesu ka nnipa a wɔte sɛɛ ho asɛm dɛn?
30 Nnipa afoforo ɔpepem pii a wɔkɔ Nkaedi yi ase wɔ Ahenni Asa ahorow so wɔ asase so nyinaa no yɛ wɔn a wɔde anigye ba bɛhwɛ. Ɛma wɔn nso wɔkae nea Yehowa Nyankopɔn ne Yesu Kristo yɛ maa wɔn na ama wɔatumi agye wɔn afi bɔne ne owu mu no. Nanso sɛ́ anka wɔbɛhwɛ ɔsoro asetra kwan no, wɔn ani gye wɔn anidaso a ɛwɔ hɔ sɛ wɔbɛtra ase daa wɔ paradise asase so no mu. Wɔte sɛ Yohane Osuboni a ɔkaa ne ho asɛm sɛ “ayeforokunu no adamfo” mmom sen sɛ ɔbɛyɛ Kristo ayeforo kuw a emufo yɛ 144,000 no muni no. (Yohane 3:29) Nnipa ɔpepem yi yɛ “nguan foforo” a Yesu kaa wɔn ho asɛm no mufo. Wɔnyɛ “kuw ketewa” no mufo. Nanso, sɛnea Yesu kae no, wɔne “kuw ketewa” no mufo bom som, na wɔn nyinaa “ayɛ kuw biako.”—Yohane 10:16; Luka 12:32.
ONYANKOPƆN A YƐNE N’AHYEHYƐDE BƐBOM ASOM
31. Adanse bɛn na ɛwɔ hɔ sɛ Onyankopɔn ani nsɔ wɔn a wɔtra atoro som mu nanso wɔbɔ mmɔden sɛ wɔbɛyɛ n’ahyehyɛde no fã no?
31 Hwɛ sɛnea ɛda adi pefee sɛ, te sɛ mmere a atwam no, Yehowa Nyankopɔn wɔ ahyehyɛde a aniwa hu nnɛ! Ɔde redi dwuma mprempren de atete nnipa ama asetra wɔ ne trenee nhyehyɛe foforo no mu. Nanso, yɛrentumi nyɛ Onyankopɔn ahyehyɛde no fã, na bere koro no ara mu no, yɛayɛ atoro som fã. Onyankopɔn Asɛm se: “Mo ne wɔn a wonnye nni nntwe kɔndua koro; na twaka bɛn na trenee ne amumɔyɛ wɔ? Anaasɛ ayɔnkofa bɛn na hann ne sum wɔ? . . . Anaasɛ kyɛfa bɛn na ogyidini ne nea onnye nni wɔ?” Enti Onyankopɔn hyɛ sɛ: “Mumfi wɔn mu, na montew mo ho.”—2 Korintofo 6:14-17.
32. (a) Sɛ ‘yebefi wɔn mu’ a, dɛn na ɛsɛ sɛ yɛyɛ? (b) Sɛ yeyi yɛn anim ne ne teokrase ahyehyɛde a aniwa hu no som Onyankopɔn a, nhyira bɛn na yebenya?
32 Sɛ́ ‘yebefi wɔn mu’ no kyerɛ dɛn? Wiɛ, yɛrentumi nni saa ahyɛde no so na yɛnkɔ so nyɛ nyamesom ahyehyɛde foforo bi muni anaasɛ yɛmmoa saa ahyehyɛde no mmom nsen nea Yehowa Nyankopɔn de redi dwuma no. Enti sɛ yɛn mu bi da so wɔ nyamesom ahyehyɛde a ɛte saa mu a, ɛsɛ sɛ yɛbɔ wɔn amanneɛ sɛ yɛrefi mu. Sɛ yɛtwe yɛn ho mprempren fi wɔn a wɔsom atoro som no mu na yɛhyɛ da ne ne teokrase ahyehyɛde a aniwa hu no som Onyankopɔn a, yɛbɛka wɔn a Onyankopɔn ka eyi fa wɔn ho no ho: “Mɛtra wɔn mu, na manantew wɔn mu, na mayɛ wɔn Onyankopɔn, na wɔayɛ me ɔman.”—2 Korintofo 6:16.
[Kratafa 192 mfoni]
Nsuyiri bere no mu no, so na Onyankopɔn wɔ nea ɛboro ahehyɛde biako?
[Kratafa 196 mfoni]
YEHOWA ADANSEFO WIASE NYINAA DWUMADIBEA Tl
MPANYIMFO DWUMADIBEA AHOROW
Computer Nhyehyɛe Horow
BROOKLYN NHOMA TINTIMBEA
Rotary Nhoma Tintim
Nhomapambea
Nhoma Amanae
[Kratafa 197 mfoni]
MMEAE AFOFORO PII A WOTINTIM ƆWƐN ABAN NHOMA HOROW NO BINOM
Brazil
England
South Africa
Wallkill, New York
Canada
[Kratafa 198 mfoni]
Nnipa 253,922 a wɔkɔɔ Yehowa Adansefo nhyiam wɔ New York no binom
Polo Grounds
Yankee Stadium
[Kratafa 201 mfoni]
Bible nkyerɛkyerɛ dwumadi kɔ so wɔ Yehowa Adansefo nhyiam horow